第1章
上帝系边个？
1,2．人经常会谂乜嘢问题呢？
小朋友好钟意问问题。可能你已经解释咗俾佢听，不过，佢仲系会问：“点解呀？”就算你尽力回答佢嘅问题，佢都系会问：“点解嘅？”
2 无论我哋系咩年纪，都会谂好多问题。例如，我哋会谂食乜嘢、着乜嘢、买乜嘢。又或者我哋曾经谂过关于人生同未来呢啲重要嘅问题。但系当我哋揾唔到令自己满意嘅答案嗰阵，就可能会放弃，唔再揾答案。
3．点解好多人觉得好难揾到某啲重要问题嘅答案？
3 我哋所谂嘅一啲重要问题，究竟可唔可以揾到答案呢？有啲人觉得可以，但系唔知喺边度揾。有啲人认为圣经有答案，但系觉得圣经好难明，佢哋认为只有宗教导师先至理解圣经。仲有啲人觉得，承认自己唔知道答案系好冇面嘅事。你觉得呢？
4,5．你谂过乜嘢重要嘅问题呢？点解你应该继续揾答案？
4 你可能想知道一啲问题嘅答案，例如：点解我会生存喺呢个世上？人死咗之后会去边度？究竟有冇上帝呢？如果有嘅话，佢系点样嘅呢？著名嘅导师耶稣话：“你哋要不断恳求，就一定会俾你哋；不断寻求，就一定会揾到；不断敲门，就一定会开门俾你哋。”（马太福音7:7）如果你仲未揾到满意嘅答案，千祈唔好放弃。
5 如果你“不断寻求”，就一定可以喺圣经里面揾到答案。（箴言2:1-5）而且呢啲答案都唔难明白。呢啲知识唔单止帮你而家生活得更快乐，仲可以使你确信会有一个美好嘅未来。等我哋先嚟讨论一个困扰好多人嘅问题。
上帝关唔关心我哋？
6．点解有啲人认为上帝根本就唔关心人呢？
6 好多人认为上帝根本就唔关心人。佢哋觉得，如果上帝真系关心我哋嘅话，世界就唔会好似而家噉。呢个世界到处都充满战争、仇恨同苦难，而且人会病，会受苦，仲会死亡。所以好多人自然会谂：“如果上帝真系关心我哋，点解佢唔阻止呢啲事发生呢？”
7．（甲）宗教领袖点样误导人，使人以为上帝好残忍？（乙）当坏事发生嘅时候，点解我哋唔应该怪责上帝呢？
7 有时宗教领袖会误导人，使人以为上帝好残忍。当发生灾难嘅时候，佢哋话系上帝嘅旨意，上帝用呢啲事嚟考验人。噉讲其实等于怪责上帝。不过圣经话俾我哋知坏事绝对唔系嚟自上帝嘅。雅各书1:13话，上帝唔会用坏事嚟考验人。经文话：“人受考验嘅时候唔应该话：‘系上帝考验我。’因为上帝既唔能够被恶事考验，佢自己亦都唔会用恶事考验人。”意思即系话，虽然上帝冇阻止坏事发生，但系呢啲事绝对唔系佢造成嘅。（请读约伯记34:10,12）等我哋嚟睇吓一个例子。
8,9．我哋有难题嘅时候点解唔应该怪责上帝呢？请举例。
8 假设一个年轻人同父母一齐住。佢爸爸好爱佢，仲一直教佢做啱嘅事。后来，呢个儿子成年之后变得好忤逆，仲离家出走。佢喺外面做咗好多坏事，惹咗好多麻烦。发生噉嘅事，系咪应该怪佢爸爸当初冇阻止个仔离家出走呢？当然唔应该！（路加福音15:11-13）上帝就好似呢个爸爸噉，佢冇阻止人类背叛佢同埋做坏事。所以当坏事发生嘅时候，我哋要记住：呢啲坏事绝对唔系上帝造成嘅，怪责上帝并唔公平。
9 上帝冇阻止坏事发生系有充分嘅理由，呢本书第11章会话俾我哋知理由系乜嘢。但系可以肯定嘅系上帝好爱我哋，人有难题嘅时候唔应该怪责佢。事实上，只有佢先可以解决呢啲难题。（以赛亚书33:2）
