人物生平
耶和华大大祝福我嘅决定
当我哋静静噉将传单摄入地区入面嘅最后几户人家嘅门底嗰时,太阳先啱啱出嚟。当时系1939年,我哋半夜就起身,开咗超过一个钟嘅车,去到美国密苏里州西南部一个叫做乔普林嘅小城市。我哋一做完呢个地区就即刻上车,然后开去下一个集合地点,喺嗰度等其他车队到达。你可能会谂,点解我哋嗰个朝早天未光就开始传道,同埋点解咁快就离开。我之后会话俾你知。
我父母弗雷德·莫洛汉同埃德娜都系基督徒。1934年我出世嗰阵,佢哋已经成为圣经研究者(耶和华见证人)20年嘞。我好感激佢哋帮助我自细就培养自我牺牲嘅精神。我哋一家人生活喺堪萨斯州东南部嘅帕森斯。我哋会众几乎所有成员都系受膏基督徒。我哋全家都经常参加聚会,经常向人传讲上帝王国嘅好消息。星期六下午我哋一般会去街上向人作见证,当时叫公众场所见证。有时传道结束之后我哋觉得有啲攰,不过喺呢个时候爸爸会带我哋去食雪糕,帮助我哋恢复精神。
我哋会众人数唔多,但系传道地区就好大,包括几个小镇同附近嘅好多农场。我哋拜访农夫嘅时候,经常会用我哋嘅书刊嚟交换当地出产嘅蔬菜同新鲜嘅鸡蛋,有时仲会换到鸡添。因为爸爸已经事先为书刊作咗捐款,所以呢啲食物可以帮补我哋一家。
传道运动
我父母得到一部用嚟传道嘅留声机。虽然我仲细,唔识得点样用,不过就好开心喺爸爸妈妈做续访以及同人讨论圣经嗰时帮手播放卢述福弟兄嘅演讲。
我同爸爸妈妈一齐喺播音车前面
爸爸改装咗我哋嘅1936年型福特,喺车顶装咗个大喇叭。呢部车喺传讲王国好消息方面好有用。通常我哋会先放一段音乐嚟吸引人嘅注意,跟住就播放一个圣经演讲。演讲结束之后,我哋会向感兴趣嘅人分发书刊。
喺堪萨斯州嘅切里韦尔小镇,爸爸将播音车开入城镇嘅公园,因为有好多人钟意喺星期日去嗰度放松一下。不过,跟住警察就过嚟同
爸爸讲,播音车唔可以开入公园,只能够喺公园外面。爸爸好合作。为咗等啲人可以继续听到圣经嘅信息,于是爸爸将部车开去公园附近嘅一条街,继续播放节目。对我嚟讲,每次同爸爸、哥哥杰里遇到噉样嘅情况都好兴奋。20世纪30年代后期,为咗快速将好消息传遍一啲受到猛烈反对嘅地区,我哋参加咗一个叫做“突袭”嘅特别运动。我哋会喺天光之前起身(就好似喺密苏里州乔普林所做嘅噉),快速将传单或者小册子摄入住户嘅门底。之后,我哋会喺郊区碰头,睇吓有冇人俾警察拘捕咗。
喺嗰个年代,另一个激动人心嘅部分就系宣传游行。为咗宣传上帝嘅王国,我哋身上会挂住标语牌,排成一条队,喺城市入面游行。我记得,有一次弟兄姊妹嚟我哋嘅镇游行,佢哋身上挂住“宗教系个网罗同骗局”嘅标语牌。佢哋从我哋屋企出发,喺镇入面行咗大约1.6公里(1英里),然后返到我哋屋企。庆幸嘅系,佢哋游行期间冇受到反对,不过就有好多好奇嘅人嚟围观。
早期嘅大会
我哋全家经常从堪萨斯州去到德克萨斯州参加大会。爸爸喺密苏里-堪萨斯-德克萨斯铁路公司返工(亦都称为M-K-T或者Katy铁路),所以我哋可以用爸爸嘅职员身份,一齐坐火车去探亲戚同参加大会。我嘅舅父弗雷德.维斯马尔同舅母厄拉利住喺德克萨斯州嘅坦普尔。舅父弗雷德喺20世纪初就学习圣经并受浸,当时佢仲系个年轻人。佢亦都同兄弟姐妹,包括我妈妈,分享自己学到嘅真理。佢曾经喺德克萨斯州中部担任带务仆人(现称分区监督),当地好多弟兄姊妹都识得佢。佢性格乐观,待人亲切,所以大家同佢一齐都好开心。佢喺传讲王国真理方面好热心,所以我喺年轻嘅时候受到佢好好嘅影响。
1941年,我哋一家人坐火车去密苏里州嘅圣路易斯参加大会。所有嘅年轻人都受到邀请,一齐坐喺运动场嘅一个特别区域聆听卢述福弟兄嘅演讲,题目系“君王嘅儿女”。喺演讲最后嘅部分,卢述福弟兄同佢嘅助手亲自将《儿童》呢本新书送俾我哋每个年轻人作为礼物。超过1万5000个年轻人得到呢份属灵赏赐。
1943年4月,我哋参加咗喺堪萨斯州科菲维尔举行嘅区域大会,主题为“采取行动”。虽然呢个大会规模唔大,但系好重要。大会宣布,所有会众都会开始一个新安排,就系神治
传道训练班。大会又发行咗一本喺训练班使用嘅册子,入面有52课。喺同一年,我发表咗自己第一次嘅学生演讲。呢次大会对我嚟讲亦都好特别,因为我同另外几个人喺附近农场入面一个好冻嘅水池度受浸。投身伯特利服务
