Nojochchajen tu kaajil Tampere, tu luʼumil Finlandia. Teʼ tuʼux kajaʼanoʼonoʼ yaan jeetsʼelil kaʼachiʼ yéetel jach yaʼaxtʼubeʼen. In familiaeʼ maʼatech u jach binoʼob tiʼ junpʼéel religión, chéen baʼaleʼ tu yiloʼob ka xiʼikoʼon escuela yéetel ka yanaktoʼon jatsʼuts modos. In maamaeʼ Alemania u taal, le oʼolal tin paalileʼ suuk kaʼach k-bin xíimbalt in abueloʼob.

 Jach jatsʼuts in wilik in báaxal, le oʼolal tin paalileʼ jejeláas deporteʼob tin kanaj. Baʼaleʼ le yaanten 14 añosoʼ maas jatsʼuts tin wilil in báaxtik tenis. Le ka tu tsʼáajten 16 añosoʼ, kex kaʼatéen wa óoxtéen kin entrenar sáamsamal. De tempranoeʼ kaʼatéen kin entrenar yéetel le máaxoʼob kaʼansikenoʼ, yéetel de tardeeʼ tin juunal kin entrenar. Jatsʼuts in wilik in báaxal tenis tumen ku beetik u meyaj in tuukul yéetel in wíinklil. Kex uts tin tʼaan in jóokʼol yéetel in amigoʼob bey xan in wukʼik junpʼéel cerveza cada wa baʼax kʼiineʼ, mix juntéen anchajten problemaʼob yoʼolal droga wa yoʼolal in káaltal. Maases chéen in báaxal tenis kin tsʼaatáantik.

 Le ka tu tsʼáajten 17 añoseʼ, káaj in táakpajal tiʼ le báaxaloʼob ku beetik le ATP. a Yaʼab u téenel ganarnajen le oʼolal famosochajen tu luʼumil Finlandia. Le ka tu chukaj 22 años teneʼ tsʼaʼab in kʼaabaʼ ichil le 50 máakoʼob jach u yojloʼob u báaxtoʼob tenis tiʼ tuláakal le yóokʼol kaabaʼ.

 Ichil yaʼab jaʼaboʼobeʼ binen báaxal tiʼ jejeláas luʼumiloʼob. Tin kʼaj óoltaj yaʼab jatsʼuts kaajoʼob, baʼaleʼ tin tsʼáaj cuenta yaʼab muʼyajil yaan tu yoʼolal le drogaoʼ, le u kʼaskúuntaʼal le Luʼumaʼ yéetel le u sen beetaʼal loob tiʼ máakoʼ. Jeʼex le ka binoʼon Estados Unidoseʼ aʼalaʼabtoʼon yaan tuʼuxoʼob maʼ unaj k-biniʼ tumen sajbeʼentsil. Lelaʼ tu beetaj u lúubul in wóol, kex táan in beetik baʼax uts tin wicheʼ, kin wuʼuyikinba chéen tin juunal.

 Sanna, in noviaeʼ tsʼokaʼaniliʼ u káajal u xokik le Biblia yéetel u testigoʼob Jéeobaoʼ. Jaʼakʼ in wóol ka tin wilaj bix u tsʼáaik u yóol u beet le baʼax ku kanikoʼ chéen baʼaleʼ maʼ tsʼíikilnajeniʼ. Tsʼoʼok k-beel tu añoil 1990, junpʼéel año máanakeʼ ka tu beetuba Testigo. Kex kin creertik yaan Dioseʼ maʼatech in bin tiʼ mix junpʼéel religión. Kʼajaʼanteneʼ in abuela kajaʼan Alemaniaoʼ jach ku xokik le Bibliaoʼ, letiʼeʼ tu kaʼansen orar.

 Junpʼéel kʼiineʼ juntúul Testigo yéetel u yataneʼ tu invitartoʼon ka xiʼikoʼon tu yotoch. Kari, le íichamtsiloʼ, tu tsikbaltajten le profecíaʼob yanoʼob teʼ Biblia ku tʼaanoʼob tiʼ «u tsʼoʼok kʼiinoʼoboʼ» (2 Timoteo 3:1 tak 5). Tu péeksaj in wóol le baʼax tu yaʼaloʼ tumen tin tsʼáaj cuenta baʼaxten ku yúuchul le baʼaloʼob kʼaastak teʼ yóokʼol kaabaʼ. Teʼ súutuk jeʼeloʼ maʼ seguernaj k-tʼaan tiʼ religioniʼ. Baʼaleʼ desde teʼ kʼiin jeʼeloʼ káaj in tsikbal yéetel Kari yoʼolal le Bibliaoʼ. Tin wileʼ jach jaaj tuláakal le baʼaxoʼob tu kaʼansaj tenoʼ. Tumen yaʼab in viajareʼ ku máan kʼiin tak kéen tsikbalnakoʼon tu kaʼatéen. Kex beyoʼ Karieʼ maʼ tu pʼateniʼ. Ku tsʼíibtik cartaʼob utiaʼal u núukikten le baʼaxoʼob kin kʼáatiktiʼ le kéen xooknakoʼonoʼ. Tin wileʼ le Bibliaoʼ jach maʼalob bix u núukik le baʼaxoʼob taak u yojéeltik máakoʼ. Jujunpʼíitil úuchik in naʼatik le Bibliaoʼ ku tʼaan tiʼ bix kéen u béeykuntil le Reino le baʼax u tukultmaj Diosoʼ. Tu péeksaj in wóol in wojéeltik Jéeoba, u kʼaabaʼ Dios yéetel in wilik tuláakal le baʼaxoʼob u beetmaj t-oʼolaloʼ (Salmo 83:18). Le baʼax maas beet u jaʼakʼal in wóoloʼ letiʼe in kaanbal tiʼ u kuxtal Jesús tu kʼuboʼ tumen tin wileʼ lelaʼ junpʼéel bix tu yeʼesil u yaabilaj Dios (Juan 3:16). Tin kanaj xaneʼ jeʼel u béeytal in amigotik Dioseʼ yéetel jeʼel u béeytal in kuxtal ich jeetsʼelil utiaʼal mantatsʼ teʼ paraísooʼ (Santiago 4:8). Le oʼolaleʼ joʼopʼ in tuklik: «¿Bix jeʼel in weʼesik in kʼáat in tsʼáa u graciasil tiʼ Dioseʼ?».

