In taataʼobeʼ tiʼ u taaloʼob tu islailoʼob Tongaeʼ, teʼ luʼumilaʼ yaan 170 mejen islasiʼ yéetel tiaʼanoʼob tu noojol-chikʼinil le Pacificooʼ. Maʼ jach yaʼab baʼaloʼob yaantoʼon kaʼachiʼ yéetel minaʼan kaʼach mix corriente mix coche tiʼ toʼon. Chéen baʼaleʼ yaantoʼon kaʼach jaʼ yéetel wa jaytúul x-kaaxoʼob. Kéen tsʼaʼabaktoʼon vacaciones teʼ escuelaoʼ k-áantik kaʼach k-papá teʼ kooloʼ. In papáeʼ ku beetik uláakʼ chan meyajoʼob, baʼaleʼ utiaʼal u chan antal baʼax k-jaanteʼ k-áantik xan u pakʼ jaʼas, makal, iis yéetel tsʼíin. Jeʼex u maasil máakoʼob kajaʼanoʼob teʼ islaoʼ in taataʼobeʼ ku xokikoʼob le Bibliaoʼ yéetel ku binoʼob iglesia. Chéen baʼaleʼ toʼoneʼ k-tuklik kaʼacheʼ utiaʼal u bintoʼon maas maʼalobileʼ unaj kaʼach k-bin kajtal tiʼ uláakʼ luʼumil.

 Ka anchajten 16 añoseʼ in tíoeʼ tu yilaj bix u biskoʼon kajtal California (Estados Unidos). Jach talamchajtoʼon k-kajtal teʼeloʼ tumen yaanal baʼaloʼob suuk u beetaʼaliʼ. Kex maas chan yaantoʼon junpʼíit taakʼineʼ, le tuʼux kajaʼanoʼonoʼ jach yaan óotsililiʼ, kʼasaʼan máakoʼob yéetel yaʼab máaxoʼob ku drogarkubaʼobiʼ. Suuk kaʼach k-uʼuyik u wáakʼal tsʼoon de áakʼab yéetel tuláakal máak sajak kaʼach tiʼ le bandasoʼ. Yaʼab tiʼ le máaxoʼob yanoʼob teʼ bandasoʼ yaan u tsʼoonoʼob utiaʼal u kanáantkubaʼob tiʼ uláakʼ bandas. Teneʼ tsʼoʼonen juntéen yéetel tak bejlaʼa yaan junpʼéel bala tin tseemeʼ.

 Tin táankelmileʼ, tin wilaj in lúubul utsil tiʼ in wéet xookoʼob. Kin bin tiʼ fiestaʼob kaʼachiʼ, kin káaltal, jach kʼasaʼanen yéetel kin drogarkinba. Káaj in drogarkinba yéetel cocaína yéetel káaj in wookol utiaʼal in manik droga. Kex in láakʼtsiloʼob ku binoʼob iglesiaeʼ mix juntéen tu tsoloʼobten u nuʼuk mix tu yáantenoʼob in beet baʼax uts. Teneʼ jach kʼasaʼanen kaʼachi, le oʼolal yaʼab u téenel tu jeʼelsen le políciaʼoboʼ. Jach kʼaschaj in kuxtal. Ka máan kʼiineʼ kʼaʼalen cárcel.

 Junpʼéel kʼiin, tu añoil 1997, le tiʼaʼanen teʼ cárceloʼ juntúul tiʼ le máaxoʼob kʼalaʼanoʼob xanoʼ tu yilaj yaanten junpʼéel Biblia. Teʼ kʼiin jeʼeloʼ táan kaʼach u kʼiinbesaʼal le Navidadoʼ, le máaxoʼob kajaʼanoʼob Tongaoʼ ku yilkoʼob le kʼiinbesaj bey junpʼéel baʼal jach kʼaʼanaʼaneʼ. Le máakoʼ tu kʼáatajten wa in wojel baʼax ku yaʼalik le Biblia yoʼolal u kʼiinil u síijil Jesúsoʼ, baʼaleʼ teneʼ hasta maʼ tin naʼataj le baʼax tu yaʼaloʼ. Letiʼeʼ tu yeʼesajten teʼ Biblia bix síijik Jesúsoʼ, ka tin tsʼáaj cuentaeʼ yaʼab tiʼ le baʼaxoʼob ku beetaʼal utiaʼal le Navidadoʼ maʼatech u chíikpajal teʼ Bibliaoʼ (Mateo 2:1-12; Lucas 2:5-14). Jach jatsʼuts tin wilil le baʼax ku yaʼalik le Bibliaoʼ ka taakchaj in maas kaanbal. Le máakoʼ tu yaʼalajteneʼ ku bin teʼ muchʼtáambaloʼob ku beetik teʼ cárcel u testigoʼob Jéeobaoʼ, ka tin waʼalajtiʼ jeʼel in bin tu yéeteleʼ. Teʼ kʼiinoʼ xakʼaltaʼab u libroil Apocalipsis. Kex maʼ tin naʼataj mix baʼaleʼ tin tsʼáaj cuentaeʼ tuláakal le baʼax ku kaʼansaʼaloʼ teʼ Biblia u taaloʼ.

