Baʼax suuk u yaʼalaʼal: U testigoʼob Jéeobaeʼ maʼatech u binoʼob yiknal doctor tumen maʼatech u creerkoʼob wa jeʼel u tsʼaʼakaloʼobeʼ.

 U jaajil: U testigoʼob Jéeobaeʼ k-ilik k-kaxtik maʼalob doctoroʼob. Le kéen kʼojaʼanchajak wa máax tiʼ k-familia wa kéen kʼaʼabéetchajak u operartaʼaleʼ k-ilik k-kaxtik doctoroʼob úuch joʼopʼok u operaroʼob yéetel maʼatech u usarkoʼob kʼiʼikʼ. Yoʼolal lelaʼ jach k-kiʼimak óol tumen bejlaʼeʼ ku usartaʼal uláakʼ tratamientoʼob x-maʼ kʼiʼikʼil. Bejlaʼeʼ le tratamientoʼobaʼ ku meyaj tiʼ uláakʼ luʼumiloʼob utiaʼal u tsʼaʼakal máakoʼob maʼ Testigoʼobiʼ. Teʼ kʼiinoʼobaʼ tiʼ jeʼel máaxakeʼ jeʼel u tsʼaʼabal le tratamientoʼobaʼ, lelaʼ jach maʼalob tumen maʼ peligroso u rechazartik u wíinklil máakiʼ wa ka páakʼaktiʼ kʼojaʼaniloʼob ku taal tiʼ le kʼiʼikʼoʼ.

 Baʼax suuk u yaʼalaʼal: U testigoʼob Jéeobaeʼ ku orarkoʼob bin máak utiaʼal ka tsʼaʼakak.

 U jaajil: U testigoʼob Jéeobaeʼ mix juntéen u orartoʼob máak utiaʼal u tsʼakikoʼob.

 Baʼax suuk u yaʼalaʼal: Le tratamientoʼob ku tsʼaʼabal x-maʼ kʼiʼikʼiloʼ jach táaj koʼojtak.

 U jaajil: Kex jach koʼoj le tratamientoʼobaʼ yaʼab utsil ku taasik wa ku kʼamik máak. a

 Baʼax suuk u yaʼalaʼal: Cada añoeʼ yaʼab Testigoʼob bey xan u mejen paalaloʼobeʼ ku kíimloʼob tumen maʼatech u kʼamkoʼob kʼiʼikʼ.

 U jaajil: Minaʼan pruebas eʼesik wa jaaj le baʼax ku yaʼalaʼalaʼ. Yaan kʼiineʼ le doctoroʼoboʼ jach peligroso le operación ken u beetoʼoboʼ, jeʼex u operarkoʼob u puksiʼikʼal máak wa u beetkoʼob junpʼéel transplante tiʼ u órganos máak, kex beyoʼ maʼatech u usarkoʼob kʼiʼikʼ. b Le mejen paalaloʼob yéetel uláakʼ máaxoʼob maʼatech u aceptarkoʼob ka tsʼaʼabaktiʼob kʼiʼikʼoʼ maas séebaʼan u recuperakubaʼob ke le máaxoʼob ku aceptarkoʼoboʼ. c U jaajileʼ mix máak jeʼel u béeytal u yaʼalik wa yaan u kíimil wa maʼ u kʼamik kʼiʼikeʼ, bey xan wa yaan u kuxtal wa ku kʼamkeʼ.

 Tumen bey u yaʼalik le Biblia teʼ Antiguo yéetel teʼ Nuevo Testamentooʼ; ku yaʼalikeʼ maʼ u meyajtoʼon le kʼiʼikʼoʼ yéetel ka k-náachkuntba tiʼ (Génesis 9:4; Levítico 17:10; Deuteronomio 12:23; Hechos 15:28, 29). Tsʼoʼoleʼ Dioseʼ ku yaʼalikeʼ teʼ kʼiʼikʼoʼ tiaʼan le kuxtaloʼ (Levítico 17:14). Le beetik toʼon u testigoʼon Jéeobaeʼ maʼatech k-aceptartik ka tsʼaʼabaktoʼon kʼiʼikʼ tumen k-respetartik baʼax ku yaʼalik Dios, le máax tsʼaamiltoʼon le kuxtaloʼ.

 Úuchjeakileʼ yaʼab doctoroʼobeʼ ku tuklikoʼobeʼ u operartaʼal máak x-maʼ kʼiʼikʼileʼ bey ka u kíimsubaeʼ, chéen baʼaleʼ le tuukul jeʼeloʼ tsʼoʼok u kʼexpajal. Tumen jeʼex tu añoil 2004, jóoʼsaʼab junpʼéel revista ku tʼaan tiʼ bix u tsʼaʼakal máak, ku yaʼalik: «Yaʼab tiʼ le tratamientoʼob ku meyaj utiaʼal u tsʼaʼakal u testigoʼob Jéeobaoʼ yaan u káajal u usartaʼal utiaʼal jeʼel máaxak u kʼáateʼ». d Tu añoil 2010 xaneʼ le libro Medicina transfusional tu yaʼalaj: «Tu yoʼolal le tratamientoʼobaʼ maʼ kun xáantaleʼ yaan u suuktal u yilaʼal u operartaʼal máak x-maʼ kʼiʼikʼil».

 Tiʼ tuláakal yóokʼol kaabeʼ yaʼab doctoroʼobeʼ táan u meyajtiʼob tratamientoʼob tuʼux maʼ tu perdertaʼal yaʼab kʼiʼikʼ, le oʼolal ku yilkoʼob maʼ kʼaʼabéet le transfusionoʼoboʼ. Tsʼoʼoleʼ le tratamientoʼobaʼ tak teʼ luʼumiloʼob tuʼux jach yaan óotsilil yanoʼ, le oʼolal yaʼab máakoʼob kex maʼ Testigoʼobeʼ u kʼáatoʼob ka operartaʼakoʼob x-maʼ kʼiʼikʼil.