Le donaciónoʼoboʼ ku meyaj utiaʼal u maas kaʼansaʼal u Tʼaan Dios, tsʼoʼoleʼ ku meyaj xan utiaʼal u yáantaʼal le máaxoʼob ku aktáantkoʼob junpʼéel nojoch loobiloʼ. Tuláakal leloʼ ku beetaʼal utiaʼal ka páajchajak u beetkuba máak u discípulo Jesucristo, leloʼ letiʼe baʼax jach tu jaajil k-kʼáatoʼ (Mateo 28:19, 20).

 Le donaciónoʼoboʼ jach junpuliʼ maʼatech u ayikʼalkúuntik mix máak. Le Testigoʼob ku máanoʼob u kaʼansoʼob u Tʼaan Dios joonaj joonajil bey xan le máaxoʼob ku kaʼansajoʼob teʼ múuchʼuliloʼoboʼ maʼatech u boʼotaʼaloʼob. Maʼatech xan u boʼotaʼal le máaxoʼob ku meyajoʼob teʼ sucursaloʼoboʼ mix le Cuerpo Gobernante wa le junmúuchʼ máakoʼob nuʼuktik le meyaj ku beetik le Testigoʼoboʼ.

•   Utiaʼal u beetaʼal publicaciónoʼob: Cada añoeʼ ku traducirtaʼal, ku imprimirtaʼal yéetel ku tʼoʼoxol u millonesil publicaciónoʼob tiʼ le máakoʼoboʼ, tsʼoʼoleʼ maʼatech u cobrartaʼal mix baʼal tiʼob. Le publicaciónoʼobaʼ tiaʼanoʼob teʼ sitio ich Internet jw.org yéetel teʼ aplicación JW Libraryoʼ, teʼ sitio yéetel teʼ aplicaciónoʼ maʼatech u anunciartaʼal mix baʼal yéetel maʼatech u cobrartaʼal mix baʼal tu yoʼolaloʼob.

•   Utiaʼal construcción yéetel mantenimiento: K-beetik lugaroʼob tuʼux k-muchʼikba yéetel k-tsʼáaik mantenimiento tiʼob. Yoʼolal leloʼ ku yantal jatsʼuts najoʼob utiaʼal k-muchʼikba k-adorart Dios. Tsʼoʼoleʼ ku beetaʼal xan sucursaloʼob yéetel oficinaʼob tiʼ traducción yéetel ku tsʼaʼabal xan mantenimiento tiʼob. Yaʼab tiʼ le meyajoʼobaʼ ku beetaʼal tumen voluntarioʼob, tu yoʼolal leloʼ yaʼab taakʼin ku ahorrartaʼal.

•   Utiaʼal u yáantaʼal le sukuʼunoʼob de tiempo completooʼ: Le donaciónoʼob ku tsʼaʼabaloʼ ku meyaj utiaʼal u reembolsartaʼal le xupoʼob ku yantal tiʼ le superintendenteʼob tiʼ circuitooʼ, le ku meyajoʼob teʼ central mundialoʼ, le ku meyajoʼob teʼ sucursaloʼoboʼ bey xan le ku meyajoʼob teʼ oficinaʼob tiʼ traducciónoʼ.

•   Utiaʼal u kaʼansaʼal u Tʼaan Dios: Mix juntúul u testigo Jéeoba ku boʼotaʼal ikil u jóokʼol kaʼansaj joonaj joonajil (2 Corintios 2:17). Chéen baʼaleʼ jeʼex u beetaʼal teʼ yáax siglo kaʼachoʼ wa yaan máax ku capacitartaʼal yéetel táan u meyaj teʼ servicio de tiempo completooʼ ku tsʼaʼabal tuʼux u kajtal, tsʼoʼoleʼ ku yáantaʼal yéetel jujunpʼéel baʼaloʼob kʼaʼabéettiʼ (Filipenses 4:16, 17;1 Timoteo 5:17, 18).

•   Utiaʼal kaʼansaj: Yéetel le donaciónoʼob ku tsʼaʼabaloʼ ku beetaʼal le asambleaʼoboʼ, ku beetaʼal xan le audioʼob yéetel le videoʼoboʼ. Tsʼoʼoleʼ ku tsʼaʼabal xook yéetel cursoʼob utiaʼal u maas maʼalobtal bix u kaʼansaj le ancianoʼob bey xan le sukuʼunoʼob yanoʼob de tiempo completooʼ.

•   Utiaʼal u tsʼaʼabal áantaj: Kéen úuchuk junpʼéel nojoch loobeʼ ku meyaj le donaciónoʼob utiaʼal u yáantaʼal «le sukuʼunoʼob yéetel le kiikoʼob teʼ múuchʼuliloʼ» yéetel yaan horaeʼ tak le máaxoʼob maʼ Testigoʼoboʼ. Ichil le áantajaʼ táakaʼan u tsʼaʼabal jaʼ utiaʼal u yukʼ máak, janal bey xan junpʼéel lugar seguro utiaʼal u yantal máakiʼ (Gálatas 6:10).