第11章
点解会有咁多苦难？
1,2．好多人都会问乜嘢问题？
喺某个地方，一场地震几乎摧毁咗成个城市。一个枪手向教堂里面嘅人开枪，导致好多人伤亡。一个妈妈被癌症夺去生命，留低咗五个仔女。
2 发生灾难或者悲剧嘅时候，好多人都会问：“点解？”好多人都想知道点解呢个世界充满仇恨同苦难。你有冇谂过类似嘅问题？
3,4．（甲）哈巴谷问咗乜嘢问题？（乙）耶和华点样回应哈巴谷？
3 圣经记载，即使对上帝有坚定信心嘅人都曾经有类似嘅疑问。例如，先知哈巴谷曾经问耶和华：“你点解要我睇见坏事？你点解目睹苦难都坐视不理？点解我面前总有抢掠同暴行？点解经常有争吵打斗嘅事？”（哈巴谷书1:3）
4 哈巴谷书2:2,3记载咗上帝点样回应哈巴谷，上帝亦都承诺会纠正事态。耶和华深爱人类，圣经话：“佢关心你哋”。（彼得前书5:7）其实，上帝比我哋更加唔想见到人受苦。（以赛亚书55:8,9）既然系噉，等我哋一齐嚟探讨一个问题：点解世上会有咁多苦难？
点解世上会有咁多苦难？
5．对于人受苦，好多宗教导师点讲？圣经又点讲呢？
5 点解人会遭遇苦难？我哋可能听到唔同嘅解释。有人话系天意，而牧师、教士等就往往会话系上帝嘅旨意。有人认为我哋遭遇嘅每一件事，包括悲惨嘅事，都系上帝早就预定嘅，而且我哋永远都唔会知道人受苦嘅原因。甚至有啲人话某个人死，包括小朋友夭折，系因为上帝想佢哋上天堂同佢一齐。但系，呢啲全部都唔系真嘅，因为耶和华从来都唔会做恶事。圣经话：“上帝绝对唔会行恶，全能者绝对唔会唔公正”。（约伯记34:10）
6．点解好多人因为世上嘅苦难而责怪上帝？
6 好多人因为世上嘅苦难而责怪上帝，因为佢哋以为统治世界嘅系上帝。不过我哋喺第3章学过，统治紧世界嘅其实系魔鬼撒但。
7,8．点解世上会有咁多苦难？
7 圣经话“全世界都受嗰个恶者控制”。（约翰一书5:19）撒但系呢个世界嘅统治者，佢又凶狠又残暴，仲“迷惑咗普天下嘅人”。（启示录12:9）好多人嘅言行反映出撒但嘅精神，结果世界充满谎言、仇恨同残忍嘅事。
8 世上有咁多苦难嘅另一个原因系，亚当夏娃反叛上帝之后将罪遗传俾后代。因为罪嘅影响，人会做出伤害其他人嘅事。由于佢哋觉得自己比其他人优越，所以就产生仇恨、战争同欺凌嘅事。（传道书4:1；8:9）有时，人受苦嘅原因只系由于“时间同不可预见嘅遭遇”。（传道书9:11）人如果喺唔适当嘅时候身处喺唔适当嘅地方，就可能会发生意外。
9．我哋点知道，耶和华容许苦难发生系有原因嘅呢？
9 苦难从来都唔系耶和华促成嘅。佢唔需要为战争、罪恶同唔公平嘅事承担责任。地震、飓风同水灾等等嘅天灾亦都唔系耶和华造成嘅。不过你可能会问：“如果耶和华系宇宙中最有能力嘅，点解佢唔阻止呢啲事发生呢？”我哋知道上帝好爱人类，所以佢容许苦难发生，一定系有原因嘅。（约翰一书4:8）
点解上帝容许苦难发生
10．撒但点样指控耶和华？
10 魔鬼喺伊甸园误导亚当夏娃。撒但指控上帝，话佢唔系一个好嘅统治者，声称上帝保留咗啲好嘅嘢唔俾亚当夏娃。撒但想亚当夏娃相信佢先至系最好嘅统治者，佢哋根本唔需要上帝。（创世记3:2-5）——请睇附注27
11．我哋需要解答乜嘢问题？
11 亚当夏娃冇服从耶和华，佢哋反叛上帝，觉得可以自行决定是非对错。耶和华会点样证明叛徒系错嘅，而佢先至知道乜嘢对人类系最好呢？
12,13．（甲）点解耶和华冇即刻处决亚当夏娃？（乙）点解耶和华容许撒但做呢个世界嘅统治者，而且容许人类自行统治？
