Artur, juntúul superintendente tiʼ circuitoeʼ, le táan u xíimbaltik junpʼéel congregación tu luʼumil Armeniaeʼ, tu yojéelteʼ le sukuʼunoʼoboʼ maʼ káajak u predicaroʼob yéetel le carritoʼoboʼ. Utiaʼal u líiʼsik u yóoloʼobeʼ, Artur yéetel u yatan bey xan uláakʼ sukuʼun ku kʼaabaʼtik Yiraíreʼ binoʼob predicar tiʼ junpʼéel chan kaaj yéetel tu tsʼáajoʼob le carrito tuʼux jach yaʼab u máan le máakoʼoboʼ.

 Le máakoʼob ku máanoʼob teʼeloʼ tu séebaʼanil káaj u náatsʼal u chʼaʼob le publicaciónoʼob teʼ carritooʼ. Chéen baʼaleʼ lelaʼ tu beetaj xan u kʼuuxil jujuntúul máakoʼob. Kaʼatúul sacerdoteʼobeʼ náatsʼoʼob xaniʼ, pero juntúuleʼ tu lamaj junpuul kóochakʼ tiʼ le carritooʼ, ka tsʼoʼokeʼ tu xíiklajtaj Artur, hasta náach tuʼux bin pektal u lentes. Kex Artur, Ana yéetel Yiraír tu tratartoʼob u calmarkoʼob le sacerdoteʼoboʼ, letiʼobeʼ deporsi pʼujaʼanoʼob. Seguernaj u kokoʼchaʼatkoʼob le carritooʼ le oʼolal le publicaciónoʼoboʼ pʼáatoʼob jáayunjáayoʼob. Letiʼobeʼ tu poʼopochʼoʼob yéetel tu amenazartoʼob le sukuʼunoʼoboʼ, ka tsʼoʼokeʼ ka chéen binoʼob.

 Artur, Ana yéetel Yiraíre’ bin u demandartoʼob le sacerdoteʼob tu yiknal le policíaʼoboʼ. Letiʼobeʼ tu yaʼaloʼob le baʼax úuchoʼ, ka tsʼoʼokeʼ ka jáan predicarnajoʼob tiʼ jujuntúul policíaʼob bey xan tiʼ uláakʼ máakoʼob ku meyajoʼob teʼeloʼ. Ka tsʼoʼokeʼ bisaʼaboʼob tu táan u nojchil le policíaʼoboʼ tumen letiʼ xaneʼ taak u yojéeltik jach bix úuchik tuláakal. Letiʼeʼ jaʼakʼ u yóol ka tu yojéeltaj Artureʼ, kex juntúul máak nojoch u wíinklileʼ, maʼ tu sutaj u jeel le úuchik u laʼajloʼ. Le oʼolal u nojchil le policíaʼoboʼ taakchaj u yojéeltik baʼax ku creertik u testigoʼob Jéeoba. Ka máan cuatro horas táan u tsikbaloʼobeʼ, u nojchil le policíaʼoboʼ tu yaʼalaj: «Jach tun maʼalob baʼax ku kaʼansaʼalteʼex. Maʼ xaan ka animarnaken in muchʼinba ta wéeteleʼexiʼ».

 Tuláakʼ kʼiineʼ Artureʼ bin predicar yéetel le carritooʼ ka náatsʼ juntúul máak felicitartik tumen maʼ kʼuuxilnaj yéetel maʼ baʼatelnaj yéetel le sacerdoteʼoboʼ. Leloʼ jach tu pʼataj kʼaasil le sacerdoteʼoboʼ le oʼolal xuʼul u confiartiʼob.

 Tu áakʼabileʼ u nojchil le policíaʼoboʼ tu yaʼalaj tiʼ Artur ka xiʼik tsikbal tu yéetel, chéen baʼaleʼ utiaʼal u núukaʼal u preguntaʼob yéetel le Bibliaoʼ. Teʼ súutuk jeʼeloʼ tʼaʼan xan kaʼatúul policíaʼob utiaʼal ka u yuʼuboʼob le tsikbaloʼ.

 Tuláakʼ kʼiineʼ Artureʼ bin u xíimbalt u nojchil le policíaʼob utiaʼal u yeʼesiktiʼ le videoʼob yaan teʼ sitiooʼ. Le máakoʼ tu tʼanaj xan uláakʼ kaʼatúul policíaʼob utiaʼal ka u chaʼantoʼob le videoʼoboʼ.

 Le baʼax tu beetaj le sacerdoteʼoboʼ tu tsʼáaj tuʼux u tsikbaltaʼal u Tʼaan Dios tiʼ le policíaʼoboʼ. Tsʼoʼoleʼ béeychaj u yilkoʼobeʼ maʼ kʼasaʼan u testigoʼob Jéeobaiʼ.