Tsʼaʼantiʼob kaʼach junpʼéel triángulo púrpura
Maudeʼ, juntúul kiik u testigo Jéeoba kajaʼan Francia. Letiʼeʼ ku meyaj tiʼ junpʼéel escuela tuʼux ku kanáantik le mejen paalaloʼob yaantiʼob wa baʼax discapacidadil ku xookoʼob teʼeloʼ. Maʼ sen úucheʼ le maestrooʼ táan kaʼach u tʼaan yoʼolal le Holocaustooʼ bey xan yoʼolal le campos de concentración naziʼoboʼ. Tu yaʼaleʼ le máaxoʼob kʼaʼaloʼoboʼ tu uniformeʼobeʼ chuʼuytiʼob junxéetʼ nookʼ, u color yéetel u formaileʼ ku yeʼesik baʼaxten kʼalaʼanoʼob.
Le ka tʼaanaj yoʼolal le triángulo púrpuraoʼ le maestrooʼ tu yaʼalaj: «Mi tiʼ le homosexualoʼob ku tsʼaʼabal kaʼachoʼ». Ka tsʼoʼok le xookoʼ Maudeʼ bin tʼaan yéetel le maestrooʼ ka tu tsolajtiʼeʼ le naziʼoboʼ tu tsʼáajoʼob le triángulo púrpura tiʼ u testigoʼob Jéeobaoʼ. a Tu yaʼalaj tiʼ le maestrooʼ jeʼel u páajtal u bisiktiʼ u maasil información ku tʼaan tiʼ leloʼ. Le maestrooʼ tu yóotaj, hasta tu yaʼalaj tiʼ Maud wa jeʼel u tsolik tu táan le paalaloʼob ku xookoʼoboʼ.
Tuláakʼ kʼiineʼ juntúul maestraeʼ láayliʼ táan kaʼach u kaʼansaj yoʼolal leloʼ. Letiʼeʼ tu yeʼesaj junpʼéel dibujo utiaʼal u tsolik máakalmáak u coloriloʼob le nookʼ chuʼuy tu uniforme le máaxoʼob kʼaʼaloʼoboʼ. Teʼ dibujooʼ jach claro u yilaʼaleʼ le triángulo púrpuraoʼ tiʼ u testigoʼob Jéeoba tsʼaʼabi. Maudeʼ tu yaʼalaj xan tiʼ le maestraoʼ jeʼel u bisiktiʼ u maasil información ku tʼaan tiʼ le jeʼeloʼ. Le maestraoʼ tu yóotaj, ka tu yaʼaleʼ Maud kun tsolik tu táan le paalaloʼob ku xookoʼoboʼ.
Maudeʼ táan u yeʼesik le publicaciónoʼob meyajnajtiʼoʼ
Utiaʼal le yáax presentación tu beetoʼ Maudeʼ tu tsʼáajeʼ 15 minutos kun xáantal le baʼax ken u tsoloʼ. Chéen baʼaleʼ tu yoraileʼ le maestrooʼ tu yaʼalajtiʼ: «Yaantech junpʼéel hora utiaʼal a tsolik le baʼax ta preparartoʼ». Utiaʼal u káajbaleʼ Maudeʼ tu tsʼáaj junpʼéel video ku yeʼesik tuláakal le baʼaxoʼob beetaʼab u muʼyajtik u testigoʼob Jéeoba tumen le naziʼoboʼ. Tu yaʼaleʼ 800 tiʼ u paalal le Testigoʼoboʼ náachkuntaʼaboʼob tiʼ u taataʼob. Maud túuneʼ tu jeʼelsaj le videooʼ ka tu xokaj u experiencia óoxtúul tiʼ le mejen paalaloʼoboʼ. Utiaʼal u tsʼoʼokoleʼ Maudeʼ tu xokaj le carta tu tsʼíibtaj Gerhard Steinacher tu añoil 1940. Letiʼeʼ Austria u taal, 19 años yaan kaʼach tiʼ yéetel u testigo Jéeoba. Le cartaoʼ tu tsʼíibtaj utiaʼal u despedirkuba tiʼ u taataʼob antes u kíimsaʼal tumen le naziʼoboʼ. b
Utiaʼal le uláakʼ presentación tu máansoʼ Maudeʼ óoliʼ láayliʼ bey tu beetiloʼ. Yoʼolal le baʼax tu beetaj Maudoʼ bejlaʼeʼ le maestro yéetel le maestraoʼ, kéen tʼaanakoʼob yoʼolal le máaxoʼob muʼyajnajoʼob teʼ campos de concentración naziʼoboʼ, mantatsʼ ku chʼaʼchiʼitkoʼob u testigoʼob Jéeoba.
a Tu kʼiiniloʼob le Segunda Guerra Mundialoʼ u testigoʼob Jéeoba yanoʼob Alemania (Xoknáaloʼob tiʼ le Bibliaoʼ) maʼ tu apoyartoʼob le naziʼoboʼ, le oʼolal ku bisaʼaloʼob teʼ campos de concentraciónoʼ.
b Gerhard Steinachereʼ aʼalaʼab yaan u kíimsaʼal tumen maʼ tu yóotaj u apoyart le ejército alemánoʼ. Teʼ carta tu tsʼíibtoʼ tu yaʼalaj: «Jach táankelmen, chéen baʼaleʼ tsʼoʼok in kʼáatik tiʼ Dios ka u tsʼáaten u muukʼil utiaʼal ka páajchajak u chúukpajal in wóol». Le ka sáaschaj tuláakʼ kʼiineʼ kíimsaʼabi. Teʼ tuʼux muʼukoʼ tsʼíibtaʼab lelaʼ: «Kíim utiaʼal u alabartaʼal Dios».
Maʼ xaaneʼ jeʼel u yutstal xan ta wicheʼ
KʼÁATCHIʼOB SUUK U BEETAʼAL
¿Baʼaxoʼob tu sen sufrirtaj u testigoʼob Jéeoba tu kʼiiniloʼob le Holocaustooʼ?
Yaan u jaʼakʼal a wóol kéen a wojéelt baʼaxten.
BAʼALOʼOB KU NÚUKAʼAL TEʼ BIBLIAOʼ
¿Baʼaxten Dioseʼ tu chaʼaj u kíimsaʼal yaʼab judíoʼob teʼ Holocaustooʼ?
Yaʼab máak taak u yojéeltik baʼaxten juntúul Dios jach yaan u yaabilajeʼ ku chaʼik u sufrir máak. Ojéelt baʼax ku yaʼalik le Bibliaoʼ.