Síijen Montreal, le kaaj maas nojoch yaan Quebec, tu luʼumil Canadaoʼ. Teen yéetel óoxtúul in sukuʼunoʼobeʼ nojochchajoʼon tu barrioil Rosemont, teʼeloʼ maʼ sajbeʼentsil u kuxtal máak kaʼachiʼ yéetel jach yaabiltaʼanoʼon tumen k-taataʼob. Jach jatsʼuts bix kuxlikoʼon kaʼachi.

 Tin paalileʼ uts tin tʼaan in xokik le Bibliaoʼ. Kʼajaʼanteneʼ le yáanten 12 añosoʼ jach jatsʼuts in wilik in xokik teʼ Nuevo Testamento bix kuxlajik Jesusoʼ. Jatsʼuts in wilik kaʼach bix tu yeʼesil yaabilaj yéetel bix tu chʼaʼaj óotsilil tiʼ u maasil le oʼolal taakchaj in beetik jeʼex letiʼeʼ. Chéen baʼaleʼ ka nojochchajeneʼ joʼopʼ in biskinba yéetel máaxoʼob yaanal baʼax ku tuklikoʼob.

 In papaeʼ ku paxik kaʼach saxofón, ka máan kʼiineʼ tu pʼataj ten u saxofón. Jeʼex letiʼeʼ teen xaneʼ jatsʼuts tin wilil le paaxoʼ le oʼolal pʼáat chéen le kin tsʼaatáantik ichil in kuxtal. Como jach jatsʼuts in wilkeʼ séeb úuchik in kanik in pax guitarra. Ka máan kʼiineʼ teen yéetel in amigoʼobeʼ t-beetaj junpʼéel grupo utiaʼal k-paxik rock, yaʼab tuʼuxoʼob k-bin paax kaʼachi. Juntéenjeakeʼ jujuntúul máakoʼob jach kʼaj óolaʼanoʼob ku meyajoʼob tuʼux ku grabartaʼal discoʼobeʼ jatsʼuts tu yuʼubiloʼob k-paax le oʼolal tu yaʼaloʼob ka k-firmart junpʼéel contrato tu yéeteloʼob. Jach yaʼab máakoʼob uʼuyik kaʼach tu radioil Quebec le paax k-beetkoʼ.

 Bey mix baʼal ku bineltikteneʼ tumen táankelmen, kʼaj óolaʼanen, yaʼab taakʼin kin náajaltik yéetel táan kaʼach in beetik le baʼax maas uts tin tʼaanoʼ. De kʼiineʼ kin bin gimnasio, kin entrevistartaʼal, kin firmartik autógrafos yéetel kin jóokʼol televisión. De áakʼabeʼ k-bin paax tiʼ fiestaʼob. Utiaʼal maʼ in wuʼuyik in kaʼanaleʼ kin wukʼik cerveza, ka tsʼoʼokeʼ káaj in drogartkinba. Kʼaschaj bix in kuxtal yéetel maʼ saajken tiʼ jeʼel baʼaxak ka úuchkeʼ.

 Yaʼab máaxoʼob ku tsʼíiboltkoʼob kaʼach le kuxtal yaantenoʼ tumen ku tuklikoʼobeʼ kiʼimak in wóol. Baʼaleʼ teneʼ maʼ bey in wuʼuyikinbaoʼ, le kéen pʼáatken kaʼach tin juunaleʼ kin wuʼuyik minaʼan u biilal in kuxtal, ku luubul in wóol yéetel kin sen chiʼichnaktal. Le táan u binten jach maʼaloboʼ, tsaʼay sida tiʼ kaʼatúul tiʼ le máaxoʼob grabartik in paaxoʼ ka kíimoʼob. Maʼ tu béeytal in creertik kaʼachi. Jatsʼuts in wilik le paaxoʼ, baʼaleʼ jach kʼaas in wilik le baʼaxoʼob ku beetik le máaxoʼob ku meyajoʼob tin wéeteloʼ.

 Kex jach maʼalob u bin teneʼ kin tsʼáaik cuentaeʼ le yóokʼol kaabaʼ táan u maas kʼastal. Yaʼab u téenel kʼuchen in tukult baʼaxten Dioseʼ ku chaʼik u beetaʼal baʼaloʼob kʼaastak. Kin sen kʼáatiktiʼ kaʼach ka u yáanten in naʼat lelaʼ. Juntéenjeak, le ka t-chʼaʼtuklaj k-jeʼelel tiʼ k-bin paaxeʼ, tin kaʼa xokaj le Bibliaoʼ. Maʼ yaʼab baʼaxoʼob tin naʼatiʼ, baʼaleʼ tin tsʼáaj cuenta naatsʼ u kʼiinil u xuʼulsaʼal le yóokʼol kaabaʼ.