12 耶和华冇即刻处决亚当同夏娃。相反，上帝容许佢哋生儿育女。噉样，亚当夏娃嘅后代就有机会选择由边个嚟统治佢哋。耶和华嘅旨意系要完美嘅人遍满地面。无论魔鬼点样做，都唔能够阻止耶和华嘅旨意实现。（创世记1:28；以赛亚书55:10,11）
13 撒但质疑耶和华嘅时候，有亿万天使在场。（约伯记38:7；但以理书7:10）所以，耶和华俾时间撒但统治世界，系要证明撒但嘅指控系咪啱嘅。上帝亦都容许人类用一段时间嚟证明，喺撒但影响之下自行统治究竟会唔会成功。
14．过去几千年以来，人类嘅统治证明咗乜嘢？
14 几千年以来，人类一直自行统治，结果都系失败嘅。事实证明撒但讲大话。的确，人类真系好需要上帝嘅统治。先知耶利米讲得好啱：“耶和华啊，我清楚知道，世人唔能够掌握自己嘅道路，人行走亦无法确定该走嘅方向。”（耶利米书10:23）
点解耶和华容许苦难延续咁耐？
15,16．（甲）点解耶和华容许苦难延续咁耐？（乙）喺撒但统治世界期间，点解耶和华冇出手解决难题？
15 点解耶和华容许苦难延续咁耐？点解佢唔制止恶事发生呢？要证明撒但嘅统治会失败系需要时间嘅。人类尝试过形形色色嘅统治方式，全部都唔成功。虽然人类喺科技方面有唔少成就，不过贫穷、罪恶、战争同唔公平嘅事就越来越多。事实上，人类统治自己系唔可能成功嘅，我哋系需要上帝嘅统治。
16 撒但造成咁多难题，点解耶和华冇出手解决呢？如果佢噉样做，就表明佢支持撒但嘅统治。另外，人类会以为人统治人其实都行得通。不过呢个只系撒但讲嘅大话，而耶和华从来唔会讲大话，佢唔会做任何事助长撒但嘅谎言。（希伯来书6:18）
17,18．对于撒但所造成嘅难题，耶和华会点做？
17 撒但同人类造成嘅所有难题，耶和华有冇能力完全修复呢？当然有。冇任何事系上帝做唔到嘅。耶和华知道几时可以完全驳倒撒但嘅质疑。跟住，佢就会将地球恢复成为一个乐园，正如佢最初定意嘅噉样。“所有喺纪念墓入面嘅人”都会复活。（约翰福音5:28,29）人唔会再有疾病同死亡。耶和华会任用耶稣“粉碎魔鬼嘅作为”，修复撒但所造成嘅一切破坏。（约翰一书3:8）我哋真系应该感激耶和华对我哋表现耐心，喺佢采取行动之前，俾机会我哋认识佢，亦都使我哋有机会选择支持佢嘅统治权。（请读彼得后书3:9,10）即使我哋经历苦难，上帝都一定会帮助我哋保持忍耐。（约翰福音4:23；请读哥林多前书10:13）
18 耶和华冇强迫我哋接受佢嘅统治，反而赐俾人类自由意志。呢个宝贵嘅恩赐对我哋有乜嘢意义呢？跟住落嚟我哋会探讨一下。
你会点样运用自由意志？
19．耶和华赐俾我哋乜嘢宝贵嘅恩赐？点解我哋应该感激耶和华？
19 耶和华赐俾人自由意志，呢个宝贵嘅恩赐使我哋同动物有好大分别。动物按本能生活，而人类就可以选择过点样嘅生活，同埋决定要唔要事奉耶和华。（箴言30:24）我哋亦都唔系机器，机器只能够按照指令运作。耶和华想我哋充分享受生命，所以赐俾我哋选择嘅自由。我哋可以选择做点样嘅人，选择同点样嘅人做朋友，同埋过点样嘅生活。
20,21．你可以做乜嘢明智嘅决定？
20 耶和华想我哋全心全意爱佢。（马太福音22:37,38）正如爸爸听到仔女发自内心同佢讲“我爱你”，就会好开心。同样，耶和华都希望我哋爱佢系发自内心嘅。上帝俾我哋自由，等人类自行决定要唔要事奉佢。撒但、亚当同夏娃选择反叛耶和华。噉你又会点选择呢？
21 要运用你嘅自由意志去选择事奉耶和华。今日，有数以百万计嘅人拒绝跟从撒但，而选择事奉上帝。（箴言27:11）喺新世界，上帝将会消除所有苦难。你点样做先可以进入新世界？下一章会解答呢个问题。