10．点解我哋可以肯定，上帝一定会消除所有坏人坏事呢？
10 上帝系圣洁嘅。（以赛亚书6:3）即系话，上帝系纯洁无瑕、毫无邪恶嘅，所以我哋可以信赖佢。人就唔一样，人有时会犯错。再讲，就算最诚恳嘅统治者都冇能力将坏人造成嘅破坏完全修复，因为人嘅能力同上帝系冇得比嘅。上帝唔单止有能力，而且佢仲决意要将坏人造成嘅所有破坏完全修复。佢会将一切坏人坏事永远铲除。（请读诗篇37:9-11）
人受苦时上帝有咩感觉？
11．你受苦嘅时候，上帝有咩感觉呢？
11 上帝见到呢个世界嘅情况同埋你面对嘅难题，佢有咩感觉呢？圣经话上帝“喜爱公正”。（诗篇37:28）上帝好关心是非对错。佢唔钟意见到人受苦。圣经记载，以往地上到处都系坏人坏事，当时上帝感到“痛心”。（创世记6:5,6）上帝见到人受苦嘅时候，佢嘅感觉从来都冇改变。（玛拉基书3:6）圣经话上帝好关心你。（请读彼得前书5:7）
圣经话，仁爱嘅耶和华系全宇宙嘅创造主
12,13．（甲）点解我哋有爱心呢种特质？我哋对世上嘅苦难有咩感觉？（乙）点解我哋可以肯定，上帝一定会消除所有苦难同唔公平嘅事？
12 圣经话我哋系照住上帝嘅形像创造嘅。（创世记1:26）意思系佢创造人嘅时候，使人同佢有相似嘅美好特质。上帝其中一种特质就系爱心。圣经话“上帝就系爱”。（约翰一书4:8）因为上帝有爱心，我哋亦都有爱心。例如，当你见到无辜嘅人受苦，你可能会好难过，上帝自然会更加难过。我哋点解可以肯定上帝一定会消除苦难呢？
13 试谂吓，如果你有能力，你会唔会消除呢个世界嘅一切苦难同唔公平嘅事？一定会，因为你有爱心。噉上帝呢？佢系全能嘅，而且好爱我哋，所以佢一定会终止所有苦难同唔公平嘅事。你可以相信，呢本书开头提到上帝讲嘅每一个承诺一定会实现！不过要对上帝嘅承诺有更大嘅信心，你就要多啲认识佢。
上帝希望你认识佢
如果你想同对方做朋友，你会话俾佢知你个名。上帝通过圣经话俾我哋知佢嘅名
14．上帝叫咩名？我哋点解要用呢个名嚟称呼佢？
14 如果你想同某个人做朋友，首先你会点做呢？你会话俾对方知你叫咩名。噉上帝有冇名呢？好多教会话佢嘅名就系叫“上帝”、“神”或者“主”，但系呢啲都唔系名嚟嘅，就好似“皇帝”或者“总统”，都只不过系衔头。上帝话俾我哋知佢个名叫耶和华。诗篇83:18话：“愿人人都知道，你嘅名系耶和华，唯有你系统治全地嘅至高者。”事实上，上帝个名喺圣经出现咗几千次，表明耶和华好想你知道同埋用呢个名嚟称呼佢，亦都表明佢好想同你做朋友。
15．耶和华呢个名系咩意思？
15 耶和华呢个名有好特别嘅含意，意思系上帝可以实现佢所有嘅承诺同旨意。只有耶和华先配得上呢个名。 *
16,17．关于耶和华，以下嘅衔头有咩含意：（甲）“全能嘅上帝”？（乙）“永恒嘅王”？（丙）“创造主”？
16 启示录15:3话：“耶和华全能嘅上帝啊，你嘅作为又伟大又奇妙。永恒嘅王啊，你嘅道路又正义又真实”。“全能嘅上帝”意味住耶和华系全宇宙最有能力嘅。“永恒嘅王”意味住佢一直都存在。诗篇90:2话，上帝从永恒嘅以往，到永恒嘅未来都系存在嘅。真系令人惊叹！
