¿Jeʼel wa u páajtal u xuʼulul u beetkuba u testigo Jéeoba wa máaxeʼ?

PAX ICH

Jeʼeleʼ. Kaʼapʼéel bix jeʼel u páajtal u beetik máakeʼ:

Letiʼ ka u kʼáate. Utiaʼal u xuʼulul u beetkuba Testigoeʼ letiʼ kʼaʼabéet u yaʼalik wa u tsʼíibtik junpʼéel carta tuʼux ku yaʼalik maʼ u kʼáat u seguer u beetkuba u testigo Jéeobaiʼ.
Yoʼolal baʼax ku beetik. Juntúul máakeʼ yoʼolal baʼax ku beetkeʼ jeʼel u yeʼesik maʼ u kʼáat táakpajal ichil u testigoʼob Jéeobaeʼ (1 Pedro 5:9). Maʼ xaaneʼ ku káajal u muchʼkuba yéetel uláakʼ religión yéetel ku yeʼesik u káat pʼáatliʼ (1 Juan 2:19).

¿Kux túun wa chéen xuʼul u jóokʼol kʼaʼaytaj yéetel u muchʼkuba yéetel le Testigoʼoboʼ? ¿Ku xuʼulul wa u yilaʼal bey u testigoʼob Jéeobaeʼ?

Maʼatech. U jaajileʼ juntúul máak ku yaʼalik maʼ u kʼáat ka seguernak u kʼaj óoltaʼal bey u testigo Jéeobaeʼ maʼ igual tiʼ juntúul máak maʼ jach yaan u fejiʼ. Yaan horaeʼ le máaxoʼob ku xuʼulul u tsʼáaik u yóol u adorartoʼob Jéeoba junpʼéel tiempoeʼ, chéen lubaʼan u yóoloʼob, maʼ u káat u yaʼal wa junpuliʼ taak u xúumpʼattikoʼob u religionoʼobiʼ. Le oʼolaleʼ k-líiʼsik u yóoloʼob yéetel k-áantkoʼob, tsʼoʼoleʼ maʼ tu xuʼulul k-bisikba tu yéeteloʼob (1 Tesalonicailoʼob 5:14; Judas 22). Wa le máax lubaʼan u yóol u kʼáat ka áantaʼakoʼ, letiʼe ancianoʼob tiʼ le múuchʼulil ku yilkoʼob u yáax tsʼáaikoʼob le áantaj kʼaʼabéettiʼoʼ (Galaciailoʼob 6:1; 1 Pedro 5:1-3).

Chéen baʼaleʼ le ancianoʼoboʼ maʼatech u obligartikoʼob mix máak utiaʼal u seguer u beetkuba u testigo Jéeoba. Cada juntúul unaj u yéeyik u religión (Josué 24:15). Máaxoʼob adorartik Dioseʼ tu puksiʼikʼaloʼob unaj u síijil u beetkoʼob (Salmo 110:3; Mateo 22:37).