Teʼ tu tsʼok añosaʼ tu luʼumil Venezuelaeʼ jach táan u yilaʼal óotsilil, le oʼolal jach tsʼoʼok u kʼexpajal u kuxtal le máakoʼoboʼ. Juntúul u testigo Jéeoba ku kʼaabaʼtik Edgareʼ tu yaʼalaj: «Le máakoʼoboʼ jach séebaʼan úuchik u pʼáatal minaʼan taakʼin tiʼob yéetel tu peʼertoʼob le baʼaxoʼob yaantiʼoboʼ. Hasta pʼáat bey tiʼ yaanal luʼumil kajaʼanoʼoneʼ».

 ¿Baʼax áant Edgar u aktáant le baʼax úuchoʼ? Letiʼeʼ ku yaʼalik: «Teen yéetel Carmen, in wataneʼ, t-xokaj baʼax ku beetik le misioneroʼob kéen xiʼikoʼob kajtal tuʼux ku yilaʼal óotsililoʼ yéetel bix u kankoʼob kuxtal chéen yéetel junpʼíit baʼaloʼob. Leloʼ le áantoʼon utiaʼal k-kanik kuxtal chéen yéetel le baʼax kʼaʼabéetoʼ bey xan utiaʼal ka káajak k-pakʼik jujunpʼéel baʼaloʼob utiaʼal k-jaante».

 Pero yaan uláakʼ baʼax tu beetaj Edgar yéetel Carmen. Letiʼobeʼ tu yiloʼob u líiʼskoʼob u yóol le sukuʼunoʼoboʼ tak le yaan depresión tiʼoboʼ (1 Tesalonicenses 5:11). Edgareʼ ku yaʼalik: «Toʼoneʼ t-líiʼsaj u yóoloʼob yéetel t-animartoʼob utiaʼal ka u yáantoʼob u maasil tumen leloʼ ku taasik kiʼimak óolal tiʼ máak» (Hechos 20:35).

 Le ka káaj le coronavirusoʼ Argeniseʼ tu chʼaʼtuklaj u tsikbaltik u Tʼaan Dios tiʼ u láakʼtsiloʼob tiʼ teléfono. Jujuntúul tiʼ letiʼobeʼ tu yaʼaloʼob jeʼel u xokikoʼob le Biblia tu yéeteloʼ.

 Argeniseʼ u yojel minaʼan Internet tiʼ u láakʼtsiloʼob, kex beyoʼ u kʼáat kaʼach ka u chaʼantoʼob le asamblea regional beetaʼab teʼ año 2020. Juntúul sukuʼun kajaʼan naatsʼ tiʼ u láakʼtsiloʼobeʼ tu máansaj u grabaciónil le asamblea tiʼoboʼ. U láakʼtsiloʼob Argeniseʼ tu majáantoʼob junpʼéel nuxiʼ televisión yéetel bocinas utiaʼal u béeytal u yuʼubikoʼob yéetel u chaʼantikoʼob le asambleaoʼ. Antes u chaʼantikoʼobeʼ tʼaʼanoʼob tumen Argenis utiaʼal u beetkoʼob le oraciónoʼ. Yaʼab utsiloʼob tu taasaj le baʼax tu beetoʼ, tumen kantúul tiʼ u láakʼtsiloʼob yéetel uláakʼ 15 máakoʼobeʼ tu chaʼantoʼob le asambleaoʼ.

 Teʼ múuchʼulil tuʼux yaan Jairo yéetel Johana, u yatanoʼ, chéen letiʼob yaan u chan cocheʼob, le oʼolaleʼ jach ku usarkoʼob utiaʼal u yáantkoʼob u maasil. Teʼ tuʼux kajaʼanoʼoboʼ jach difícil u conseguirtaʼal le gasolinaoʼ. Jairoeʼ ku yaʼalik: «Yaan horaeʼ bul áakʼab tiaʼanen teʼ fila utiaʼal u béeytal in chupik u tanqueil le cocheoʼ».

 Jairoeʼ tsʼoʼok u tsʼáaik cuentaeʼ kex maʼ chéen chʼaʼabil le baʼaxoʼob ku beetkoʼoboʼ jach yaʼab utsiloʼob ku taasik. Letiʼeʼ ku yaʼalik: «Kéen xiʼikoʼon k-bis wa baʼax tiʼ le sukuʼunoʼoboʼ jach ku kiʼimaktal k-óol tumen k-ilik bix u tsʼáaikoʼob u graciasil tiʼ Jéeoba ikil u tsʼáaik tiʼ u kaajal tuláakal baʼax kʼaʼabéettiʼ» (2 Corintios 9:11, 14).

 Norianni, juntúul kiik yaan 28 años tiʼeʼ, ku tuklik kaʼacheʼ jach paal u yilaʼal tumen u maasil le oʼolal maʼ tu páajtal u yáantik le sukuʼunoʼoboʼ. Chéen baʼaleʼ juntéeneʼ tu xokaj 1 Timoteo 4:12, ku yaʼalik: «Maʼ a chaʼik tiʼ mix máak ka u mixbaʼalkúunt a táankelmil».

 Le tekstoaʼ le péeks Norianni utiaʼal u yáantik le sukuʼunoʼob yaan u jaʼabiloʼob utiaʼal u tsʼíibtikoʼob u cartaʼob le kéen predicarnakoʼoboʼ yéetel ku invitarkoʼob le kéen u tsʼáa xook tiʼ le máakoʼoboʼ. Letiʼeʼ joʼopʼ xan u tʼanik yéetel u túuxtik mensaje tiʼ le sukuʼunoʼob utiaʼal u líiʼsik u yóoloʼoboʼ. Noriannieʼ ku yaʼalik: «Jéeobaeʼ tsʼoʼok u yeʼesikten jeʼel u páajtal in beetik yaʼab baʼaloʼob utiaʼal in wáantik u maasileʼ».

 Le sukuʼunoʼob yéetel le kiikoʼob kajaʼanoʼob Venezuelaoʼ yaʼab baʼaloʼob táan u aktáantkoʼob teʼ tu tsʼook kʼiinoʼobaʼ. Kex beyoʼ letiʼobeʼ maʼ xuʼuluk u tsʼáaik u yóoloʼob u kaʼansoʼob u maasiliʼ mix u paklan áantkubaʼobiʼ (Colosenses 4:11; 2 Timoteo 4:2).