Síijen Uganda tu distritoil Gomba. U maas yaʼabil le máakoʼob kajaʼanoʼob teʼeloʼ jach óotsiloʼob. Tsʼoʼoleʼ como minaʼan corriente teʼ tuʼux kajaʼanoʼonoʼ suuk kaʼach k-usartik quinquéʼob.

 In taataʼobeʼ lukʼoʼob Ruandaeʼ ka binoʼob kajtal Uganda. Letiʼobeʼ suuk kaʼach u meyajoʼob teʼ kʼaaxoʼ, suuk kaʼach u pakʼikoʼob café yéetel jaʼas. Tsʼoʼoleʼ yéetel le jaʼasoʼ ku beetkoʼob kaʼach junpʼéel licor ku kʼaabaʼtik waragi. Suuk kaʼach xan u tséentkoʼob x-kaaxoʼob, chivoʼob, kʼéekʼenoʼob yéetel vacaʼob. Yoʼolal bix líiʼsaʼabikeneʼ suuk kaʼach in tuklikeʼ juntúul atantsileʼ unaj u beetik tuláakal baʼax ku yaʼalaʼaltiʼ tumen u yíicham yéetel maʼ unaj u yaʼalik baʼax ku tuklikiʼ.

 Le yaanten 23 añosoʼ binen kajtal Ruanda. Teʼeloʼ suuk kaʼach k-bin teʼ discotecaʼob yéetel uláakʼ xiʼipalaloʼoboʼ. Tiʼ junpʼéel tiʼ le discotecaʼob suuk in bin kaʼachoʼ káaj u chaʼabal in wokol gratisiʼ. Jach uts tin tʼaan xan in chaʼantik películaʼob tuʼux ku sen úuchul baʼateliʼ. Tuláakal le baʼaxoʼob kin beetik yéetel le bix in náaysik in wóoloʼ tu beetaj u jach kʼastal in modos, joʼopʼ in káaltal yéetel in núupkʼebantal.

 Tu añoil 2000 kajlajen yéetel juntúul x-chʼúupal ku kʼaabaʼtik Skolastique Kabagwira, ka máan kʼiineʼ anchaj óoxtúul k-paalal. Desde tin paalileʼ kaʼansaʼabteneʼ juntúul koʼoleleʼ unaj u xoltal u saludarten bey xan unaj u beetik kéen u kʼáatten wa baʼax. Kin tuklik xan kaʼacheʼ tuláakal le baʼax yaantoʼonoʼ chéen in tiaʼal le oʼolal jeʼel u páajtal in beetik jeʼel baʼaxak in kʼáat tu yéeteleʼ. Yaʼab u téenel xaneʼ kin jóokʼol de áakʼab yéetel láas tres de la mañana táan in suut, tsʼoʼoleʼ kalaʼanen kéen suunaken. Kéen kʼuchkeneʼ kin loxik le joonajoʼ yéetel wa ku xáantal u jeʼebeleʼ yaan in loxik Skolastique.

 Teʼ kʼiinoʼob jeʼeloʼ teen u supervisoril le máaxoʼob ku meyajoʼob de seguridad tiʼ junpʼéel compañíaoʼ yéetel jach maʼalob in náajal kaʼachi. Teʼ kʼiinoʼob xanoʼ Skolastiqueeʼ tu yaʼalajten ka in láakʼint teʼ iglesia pentecostal tuʼux ku binoʼ, ku tuklik kaʼacheʼ jeʼel u yáantken in kʼex in modoseʼ. Pero maʼ tin wóotiʼ, baʼax tin beeteʼ in kaxtik uláakʼ koʼolel. Como maʼ tin wóotaj in kʼex in modos yéetel káaj in jóokʼol yéetel uláakʼ koʼoleloʼobeʼ Skolastiqueeʼ bin kajtal tu yotoch u papáʼob yéetel tu bisaj k-paalal.

 Juntúul in amigo maas yaan u jaʼabil tiʼ teneʼ tu yaʼalajten maʼ maʼalob le bix kuxlikenoʼ, ka tu yaʼalajten ka suunaken yéetel Skolastique. Tu yaʼalajten xaneʼ wa in yaabiltmaj in paalaleʼ maʼ unaj in náachtal tiʼ letiʼobiʼ. Le oʼolal tu añoil 2005, xuʼul in káaltal, tin pʼataj xan le uláakʼ koʼolel in kajkúuntmajoʼ yéetel suunajen yiknal Skolastique. Tsʼoʼok k-beel tu añoil 2006, pero láayliʼ jach séeb in pʼuʼujuleʼ yéetel jach kin maltratartik in watan.

