Bryn, juntúul sukuʼun kajaʼan Carolina del Norteeʼ (Estados Unidos), táakaʼan ichil junpʼéel Comité de Enlace yéetel le Hospitaloʼoboʼ. Le comitéʼobaʼ ku yilkoʼob bix jeʼel u yáantkoʼob le sukuʼunoʼob yanoʼob teʼ hospitaloʼoboʼ.

 Yoʼolal le COVID-19, yaʼab hospitaloʼobeʼ maʼatech u chaʼik u bin xíimbaltbil le kʼojaʼanoʼoboʼ. Le oʼolal Bryneʼ tʼaanaj teʼ hospital utiaʼal u tʼaan yéetel le director ilik le baʼaloʼob yaan yil yéetel religión teʼ hospitaloʼ. Letiʼeʼ taak kaʼach u kʼáatiktiʼ bix jeʼel u yáantik le Testigoʼob yanoʼob teʼeloʼ.

 Le máax núuk u tʼaan Brynoʼ letiʼe máax áantik le directoroʼ. Bryn túuneʼ tu kʼáataj wa jeʼel u páajtal u tsʼaʼabal u número tiʼ le Testigoʼob yanoʼob teʼ hospitaloʼ, beyoʼ kex maʼ tu páajtal u bin u xíimbalt le sukuʼunoʼoboʼ jeʼel u páajtal u tʼaan tu yéeteloʼobeʼ. Le máax áantik le director túunoʼ tu yaʼaleʼ jeʼel u páajtaleʼ.

 Bryneʼ tu yaʼalajtiʼeʼ jach ku apreciartik tuláakal le meyaj ku beetkoʼob teʼ hospitaloʼ yéetel tu yaʼalajtiʼ ka u jach kanáantubaʼob. Tu yaʼalaj xan tiʼeʼ tsʼoʼok u xokikeʼ yaʼab máakoʼob tiʼ tuláakal tuʼuxeʼ táan u jach estresaroʼob yoʼolal le pandemiaoʼ, maases le ku meyajoʼob teʼ hospitaloʼoboʼ.

 Le máak túunoʼ tu yaʼalaj tiʼ Bryneʼ jach jaaj, yaʼab máaxoʼob táan u sen estresaroʼob teʼ hospital yoʼolal le COVID-19.

 Bryn túuneʼ tu yaʼalaj tiʼ le máakoʼ: «Teʼ sitio yaantoʼon ich Internetoʼ yaan información jach jeʼel u yáantik le máakoʼob utiaʼal maʼ u jach estresaroʼoboʼ. Wa ka wokol teʼ jw.org yéetel ka tsʼíibtik le tʼaan ‹estrés› yaan a kaxtik yaʼab información jach jeʼel u yáantik le máaxoʼob ku meyajoʼob teʼ hospitaloʼ».

 Le táan u tʼaanoʼoboʼ le máakoʼ tu kaxtaj le sitio jw.org, ka tu tsʼíibtaj le tʼaan «estrés» teʼ buscadoroʼ. Le ka tu yilaj le xookoʼoboʼ tu yaʼalaj: «¡Jach táaj interesante le xookoʼobaʼ! Yaan in weʼesik tiʼ le directoroʼ. Le xookoʼobaʼ jach jeʼel u yáantik le máaxoʼob ku meyajoʼob teʼ hospitaloʼ bey xan uláakʼ máakoʼob. Yaan in jóoʼsik u copiasil utiaʼal ka in tʼoxe».

 Ka máan wa jaypʼéel semanaʼobeʼ Bryneʼ tʼaanaj yéetel le directoroʼ. Le director túunoʼ tu yaʼalajtiʼeʼ ookoʼob teʼ sitio jw.org, ka tu jóoʼsoʼob u copiasil le xookoʼob ku tʼaanoʼob ku tiʼ le estrésoʼ bey xan le uláakʼ xookoʼob ku tʼaanoʼob tiʼ leloʼ. Tu yaʼaleʼ tu tsʼáajoʼob tiʼ le enfermeroʼob yéetel tiʼ le enfermeraʼoboʼ bey xan tiʼ le uláakʼ máaxoʼob ku meyajoʼob teʼ hospitaloʼ.

 Bryneʼ tu yaʼalaj: «Le directoroʼ tu tsʼáajten u graciasil tumen k-áantik u maasil máakoʼob yéetel tu yaʼaleʼ le xookoʼoboʼ jach maʼalob beetaʼaniloʼob, tsʼoʼoleʼ jach ku yáantajoʼob».