第18章
我应唔应该献身受浸？
1．学习呢本书之后，你或者会谂乜嘢问题？
你通过呢本书能够学到好多圣经真理。例如，永生嘅应许、人死后嘅情况同复活嘅希望。（传道书9:5；路加福音23:43；约翰福音5:28,29；启示录21:3,4）你可能开始参加耶和华见证人嘅聚会，而且相信佢哋系真正崇拜上帝嘅。（约翰福音13:35）你可能同耶和华建立紧亲密嘅友谊，决心事奉佢。不过，你或者会谂：要事奉上帝，我应该点做呢？
2．一个埃塞俄比亚人点解想受浸？
2 公元一世纪，一个埃塞俄比亚人都谂过类似嘅问题。耶稣复活之后，佢嘅门徒腓力向呢个人传道，用经文向佢证明耶稣就系弥赛亚。呢个埃塞俄比亚人因为深受圣经嘅真理感动，就即刻话：“请睇，呢度有一潭水，有乜嘢阻止我受浸呢？”（使徒行传8:26-36）
3．（甲）耶稣吩咐门徒做乜嘢？（乙）基督徒应该点样受浸？
3 圣经清楚指出，人想事奉耶和华就一定要受浸。耶稣吩咐门徒，话：“你哋要去，使所有国族嘅人做我嘅门徒，……为佢哋施浸”。（马太福音28:19）耶稣受浸为我哋树立榜样。佢受浸嘅时候，唔系叫人喺佢头上洒啲水，而系整个人完全浸入水里面。（马太福音3:16）今日，基督徒受浸都应该全身浸入水里面。
4．你受浸就表明乜嘢？
4 你受浸就表明自己真系好想事奉上帝，成为佢嘅朋友。（诗篇40:7,8）可能你会谂：我点样先符合资格受浸呢？
要有知识同信心
5．（甲）你受浸之前需要点做？（乙）点解参加基督徒聚会好重要？
5 你受浸之前，需要通过学习圣经认识耶和华同耶稣。（请读约翰福音17:3）不过，只系噉样做系唔够嘅。圣经话，你要对耶和华嘅旨意“充满确切嘅知识”。（歌罗西书1:9）耶和华见证人嘅聚会可以帮助你加深认识耶和华，更加亲近佢。所以，经常参加聚会系好重要嘅。（希伯来书10:24,25）
受浸之前，你需要学习圣经
6．受浸之前，你需要有几多圣经知识呢？
6 当然，耶和华冇要求你精通圣经先可以受浸，就正如佢冇要求嗰个埃塞俄比亚人精通圣经先可以受浸。（使徒行传8:30,31）事实上，上帝嘅知识系永远都学唔完嘅。（传道书3:11）不过你受浸之前，起码要认识同相信圣经嘅基本教义。（希伯来书5:12）
7．研读圣经对你有乜嘢帮助？
7 圣经话：“人冇信心，就唔能够赢得上帝嘅喜悦”。（希伯来书11:6）所以，受浸之前你一定要有信心。圣经话，古代有啲哥林多人听到耶稣嘅门徒传讲嘅信息，结果就“相信，受咗浸”。（使徒行传18:8）同样，研读圣经可以帮助你培养信心，使你深信上帝嘅应许，亦确信耶稣嘅赎价能够拯救人。（约书亚记23:14；使徒行传4:12；提摩太后书3:16,17）
向人传讲圣经嘅真理
8．点解你想同人分享自己所学到嘅圣经知识？
8 你学习圣经一段时间之后，发觉圣经真理改善咗你嘅生活，信心就会越来越强，而且仲好想同人分享你所学到嘅圣经知识。（耶利米书20:9；哥林多后书4:13）噉你想同边个分享呢？
你有信心，就会向人传讲自己嘅信仰
9,10．（甲）你可以先同边个分享圣经知识呢？（乙）如果你想同会众嘅弟兄姊妹一齐传道，就应该点样做？
9 你可能想同家人、朋友、邻居或者同事分享你所学到嘅圣经知识，你噉样做非常好，不过记得要表现仁慈同尊重嘅态度。如果你想同会众嘅弟兄姊妹一齐传道，就可以话俾同你学习圣经嘅见证人知。如果佢觉得你已经准备好，而且生活符合圣经嘅标准，噉你哋就会一齐同会众嘅两位长老见面。
10 点解要同两位长老见面呢？佢哋想知道你系咪明白圣经嘅基本教义，有冇按照圣经嘅标准生活，而且系咪想成为耶和华见证人。长老有责任照顾会众嘅每一位成员，包括你在内，所以你唔使担心要同佢哋会面。（使徒行传20:28；彼得前书5:2,3）会面之后，长老会通知你系咪可以开始参加会众嘅传道工作。
11．参加会众嘅传道工作之前，点解作出调整咁重要？
11 长老可能会同你讲，为咗符合资格参加会众嘅传道工作，你仲有边啲方面需要调整。点解调整咁重要呢？因为我哋传道嘅时候，代表嘅系耶和华，所以我哋嘅生活方式都要荣耀佢。（哥林多前书6:9,10；加拉太书5:19-21）
悔改同回头
12．点解人人都需要悔改？
12 受浸之前你仲要做一件事。使徒彼得话：“你哋要悔改、回头，使你哋嘅罪得以抹去”。（使徒行传3:19）悔改系咩意思？就系对自己以往所做嘅错事诚心懊悔。生活放荡嘅人当然需要悔改，不过就算相当正直嘅人亦都要悔改。因为每个人都有罪，都需要上帝嘅宽恕。（罗马书3:23；5:12）
