Síijen tiʼ junpʼéel chan kaaj ku kʼaabaʼtik San Juan Chancalaíto, yaan Chiapas (México). In láakʼtsiloʼobeʼ tiʼ u taaloʼob tiʼ le úuchben mayaʼob ku tʼankoʼob choloʼ. In taataʼobeʼ yanchaj 12 juntúulal u paalaloʼob, teen u cincoil. Tin paalileʼ, teen yéetel in sukuʼunoʼobeʼ k-xokik le Biblia yéetel u testigoʼob Jéeobaoʼ. Chéen baʼaleʼ teneʼ maʼ tin beetaj le baʼax tin kanoʼ.

 Ka tu tsʼáajten 13 añoseʼ, tsʼokaʼaniliʼ u káajal in drogartkinba yéetel in wookoleʼ. Teʼ kʼiinoʼob jeʼeloʼ, lukʼen tin wotoch ka joʼopʼ in máan chéen beyoʼ. Ka tu tsʼáajten 16 añoseʼ, káaj in meyaj tuʼux ku paʼakʼal marihuana. Junpʼéel áakʼabeʼ, le táan k-bisik yaʼab marihuana tiʼ junpʼéel chan barcoeʼ, le uláakʼ máakoʼob ku konkoʼob droga xanoʼ káaj u tsʼoʼontsʼoʼonkoʼonoʼob, lelaʼ úuch kex bey junpʼéel año káajak in meyajiʼ. Utiaʼal maʼ in kíimsaʼaleʼ, tin pulimba ichil le jaʼoʼ yéetel maʼ séeb jóokʼen yóoʼkabiliʼ. Ka tsʼoʼokeʼ, púutsʼeneʼ ka binen Estados Unidos.

 Teʼeloʼ seguernaj in konik drogaiʼ yéetel in wokskinba tiʼ uláakʼ problemaʼob. Ka tu tsʼáajten 19 añoseʼ, bisaʼaben cárcel tumen ookolnajen yéetel óolak in kíims juntúul máak. Teʼ carceloʼ tin woksinba ichil junpʼéel pandilla ka seguernaj in beetik baʼaloʼob kʼaastak. Yoʼolal le baʼax úuchaʼ le autoridadoʼoboʼ tu bisenoʼob tiʼ junpʼéel cárcel maas nojoch yaan tu kaajil Lewisburg (Pensilvania).

 Teʼ carcelaʼ maas kʼaschaj in modos. Como in yáax beetmaj in tatuajeʼob jeʼex le yaan tiʼ in pandilla kaʼachoʼ, maʼ talamchaj in kaʼa biskinba yéetel in wéet pandilleroʼob kʼalaʼanoʼob xan tuʼux bisaʼabenoʼ. Maas píitmáan in kʼasaʼanil yéetel seguernaj in wokskinba tiʼ baʼateʼel. Juntéenjeakeʼ, tin woksinba tiʼ junpʼéel nojoch baʼateʼel anchaj yéetel uláakʼ pandillaʼob teʼ carceloʼ, jach kʼaas le baʼax úuchoʼ tumen t-machaj tak u bateiloʼob beisbol yéetel le pesaʼob yaan teʼ gimnasiooʼ. Le guardiaʼoboʼ anchaj u pulkoʼob teʼ tuʼux yanoʼon junpʼéel clase gas ku beetik u yelel u yich máak utiaʼal k-xulik k-baʼateloʼ. Ka tsʼoʼokeʼ kʼaʼalen tuʼux ku tsʼaʼabal le máaxoʼob táaj kʼasaʼanoʼoboʼ. Jach séeb in pʼuʼujul yéetel jach kin poochʼil. Tsʼoʼoleʼ kin baʼateʼel yoʼolal jeʼel baʼalakeʼ. Teneʼ jach uts tin wich in baʼateʼel kaʼachi yéetel junpuliʼ maʼ jelaʼan in wuʼuyikinba yoʼolal baʼax kin beetkiʼ.

 Teʼ tuʼux bisaʼabenoʼ, maases bul kʼiin kʼalaʼanen tiʼ junpʼéel chan cuarto. Le oʼolaleʼ utiaʼal maʼ u náakal in wóoleʼ káaj in xokik le Bibliaoʼ. Ka máan kʼiineʼ, juntúul koʼolel tsʼaʼan de guardiaileʼ tu tsʼáajten le libro Usted puede vivir para siempre en el paraíso en la Tierra. a Jeʼex úuchik in bin in xokikoʼ, joʼopʼ in kʼaʼajsik le baʼax tin kanaj tin paalil le táan in xook yéetel le Testigoʼoboʼ. Tin máansaj tin tuukul jach bix tsʼoʼok u binten kʼaasil ikil in séeb pʼuʼujul. Tuukulnajen xan tiʼ in láakʼtsiloʼob. Kaʼatúul tiʼ in kiikoʼobeʼ tu beetubaʼob u testigoʼob Jéeoba, ka tin tuklaj: «Letiʼobeʼ yaan u kuxtaloʼob utiaʼal minaʼan u xuul». Ka tsʼoʼokeʼ tin tuklaj: «Kux túun teen, ¿baʼaxten maʼ tu béeytal xan in kuxtal minaʼan u xuul?». Teʼ súutukoʼ tin chʼaʼtuklaj in kʼexik in kuxtal.

