Maʼ, maʼ sionistaʼoniʼ. Toʼon u testigoʼon Jéeobaeʼ k-creertik baʼax ku yaʼalik le Bibliaoʼ. Kex yaan máax creertik tsʼíibtaʼan teʼ Biblia yaan u kaʼa múul kajtal tuláakal le judíoʼob teʼ Palestinaoʼ, toʼoneʼ maʼ t-creertik leloʼ. Kex ka úuchuk wa kex maʼeʼ, toʼoneʼ maʼ t-creertik wa profetizartaʼan teʼ Bibliaoʼ. Le Kiliʼich Tsʼíiboʼoboʼ maʼ tu yaʼalik wa maas maʼalob junpʼéel u gobiernoil wíinik mix tu yaʼalik wa maas maʼalob junpʼéel chʼiʼibal tiʼ u maasil. Le revista U Pʼíich Tulumil Kanan k-jóoʼsikoʼ juntaatsʼ úuchik u yaʼalikeʼ «le Bibliaoʼ minaʼan baʼax u yil yéetel le sionistaʼoboʼ».

 Le Encyclopædia Britannicaoʼ ku yaʼalikeʼ le sionismooʼ letiʼe «u múul meyaj le judíoʼob utiaʼal u yantal junpʼéel túumben nación tu luʼumil Palestinaoʼ». Le sionismooʼ yaan baʼax u yil yéetel religión bey xan yéetel política. U testigoʼob Jéeobaeʼ maʼ tu kaʼanskoʼob leloʼ yéetel maʼ tu yoksikubaʼob tiʼ política.

 U testigoʼob Jéeobaeʼ junpʼéel religión minaʼan baʼax u yil yéetel política mix yéetel le sionismooʼ. Ojéelaʼan maʼ t-oksikba tiʼ baʼaloʼob yaan yil yéetel política, le oʼolal tsʼoʼok k-sen chʼaʼpachtaʼal tiʼ jujunpʼéel luʼumoʼob. Toʼoneʼ k-ojel chéen u Reino Dios yaan teʼ kaʼan kun páajtal u taasik jeetsʼelil utiaʼal mantatsʼ way Luʼumoʼ. Mix junpʼéel u gobiernoil wíinik kun páajtal u beetik leloʼ.

 Tuláakal u testigoʼob Jéeobaeʼ kex jeʼel tuʼuxak kajaʼanoʼoneʼ suuk k-eʼesik tsiikil tiʼ le leyoʼob ku tsʼaʼabal tumen le gobiernoʼoboʼ. Maʼatech k-líikʼil tu contra le autoridadoʼoboʼ mix tech k-bin baʼateʼel tu yéeteloʼob.