Rachel, kajaʼan tu luʼumil República Dominicanaeʼ, ku yaʼalik: «Síijen ichil junpʼéel familia ku meyajtik Jéeoba, chéen baʼaleʼ le yaanten siete añosoʼ in papáeʼ xuʼul u meyajtik Jéeoba, jach kʼaschaj u modos yéetel jach tu pʼektaj le Testigoʼoboʼ. Yoʼolal lelaʼ jach difícilchajten in meyajtik Jéeoba. Yaan kʼiineʼ utiaʼal u beetik u xuʼulul in meyajtik Jéeobaeʼ ku yaʼalik u tsʼáaikten yaʼab baʼaloʼob, por ejemplo, junpʼéel celular, u bisken xíimbal Disneyland wa hasta u tsʼáaikten junpʼéel tarjeta de crédito. Yaʼab u téeneleʼ tu jaʼajaʼtsʼen tumen ku tuklik kaʼacheʼ wa ka pʼáatak maʼ u béeytal in tʼaan yéetel in xíimbaleʼ jeʼel u xuʼulul in meyajtik Jéeobaeʼ. Pero maʼ béeychaj le baʼax ku tuklikoʼ tumen teneʼ jach in chʼaʼtukultmaj maʼ in fallartik mix junpʼéel reunión.

 In papáeʼ tu yilaj maʼ u yojéeltik in maama wa ku jatsʼken. Tu yaʼalajteneʼ wa kin waʼaliktiʼ in maama le baʼax ku beetiktenoʼ yaan xan u loobiltik óotsil in maama. Tu yaʼalaj xan tiʼeʼ táan u kaʼansikten karate le oʼolal láaj morado in wíinklil.

 «Jach paalen kaʼachi, tsʼoʼoleʼ jach saajken tiʼ in papá le oʼolal maʼ béeychaj in tsikbaltik tiʼ in maama le baʼax ku yúuchultenoʼ. Le oʼolal tin chʼaʼtuklaj in tsikbaltik tiʼ Jéeoba. Kin bin xíimbal teʼ nukuch kʼaaxoʼob yaan paachil tiʼ in wotoch yaan tu kaajil Maryland (Estados Unidos). Teʼeloʼ yaan junkúul nuxiʼ cheʼiʼ, kin naʼakliʼ tsʼoʼoleʼ kin kutal tiʼ junpʼéel u kʼaboʼob, teʼ túunoʼ kin orar tiʼ Jéeoba. Kin tsikbaltiktiʼ jach bix in wuʼuykinba bey xan le baʼaxoʼob kéen in beet tu yoʼolal le kéen nojochchajkenoʼ..., bueno wa letiʼ ku tsʼáaikten u páajtalil u seguer in kuxtal. Tin waʼalaj xan tiʼ tuláakal le baʼaloʼob ken in beet teʼ túumben luʼumoʼ, yaan u yantal kiʼimak óolal ichil in familia, mix baʼal kun sajakkúuntken yéetel mix baʼal ken in muʼyajteʼ, yaan in kuxtal ich jeetsʼelil.

 Kéen u jatsʼen in papá wa ken u beet uláakʼ baʼal utiaʼal u náachkuntken tiʼ Dioseʼ kin wuʼuyik bix Jéeobaeʼ ku tsʼáaikten muukʼ yéetel ku líiʼsik in wóol. Jach tu yáanten utiaʼal maʼ u lúubul in wóol yéetel u chúukpajal in wóol tiʼ.

 Okjaʼanajen le yaanten diez añosoʼ, ka máan dos añoseʼ káaj in beetik in precursorail. In papáeʼ maʼ u yojel kaʼachiʼ, le oʼolal ka tu yojéelteʼ jach pʼuʼuji tu loxaj in kamaʼacheʼ ka tu láaj péeksaj u baakeloʼob.