 Káaj in wilik baʼax táan in beetik yéetel in kuxtal. Teʼ Bibliaoʼ tin kaneʼ maas ku taasik kiʼimak óolal u tsʼaʼabal wa baʼax, leloʼ tu beetaj in tsʼíiboltik in tsikbaltik le baʼaxoʼob kin creertikoʼ (Baʼaxoʼob 20:35). Le táan in báaxtik tenisoʼ, ku pʼáatal minaʼanen tin wotoch kex 200 kʼiinoʼob ichil junpʼéel año. In familiaeʼ chéen u tsʼaatáantmaj u yáantenoʼob utiaʼal in maas báaxal maʼalob, le oʼolal tin tsʼáaj cuenta kʼaʼabéet in kʼexik in kuxtal.

 In wojleʼ wa kin pʼatik in báaxal chéen tu yoʼolal in religioneʼ yaʼab máakoʼobeʼ maʼ ken u naʼatoʼob. Chéen baʼaleʼ jach in wojleʼ in kʼaj óoltik Jéeoba yéetel in kuxtal minaʼan u xuuleʼ maas koʼoj tiʼ jeʼel baʼalak jeʼel u béeytal in náajaltik teʼ deporteoʼ. Tin chʼaʼtuklaj maʼ in beetik u cuentail le baʼax ken u yaʼal u maasil tin woʼolaloʼ. Junpʼéel teksto áanten utiaʼal maʼ in chʼaʼik saajkil tiʼ u maasileʼ, letiʼe Salmo 118:6, teʼeloʼ ku yaʼalik: «Yuumtsileʼ tin wéetel yaan; minaʼanten saajkilil. ¿Baʼax jeʼel u páajtal u beetikten wíinikeʼ?».

 Teʼ kʼiinoʼob jeʼeloʼ jujuntúul máakoʼobeʼ tu yaʼaloʼob jeʼel u boʼotkenoʼob maas maʼalob wa kin báaxal tiʼ uláakʼ competenciaʼob maas nuuktakeʼ, beyoʼ minaʼan in chéen tuklik u pʼáatal minaʼanten taakʼin yaʼab años. Chéen baʼaleʼ tsʼokaʼaniliʼ in chʼaʼtuklik baʼax ken in beeteʼ. Maʼ tin wóotaj báaxal teʼ competenciaʼoboʼ yéetel maʼ seguernaj in báaxal teʼ ATP. Tin seguertaj in kaanbal tiʼ le Bibliaoʼ yéetel tu kʼiinil 2 tiʼ julio tiʼ 1994, okjaʼanajen.

 Teneʼ maʼ anchaj in muʼyajtik baʼaloʼob kʼaastak utiaʼal u káajal in natsʼkinba tiʼ Diosiʼ. Maʼ xan táan in máan kaʼach in kaxt u jaajil religioniʼ. Kin tuklik kaʼacheʼ yaanten junpʼéel maʼalob kuxtal yéetel mix baʼal ku bineltikten. Baʼaleʼ chéen junpʼéel kʼiineʼ tin wileʼ le kuxtalaʼ yaan u biilal, bey men cuenta tsʼaʼab tin táan u jaajil utiaʼal ka in kaxteʼ. Bejlaʼeʼ in kuxtaleʼ maas maʼalob tiʼ le yaanten kaʼachoʼ. In familia xaneʼ maas maʼalob u biskuba bejlaʼeʼ yéetel jach kiʼimak in wóol tumen tu yóoxtúulal in paalaleʼ maʼ binoʼob tu paach le deporteoʼ, baʼaxeʼ tu meyajtoʼob Dios jeʼex teneʼ.

 Bejlaʼeʼ láayliʼ uts tin wich in báaxal teniseʼ. Tiʼ le jaʼaboʼob tsʼoʼok u maanoʼoboʼ tiʼ kin náajaltik taakʼin utiaʼal in tsʼáaik baʼax kʼaʼabéet tiʼ in familiaiʼ. Tsʼoʼok in beetik in entrenadoril yéetel kin nuʼuktik junpʼéel tuʼux ku báaxtaʼal tenis. Baʼaleʼ bejlaʼeʼ in kuxtaleʼ maʼ chʼiikil chéen tiʼ le deporteoʼ. Kaʼacheʼ yaʼab tiempo kin practicar utiaʼal in beetkinba juntúul jach maʼalob deportista. Bejlaʼeʼ jach in tsʼaamaj in wóol teʼ kʼaʼaytajoʼ bey xan utiaʼal in wáantik uláakʼ máakoʼob u kʼaj óoltoʼob le nuʼuktajoʼob yanoʼob teʼ Bibliaoʼ yéetel ka u tsʼáaʼob ichil u kuxtaloʼob tumen lelaʼ letiʼe baʼax áanten in kʼex in kuxtaloʼ. Jach ku kiʼimakkúuntik in wóol in maas biskinba yéetel Jéeoba bey xan in tsikbaltik tiʼ uláakʼ máakoʼob le baʼax ken u beet Dios maʼ tun xáantaloʼ (1 Timoteo 6:19).