13．“回头”系乜嘢意思呢？
13 只系对自己以往所做嘅错事感到后悔系咪就够呢？唔系嘅。使徒彼得话你仲需要“回头”，即系话你要舍弃以前嘅生活方式，开始做啱嘅事。举个例，假设你去紧一个从未去过嘅地方，途中你发觉去紧嘅方向系错嘅。你会点做呢？你一定会停低，然后返转头，行翻正确嘅方向。同样，你学习圣经之后，可能发觉自己以往嘅生活方式需要调整，噉你就要“回头”，作出必要嘅改变，然后开始做正确嘅事。
决定献身俾上帝
你系咪已经向耶和华承诺一生事奉佢？
14．你可以点样献身俾上帝？
14 受浸之前嘅另一个重要步骤，就系将自己献身俾耶和华。如果你决定献身俾耶和华，就可以通过祷告向上帝承诺一生唯独崇拜佢，将佢嘅旨意放喺生活嘅第一位。（申命记6:15）
15,16．乜嘢会推动一个人献身俾上帝？
15 承诺一生唯独事奉耶和华，就好似你承诺同自己嘅爱人厮守终生一样。试谂吓，一对男女谈恋爱，男方越了解女方就越爱佢，好想同佢结婚。虽然呢个男子知道结婚之后要负起更多责任，但由于深爱对方，所以愿意作出结婚嘅承诺。
16 同样，你越认识耶和华，就会越爱佢，越想竭尽全力事奉佢。呢种爱会推动你喺祷告中作出承诺事奉佢。圣经话，边个想跟从耶稣就要承认“唔再拥有自己”。（马可福音8:34）噉系乜嘢意思呢？呢个意味住凡事先服从耶和华，将耶和华想我哋做嘅事放喺首位，甚至比满足自己嘅欲望或者追求人生目标更重要。（请读彼得前书4:2）
克服疑虑
17．点解有啲人唔敢献身俾耶和华？
17 有啲人担心自己唔能够贯彻始终，履行献身嘅誓愿。佢哋唔想令耶和华失望，所以唔敢献身俾佢；又或者佢哋觉得冇献身俾耶和华，就唔使向佢负责，所以不如唔献身仲好。
18．乜嘢可以帮助你克服疑虑，唔使担心会令耶和华失望？
18 对耶和华嘅爱可以帮助你克服疑虑，唔使担心会令佢失望。因为你爱上帝，就会尽力履行献身嘅誓愿。（传道书5:4；歌罗西书1:10）你唔会觉得遵行上帝嘅旨意系好困难嘅事。使徒约翰话：“我哋遵守上帝嘅诫命，就系爱佢嘞，况且佢嘅诫命并唔系沉重嘅负担”。（约翰一书5:3）
19．对于献身俾耶和华，点解你唔应该过度忧虑？
19 你唔需要十全十美先至献身俾耶和华。佢从来都唔会对人要求过高。（诗篇103:14）佢会帮助你做正确嘅事。（以赛亚书41:10）你要全心信赖耶和华，“佢必修直你嘅路”。（箴言3:5,6）
口里宣扬就可以得救
20．你献身俾上帝之后，下一步系乜嘢？
20 你系咪已经准备好献身俾耶和华？你献身俾耶和华之后，下一步就系受浸。
21,22．你可以点样“口里宣扬”自己嘅信念？
21 如果你已经献身俾耶和华，打算受浸，就要通知会众嘅长老团协调人。佢会安排几位长老同你一齐重温圣经嘅基本教义。如果佢哋认为你符合资格受浸，就会通知你喺下一个耶和华见证人嘅分区或者区域大会受浸。喺大会里面，一位讲者会讲解浸礼嘅意义，然后会请准备受浸嘅人回答两个简单嘅问题。你回答呢啲问题，就系“口里宣扬”自己嘅信念。（罗马书10:10）
22 之后，你就可以受浸嘞。受浸嘅时候，你需要全身浸入水里面。通过浸礼，你公开表明自己已经献身俾耶和华，成为耶和华嘅见证人。
浸礼代表乜嘢
23．“奉父亲、儿子、圣灵嘅名”受浸系乜嘢意思？
23 耶稣吩咐门徒要“奉父亲、儿子、圣灵嘅名”受浸。（请读马太福音28:19）系乜嘢意思呢？意思即系你承认耶和华嘅权力同地位，亦都承认耶稣喺上帝旨意中所担任嘅角色，以及上帝点样运用圣灵去实现佢嘅旨意。（诗篇83:18；马太福音28:18；加拉太书5:22,23；彼得后书1:21）
你受浸，就系公开表明自己想遵行上帝嘅旨意
24,25．（甲）浸礼代表乜嘢？（乙）下一章会讨论乜嘢问题？
24 浸礼具有重要嘅象征意义。你浸入水里面，就象征已经舍弃以前嘅生活方式，好似以往嘅你已经死去一样。你从水里面出嚟，就意味住从今以后你会按照耶和华嘅旨意生活。要记得，你唔系将自己献俾某个人、某个组织或者某份工作，而系将一生献俾耶和华。
25 献身受浸会使你同上帝嘅关系更加亲密。（诗篇25:14）不过，唔系话一个人只要受咗浸就会得救。使徒保罗话我哋仲要“不断努力，完成使你哋得救嘅工作”。（腓立比书2:12）浸礼只系一个开始。噉你点先至可以继续亲近耶和华呢？下一章会解答呢个问题。
