¿Bix u yilik u testigoʼob Jéeoba le baʼaxoʼob suuk u beetaʼal ken kíimik máakoʼ?

PAX ICH

Toʼoneʼ k-seguertik le baʼaxoʼob ku kaʼansik le Biblia le ken kíimik wa máaxoʼ. Koʼox ilik jujunpʼéeliʼ:

Maʼ kʼaas u yaatal k-óol le ken kíimik juntúul máax k-yaabiltmiʼ. U disipuloʼob Jesuseʼ okʼolnajoʼob le ka kíim le máaxoʼob u yaabiltmoʼoboʼ (Juan 11:33-35, 38; Baʼaxoʼob [Hechos] 8:2; 9:39). Le oʼolaleʼ le súutukiloʼobaʼ maʼ t-ilik bey junpʼéel kʼiinbesajeʼ (Eclesiastés 3:1, 4; 7:1-4). Baʼaxeʼ k-ilik bey u súutukil utiaʼal k-tsʼáaikba tu lugar le máax ku muʼyajoʼ (Romailoʼob 12:15).
Le kimenoʼoboʼ maʼ u yojloʼob mix baʼaliʼ. Kex jeʼel tuʼuxak kajaʼanoʼoneʼ maʼatech k-táakpajal tiʼ baʼaloʼob suuk u beetaʼal ikil u creertaʼal jeʼel u yáantkoʼon le kimenoʼoboʼ wa yaan baʼax ku pʼáatal kuxaʼanil tiʼ máak ken kíimik. Le baʼaloʼobaʼ ku bin tu contra le baʼax ku kaʼansik le Bibliaoʼ (Eclesiastés 9:5, 6, 10). Toʼoneʼ maʼatech k-beetik u biix le kimenoʼoboʼ, maʼatech k-síik wa baʼax tiʼ le kimenoʼoboʼ, maʼatech k-beetik janal utiaʼal k-tsʼáaiktiʼob yóoʼ mesa, maʼatech k-kʼáatik ka u yáantoʼonoʼob mix k-beetik uláakʼ baʼaloʼob jeʼex leloʼobaʼ. Toʼoneʼ maʼatech k-táakpajal tiʼ le baʼaloʼobaʼ tumen le Bibliaoʼ ku yaʼalik: «Náachkuntabaʼex [...], xuʼuluk a machkeʼex le baʼax éekʼchajaʼanoʼ» (2 Corintoiloʼob 6:17).
Yaan u kaʼa kuxtal le kimenoʼoboʼ. Le Bibliaoʼ ku kaʼansikeʼ maʼ tun xáantaleʼ yaan u kaʼa kuxkíintaʼal le kimenoʼoboʼ yéetel yaan u kʼuchul u kʼiinil mix máak kun kíimil (Baʼaxoʼob 24:15; Apocalipsis 21:4). Le esperanzaaʼ jach tu beetaj u líikʼil u yóol le yáax cristianoʼoboʼ. Tumen k-ojel yaan u kaʼa kuxtal le kimenoʼoboʼ, maʼatech u píitmáan le bix k-eʼesik yaachajaʼan k-óoloʼ (1 Tesalonicailoʼob 4:13).
Le Bibliaoʼ ku yaʼalikeʼ maʼ unaj k-taasikba nojbaʼaliliʼ (Proverbios 11:2). Le ken kíimik wa máax k-yaabiltmeʼ maʼatech k-ilik bey u súutukil utiaʼal k-eʼesik jach yaantoʼon taakʼiniʼ (1 Juan 2:16). Le oʼolaleʼ maʼatech k-sen xuup le ken kíimik wa máax k-yaabiltmaj chéen utiaʼal k-kiʼimakkúuntik u yóol u maasil. Maʼatech k-manik xan cajaʼob jach táaj koʼojtak. Tsʼoʼoleʼ teʼ súutukoʼob beyaʼ maʼatech k-tsʼáaik nookʼoʼob especialoʼob chéen utiaʼal ka ilaʼak tumen u maasil.
Maʼatech k-obligartik u maasil u creert le baʼaxoʼob k-creertikoʼ. Tu lugar leloʼ k-chʼaʼik en cuenta le baʼax ku yaʼalik le Bibliaaʼ: «Cada juntúul tiʼ toʼoneʼ yaan u kʼubik cuenta tiʼ Dios» (Romailoʼob 14:12). Chéen baʼaleʼ wa k-ilik maʼalobeʼ k-aʼalik le baʼaxoʼob k-creertikoʼ «yéetel jeetsʼelil bey xan yéetel nojoch tsiikil» (1 Pedro 3:15).

