第2章
圣经——嚟自上帝嘅书
1,2．圣经呢份嚟自上帝嘅礼物点解好特别？
有个朋友想俾个惊喜你，于是佢送份礼物俾你。你会有咩感觉呢？你一定好想即刻睇吓系咩礼物。你个朋友咁有心，你实会好开心同埋多谢佢。
2 圣经系一份嚟自上帝嘅礼物。圣经独一无二，里面包含喺其他地方揾唔到嘅信息。例如，圣经话俾我哋知上帝创造咗天地同第一对男女，仲有好多原则可以帮助我哋应付难题。通过圣经，我哋仲可以学到，上帝会点样实现佢对地球嘅旨意，使地球嘅情况得以好转。圣经真系一份好特别嘅礼物！
3．通过学习圣经，你会知道乜嘢？
3 通过学习圣经，你会知道上帝好想同你做朋友。你越认识佢，你同佢嘅关系就会越亲密。
4．喺发行量方面，圣经有咩令人惊叹嘅地方？
4 圣经已经被翻译成超过3200种语言，发行量高达几十亿。全世界超过百分之90嘅人可以用自己嘅语言阅读圣经。平均每个星期就有超过一百万本圣经分发出去！圣经的确与众不同。
5．点解话圣经系上帝“启示”嘅呢？
5 圣经系“上帝用圣灵启示嘅”。（请读提摩太后书3:16）但系有啲人可能会谂：“既然圣经系人写嘅，噉点解话系嚟自上帝嘅呢？”圣经话：“人受圣灵感动［或指引］，将上帝嘅话讲出嚟”。（彼得后书1:21）就好似一个老板叫秘书写一封书信，边个先系呢封书信嘅作者呢？系老板，而唔系秘书。同样，圣经嘅作者系上帝，而唔系上帝任用嚟写圣经嘅人。上帝指引佢哋写低佢嘅谂法。圣经的确系“上帝嘅话语”。（帖撒罗尼迦前书2:13）——请睇附注2
《圣经新世界译本》已经有好多种语言版本
圣经准确可靠
6,7．点解话圣经各部分互相呼应呢？
6 圣经足足写咗1600几年。写圣经嘅人生活喺唔同嘅时代，受教育嘅程度各有不同。例如其中一位系医生，其他嘅仲有农民、渔夫、牧羊人、先知、法官同埋君王。虽然圣经系通过唔同背景嘅人写嘅，但系圣经各部分互相呼应，都系围绕住同一个主题。 *
7 圣经嘅第一卷书解释咗世界嘅难题系点样开始嘅，而最后嗰卷就话俾我哋知，上帝会点样解决呢啲难题，使地球成为乐园。圣经嘅内容包含咗人类几千年嘅历史，呢啲记载帮我哋睇出上帝一定会成就佢嘅旨意。
8．请举例说明圣经喺科学上系准确嘅。
8 圣经唔系一本教人科学嘅书，但每逢内容涉及到科学，都总系准确无误。例如，喺人类仲未知道病毒同细菌会导致疾病之前，利未记好早就已经提到上帝教以色列人点样防止疾病嘅传播。圣经亦都好准确讲到地球系冇嘢托住嘅。（约伯记26:7）古代一般人都误以为地球系平嘅，但系圣经早就指出地球系圆嘅。（以赛亚书40:22）一本书如果嚟自上帝，唔系应该噉样咩？
9．写圣经嘅人咁诚实，帮我哋睇出乜嘢？
9 从历史角度嚟睇，圣经亦都准确可靠。好多记载历史嘅人唔会将事实准确噉记录落嚟。例如，佢哋未必会提及自己嘅民族打败仗。而写圣经嘅人就忠实噉写低自己嘅民族被打败，甚至仲会写埋自己犯嘅错。例如，执笔写民数记嘅摩西，话自己因为犯咗一个严重嘅错误而俾上帝惩罚。（民数记20:2-12）写圣经嘅人咁诚实，表明圣经呢本书真系嚟自上帝嘅。我哋确实可以相信圣经。
一本充满实用智慧嘅书
10．今日，点解圣经嘅建议依然好实用呢？
10 圣经系“上帝用圣灵启示嘅，对于教导、责备、纠正……都系有益嘅”。（提摩太后书3:16）今日，圣经嘅建议依然好实用。耶和华创造咗我哋，所以佢比我哋更了解我哋嘅谂法同感受。佢亦都好想我哋幸福快乐。上帝知道乜嘢对我哋最好，乜嘢会对我哋有害。
11,12．我哋可以喺圣经学到乜嘢实用嘅建议？