 Tu añoil 2008, juntúul u testigo Jéeoba ku kʼaabaʼtik Joëleʼ kʼoopnaj tu jool in wotoch ka tin wuʼuyaj le baʼax ku tsikbaltikoʼ. Letiʼ yéetel Bonaventure, uláakʼ juntúul Testigoeʼ, tu xíimbaltenoʼob durante yaʼab meses yéetel joʼopʼ k-tsikbal yoʼolal le kaʼansajoʼob yaan teʼ Bibliaoʼ. Yaʼab preguntaʼob kin beetiktiʼob kaʼachi, maases yoʼolal u libroil Apocalipsis, tumen taak kaʼach in weʼesiktiʼob maʼ jaaj le baʼax ku kaʼansik le Testigoʼoboʼ. Por ejemploeʼ teneʼ tin kʼáatajtiʼob baʼaxten ku kaʼanskoʼobeʼ le yaʼabkach máakoʼob ku yaʼalik Apocalipsis 7:9, yaan u kuxtaloʼob way Luʼumeʼ. Si le mismo tekstooʼ ku yaʼalikeʼ ‹waʼalakbaʼaloʼob tu táan u trono Dios yéetel tu táan le Tamanoʼ›. Joëleʼ yéetel paciencia tu tsolajten tuláakal le baʼax tin kʼáatajtiʼoʼ. Tsʼoʼoleʼ tu tsolajten baʼax ku kaʼansik Isaías 66:1, teʼeloʼ Dioseʼ ku yaʼalikeʼ ‹le luʼumoʼ letiʼe tuʼux ku tʼalkúuntik u yookoʼoboʼ›, le oʼolaleʼ jeʼel u páajtal u yaʼalaʼaleʼ le yaʼabkach máakoʼoboʼ tiaʼanoʼob tu táan u trono Dioseʼ. Tin xokaj xan le baʼax ku yaʼalik Salmo 37:29, teʼeloʼ ku yaʼalikeʼ le máaxoʼob ku beetkoʼob baʼax maʼaloboʼ yaan u kajtaloʼob utiaʼal mantatsʼ way Luʼumeʼ.

 Ka máan kʼiineʼ tin waʼalaj jeʼel in wóotik xook yéetel u testigoʼob Jéeobaeʼ, Bonaventure túuneʼ káaj u tsʼáaikten xook bey xan tiʼ in watan. Yoʼolal baʼax kin kanik teʼ Bibliaoʼ jujunpʼíitil tin kʼexil in kuxtal. Joʼopʼ xan in tratartik yéetel yaabilaj in watan, xuʼul xan in waʼaliktiʼ ka xolak tin táan utiaʼal u saludarken wa utiaʼal u kʼáatikten wa baʼax. Tsʼoʼoleʼ xuʼul xan in tuklik de ke tuláakal le baʼax yaantoʼonoʼ chéen in tiaʼal. Xuʼul xan in chaʼantik películaʼob tuʼux ku sen úuchul baʼateʼel. Utiaʼal in pʼatik le baʼaloʼobaʼ kʼaʼabéetchaj in weʼesik humildad yéetel in kanik in controlartinba.

 Antes in maas naʼatik baʼax ku kaʼansik le Bibliaoʼ tsʼokaʼaniliʼ in bisik Uganda u maas nojchil in hijoʼob ku kʼaabaʼtik Christian utiaʼal u kajtal yiknal in láakʼtsiloʼob. Pero le ka tin xokaj baʼax ku yaʼalik Deuteronomio 6:4-7, tin tsʼáaj cuentaeʼ tiʼ teen yéetel tiʼ in watan yaan u responsabilidadil k-kanáantik yéetel k-kaʼansik tiʼ k-paalal le baʼax ku yaʼalik le Bibliaoʼ. ¡Jach kiʼimakchaj k-óol ka suunaj kajtal k-hijo t-otoch, letiʼ xaneʼ jach kiʼimakchaj u yóol!

 Tin kaneʼ Jéeobaeʼ juntúul Dios jach ku chʼaʼik óotsilil yéetel tsʼoʼok u perdonartik tuláakal le baʼaxoʼob in beetmoʼ. Kiʼimakchaj in wóol xan le ka tu yaʼalaj Skolastique taak xan u xokik le Bibliaoʼ. Tu kaʼatúulaloʼon t-kʼubaj k-kuxtal tiʼ Jéeoba yéetel okjaʼanajoʼon 4 tiʼ diciembre tiʼ 2010. Bejlaʼeʼ maas yaan confianza ichiloʼon yéetel k-ilik k-beetik baʼax ku kaʼansik le Biblia utiaʼal u yantal kiʼimak óolal ichil k-familiaoʼ. In wataneʼ uts tu tʼaan ka xiʼiken tiʼ wotoch chéen pʼelak in jóokʼol tin meyaj. Letiʼeʼ jach ku kiʼimaktal u yóol kéen u yil jach kin chʼaʼik en cuenta baʼax ku yaʼalik, tsʼoʼoleʼ maʼatech in maltratartik yéetel jach xuʼul in káaltal. In wataneʼ jach kiʼimak u yóol tumen bejlaʼeʼ maʼ kʼasaʼanen jeʼex kaʼacheʼ. Tu añoil 2015 ka káaj in meyaj bey anciano utiaʼal in kanáantik le sukuʼunoʼob teʼ múuchʼuliloʼ. Tsʼoʼoleʼ tiʼ le cinco paalal anchajtoʼonoʼ óoxtúuleʼ tsʼoʼok u yokjaʼob.

 Le ka káaj in xokik le Biblia yéetel u testigoʼob Jéeobaoʼ maʼ chéen tin jáan creertaj le baʼax ku kaʼanskoʼoboʼ, tin tsʼáaj cuentaeʼ le kéen u núukoʼob in preguntaʼobeʼ teʼ Biblia ku chʼaʼikoʼob u núukiloʼ. Teen yéetel Skolastiqueeʼ t-tsʼáaj cuentaeʼ le máax u kʼáat u meyajt Diosoʼ kʼaʼabéet u kuxtal jeʼex u yaʼalik letiʼoʼ. Jach kin tsʼáaik gracias tiʼ Jéeoba tumen tsʼoʼok u natsʼken tu yiknal yéetel ku chaʼik in wantal ichil u kaajal. Yoʼolal le baʼax úuchtenaʼ kin tsʼáaik cuentaeʼ tuláakal máak jeʼel u páajtal u kʼexik u kuxtal yéetel u yáantaj Dioseʼ.