U testigoʼob Jéeoba yanoʼob Bulgariaoʼ jach táan u kaʼanskoʼob baʼax ku yaʼalik le Bibliaoʼ. Desde tu añoil 2000, yaʼab sukuʼunoʼob yéetel kiikoʼobeʼ tsʼoʼok u binoʼob u kaʼansoʼob u tʼaan Dios tu luʼumil Bulgaria. ¿Baʼaxoʼob ku sen aktáantik le máaxoʼob ku binoʼob áantaj táanxel luʼumiloʼ? ¿Baʼax utsiloʼob tsʼoʼok u kʼamkoʼob? Koʼox ilik bix tsʼoʼok u bin tiʼ jujuntúul máaxoʼob binoʼob áantaj Bulgaria.

 Darren, nojochchaj Inglaterraeʼ ku yaʼalik: «Desde úuch taakchajak k-bin áantaj táanxel luʼumil. Le ka tsʼoʼok k-beeleʼ, teen yéetel Dawneʼ binoʼon kajtal Londres utiaʼal k-tsikbaltik u tʼaan Dios tiʼ le máakoʼob ku tʼankoʼob rusooʼ. Kex yaʼab u téenel t-beetaj u planesil utiaʼal k-bin áantaj táanxel luʼumileʼ, maʼ béeychajak k-biniʼ. Jach t-tuklaj mix bikʼin kun béeytal le baʼax k-tsʼíiboltikoʼ. Chéen baʼaleʼ juntúul k-amigoeʼ jach tu yáantoʼon k-il láayliʼ jeʼel u páajtal k-bin áantaj táanxel luʼumileʼ». Darren yéetel u yataneʼ joʼopʼ u kaxtikoʼob tuʼux maas kʼaʼabéet áantaj. Tu añoil 2011, binoʼob Bulgaria utiaʼal u kaʼanskoʼob u tʼaan Dios tiʼ le máakoʼoboʼ.

 Le sukuʼunoʼob ku yáantajoʼob táanxel luʼumiloʼoboʼ jach kiʼimak u yóoloʼob yéetel tsʼoʼok xan u yáantkoʼob u maasil utiaʼal ka u beetoʼob beyoʼ. Giada yéetel Luca, u yíichameʼ, nojochchajoʼob Italia. Giadaeʼ ku yaʼalik: «Tin kʼaj óoltaj yaʼab kiikoʼob tsʼoʼok u binoʼob áantaj Sudamérica yéetel África, letiʼobeʼ chíikaʼan jach kiʼimak u yóoloʼob. Le baʼax ku tsikbaltikoʼoboʼ jach kʼuch tin puksiʼikʼal le oʼolal tin chʼaʼtuklaj in maas meyajtik Jéeoba jeʼex u beetkoʼoboʼ».

 Tomasz yéetel Veronikaeʼ yaan kaʼatúul u paalaloʼob, Klara yéetel Mathias. Letiʼobeʼ nojochchajoʼob República Checa, chéen baʼaleʼ binoʼob áantaj Bulgaria tu añoil 2015. ¿Baʼax beet u taaktal u binoʼobiʼ? Tomaszeʼ ku yaʼalik: «Jach tu yáantoʼon u ejemplo le sukuʼunoʼob bijaʼanoʼob áantaj táanxel luʼumiloʼ, tsʼoʼoleʼ yaan tiʼ k-láakʼtsiloʼobeʼ bey xan u beetkoʼoboʼ. Toʼoneʼ jatsʼuts k-uʼuyik bix u yáantkoʼob u maasil u kanoʼob u jaajil yoʼolal Dios. Mantatsʼ táan k-tsikbal kaʼach yoʼolal le bix kiʼimakil u yóoloʼoboʼ». Ka máan kʼiineʼ le familiaaʼ bin áantaj Montana, tu luʼumil Bulgaria. Bejlaʼeʼ jach kiʼimak xan u yóoloʼob.

 Linda xaneʼ bin áantaj Bulgaria. Letiʼeʼ ku yaʼalik: «Úuchjeakil ka binen xíimbal Ecuadoreʼ tin kʼaj óoltaj yaʼab sukuʼunoʼob yéetel kiikoʼob bijaʼanoʼob áantaj teʼeloʼ. Leloʼ tu beetaj xan u taaktal in bin áantaj tuʼux maas kʼaʼabéet». Petteri yéetel Nadja, u yataneʼ, tu pʼatoʼob Finlandia utiaʼal u binoʼob áantaj táanxel luʼumil. Letiʼobeʼ ku yaʼalikoʼob baʼax áantoʼob: «Teʼ múuchʼuliloʼ le sukuʼunoʼob yéetel le kiikoʼoboʼ suuk u binoʼob áantaj táanxel luʼumil. Chíikaʼan u yilaʼal kiʼimak u yóoloʼob yéetel suuk u yaʼalikoʼob tu tsʼáajoʼob u maas maʼalobil tiʼ Jéeoba».