11 喺圣经嘅马太福音5至7章，耶稣话俾我哋知点样可以过得更加快乐，点样同人相处，点样祷告，同埋对金钱应该有点样嘅睇法。虽然呢啲建议喺大约2000年前写低，不过对我哋今日嚟讲仲系好实用。
12 喺圣经里面，耶和华仲提供咗好多原则，可以使我哋嘅家庭更加幸福，使我哋成为一个好员工，而且可以同其他人保持和睦嘅关系。无论我哋系咩人，住喺边度，有咩难题，圣经嘅原则都可以帮到我哋。（请读以赛亚书48:17）——请睇附注3
圣经嘅预言值得信赖
圣经嘅执笔者以赛亚预言巴比伦会被攻陷
13．以赛亚预言巴比伦会发生咩事？
13 好多圣经嘅预言都已经应验咗。例如，耶和华通过先知以赛亚预言巴比伦会被毁灭。（以赛亚书13:19）以赛亚好具体噉描述咗呢座城会点样被攻陷。虽然呢座城有坚固嘅城门同埋一条护城河，但系以赛亚预言河水会干涸，城门会敞开。攻城嘅人唔使战斗就攻入呢座城。以赛亚甚至预言攻陷巴比伦嘅人叫做居鲁士。（请读以赛亚书44:27－45:2）——请睇附注4
14,15．以赛亚嘅预言点样应验呢？
14 以赛亚写低呢个预言之后大约两百年，一支军队到达巴比伦准备攻城。边个带领呢支军队呢？正如预言所讲嘅，就系居鲁士，佢系波斯嘅皇帝。预言嘅其他细节亦都好快会一一应验。
15 攻城当晚，巴比伦人喺城里面举行紧一个盛大嘅晚宴。佢哋以为有高大坚固嘅城墙同护城河作为保护，就可以高枕无忧。而喺城外，居鲁士同佢嘅军队将河水改道，使水位下降，噉士兵就可以行过去。但系有咁高大嘅城墙，佢哋又点样入城呢？就好似预言所讲嘅一样，当时城门大开，所以士兵唔使战斗就攻占咗呢座城。
16．（甲）以赛亚预言巴比伦最终会点样？（乙）呢个预言有冇应验呢？
16 以赛亚预言巴比伦最终唔会再有人居住。佢话：“巴比伦一定会永无人烟，世世代代都冇家园［或冇人居住］”。（以赛亚书13:20）呢个预言有冇应验呢？古巴比伦城而家系一片废墟，位于伊拉克嘅巴格达以南80公里。直到今日，嗰度都冇人居住。耶和华的确“用毁灭嘅扫把”扫灭巴比伦。（以赛亚书14:22,23） *
巴比伦城嘅废墟
17．点解我哋可以相信上帝嘅承诺全部都会实现呢？
17 圣经咁多预言都准确应验，使我哋有理由相信圣经关于未来嘅应许都会实现。我哋可以肯定耶和华会信守承诺，使地球成为乐园。（请读民数记23:19）我哋有永生嘅希望，因为“喺悠悠历代以前，冇可能讲大话嘅上帝已经应许赐人永生”。（提多书1:2） *
圣经可以改变你嘅一生
18．保罗点样描述“上帝嘅话语”呢？
18 冇一本书好似圣经噉样独一无二。圣经各部分都互相呼应，喺科学同历史方面都准确无误，又提供实用嘅智慧，好多预言都已经准确应验。圣经对人嘅益处其实仲有好多，圣经其中一位执笔者保罗话：“上帝嘅话语系活嘅，系有力量嘅”。呢句话系咩意思呢？（请读希伯来书4:12）
19,20．（甲）圣经点样帮你了解自己？（乙）上帝将圣经呢份礼物送俾你，你可以点样表示感激呢？
19 圣经可以改变你嘅一生。圣经可以帮助你睇出自己嘅真正为人，仲可以帮助你了解自己真正嘅谂法同情感。例如，我哋可能觉得自己爱上帝，但系当我哋读圣经嘅时候，我哋学到真正嘅爱唔单止系一种感觉，亦都要有行动。如果要表明自己真系爱上帝，就要按圣经所讲嘅去做。
20 圣经确实系一本嚟自上帝嘅书。我哋应该要感激上帝送俾我哋呢份礼物。上帝好想你睇圣经，学习圣经，同埋培养对圣经嘅爱。要继续学习，噉你就会明白上帝对人类嘅旨意。下一章我哋会学到上帝对人类有咩旨意。
