U testigoʼon Jéeobaeʼ k-beetik baʼax kʼaʼabéet utiaʼal u yantal yaabilaj ichil le familiaʼoboʼ, maʼ chéen ichil le k-tiaʼaloʼ baʼaxeʼ tak ichil u familia k-vecinoʼob. K-respetartik le familiaoʼ tumen k-ojel Dios beet u yantal (Génesis 2:​21-​24; Efesoiloʼob 3:​14, 15). Ichil le Bibliaoʼ Dioseʼ ku kaʼansik baʼaloʼob tsʼoʼok u yáantik máakoʼob tiʼ tuláakal yóokʼol kaab utiaʼal ka yanak kiʼimak óolal tu yotochoʼob bey xan utiaʼal maʼ u pʼatik u núupoʼob.

 Yáaxeʼ k-tsʼáaik k-óol k-beet baʼax ku yaʼalik le Bibliaoʼ, tumen leloʼ ku yáantkoʼon k-tratart maʼalob k-núup bey xan k-paalal (Proverbios 31:10-​31; Efesoiloʼob 5:22–​6:4; 1 Timoteo 5:8). U jaajileʼ le maʼalob tsolnuʼukoʼob yaan teʼ Bibliaoʼ jeʼel u yáantaj utiaʼal u biskuba maʼalob tuláakal le máaxoʼob yanoʼob ichil junpʼéel familia kex maʼ junpʼéeliliʼ u religionoʼobiʼ (1 Pedro 3:​1, 2). Koʼox ilik baʼax tu yaʼalaj jujuntúul máakoʼob le ka tsʼoʼok u beetkuba Testigo u núupoʼoboʼ:

•   «Le yáax seis años tsʼoʼokok k-beeloʼ puro baʼateʼel k-beetik, yéetel sáamsamal tsʼíikilnajaʼanoʼon. Pero ka tu beetuba Testigo Iveteeʼ káaj u maas eʼesikten yaabilaj yéetel paciencia. Le jatsʼuts modos anchajtiʼoʼ tu salvartaj k-familiaoʼ» (Clauir, kajaʼan Brasil).

•   «Jach kʼuuxilnajen ka joʼopʼ u xook in wíicham Chansa yéetel u testigoʼob Jéeoba, tumen kin tuklik kaʼacheʼ le Testigoʼoboʼ ku jubikoʼob le familiaʼoboʼ. Pero ka máan kʼiineʼ tin tsʼáaj cuentaeʼ le Bibliaoʼ ku yáantkoʼon utiaʼal k-bisikba maʼalob» (Agness, kajaʼan Zambia).

 Tsʼoʼoleʼ ken k-kʼaʼaytajnakoʼoneʼ k-kaʼansik tiʼ k-vecinoʼob bix jeʼel u yáantaj le Biblia utiaʼal le jejeláas baʼaloʼobaʼ:

•   K-yéeyik maʼalob máax yéetel kun tsʼoʼokol k-beel

•   Ka xiʼiktoʼon utsil le yáax año tsʼoʼokok k-beeloʼ

•   K-bisikba maʼalob yéetel k-suegroʼob

•   K-kanáantik k-taakʼin

•   U xuʼulul k-baʼateltʼaan

•   K-kanik perdonar

•   K-educartik k-paalal

 U jaajileʼ yaan horaeʼ ku yantal. Por ejemploeʼ tu jaʼabil 1998, le empresa de investigación ku kʼaabaʼtik Sofresoʼ tu yaʼaleʼ junpʼéel tiʼ cada 20 familiaʼob tuʼux tu beetuba Testigo chéen le íichamtsil wa chéen le atantsiloʼ anchaj problema tiʼob.