17 唯独耶和华系创造主。启示录4:11话：“耶和华我哋嘅上帝，你配得荣耀、尊崇、力量，因为你创造咗一切，一切都系因为你嘅旨意先至存在，先至被创造嘅。”无论系天上嘅星星，地上嘅花草树木，抑或海里面嘅鱼，你所谂到嘅一切都系耶和华创造嘅！
你能唔能够成为上帝嘅朋友？
18．点解有啲人觉得，佢哋永远都冇可能做上帝嘅朋友？圣经又点讲呢？
18 知道耶和华有咁多美好嘅特质之后，有啲人可能会谂：“耶和华咁有能力，地位咁高，我哋又见唔到佢，佢点可能关心我呢？”上帝系咪想我哋有噉嘅谂法呢？当然唔系！耶和华好想亲近我哋。圣经话上帝“离我哋各人都唔远”。（使徒行传17:27）上帝想你亲近佢，佢亦都承诺“会亲近”你。（雅各书4:8）
19．（甲）你点样做就可以成为耶和华嘅朋友呢？（乙）你最钟意耶和华边个特质？
19 你点样做就可以成为耶和华嘅朋友呢？耶稣话：“佢哋不断吸收知识，认识你呢位独一嘅真神，而且认识你所差嚟嘅耶稣基督，就可以有永生。”（约翰福音17:3）你继续学习圣经，就可以加深认识耶和华同耶稣，并且有机会得享永生。耶和华有好多美好嘅特质，例如，圣经话：“上帝就系爱”。（约翰一书4:16）圣经仲话耶和华 “系有慈悲有怜恤之心嘅上帝，唔轻易发嬲，满怀忠贞之爱，信守真理”。（出埃及记34:6）耶和华“又良善，又乐意宽恕人”。（诗篇86:5）上帝唔单止有耐心，仲好忠贞。（彼得后书3:9；启示录15:4）你阅读圣经就会了解到更多耶和华嘅美好特质。
20-22．（甲）你睇唔到耶和华，噉点样亲近佢呢？（乙）如果有人唔想你继续学习圣经，你应该点样做呢？
20 既然你睇唔到耶和华，噉点样亲近佢呢？（约翰福音1:18；4:24；提摩太前书1:17）通过阅读圣经，你会发觉耶和华好真实。（诗篇27:4；罗马书1:20）你越了解耶和华，就会越爱佢，而且感觉同佢越来越亲近。
一个爸爸会好爱佢嘅仔女，而我哋嘅天父就更加爱我哋
21 圣经话耶和华系我哋嘅天父。（马太福音6:9）佢赐生命俾我哋，亦都希望我哋过最幸福嘅生活，就好似仁爱嘅爸爸希望儿女幸福一样。（诗篇36:9）圣经话你系可以同耶和华做朋友嘅。（雅各书2:23）试谂吓，全宇宙嘅创造主耶和华上帝想你做佢嘅朋友，你有咩感觉呢？
22 可能会有人出于好意劝你唔好学圣经，原因可能系佢哋唔想你改变信仰。千祈唔好俾任何人阻止你成为耶和华嘅朋友，同佢建立世上最宝贵嘅友谊。
23,24．（甲）点解你应该不断问问题呢？（乙）下一章我哋会讨论乜嘢？
23 你学习圣经嘅时候有唔明白嘅地方，唔使觉得唔好意思提问或者寻求帮助。耶稣话我哋要谦卑，好似小朋友噉。（马太福音18:2-4）小朋友会问好多问题，因为佢哋想知道答案，耶和华亦都好想你揾到问题嘅答案。你可以点做呢？要认真学习圣经，噉就可以肯定自己学到嘅系真理。（请读使徒行传17:11）
24 认识耶和华最好嘅方法就系学习圣经。下一章会帮助你明白，点解话圣经系独一无二嘅。
