Yanmei, juntúul u testigo Jéeoba kajaʼan Asiaeʼ, tu yáantaj juntúul koʼolel chʼóop u kʼáatmáans le calleoʼ. Le koʼolelaʼ u kʼaabaʼeʼ Kailan. a Letiʼeʼ tu yaʼalaj tiʼ Yanmei: «Jach diosboʼotik úuchik a wáantken, ka u bendecirtech Dios». Yanmei túuneʼ tu kʼáataj tiʼ Kailan wa jeʼel u béeytal u tsikbaloʼob tuláakʼ kʼiin yoʼolal baʼax ku kaʼansik le Bibliaoʼ. Ka máan kʼiineʼ Kailaneʼ tu tsikbaltaj tiʼ Yanmeieʼ úuch joʼopʼok u orar tiʼ Dios utiaʼal ka áantaʼak u kaxt le religión kaʼansik u jaajiloʼ. ¿Baʼaxten taak kaʼach u yojéeltik máakalmáak le jaajil religiónoʼ?

 Kailaneʼ tu tsikbalteʼ tu añoil 2008, invitartaʼab tumen juntúul u amiga chʼóop ka xiʼik tiʼ junpʼéel iglesia ku yáantik le máaxoʼob discapacitadoʼoboʼ. Ka tsʼoʼok le misaoʼ Kailaneʼ tu kʼáataj tiʼ le sacerdote tuʼux tu jóoʼsaj le baʼax tu tsikbaltoʼ. Letiʼeʼ tu yaʼalajtiʼeʼ teʼ Biblia tu chʼaʼajoʼ. Desde teʼ kʼiinoʼ Kailaneʼ taakchaj u xokik le Bibliaoʼ, le oʼolal tu conseguirtaj junpʼéel ich chinoiʼ, lelaʼ tsʼíibtaʼan ich braille yéetel 32 junpʼéelel u librosil. Kex seis meses tu bisaj tiʼ Kailan u xokik le Biblia tu chúukaʼaniloʼ. Le ka tu xokoʼ tu kaneʼ maʼ jaaj wa Dioseʼ junpʼéel Trinidad jeʼex kaʼansaʼaniltiʼ kaʼachoʼ. Tu kanaj xaneʼ u kʼaabaʼ Dioseʼ Jéeoba.

 Kailaneʼ jach lúub u yóol yoʼolal bix u kuxtal jujuntúul tiʼ le máaxoʼob ku binoʼob iglesiaoʼ tumen tu tsʼáaj cuenta maʼ tu kuxtaloʼob jeʼex u yaʼalik le Bibliaoʼ. Jeʼex le kéen tʼoʼoxok le janaloʼ tiʼ le chʼóopoʼoboʼ chéen ku tsʼaʼabal u yalab. Kailaneʼ jach ku yaatal u yóol yoʼolal bix u tratartaʼaloʼob, le oʼolal joʼopʼ u kaxtik uláakʼ iglesiaʼob yaan naatsʼ tu yotoch utiaʼal ka xiʼikiʼ. Letiʼ túuneʼ joʼopʼ u orar tiʼ Dios utiaʼal ka áantaʼak u kaxt le máaxoʼob kaʼansik u jaajiloʼ.

 Jach péeknaj u yóol úuchik u yáantaʼal tumen Yanmei, le oʼolal tu kʼamaj u xokik le Biblia tu yéeteloʼ. Le maʼ úuch káajak u xookoʼ bin teʼ tuʼux ku muchʼkuba u testigoʼob Jéeobaoʼ. Letiʼeʼ ku yaʼalik: «Mix bikʼin ken in tuʼubs le yáax juntéen ka tin muchʼinba yéetel le Testigoʼoboʼ. Letiʼobeʼ jach maʼalob úuchik u tratarkenoʼob yéetel tu yeʼesoʼobten yaabilaj. Kex chʼóopeneʼ béeychaj in wuʼuyik jach u yaabiltmoʼob tuláakal máak.

 Kailaneʼ maʼ xáanchaj ka káaj u bin teʼ reuniónoʼoboʼ. Letiʼeʼ jach uts tu tʼaan u kʼayik le kʼaayoʼob utiaʼal u alabartaʼal Jéeobaoʼ, chéen baʼaleʼ minaʼan kaʼach u libroil le kʼaayoʼob ich brailleoʼ. Yéetel u yáantaj le sukuʼunoʼoboʼ Kailaneʼ tu beetaj u libroil u kʼaay ich braille. ¡Chéen 22 horaʼob tu bisajtiʼ u láaj tsʼíibtik le 151 kʼaayoʼoboʼ! Tu mesil abril tiʼ 2018, Kailaneʼ káaj u tsikbaltik u tʼaan Dios tiʼ le máakoʼoboʼ. Desde teʼ kʼiinoʼoboʼ cada meseʼ ku máansik 30 horaʼob táan u tsikbaltik u tʼaan Dios.

 Le ka tu yaʼalaj taak u yokjaʼeʼ Yanmeieʼ tu grabartajtiʼ le preguntaʼob yéetel le tekstoʼob ku chíikpajal teʼ libro Organizados para hacer la voluntad de Jehováoʼ. Tu mesil julio tiʼ 2018, béeychaj túun u yokjaʼ. Letiʼeʼ ku yaʼalik: «Jach kʼuch tin puksiʼikʼal le yaabilaj eʼesaʼabten le yáax ka binen teʼ asambleaoʼ, hasta joʼopʼ in wokʼol. Tin wuʼuyaj tiaʼanen ichil le religión kaʼansik u jaajiloʼ» (Juan 13:34, 35). Kailaneʼ jach u kʼáat u yeʼes tiʼ uláakʼ máakoʼob le yaabilaj eʼesaʼabtiʼoʼ. Le oʼolal desde ka okjaʼanajeʼ joʼopʼ u xupik u tiempo utiaʼal u tsikbaltik tiʼ uláakʼ máakoʼob u tʼaan Dios.