1,2．（甲）乜嘢证据表明我哋嘅君王自从1914年以来一直施行统治？（乙）呢一章会讨论乜嘢？

 回顾上帝王国喺仇敌当中所取得嘅成就，真系强化人心。（诗篇110:2）我哋嘅君王兴起咗一支甘心乐意嘅传道大军，而且喺属灵同道德方面熬炼佢哋，使佢哋得以洁净。今日，虽然王国嘅仇敌千方百计要分裂我哋，但系我哋依然能够享有一个团结嘅国际弟兄团体。我哋已经分析过好多王国嘅成就，呢一切充分证明，我哋嘅君王自从1914年以来已经喺王国嘅仇敌当中施行统治。

² 喺不久嘅将来，王国会有更多令人惊叹嘅成就。王国会“来临”，将仇敌“打碎灭绝”。（马太福音6:10；但以理书2:44）但系喺呢件事发生之前，仲会有其他大事发生。系乜嘢大事呢？有几个圣经预言可以解答呢个问题。等我哋嚟分析呢啲预言，睇吓我哋前头仲有乜嘢事会发生。

3．首先发生嘅系乜嘢事？

³ 宣告和平 使徒保罗写俾帖撒罗尼迦会众嘅信，讲到第一件我哋正热切期待嘅事。（请读帖撒罗尼迦前书5:2,3）保罗喺信所讲嘅“耶和华嘅日子”，将会喺“大巴比伦”受到攻击嗰时开始。（启示录17:5）但系喺耶和华嘅日子开始之前，列国会宣告：“和平安全嘞”。呢个可能系单独嘅一个宣布，亦都可能系一连串嘅特别声明。世上嘅宗教领袖会唔会参与呢件事呢？既然佢哋属于呢个世界，好可能都会同列国一齐宣告“平安无事喇！”（耶利米书6:14；23:16,17；启示录17:1,2）呢个和平安全嘅宣告，就系耶和华嘅大日子马上会开始嘅标志。上帝王国嘅仇敌“一定无法逃脱”。

4．保罗预告和平安全嘅宣告将会发出。明白呢个预言嘅意义，对我哋有乜嘢益处呢？

 ⁴ 明白呢个预言嘅意义，对我哋有乜嘢益处？保罗话：“你哋唔系喺黑暗当中，所以嗰个日子唔会忽然临到你哋，好似人将贼捉住一样”。（帖撒罗尼迦前书5:4）同世人唔同，我哋清楚知道呢个世界嘅结局会系点样嘅。呢个关于和平安全嘅预言具体会点样应验呢？我哋一定要耐心等待，仔细留意世界嘅形势会点样发展落去。所以，我哋“要时刻警醒，保持清醒”。（帖撒罗尼迦前书5:6；西番雅书3:8）

5．乜嘢事件会成为“大患难”嘅第一幕？

⁵ 宗教受到攻击 保罗讲过：“人正讲紧‘和平安全嘞’嘅时候，突如其来嘅毁灭就即时临到佢哋”。就好似闪电过后马上会听到雷声一样，一宣告“和平安全嘞”，即时就会发生“突如其来嘅毁灭”。乜嘢会被毁灭呢？首先系“大巴比伦”，又称为“娼妓”，即系世上所有错误嘅宗教。（启示录17:5,6,15）假基督教同其他所有错误宗教嘅毁灭成为“大患难”嘅第一幕。（马太福音24:21；帖撒罗尼迦后书2:8）呢件事会令好多人都觉得非常惊讶。点解呢？因为喺呢件事发生之前，娼妓以为自己系一个“永远唔会哀恸”嘅“女王”。但系佢点都估唔到自己会突然间被铲除，快到好似“喺一日之内”噉。（启示录18:7,8）

6．边个会攻击“大巴比伦”？

⁶ 边个会攻击“大巴比伦”呢？圣经话俾我哋知，系有“十只角”嘅“野兽”。我哋从启示录睇出，呢只野兽就系联合国。十只角象征当今世上所有支持呢只“鲜红色嘅野兽”嘅政治势力。（启示录17:3,5,11,12）呢场攻击有几猛烈呢？联合国嘅成员国会掠夺娼妓嘅财富，将佢吞灭，“用火将佢完全烧毁”。（请读启示录17:16） a

7．耶稣喺马太福音24:21,22所讲嘅话点样喺公元1世纪应验？将来又会点样应验？

⁷ 缩短嗰段日子 我哋嘅君王透露，喺大患难期间嘅呢个时刻会有乜嘢事发生。耶稣话：“为咗蒙拣选嘅人，嗰段日子将会缩短。”（请读马太福音24:21,22）耶稣嘅话喺公元66年得到小规模嘅应验，当时耶和华“缩短”咗罗马军队攻击耶路撒冷嘅时间。（马可福音13:20）因为噉，耶路撒冷同犹地亚嘅基督徒就可以得救。噉喺即将嚟到嘅大患难期间，全球各地会发生乜嘢事呢？耶和华会通 过我哋嘅君王缩短联合国攻击宗教嘅时间。噉样，正确宗教就唔会同错误宗教一齐被毁灭。所有错误宗教将会被铲除，只有正确嘅宗教可以存留。（诗篇96:5）等我哋嚟睇吓，喺大患难嘅呢个阶段结束之后，仲会有乜嘢事发生？