¿Baʼax ku beetik u testigoʼob Jéeoba táanil tiʼ u mukikoʼob juntúul kimen?

Tuʼux ku beetaʼal: Wa u láakʼtsiloʼob le máax kimen u kʼáat ka tsoʼolok junpʼíit tiʼ le baʼax ku yaʼalik le Bibliaoʼ, letiʼob kun yéeyik tuʼux kun beetbil. Maʼ xaaneʼ tiʼ junpʼéel Najil Reino, tiʼ junpʼéel funeraria, tu yotoch máak, tiʼ junpʼéel crematorio wa teʼ cementeriooʼ.

Baʼax ku beetaʼal: Utiaʼal u líiʼsaʼal u yóol u láakʼtsilil le máax kíimoʼ ku tsoʼolol le baʼax ku yaʼalik le Biblia tu yoʼolal le kíimiloʼ bey xan u esperanzail u kaʼa kuxtal le máaxoʼob tsʼoʼok u kíimloʼoboʼ (Juan 11:25; Romailoʼob 5:12; 2 Pedro 3:13). Tiʼ le baʼax ku tsoʼololoʼ jeʼel u páajtal u chʼaʼchiʼitaʼal u jatsʼuts modos le máax kíimoʼ, jeʼel u páajtal u yaʼalaʼal baʼax ku kaʼansiktoʼon le bix chúukpajik u yóol tiʼ Diosoʼ (2 Samuel 1:17-27).

Jeʼel u páajtal u kʼaʼayal junpʼéel kʼaay jóoʼsaʼan teʼ Bibliaoʼ (Colosasiloʼob 3:16). Tu tsʼookeʼ ku beetaʼal junpʼéel oración utiaʼal u líiʼsaʼal u yóol le láakʼtsiloʼoboʼ (Filiposiloʼob 4:6, 7).

U kʼáataʼal taakʼin: Maʼatech k-cobrar le ken k-tsol tu táan u maasil baʼax ku yaʼalik le Bibliaoʼ, mix ken kíimik wa máax. Tsʼoʼoleʼ maʼatech k-kʼáatik taakʼin tiʼ mix junpʼéel tiʼ le muchʼtáambaloʼob k-beetkoʼ (Mateo 10:8).

Máaxoʼob jeʼel u páajtal u binoʼobeʼ: Wa tu Najil Reino ku beetaʼaleʼ tuláakal máak jeʼel u páajtal u bineʼ tak le máaxoʼob maʼ u testigoʼob Jéeobaoʼ.

U testigoʼob Jéeobaeʼ, ¿ku binoʼob wa tuʼux ku velartaʼal wa u muʼukul juntúul máax yaanal u religión?

Lelaʼ cada juntúul ken u yéey wa yaan u biniʼ. Baʼaleʼ unaj u chʼaʼik en cuenta u conciencia nuʼuktaʼan tumen le Bibliaoʼ (1 Timoteo 1:19). Chéen baʼaleʼ wa le baʼaloʼob ku beetaʼal tumen le uláakʼ religionoʼob ku bin tu contra le baʼax ku kaʼansik le Bibliaoʼ, toʼoneʼ maʼatech k-táakpajliʼ (2 Corintoiloʼob 6:14-17).