Toʼoneʼ maʼ tu xuʼulul k-bisikba yéetel le máaxoʼob okjaʼanajaʼanoʼob ichil k-religión baʼaleʼ ku pʼatik u kʼaʼaytajoʼob yéetel u muchʼkubaʼob t-éeteloʼ. U jaajileʼ hasta k-líiʼsik u yóoloʼob utiaʼal ka suunak u múul adorartoʼob Dios t-éetel.

 Wa juntúul Testigo okjaʼanajaʼan ku lúubul tiʼ nojoch kʼebaneʼ jeʼel u jóoʼsaʼal tiʼ le múuchʼuliloʼ. Baʼaleʼ táanil tiʼ u jóoʼsaʼaleʼ yaʼab baʼax ku chʼaʼabal en cuenta. Wa tsʼoʼok u suuktal u beetik baʼaloʼob kʼaastak bey xan wa maʼ tu kʼexik u tuukuleʼ, ku jóoʼsaʼal yéetel ku xuʼulul k-bisikba tu yéetel. Le Bibliaoʼ juntaatsʼ u yaʼalik: «Jóoʼseʼex le kʼasaʼan máak ichileʼexoʼ» (1 Corintios 5:13).

 ¿Kux túun wa ku jóoʼsaʼal juntúul máak baʼaleʼ u yatan yéetel u paalaleʼ láayliʼ u testigoʼob Jéeobaeʼ? Kex maʼ tu múul adorartik Dios yéetel u familia jeʼex kaʼacheʼ, u paalal yéetel u yataneʼ láayliʼ u láakʼtsiloʼobeʼ. Le bix u biskuba u yatan bey xan u paalal tu yéeteloʼ maʼ tu kʼexpajal, ku pʼáatal jeʼex suukileʼ.

 Le máaxoʼob jóoʼsaʼanoʼob tiʼ le múuchʼuliloʼ jeʼel u páajtal u seguer u binoʼob teʼ tuʼux k-muchʼikbaoʼ. Wa u kʼáatoʼob xaneʼ, jeʼel u páajtal u yáantaʼaloʼob tumen u ancianoiloʼob le múuchʼulil utiaʼal ka páajchajak u kaʼa beetkubaʼob Testigoʼobeʼ. Wa juntúul máak jóoʼsaʼan tiʼ le múuchʼulil ku yilik u náachtal tiʼ baʼax kʼaas yéetel ku yeʼesik u kʼáat kuxtal tu kaʼatéen jeʼex u yaʼalik le Bibliaoʼ, jeʼel u páajtal u kaʼa beetkuba u testigo Jéeobaeʼ.