8,9．耶稣提到嘅奇异景象可能系乜嘢意思？世人睇到呢啲事会有乜嘢反应？

⁸ 耶稣喺关于最后日子嘅预言指出，哈米吉多顿大战爆发之前会有几件大事发生。我哋会先考虑两件喺马太福音、马可福音同路加福音都有提及嘅事。（请读马太福音24:29-31；马可福音13:23-27；路加福音21:25-28）

⁹ 天上出现奇异嘅景象 耶稣预告话：“太阳就要变黑，月亮亦唔放光，星辰从天上坠落”。到时，人唔会再向宗教领袖寻求指引，亦都唔会再认为佢哋系属灵亮光嘅来源。耶稣嘅意思系咪亦都表明天上会出现超自然嘅景象呢？有可能。（以赛亚书13:9-11；约珥书2:1,30,31）世人睇到呢啲事会有乜嘢反应呢？佢哋会因为“不知所措”而感到“痛苦不堪”。（路加福音21:25；西番雅书1:17）冇错，上帝王国嘅仇敌，上至君王下至奴隶都会感到“惊恐，谂到世上要发生嘅事就头晕目眩”，要揾地方躲藏。但系，佢哋发现根本冇一个安全嘅地方，可以躲避我哋君王嘅愤怒。（路加福音21:26；23:30；启示录6:15-17）

10．耶稣会宣布乜嘢判决？对于呢个判决，支持同反对上帝王国嘅人分别有乜嘢反应？

¹⁰ 宣布判决 之后，上帝王国嘅所有仇敌就要被迫面对一件会令佢哋更加苦恼嘅事。耶稣话：“到时，人必睇见人子喺云中来临，大有力量同荣耀。”（马可福音13:26）耶稣用呢个超自然嘅方式显示力量，表明佢已经嚟到，要宣布判决。关于呢个判决，耶稣喺同一个关于末世嘅预言讲到绵羊同山羊嘅比喻，透露咗更多同呢个判决有关嘅细节。（请读马太福音25:31-33,46）忠贞支持上帝王国嘅人会被判定为“绵羊”，佢哋会“挺身昂首”，因为知道自己“好快就会得救嘞”。（路加福音21:28）而嗰啲反对上帝王国嘅人会被判定为“山羊”，佢哋会“悲恸捶胸”，因为知道自己会“永远被剪除”。（马太福音24:30；启示录1:7）

11．我哋分析将要发生嘅事嗰阵，需要谨记乜嘢？

 ¹¹ 耶稣向“所有国族”宣布判决之后，仲有一啲大事会喺哈米吉多顿大战爆发之前发生。（马太福音25:32）我哋会讨论吓两件事：歌革嘅攻击；将受膏基督徒聚集到天上。当分析呢两件事嘅时候，我哋需要谨记，上帝嘅话语并冇透露呢两件事发生嘅确切时间。其实，呢两件事好可能会有一段时间同时发生。

12．撒但会点样全力发动攻击，对抗上帝嘅王国？

¹² 全力发动攻击 玛歌革地嘅歌革会攻击地上嘅受膏基督徒同埋另外嘅绵羊。（请读以西结书38:2,11）呢场对抗已经施行统治嘅上帝王国嘅攻击会系最后一次。撒但被逐出天上以来，一直都同地上剩余嘅受膏基督徒作战。（启示录12:7-9,17）自从受膏基督徒开始被聚集到复兴嘅基督徒会众，撒但更加想尽办法阻止佢哋喺属灵方面蓬勃发展，不过佢并冇得逞。（马太福音13:30）呢个时候，错误嘅宗教组织已经唔存在，上帝嘅子民就好似住喺“冇城墙，冇门冇闩”保护嘅地方一样。撒但以为呢个系大好时机，于是煽动玛歌革地嘅歌革，即系地上嘅政府，全力攻击支持上帝王国嘅人。

13．耶和华会点样解救佢地上嘅忠仆？

¹³ 跟住会有乜嘢事发生呢？关于歌革，以西结预言话：“你必从你嘅地方，从北方嘅极处而嚟。你率领好多民族，佢哋都骑住马，成为一支人数众多嘅大军。你会嚟攻击我嘅子民以色列人，好似密云遮盖地面。”（以西结书38:15,16）对于呢场睇嚟势不可挡嘅攻击，耶和华会采取乜嘢行动呢？耶和华话：“我嘅烈怒就要爆发……我必呼唤刀剑攻击佢。”（以西结书38:18,21；请读撒迦利亚书2:8）耶和华会发动哈米吉多顿大战，解救佢地上嘅忠仆。

14,15．喺撒但全力发动攻击之后，会发生乜嘢事？

¹⁴ 哈米吉多顿大战期间，耶和华会点样保护佢嘅子民呢？讨论呢个问题之前，我哋先嚟睇吓另一件大事。呢件事会喺撒但全力发动攻击之后，耶和华发动哈米吉多顿大战解救佢嘅忠仆之前嘅某个时候发生。正如11段提到嘅一样，呢件事就系将地上嘅受膏基督徒聚集到天上。