 Yaan máaxoʼob aʼalikteneʼ maas maʼalob maʼ in beetik in precursorail tumen jach paalen yéetel saajkoʼob maʼ in tsʼoʼokbesik le nojoch meyajoʼ. Ka máan kʼiineʼ tin wileʼ yaʼab táankelmoʼob teʼ múuchʼuliloʼ jach maʼ u tsʼaamaj u yóoloʼob u meyajtoʼob Jéeobaiʼ, baʼaxeʼ chéen táan u náaysik u yóoloʼob tiʼ fiestaʼob. Yaan kʼiineʼ jach kin tsʼíiboltik in beetik xan beyoʼ, kin tuklik kaʼacheʼ wa ka xuʼuluk in beetik in precursoraileʼ jeʼel in divertirkinbaeʼ. Pero cada ken in wuʼuyinba beyoʼ kin tsikbaltik tiʼ Jéeoba ich oración.

 Le yaanten 15 añosoʼ junpʼéel empresaeʼ tu tʼanen utiaʼal u kʼáatikten wa jeʼel in wóotik meyaj bey modeloil tu kaajil Milán, Italiaeʼ, tsʼoʼoleʼ jach maʼalob kin boʼotbil kaʼachiʼ. Jach kiʼimakchaj in wóol le ka aʼalaʼabten jeʼel u béeytal in beetik in modeloileʼ tumen yaan in jóokʼol tiʼ revistaʼob yéetel yaan in búukintik nookʼoʼob koʼojtak u tojol. Tsʼoʼok tres años káajak in beetik in precursorail, le oʼolal tin tuklaj: ‹Wa kin kʼamik le meyajaʼ jach jeʼel u yáantken yéetel in gastoseʼ yéetel jeʼel u páajtal u seguer in beetik precursoraileʼ›. Tsʼoʼoleʼ yaan u béeytal xan in wáantik in maama tumen tsʼokaʼaniliʼ u pʼatkoʼon in papáeʼ.

 Orarnajen tiʼ Jéeoba yéetel tin tsikbaltaj xan tiʼ in maama le baʼax ku yúuchloʼ, letiʼeʼ tsʼoʼok u máan yaʼab años joʼopʼok u beetik u precursorail, tʼaanajen xan yéetel juntúul anciano jach kin confiar tiʼ. Tsʼoʼoleʼ jeʼex suukileʼ binen ka orar tu kʼab le nuxiʼ cheʼoʼ. Jéeobaeʼ tu núukaj in oración yéetel le teksto tu xokajten le ancianooʼ, Eclesiastés 5:4, ku yaʼalik: ‹Le kéen a prometert wa baʼax tiʼ Dioseʼ unaj a beetik tu séebaʼanil›. Teneʼ in prometermaj tiʼ Jéeobaeʼ yaan in meyajtik tuláakal u kʼiiniloʼob in kuxtal. Pero wa kin kʼamik le meyajaʼ jeʼel u beetik in náachtal tiʼ Dioseʼ, le oʼolal tin waʼalaj maʼ ken in kʼameʼ.

 Beoraeʼ jach kiʼimak in wóol, yaaske maʼ kíimeniʼ tsʼoʼok 27 años joʼopʼok in beetik in precursorail, in wíicham Jasereʼ anciano yéetel in hijo Connoreʼ 9 años yaantiʼ yéetel publicador maʼ okjaʼanajaʼaniʼ.

 Yaʼab u téenel kin kʼaʼajsik le bix in orar tiʼ Jéeoba tu kʼab le nuxiʼ cheʼ yaan tu paachil in wotochoʼ. Kin sen kʼáatiktiʼ ka u yáanten yéetel mantatsʼ tu beetaj, jach tu líiʼsaj in wóol, tu tsʼáajten u muukʼil in aguantartik le baʼaxoʼob úuchtenoʼ yéetel mantatsʼ tu nuʼukten. Jéeobaeʼ tsʼoʼok u kanáantken jeʼex u beetik juntúul taatatsil jach yaan u yaabilajeʼ. In meyajtik Jéeobaeʼ letiʼe baʼax maʼalob tsʼoʼok in beetkoʼ, junpuliʼ maʼ tin arrepentir».