1,2． （甲）耶稣嘅三位使徒亲耳听到耶和华讲咗啲乜嘢？（乙）佢哋有乜嘢反应呢？

 如果耶和华上帝吩咐你做一啲事，你会有乜嘢反应呢？无论上帝要你做乜嘢，你都乐意照佢讲嘅去做，系咪呢？当然系啦！

² 公元32年逾越节结束冇几耐，彼得、雅各同埋约翰三位使徒就有过噉嘅经历。（请读马太福音17:1-5）佢哋同主耶稣一齐“上咗一座高山”。三位使徒喺异象里面睇到耶稣将来喺天上作王嘅辉煌景象。异象睇嚟好真实，彼得提出要帮异象里面嘅人搭帐幕。但佢嘅话都未讲完，就有云遮住佢哋。跟住，彼得同另外两位使徒清晰噉听到耶和华同佢哋讲话，呢个系几咁难得嘅殊荣！世上冇几多个人可以好似佢哋噉，亲耳听到耶和华嘅声音。耶和华明确表示耶稣系佢嘅儿子，然后吩咐三位使徒：“要听从佢”。使徒就照住做嘞。佢哋唔单止自己听从耶稣嘅教导，仲劝其他人都噉样做。（使徒行传3:19-23；4:18-20）

3． （甲）点解耶和华要我哋听从耶稣？（乙）我哋会探讨乜嘢题目？

³ 圣经将“要听从佢”呢句话记录落嚟，系为咗令我哋得益。（罗马书15:4）点解噉讲呢？因为耶稣系耶和华嘅代言人。耶稣每次教导人，讲嘅都系天父想我哋知道嘅事。（约翰福音1:1,14）耶稣经常传讲上帝嘅王国，亦即系弥赛亚所领导嘅天上政府（弥赛亚王国）。喺呢个政府里面，除咗君王耶稣基督之外，仲有14万4000人同耶稣一齐作王。既然耶稣讲论上帝嘅王国比任何话题都要多，我哋唔系好应该仔细探讨吓呢个重要嘅题目咩？（启示录5:9,10；14:1-3；20:6）等我哋嚟睇吓耶稣点解经常传讲上帝嘅王国。

4． 我哋点样睇得出上帝嘅王国喺耶稣心目中非常重要？

⁴ 喺耶稣心里面，上帝嘅王国非常重要。我哋点知呢？言谈就好似一扇窗噉，可以将人内心嘅谂法显露出嚟。换 句话嚟讲，通过我哋嘅言谈，其他人可以睇出我哋心里面重视嘅系乜嘢。耶稣话：“心所充满嘅，口就讲出嚟。”（马太福音12:34）耶稣一有机会就传讲上帝嘅王国。喺四福音原文里面，译做“王国”嘅呢个词出现咗百几次，其中大部分都系耶稣讲嘅。耶稣传道嘅主题就系上帝嘅王国，佢话：“我亦要喺其他城宣扬上帝王国嘅好消息，因为我系为呢件事奉差而嚟嘅。”（路加福音4:43）耶稣复活之后，继续向门徒讲论上帝嘅王国。（使徒行传1:3）从呢一点睇出，耶稣好重视上帝嘅王国。佢心里面充满嘅，一定要讲。

5-7． （甲）我哋点知道，喺耶和华心里面佢嘅王国非常重要？请解释。（乙）我哋点样做，就表明自己重视上帝嘅王国呢？

⁵ 喺耶和华心里面，王国非常重要。点解噉讲呢？耶和华差派佢嘅独生子耶稣嚟到地上，耶稣所讲所教嘅，全部都嚟自耶和华。（约翰福音7:16；12:49,50）福音书记述咗耶稣嘅生平事迹同埋传道工作，四位执笔者所写嘅，亦都出于耶和华。不妨谂吓，呢个意味住乜嘢呢？

⁶ 假设你正喺度准备紧一本家庭相簿，你想放入去嘅相太多，相簿放唔落。你会点做呢？你一定会精心挑选，净系将自己觉得重要嘅相放入去。喺某种意义上嚟讲，四福音就好似一本相簿，等我哋可以清楚认识耶稣。耶和华冇启示四福音嘅执笔者将耶稣喺地上嘅一切言行都写落嚟。（约翰福音20:30；21:25）喺耶和华嘅圣灵引导下，四位执笔者只系将重要嘅细节记录喺福音书里面，可以令我哋明白耶稣嚟到地上传道嘅目的，亦都俾我哋知道耶和华最重视嘅系乜嘢。（提摩太后书3:16,17；彼得后书1:21）既然福音书记载嘅，大部分都系耶稣教导嘅王国真理，噉样可以睇出喺耶和华心里面，佢嘅王国非常重要。耶和华系几咁希望我哋全面认识佢嘅王国呢！