 Le máaxoʼob taak u binoʼob áantaj táanxel luʼumiloʼ jach kʼaʼabéet u kutal u tukloʼob tubeel baʼax kun kʼaʼabéettal u beetkoʼob (Lucas 14:28-30). Nele, nojochchaj Bélgicaeʼ ku yaʼalik: «Le ka tin tuklaj in bin áantaj táanxel luʼumileʼ orarnajen tiʼ Jéeoba yéetel tin xokaj revistaʼob ku tʼaanoʼob tiʼ u bin máak áantaj táanxel luʼumil. Le baʼax tin xokoʼ jach tu yáanten in wil baʼax unaj in beetik».

 Kristian yéetel Irminaeʼ tsʼoʼok nueve años u pʼatoʼob Polonia utiaʼal u binoʼob áantaj Bulgaria. Letiʼobeʼ ku yaʼalikoʼobeʼ táanil tiʼ u binoʼob Bulgariaeʼ yanchajoʼob tiʼ junpʼéel grupo ku tʼanik búlgaro tu luʼumil Polonia. Le baʼax tu beetoʼoboʼ tu yáantoʼob utiaʼal u kankoʼob le idiomaoʼ. Letiʼobeʼ ku yaʼalikoʼob: «Tsʼoʼok k-ilkeʼ Jéeobaeʼ ku kanáantik le máaxoʼob ku binoʼob áantaj táanxel luʼumiloʼ. Letiʼeʼ ku tsʼáaik tuláakal baʼax kʼaʼabéet tiʼ máak, chíikaʼan a wilik bix u kanáantkech Jéeoba. Yaʼab baʼaloʼob jeʼel u páajtal u beetik máak ichil u kaajal Jéeobaeʼ, chéen kʼaʼabéet u yaʼalik máak: ‹¡Way yaneneʼ! ¡Túuxteniʼ!›» (Isaías 6:8).

 Reto yéetel Corneliaeʼ nojochchajoʼob Suiza, letiʼobeʼ tu chʼaʼtukloʼob u binoʼob áantaj táanxel luʼumil, pero utiaʼal u béeytal u binoʼobeʼ tu yiloʼob maʼ u sen xuupoʼob. Retoeʼ ku yaʼalik: «Junpʼéel año antes k-bin kajtal Bulgariaeʼ t-jóoʼsaj junpʼéel semana utiaʼal k-bin k-kʼaj óolt le lugaroʼ. Teʼeloʼ juntúul misionero yéetel u yataneʼ tu yaʼaloʼobtoʼon jujunpʼéel baʼaloʼob jach tu yáantoʼon». Reto yéetel Corneliaeʼ tu beetoʼob le baʼaxoʼob aʼalaʼabtiʼoboʼ, bejlaʼeʼ tsʼoʼok maas tiʼ 20 años xiʼikoʼob áantaj tu luʼumil Bulgaria.

 Le máaxoʼob ku binoʼob áantaj táanxel luʼumiloʼ jejeláas baʼaxoʼob jeʼel u beetik u lúubul u yóoloʼobeʼ (Hechos 16:9, 10; 1 Corintios 9:19-23). Junpʼéel baʼax jach talam u yilkoʼobeʼ letiʼe u kankoʼob le idioma ku tʼaʼanal teʼ luʼumiloʼ. Luca, u yíicham Giadaeʼ ku yaʼalik: «Toʼoneʼ maʼ suuk k-xokik k-comentario teʼ reuniónoʼoboʼ le oʼolal tu káajbaleʼ jach talam t-ilil k-comentar ich búlgaro, hasta k-uʼuyik beyoʼon mejen paalaleʼ. Pero u jaajileʼ hasta maas maʼalob u comentar le mejen paalaloʼob tiʼ toʼonoʼ».