 Ka tu yaʼalajten le Testigoʼob wa jeʼel in xook tu yéeteloʼobeʼ, maʼ tin tuklaj kaʼatéeniʼ. Lelaʼ letiʼe yáax juntéen ka tin wuʼuyaj u yúuchul tʼaan tiʼ le paraíso ken u taas Diosoʼ (Isaías 35:5-8). Kʼuchen in naʼateʼ utiaʼal ka lúubken utsil tiʼ Dioseʼ kʼaʼabéet in kʼexik in kuxtal. Tin tsʼáaj cuentaeʼ Jéeobaeʼ maʼ ten u chaʼa u yantal máakoʼob yaan u vicioʼob teʼ paraísooʼ (1 Corintios 6:9, 10). Le oʼolaleʼ tin chʼaʼtuklaj in kʼexik in modos, in xulik in tsʼuʼutsʼik chamal, in káaltal yéetel in xulik in drogarkinba.

 Teʼ año 1999, bisaʼaben teʼ tuʼux ku kʼaʼalal le máaxoʼob minaʼan u juʼunoʼoboʼ, máan junpʼéel año maʼ tin wilik le Testigoʼoboʼ. Baʼaleʼ teneʼ in chʼaʼtukultmaj u seguer in kʼexik in kuxtal. Teʼ año 2000, maʼ kaʼa tsʼaʼabten in juʼunoʼob utiaʼal in pʼáatal Estados Unidosiʼ ka beetaʼab in suut tu kaajil Tonga.

 Ka kʼuchen Tongaeʼ, tin kaxtaj le Testigoʼob utiaʼal u seguer in xokik le Biblia tu yéeteloʼoboʼ. Jach jatsʼuts in wilik le baʼax táan kaʼach in kanikoʼ tsʼoʼoleʼ tin wilaj xaneʼ le Testigoʼob yanoʼob teʼ islaoʼ láayliʼ teʼ Biblia ku chʼaʼikoʼob le baʼax ku kaʼanskoʼob jeʼex u beetik le yanoʼob Estados Unidosoʼ.

 In taataeʼ jach kʼaj óolaʼan teʼ tuʼux kajaʼanoʼonoʼ tumen tsʼaʼan junpʼéel nojoch meyaj tiʼ teʼ iglesiaoʼ. Le oʼolaleʼ in láakʼtsiloʼobeʼ tsʼíikilnajoʼob tumen maʼ tu naʼatkoʼob baʼaxten kin xook yéetel le Testigoʼoboʼ. Baʼaleʼ ka máan kʼiineʼ in taataʼobeʼ kiʼimakchaj u yóoloʼob tumen tu yiloʼob bix tu kʼexil in kuxtal le baʼax ku yaʼalik le Bibliaoʼ.

 Junpʼéel baʼax jach talamchaj in pʼatkeʼ letiʼe in wukʼik le kavaoʼ, lelaʼ junpʼéel clase ukʼul ku beetaʼal yéetel u moots pimienta. Le kavaoʼ ku pʼatik máak bey kalaʼan wa drogadoeʼ. Ka suunajen Tongaeʼ káaj in bin tu kaʼatéen teʼ tuʼux ku yuʼukʼul kavaoʼ. Óoliʼ sáamsamal kin biniʼ yéetel hasta u pʼáatal maʼ tu páajtal in líikʼleʼ ku xuʼulul in wukʼik. Le máaxoʼob yéetel kin biskinbaoʼ maʼatech u yáantkenoʼob in beet baʼax maʼalob tumen letiʼobeʼ maʼ jatsʼuts u yilkoʼob le baʼax ku yaʼalik le Bibliaoʼ. Ka máan kʼiineʼ le Testigoʼoboʼ tu yáantenoʼob in wil maʼ maʼalob u yilik Dios le baʼax kin beetkoʼ. Le oʼolaleʼ káaj in kʼexik in kuxtal utiaʼal in lúubul utsil tiʼ Jéeoba.

 Káaj in bin teʼ tuʼux ku muchʼkuba u testigoʼob Jéeobaoʼ. In biskinba yéetel máaxoʼob ku beetkoʼob baʼax uts tu tʼaan Dioseʼ tu yáanten utiaʼal maʼ in lúubul tiʼ baʼax kʼaas. Tu añoil 2002 túuneʼ okjaʼanajen.

 Yaʼab utsiloʼob tsʼoʼok in kʼamik. Le Bibliaoʼ ku yaʼalikeʼ Jéeobaeʼ «chúukaʼan u yóol [...] tumen maʼ u kʼáat ka xuʼulsaʼak tiʼ mix máakiʼ, baʼaxeʼ u kʼáat ka u kʼex u tuukul tuláakal máak» (2 Pedro 3:9). Bejlaʼa úuch u xuʼuls Jéeoba le kʼasaʼan yóokʼol kaabaʼ, baʼaleʼ wa ka u xuʼulseʼ bejlaʼa maʼ tu páajtal u kʼaj óoltaʼal tumen máakoʼob jeʼex teneʼ. Jach ku kiʼimaktal in wóol tumen Jéeobaeʼ ku chʼaʼiken en cuenta utiaʼal in wáantik uláakʼ máakoʼob u natsʼubaʼob tu yiknal.

 Chéen yéetel u yáantaj Jéeoba páajchaj in kʼexik in kuxtal. Kaʼacheʼ kin wookol utiaʼal in manik in droga. Bejlaʼeʼ kin wáantik le máakoʼob u kʼaj óoltoʼob Jéeobaoʼ. Ichil u kaajal Jéeobaeʼ tin kʼaj óoltaj Tea, in watan, tsʼoʼoleʼ yaan juntúul k-chan hijo. Jach kiʼimak k-óol tumen k-kaʼansik tiʼ k-vecinoʼob baʼax ku yaʼalik le Biblia yoʼolal le Paraíso kun antal way Luʼumeʼ.