⁷ 每个人都应该问吓自己：“喺我心里面，上帝嘅王国有几重要呢？”如果我哋重视上帝嘅王国，就会乐意学习耶稣所教嘅王国真理，努力了解下面问题嘅答案：上帝嘅王国点解非常重要？王国嘅来临意味住乜嘢？王国几时来临呢？

8． 耶稣喺模范祷告当中，概述咗上帝会通过王国成就边啲重要嘅事？

⁸ 喺模范祷告里面，耶稣简洁有力噉概述咗上帝王国要成就嘅事，等我哋明白呢个王国有几咁重要。耶稣喺祷告里面祈求嘅七件事，头三件系同耶和华嘅旨意有关嘅：愿 上帝嘅名彰显为圣；愿上帝嘅王国来临；愿上帝嘅旨意喺地上实现，好似喺天上一样。（请读马太福音6:9,10）呢三件事密切相关。耶和华会通过弥赛亚所统治嘅王国嚟彰显自己嘅圣名，同埋实现自己嘅旨意。

9,10． （甲）上帝嘅王国来临意味住乜嘢？（乙）你期待圣经嘅边个应许实现？

⁹ 上帝嘅王国来临意味住乜嘢？我哋祈求上帝嘅王国来临，就等于求呢个王国采取行动，解决一切问题。上帝嘅王国一到，就会铲除目前嘅邪恶制度，包括世上嘅所有政府，而且全权接管大地，带嚟正义嘅新世界。（但以理书2:44；彼得后书3:13）喺上帝王国嘅统治之下，全球会变成乐园。（路加福音23:43）凡系蒙上帝记念嘅人，都会复活，同亲友重聚。（约翰福音5:28,29）服从上帝嘅人会恢复完美，得享永生。（启示录21:3-5）最终，地上嘅一切会同天上嘅完全配合，彻底实现耶和华上帝嘅旨意。你系咪好期待圣经嘅应许实现呢？请记住，你每次祈求上帝嘅王国来临，就等于喺度求呢啲应许实现嘞。

¹⁰ 好明显，模范祷告当中“愿你嘅王国来临”呢句话仲未完全实现。世上嘅政府依然喺度统治紧，正义嘅新世界仲未嚟到。不过好消息系，上帝嘅王国已经建立咗嘞，呢本书第2章会讨论呢一点。噉样，上帝嘅王国系几时建立嘅呢？会喺几时来临呢？等我哋嚟睇吓耶稣点讲。

11． 关于上帝王国几时建立，耶稣嘅话表明乜嘢？

¹¹ 耶稣表明，上帝嘅王国唔会喺公元1世纪建立，呢个同当时门徒所期待嘅唔一样。（使徒行传1:6）下面会分析两个比喻，耶稣讲出呢两个比喻嘅时间相隔唔到两年。

12． 小麦同毒麦嘅比喻点样表明，上帝嘅王国唔会喺公元1世纪建立？

¹² 小麦同毒麦嘅比喻 （请读马太福音13:24-30）公元31年春天，耶稣对群众讲咗小麦同毒麦嘅比喻。后来，佢对门徒解释比喻嘅含意。（马太福音13:36-43）下面系呢个比喻嘅要点同含意：使徒去世之后，魔鬼就喺小麦（“王国之子”，即受膏基督徒）当中撒落毒麦（假基督徒）。小麦同毒麦会一齐成长，直到收割嘅时候，亦即系“呢个制度嘅末期”。收割时期开始之后，首先会将毒麦收集起嚟，然后再将小麦收入仓库里面。呢个比喻表明，上帝嘅王国唔会喺公元1世纪建立，而系喺成长嘅时期结束之后先至会建立。事情嘅发展显示，1914年庄稼已经成熟，收割时期开始嘞。

13． 耶稣用乜嘢比喻讲明，佢返翻天上之后唔会马上登基成为弥赛亚王国嘅君王？

 ¹³ 银元嘅比喻 （请读路加福音19:11-13）公元33年，耶稣最后一次去耶路撒冷，喺途中讲咗银元嘅比喻。听耶稣讲话嘅人当中，有啲人以为耶稣一到耶路撒冷就会建立王国。为咗纠正呢个错误嘅观点，耶稣用比喻解释，仲有一段好长嘅时间上帝嘅王国先至会建立。佢将自己比喻成一个要去远方“执掌王权”嘅“贵族”。 a耶稣所讲嘅“远方”系指天上，意思系佢会到天父嗰度领受王权。不过，耶稣知道自己返到天上之后，唔会即刻登基做弥赛亚王国嘅君王，而系会坐喺上帝嘅右边，直到指定嘅时候。事实表明，耶稣等咗千几年。（诗篇110:1,2；马太福音22:43,44；希伯来书10:12,13）