 Ravil, nojochchaj Alemaniaeʼ ku yaʼalik: «Tu beetaj u chiʼibal in pool in kanik le idiomaoʼ. Kʼajaʼanten mantatsʼ kin waʼalik kaʼach: ‹Maʼ jach tuklik yéetel maʼ a kʼuuxil kéen confundirnakech›. Le baʼaxoʼob úuchtenoʼ tin wiloʼob bey parte tiʼ in meyajtik Jéeobaeʼ, maʼ tin wiloʼob bey junpʼéel problemaeʼ».

 Linda, tsʼoʼok k-yáax chʼaʼchiʼitikeʼ ku yaʼalik: «Yaʼab u téenel tin tuklaj maʼ ten in kan le idioma búlgarooʼ tumen jach chich in pool utiaʼal in kanik uláakʼ idioma. Kéen a wil maʼ tu páajtal a tsikbal yéetel u maasileʼ yéetel kéen a wil maʼ ta naʼatik baʼax ku yaʼalikoʼobeʼ jach ka tristetal. Utiaʼal túun maʼ in náachtal tiʼ Jéeobaeʼ tin wilaj in xakʼalxook ich sueco tumen letiʼe idioma kin tʼankoʼ. Le sukuʼunoʼob xanoʼ jach yaʼab tu yáantilenoʼob, ka máan kʼiineʼ tin kanaj le idiomaoʼ».

 Uláakʼ baʼax xan jeʼel u beetik u lúubul u yóol máakeʼ letiʼe u pʼatik u familia yéetel u amigoʼoboʼ. Eva yéetel Yianis, u yíichameʼ, binoʼob áantaj Bulgaria, Evaeʼ ku yaʼalik: «Tu káajbaleʼ tin wuʼuyaj jach tin juunal yanen. Kex jach náach yanileneʼ tin wilaj in tʼanik in familia bey xan k-amigoʼob. Tsʼoʼoleʼ tsʼoʼok xan u yantaltoʼon uláakʼ amigoʼob wayeʼ».

 Robert yéetel Liana, nojochchajoʼob Suizaeʼ ku yaʼalikoʼob baʼax xan úuchtiʼob: «Jach talam t-ilil u suuktal k-kuxtal teʼ tuʼux binoʼonoʼ, yéetel jach talamchaj xan k-kanik le idiomaoʼ. Tsoʼoleʼ jach muʼyajnajoʼon yoʼolal le sen keʼel ku beetkoʼ». Le sukuʼunoʼobaʼ tsʼoʼok 14 años xiʼikoʼob áantaj Bulgaria. Le baʼax áantkoʼoboʼ letiʼe maʼ u concentrarkubaʼob tiʼ le baʼaloʼob maʼ maʼalobtak ku yúuchultiʼoboʼ.

 Lillyeʼ ku yaʼalik baʼaxten maʼalob ka xiʼik máak áantaj táanxel luʼumil, letiʼeʼ ku yaʼalik: «Wa maʼ in bin áantaj táanxel luʼumileʼ bejlaʼa maʼ ten in wil bix ken u sen áantilen Jéeobaeʼ. Wayeʼ ku páajtal in wáantik u maasil yéetel leloʼ ku beetik in maas natsʼkinba tiʼ Jéeoba, tsʼoʼoleʼ ku beetik u jach kiʼimaktal in wóol». Ravil, u yíichameʼ bey xan u tuukuloʼ, letiʼeʼ ku yaʼalik: «Tsʼoʼok in kʼaj óoltik yaʼab sukuʼunoʼob jejeláas luʼumil u taaloʼob yéetel jach u tsʼaamaj u yóoloʼob u kaʼansoʼob u tʼaan Dios. Yaʼab baʼaxoʼob tsʼoʼok in kanik tiʼ letiʼob. Jach jatsʼuts in wilik in kuxtal jeʼex u beetkoʼoboʼ».

 Yaʼab sukuʼunoʼob yéetel kiikoʼobeʼ táan u binoʼob áantaj tuʼux maas kʼaʼabéet. Le baʼax ku beetkoʼobaʼ ku yáantaj utiaʼal ka tsikbaltaʼak tiʼ tuláakal yóokʼol kaab «le baʼaloʼob maʼalobtak ken u beet le Reinooʼ» (Mateo 24:14). Le sukuʼunoʼob yéetel le kiikoʼob tsʼoʼok u binoʼob áantaj Bulgariaoʼ tsʼoʼok u yilkoʼobeʼ Jéeobaeʼ jach tu jaajil tu tsʼáajtiʼob le baʼax ku tsʼíiboltik u puksiʼikʼaloʼoboʼ yéetel tu beetaj u bin utsil tiʼob (Salmo 20:1-4).