¹⁵ 将受膏基督徒聚集到天上 马太同马可都记录咗，耶稣指出哈米吉多顿大战爆发之前会发生一连串嘅事，包括同“蒙拣选嘅人”即系受膏基督徒有关嘅事。（见第7段） 耶稣讲到自己身为君王会做嘅事，话：“到时佢必差天使从四方，从地极到天边，将蒙拣选嘅人聚集起嚟。”（马可福音13:27；马太福音24:31）耶稣喺呢节经文所讲嘅“聚集”系指乜嘢呢？佢所指嘅唔系为地上嘅受膏基督徒最后盖印嘅事，因为最后盖印会发生喺大患难开始之前。（启示录7:1-3）其实耶稣所指嘅系一件会喺大患难期间发生嘅事。所以，显然喺撒但向上帝子民全力发动攻击之后嘅某个时候，仍然喺地上嘅受膏基督徒会被聚集到天上。

16．复活咗嘅受膏基督徒会点样参与哈米吉多顿大战？

¹⁶ 将地上嘅受膏基督徒聚集到天上呢件事，同跟住会爆发嘅哈米吉多顿大战有乜嘢关系呢？圣经透露，14万4000位同基督一齐作王嘅受膏基督徒会喺天上得到权柄，同基督一齐用毁灭嘅“铁杖”对付所有上帝王国嘅敌人。（启示录2:26,27）从呢一点可以睇出，上帝嘅战争哈米吉多顿大战开始之前，所有嘅受膏基督徒已经喺天上。当“人数众多嘅大军”向住自己嘅猎物——耶和华嘅子民逐步逼近嘅时候，复活咗嘅受膏基督徒会同大能嘅天使一齐跟随战无不胜嘅君王耶稣同敌人展开决战。（以西结书38:15）呢场激烈嘅战斗开始嗰时，哈米吉多顿大战就爆发嘞！（启示录16:16）

17．哈米吉多顿大战期间，被判定为“山羊”嘅人会有乜嘢下场？

¹⁷ 执行判决 哈米吉多顿大战系大患难嘅结局。呢个时候，耶稣仲有一个任务要执行。佢唔单止系“所有国族”嘅审判官，到时佢亦都会以行刑官嘅身份对嗰啲之前已经被判定为“山羊”嘅人执行判决。（马太福音25:32,33）我哋嘅君王会用“一把锋利嘅长剑……打击列国”。冇错，所有被判定为“山羊”嘅人，上至“君王”下至“奴隶”，到时都会“永远被剪除”。（启示录19:15,18；马太福音25:46）

18．（甲）对于被判定为“绵羊”嘅人嚟讲，形势点样逆转过嚟？（乙）耶稣点样战胜仇敌？

¹⁸ 对于被耶稣判定为“绵羊”嘅人嚟讲，形势发生几咁大嘅逆转！呢群睇嚟不堪一击，好似“绵羊”一样嘅“大群人”，几乎俾撒但嘅“山羊”大军践踏踩碎。而家佢哋竟然喺敌人嘅攻击之下存活，而且“从大患难中出嚟”。（启示录7:9,14）跟住耶稣会战胜并且铲除所有同上帝王国敌对嘅人，之后会将撒但同佢手下嘅邪灵揼落无底深渊。 佢哋会被囚禁一千年，停止活动，就好似死去一样。（请读启示录6:2；20:1-3）

19,20．我哋从以赛亚书26:20同30:21可以学到乜嘢？

¹⁹ 呢啲惊天动地嘅大事发生之前，我哋可以点样做好准备呢？《守望台》喺好多年前指出：“生还在于服从。”点解噉讲呢？我哋喺耶和华对古代被掳去巴比伦嘅犹太人所发出嘅警告可以揾到答案。耶和华预告巴比伦会被征服，噉上帝嘅子民需要点样做好准备呢？耶和华话：“我嘅子民啊，入去你哋嘅内室，闩埋门啦。要暂时匿藏，直到降怒完毕。”（以赛亚书26:20）请留意，经文当中“入去”、“闩埋”、“匿藏”呢几个动词都带有吩咐嘅口吻，所以呢啲都系命令。听从呢啲命令嘅犹太人都留喺屋入面，先至可以避开攻入城内嘅士兵。所以，佢哋嘅生还有赖于服从耶和华嘅指示。 b

²⁰ 我哋从中可以学到乜嘢？如果我哋想喺将来保全生命，就要好似上帝嘅古代忠仆噉，服从耶和华嘅指示。（以赛亚书30:21）通过会众，我哋可以得到呢啲指示。所以，我哋对收到嘅指示要培养乐意服从嘅态度。（约翰一书5:3）如果我哋而家就噉样做，将来就会更容易表现甘心服从嘅态度，可以得到天父耶和华同君王耶稣嘅保护。（西番雅书2:3）因为有上帝嘅保护，我哋可以亲自见证上帝嘅王国点样彻底铲除仇敌。到时呢一幕，我哋一定永远都唔会忘记！