14． （甲）耶稣点样回答四位使徒嘅问题呢？（乙）关于耶稣嘅临在同埋上帝嘅王国，我哋睇到预言陆续应验，可以明白啲乜嘢呢？

¹⁴ 耶稣俾人处死嘅前几日，四位使徒嚟问佢：“你嘅临在同呢个制度嘅末期，有咩征象呢？”（马太福音24:3；马可福音13:4）为咗回答佢哋嘅问题，耶稣讲咗个预言。呢个预言包含好多细节，记载喺马太福音24同25章。耶稣详细噉描述咗末期嗰时地上会有乜嘢大事发生，呢啲事构成咗 佢“临在”嘅综合征象。喺耶稣临在嘅开始，上帝嘅王国就会建立；到佢临在嘅高潮，上帝嘅王国就会来临。有大量嘅证据显示，自从1914年以来，耶稣预告嘅事正喺度陆续应验。 b所以，1914年系耶稣临在嘅开始，亦都系上帝王国建立嘅年份。

15,16． “呢一代人”系指边啲人呢？

¹⁵ 噉上帝嘅王国几时会来临呢？耶稣并冇透露具体嘅时间。（马太福音24:36）不过，佢嘅话令我哋深信，上帝嘅王国好快就会来临。耶稣表明，“呢一代人”一定会先睇到末世嘅征象应验，然后上帝嘅王国先至会来临。（请读马太福音24:32-34）“呢一代人”系指边啲人呢？等我哋嚟仔细睇吓耶稣点样讲。

¹⁶ “呢一代人” 耶稣提到“呢一代人”嗰时，谂到嘅系唔系嗰啲仲未归信嘅人呢？唔系。当时听耶稣讲话嘅系边啲人呢？系几位使徒。佢哋私底下嚟见耶稣，耶稣就讲咗关于末世征象嘅预言。（马太福音24:3）之后冇几耐，使徒就要受圣灵膏立。请再留意经文嘅上下文。耶稣提到“呢一代人”之前，话：“你哋要从无花果树嘅比喻学个道理：树嘅新枝一发嫩长叶，你哋就知道夏天近嘞。照样，你哋睇见呢一切事，就应该知道佢近在门口嘞。”既然系噉，边啲人会睇到耶稣预告嘅事，明白其中嘅含意，又知道耶稣“近在门口”呢？就系耶稣嘅受膏门徒，而唔系嗰啲仲未归信嘅人。所以，耶稣提到“呢一代人”嗰时，谂到嘅系佢嘅受膏门徒。

17． “一代人”同“呢一切”系指乜嘢？

¹⁷ “呢一切必定先发生，呢一代人先至会消逝。” 呢句话会点样实现呢？要回答呢个问题，我哋就需要明白“一代人”同“呢一切”系指乜嘢。喺圣经里面，“一代人”通常系指某个时期唔同日子出生嘅人，佢哋虽然年纪唔一样，不过就有一段时间同时存在。“一代人”存在时间唔会延续太耐，一定会结束。（出埃及记1:6）经文讲嘅“呢一切”，系指耶稣预告佢临在期间所发生嘅一切事，就系从佢临在嘅开始（1914年）到佢临在嘅高潮（“大患难”）呢段时间之内发生嘅事。（马太福音24:21）

18,19． （甲）我哋应该点样理解耶稣所讲嘅“呢一代人”呢？（乙）我哋可以得出乜嘢结论？

¹⁸ 噉我哋应该点样理解耶稣所讲嘅“呢一代人”呢？“呢一代人”包括两群受膏基督徒。第一群受膏基督徒睇到末世征象喺1914年开始应验。第二群受膏基督徒同第一群喺末 世嘅一段时间同时存在，系同时代嘅人。大患难爆发嗰时，第二群受膏基督徒当中仲会有啲人喺地上。呢两群基督徒都属于“呢一代人”，佢哋受膏之后，有一段时间同时喺地上生活。 c

¹⁹ 我哋可以得出乜嘢结论呢？表明耶稣临在执掌王权嘅征象，喺世界各地都已经清楚睇得出嚟。“呢一代人”当中，仲喺地上嘅受膏基督徒都已经上咗年纪。大患难爆发嗰时，佢哋当中有啲人仲会喺地上。所以，我哋可以肯定，上帝嘅王国好快就会来临，统治全地。到时，模范祷告里面“愿你嘅王国来临”呢句话就会完全实现。将来可以亲眼睇见呢件事发生，系几咁振奋人心呢！

20． （甲）呢本书主要论述乜嘢？（乙）下一章会讲乜嘢？

²⁰ 千祈唔好忘记耶和华嘅吩咐。乜嘢吩咐呢？就系要听从耶稣。耶和华从天上表明耶稣系佢嘅儿子之后，就吩咐话：“要听从佢”。身为真基督徒，我哋乐意按照耶和华嘅指示去做。关于上帝王国嘅真理，耶稣所讲所教嘅到底系乜嘢，我哋唔系好想知道咩？呢本书主要论述上帝嘅王国已经成就同埋将要成就嘅事。下一章会讲吓，上帝嘅王国喺天上建立前后有乜嘢事发生。