 Jesuseʼ tu yaʼaleʼ le máaxoʼob beetik le baʼax tu kaʼansoʼ yaan u kʼuchul u kʼiinil u yantaltiʼob kʼuuxilil yéetel u láakʼtsiloʼob (Mateo 10:32-​36). Le historiador Will Durantoʼ tu tsʼíibteʼ tu kʼiiniloʼob le Imperio romanooʼ «ku yaʼalaʼaleʼ letiʼe cristianismo jubik le familiaoʼoboʼ». a Bejlaʼeʼ letiʼe baʼax ku yaʼalaʼal xan yoʼolal u testigoʼob Jéeobaoʼ. Baʼaleʼ ¿jach wa tu jaajil tiʼ u testigoʼob Jéeoba yaan u culpail?

 Le ka taʼak u pool u testigoʼob Jéeoba táan bin u jubikoʼob le familiaʼoboʼ, le Tribunal Europeo de Derechos Humanosoʼ tu yaʼaleʼ u suukileʼ letiʼe láakʼtsiloʼob maʼ Testigoʼob beetik u yantal baʼateliloʼ, tumen maʼ tu yóotik u «naʼatoʼob yéetel u respetartoʼob le derecho yaan tiʼ máak utiaʼal u yéeyik u religionoʼ». b Le Tribunaloʼ tu yaʼalaj xan: «Bey u yúuchul tiʼ tuláakal le familiaʼob maʼ junpʼéeliliʼ religión yaantiʼoboʼ; maʼ chéen tiʼ u testigoʼob Jéeoba ku yúuchliʼ. Baʼaleʼ tak ichil le familiaʼob tuʼux yaan máakoʼob maʼ u kʼáat u respetartoʼob le derecho yaan tiʼ máak utiaʼal u yéeyik u religionoʼ, u testigoʼob Jéeobaeʼ ku chʼaʼikoʼob en cuenta le baʼax ku yaʼalik le Bibliaaʼ: «Maʼ a boʼotkeʼex kʼaas yéetel kʼaas tiʼ mix máak. [...] Wa ku béeytaleʼ, tak tuʼux ku páajtal a beetkeʼexeʼ, beeteʼex baʼax kʼaʼabéet utiaʼal ka yanakteʼex jeetsʼelil yéetel tuláakal máak» (Romailoʼob 12:17, 18).

 U testigoʼon Jéeobaeʼ k-beetik baʼax ku yaʼalik le Bibliaoʼ: máakeʼ «jeʼel u páajtal u tsʼoʼokol u beel[eʼ] [...] baʼaleʼ chéen yéetel juntúul máax ku meyajtik Yuumtsil», u kʼáat u yaʼaleʼ chéen yéetel u yéet religionil (1 Corintoiloʼob 7:​39). Jach ku bin utsil tiʼ le máaxoʼob beetik le baʼax ku yaʼalik Diosaʼ. Por ejemploeʼ tu jaʼabil 2010, junpʼéel revista ku tʼaan yoʼolal le familiaoʼ tu yaʼaleʼ «le máaxoʼob tsʼokaʼan u beeloʼob junpʼéeliliʼ u religionoʼob, junpʼéeliliʼ bix kuxlikoʼob yéetel junpʼéeliʼ baʼax ku creertikoʼoboʼ» u suukileʼ maas kiʼimak u yóoloʼob (Journal of Marriage and Family). c

 Jeʼel bixakeʼ u testigoʼob Jéeobaeʼ maʼatech u yaʼalikoʼob tiʼ mix máak ka u pʼat u núup chéen tumen maʼ Testigoiʼ. Le Bibliaoʼ ku yaʼalik: «Wa u yatan juntúul sukuʼun maʼatech u meyajtik Dios, baʼaleʼ uts tu tʼaan kajlik yéetel le sukuʼunoʼ, le sukuʼunoʼ maʼ unaj u pʼatkiʼ; tsʼoʼoleʼ wa u yíicham juntúul kiik maʼatech u meyajtik Dios, baʼaleʼ uts tu tʼaan kajlik yéetel le kiikoʼ, le kiikoʼ maʼ unaj u pʼatik u yíichamiʼ» (1 Corintoiloʼob 7:​12, 13). Toʼon xaneʼ k-beetik le baʼax ku yaʼalik le Bibliaaʼ.