 Baʼaleʼ teneʼ in wojleʼ kʼaʼabéetten áantaj utiaʼal in kʼexik in kuxtal. Le oʼolaleʼ le yáax baʼax tin beetoʼ letiʼe in orar tiʼ Jéeoba utiaʼal in kʼáatik u yáantajoʼ. Ka tsʼoʼokeʼ tin tsʼíibtaj junpʼéel carta tiʼ u Betelil Estados Unidos utiaʼal in kʼáatik ka tsʼaʼabakten xook yéetel le Bibliaoʼ. Beteleʼ tu yaʼalaj tiʼ le múuchʼulil maas naatsʼ yanil tiʼ tenoʼ ka u túuxt wa máax xíimbaltken. Baʼaleʼ teʼ kʼiinoʼoboʼ chéen in láakʼtsiloʼob jeʼel u béeytal u xíimbaltkenoʼob kaʼacheʼ. Le oʼolaleʼ juntúul Testigo tiʼ le múuchʼulil jeʼeloʼ joʼopʼ u túuxtikten cartaʼob yéetel publicacionoʼob, leloʼ tu yáanten in maas chʼaʼtukult in kʼexik in kuxtal.

 Uláakʼ baʼax anchaj in beetkeʼ, letiʼe in pʼatik le pandilla tuʼux yanen kaʼachoʼ. Juntéenjeak, le táan k-jeʼelsikbaoʼ, tin wilaj u nojchil le pandillaoʼ ka túun náatsʼen tu yiknal utiaʼal in waʼaliktiʼ in kʼáat in beetinba u testigo Jéeoba. Jaʼakʼ in wóol yoʼolal le baʼax tu núukaj tenoʼ: «Wa tu jaajil a wóol ka waʼalikeʼ, beete. Maʼ in kʼáat in woksinba tiʼ baʼaloʼob yaan yil yéetel Diosiʼ. Baʼaleʼ wa chéen a kʼáat a pʼat le pandillaaʼ a wojel baʼax kun úuchultech».

 Ka máan kaʼapʼéel añoseʼ le máaxoʼob kanáantik le carceloʼ tu tsʼáajoʼob cuenta táan u kʼexpajal in modos le oʼolal joʼopʼ u tratarkenoʼob maʼalob, hasta xuʼul u kʼaxkoʼob in kʼab kéen u bisenoʼob baño. Juntúul tiʼ le guardiaʼoboʼ tu natsʼuba tin wiknaleʼ ka tu líiʼsaj in wóol utiaʼal ka seguernak in kʼexik in kuxtal. Úuchik in kʼexik in modoseʼ le autoridadoʼoboʼ tu bisenoʼob tiʼ junpʼéel cárcel maʼ jach kanáantaʼaniʼ, teʼ tin máansaj u tsʼook año kʼalaʼanenoʼ. Tu añoil 2004, le tsʼook diez años kʼalaʼanenoʼ, chaʼab in jóokʼol yéetel suʼuten México tiʼ junpʼéel u autobusil le carceloʼ.

 Le maʼ úuch kʼuchken Méxicooʼ tin wilaj junpʼéel Najil Reino tuʼux ku muchʼkuba u testigoʼob Jéeoba. Le yáax juntéen ka binen tu yéeteloʼoboʼ in takmaj u uniformeil le carceloʼ tumen chéen letiʼe nookʼ chan maʼalob yaantenoʼ. Kex tumen bey úuchik in binoʼ, le máaxoʼob yanoʼob teʼeloʼ maʼalob úuchik u kʼamkenoʼob. Le ka tin wilaj bix jatsʼutsil u modosoʼobeʼ, tin tsʼáaj cuentaeʼ tiaʼanen ichil le jaajil cristianoʼoboʼ (Juan 13:35). Desde teʼ kʼiin jeʼeloʼ, le ancianoʼoboʼ tu yiloʼob ka tsʼaʼabakten xook yéetel le Bibliaoʼ. Tu kʼiinil 3 tiʼ septiembre tiʼ 2005, kex chéen junpʼéel año máanak táan in xokik le Bibliaoʼ, okjaʼanajen.

 Tu mesil enero tiʼ 2007, tin maas kʼubimba in meyajt Dios, káaj in beetik setenta horaʼob táan in kaʼansik le máakoʼob yéetel le Bibliaoʼ. Tu añoil 2011, binen teʼ Escuela Bíblica utiaʼal Sukuʼunoʼob maʼ Tsʼokaʼan u Beeloʼoboʼ (bejlaʼeʼ kʼaj óolaʼan Escuela utiaʼal Máaxoʼob Kʼaʼaytik le Reinooʼ). Le Escuelaaʼ tu yáanten utiaʼal in tsʼoʼokbesik le meyajoʼob tsʼaʼab in beet teʼ múuchʼuliloʼ.

 Tu añoil 2013, tsʼoʼok in beel yéetel Pilar. Le kéen in tsikbalttiʼ le bix kuxliken kaʼachoʼ letiʼeʼ ku sam cheʼej yéetel ku yaʼalik maʼ tu creertik. Tak bejlaʼaʼ maʼ in kaʼa eʼes le kʼaakʼas modos yaanten kaʼachoʼ. Teen yéetel in wataneʼ jach tsʼoʼok k-ilik le páajtalil yaan tiʼ le Biblia utiaʼal u kʼexik u kuxtal máakoʼ (Romailoʼob 12:2).

 Teneʼ kin tsʼáaik cuentaeʼ le baʼax tu yaʼalaj Jesús teʼ Lucas 19:10, táan u tʼaan tiʼ teen. Teʼeloʼ tu yaʼaleʼ taal u ‹kaxt yéetel u salvart le máax saatal kaʼachoʼ›. Bejlaʼeʼ kin wuʼuyik maʼ saatleniʼ. Maʼatech in beetik xan loob tiʼ uláakʼ máakoʼob. Le Bibliaoʼ tsʼoʼok u yáantken in bis junpʼéel maʼalob kuxtal tsʼoʼoleʼ maʼalob in biskinba yéetel tuláakal máak. U maas kʼaʼanaʼanileʼ, maʼalob in biskinba yéetel Jéeoba, le Máax beetmilenoʼ.