 Le kaʼa joʼopʼ in xokik le Bibliaoʼ tin tsʼáaj cuentaeʼ Jesuseʼ ayunarnaj 40 kʼiinoʼob teʼ desiertooʼ (Mateo 4:1, 2). Le oʼolal tin tukleʼ wa kin beetik jeʼex Jesuseʼ maʼ xaaneʼ Dioseʼ jeʼel u yeʼeskuba tiʼ teneʼ. Teneʼ tin yéeyaj junpʼéel kʼiin utiaʼal in káajsik in ayunar chéen baʼaleʼ kaʼapʼéel semanaʼob antes tiʼ leloʼ, kaʼatúul u testigoʼob Jéeobaeʼ taal u xíimbaltenoʼob. Teneʼ tin waʼalajtiʼob ka máankoʼob. ¡Hasta bey táan kaʼach in páaʼtkoʼobeʼ! Juntúul tiʼ le máakoʼobaʼ ku kʼaabaʼtik Jacques, teneʼ tin pakteʼ ka tin kʼáatajtiʼ: «¿Bix jeʼel in wojéeltik wa jach tu jaajil kuxaʼanoʼon tu tsʼook kʼiinoʼobeʼ?». Letiʼeʼ tu jeʼekʼabtaj le Bibliaoʼ ka tu xokaj 2 Timoteo 3:1 tak 5. Jach yaʼab kʼáatchiʼob tin beetajtiʼob, baʼaleʼ jach jaʼakʼ in wóol tumen tu láaj núukoʼob yéetel le Bibliaoʼ. Le maʼ úuch joʼopʼok u xíimbaltkenoʼoboʼ tin tsʼáaj cuentaeʼ maʼ tsaaj in ayunariʼ.

 Káaj in xokik le Bibliaoʼ tu yéeteloʼoboʼ. Ka máan kʼiin túuneʼ tin kʼosaj u tsoʼotsel in pool yéetel káaj in bin tiʼ tuláakal le muchʼtáambaloʼob teʼ Najil Reinooʼ. Le jatsʼuts modos eʼesaʼabten le ka binen teʼ tuʼux ku muchʼkubaʼoboʼ le áanten in wil tsʼoʼok in kaxtik u jaajil.

 Anchaj in kʼexik yaʼab baʼaloʼob utiaʼal in tsʼáaik ichil in kuxtal le baʼaxoʼob kin kanik teʼ Bibliaoʼ. Tin xulaj in drogartkinba yéetel tin pʼataj le kʼaakʼas kuxtal kin bisik kaʼachoʼ. Anchaj xan in kʼexik in modos yéetel u káajal in kaxtik u yutsil u maasil. Tumen tin juunal kin líiʼsik kaʼatúul in paalaleʼ kʼaʼabéetchaj in wilik bix jeʼel in natsʼkoʼob tiʼ Dioseʼ yéetel in naʼatik bix u yuʼubikubaʼob. Le oʼolaleʼ tin pʼataj le paaxoʼ yéetel ooken meyaj tiʼ junpʼéel fábrica tuʼux maʼ yaʼab u náajaliliʼ.

 U jaajileʼ maʼ chéen chʼaʼabil úuchik in kʼexik in kuxtaliʼ. Le táan in wilik in pʼatik le drogaʼoboʼ yaʼab u téenel lúuben tu kaʼatéeniʼ tumen in wíinklileʼ ku yuʼubik kʼaʼabéet u drogarkuba utiaʼal u kiʼimaktal u yóol (Romailoʼob 7:19, 21-24). Baʼaleʼ le baʼax maas talamchaj in pʼatkoʼ letiʼe in núupkʼebantal kaʼachoʼ. Tsʼoʼoleʼ le meyaj kin beetkoʼ jach ku kaʼansiken yéetel jach maʼ yaʼab u boʼoliliʼ. Le bajux kin náajaltik ichil óoxpʼéel mesoʼoboʼ letiʼe bukaʼaj kin náajaltik kaʼach chéen ichil kaʼapʼéel horaʼob paax kin beetkoʼ.

 Le baʼax jach áanten in kʼex in kuxtaloʼ letiʼe oracionoʼ yéetel in xokik sáamsamal le Bibliaoʼ. Láayliʼ kʼajaʼanten jujunpʼéel tekstoʼob tu líiʼsoʼob in wóoloʼ. Junpʼéeleʼ 2 Corintoiloʼob 7:1, teʼeloʼ ku yaʼalik tiʼ máak ka u limpiokíintuba «tiʼ tuláakal baʼax jeʼel u yéekʼkuntik k-wíinklil yéetel k-tuukuleʼ». Uláakʼ teksto tsʼoʼok u yáantken in pʼat le kʼaakʼas baʼaloʼob suukaʼan in beetik kaʼachoʼ Filiposiloʼob 4:13, teʼeloʼ ku yaʼalik: «Yaanten u muukʼil utiaʼal in beetik tuláakal baʼal, tu yoʼolal le Máax tsʼáaikten u páajtalil in beetkoʼ». Jéeobaeʼ tu núukaj in oracionoʼob yéetel tu yáanten in beet le baʼax ku yaʼalik le Bibliaoʼ. Leloʼ tu péeksen in kʼub in kuxtal tiʼ letiʼ (1 Pedro 4:1, 2). Tu añoil 1997 túuneʼ okjaʼanajen.

 Wa ka seguernak in kuxtal jeʼex kaʼacheʼ bejlaʼa úuch kíimkeneʼ. Chéen baʼaleʼ, bejlaʼeʼ jach kiʼimak in wóol. In watan Elvieʼ, junpʼéel nojoch bendición ichil in kuxtal. Tu kaʼatúulaloʼon k-xupikba k-meyajt Jéeoba yéetel jatsʼuts k-ilik k-kaʼansik tiʼ uláakʼ máakoʼob le baʼaxoʼob ku yaʼalik le Bibliaoʼ. Bejlaʼeʼ jach kiʼimak in wóol yéetel kin tsʼáaik u graciasil tiʼ Jéeoba úuchik u natsʼken tu yiknal (Juan 6:44).