1951年,我高中毕业。我要为自己嘅将来作一啲决定。哥哥杰里之前喺伯特利服务过,而我亦都好想投身伯特利服务。于是,我好快就向布鲁克林办公室提交咗申请表。冇几耐,我就受到邀请,喺1952年3月10日开始我嘅伯特利服务。呢个决定帮助我喺属灵上不断进步。
我希望可以喺印刷厂参与制作书刊同杂志嘅工作,不过我受到委派做餐厅服务员,之后喺厨房工作。虽然我冇机会去印刷厂,但系我好开心可以喺厨房工作,亦都从中学到好多。厨房嘅工作时间同其他部门唔一样,所以日头我可以有一段安静嘅时间喺伯特利嘅图书馆做个人研读。噉样做强化咗我嘅信心,帮助我喺属灵上更加成熟,亦都使我更加决心尽己所能留喺伯特利为耶和华服务。杰里喺1949年离开伯特利,同帕特里夏结婚,住喺伯特利附近。佢哋经常帮助同鼓励我呢个伯特利新人。
我到咗伯特利之后冇几耐,组织开始喺伯特利挑选更多弟兄,将佢哋加入伯特利讲者嘅名单。名单上嘅弟兄会喺嗰一年被委派去布鲁克林322公里(200英里)范围内嘅会众发表公众演讲,同会众嘅弟兄姊妹一齐传道。我有荣幸成为当中嘅一位。我第一次嘅公众演讲长达一个钟,成个过程我都好紧张。一般我都系坐火车去探访会众。我好记得1954年冬天嘅一个星期日晏昼,我上咗一部返纽约嘅火车,谂住可以喺傍晚返到伯特利。不过,半路突然发生一场好猛烈嘅暴风雪,火车嘅电动引擎发生短路而断咗电。最后,火车喺星期一朝早5点先至到达纽约火车站。我搭地铁返布鲁克林,即刻开始厨房嘅工作,不过就迟咗少少。我喺故障列车上成晚都冇得休息,真系好攰。虽然遇到噉样嘅情况,但系可以为当地嘅弟兄姊妹服务,而且认识咗好多新朋友,我觉得好开心好值得。
喺WBBR播音室准备播放节目
我喺伯特利服务嘅最初几年,受邀请参加WBBR电台嘅广播节目。播音室喺哥伦比亚山道124号二楼。我嘅委派,就系喺每周嘅其中一个广播节目入面扮演其中一个讨论圣经嘅人。喺伯特利服务多年嘅麦克米伦弟兄经常参与呢啲电台节目。我哋经常亲切噉叫佢做麦克弟兄。对我哋呢啲年轻嘅伯特利成员嚟讲,佢喺事奉耶和华方面系好好嘅榜样。
我哋喺传道嗰时分发传单,推广WBBR电台
1958年,我嘅工作有所调整,经常有机会接触基列学校嘅毕业生。我嘅任务系帮助呢啲热心嘅弟兄姊妹获得所需嘅签证,同埋为佢哋安排行程。喺嗰个年代,机票好贵,所以只有少数毕业生会搭飞机。大部分要去非洲同远东服务嘅弟兄姊妹会搭货船。商用喷气机服务出现之后,机票价格就平咗好多。冇几耐,大部分嘅特派传道员都搭飞机去佢哋嘅委派地区。
喺毕业礼之前,将基列毕业证书摆埋一齐
大会旅程
1960年,我负责为1961年嘅国际大会安排从美国去欧洲嘅包机。我亦都喺纽约坐包机去德国汉堡参加大会。大会结束之后,我同
另外三个伯特利嘅弟兄租咗部车,去意大利参观罗马分部办事处。我哋又去咗法国,之后穿过比利牛斯山脉,去到见证工作受禁制嘅西班牙。我哋将一啲书刊包装成礼物送俾巴塞罗那嘅弟兄姊妹。我哋见到佢哋嘅时候都非常激动!我哋最后开车去到阿姆斯特丹,搭飞机返翻纽约。大约一年之后,我亦都负责为指定嘅代表安排行程,帮助佢哋去世界各地参加一系列特别嘅国际大会。呢个就系1963年嘅“永远好消息”大会。583个代表跨越全球,去到欧洲、亚洲同南太平洋地区出席大会,之后又去夏威夷嘅檀香山(火奴鲁鲁),最后去加利福尼亚州嘅帕萨迪纳。佢哋亦都有一个特别嘅行程,就系去参观黎巴嫩同约旦呢两个同圣经有关嘅国家。我哋嘅部门负责安排航班、预订酒店同埋办理所需嘅签证。
新嘅旅途同伴
喺另一方面,1963年对我嚟讲亦都非常重要。我同莉拉·罗杰斯喺呢一年嘅6月29日结婚。佢嚟自密苏里州,已经喺伯特利服务咗3年。婚礼结束一个星期之后,我同莉拉就一齐参加环球旅程,参观咗希腊、埃及同黎巴嫩。我哋喺贝鲁特搭飞机,用咗好短嘅时间就去到约旦。因为我哋嘅工作喺约旦受限制,而且当局已经事先声明,耶和华见证人攞唔到入境签证,所以我哋好好奇,去到嗰度会发生乜嘢事。令我哋觉得惊喜嘅系,我哋一到达,就见到一班人企喺机场客运大楼楼顶,举住一个写住“欢迎耶和华见证人!”嘅标语牌。可以亲眼目睹圣经所描述嘅地方真系激动人心!我哋参观咗古代族长生活嘅地方。耶稣同使徒都喺呢啲地方传道过,基督教亦都系从呢啲地方开始传播到全世界嘅。(使徒行传13:47)
55年来,莉拉一直都系我嘅好伴侣,忠贞噉同我一齐执行我哋嘅委派。我哋嘅工作喺西班牙同葡萄牙受禁制嘅时候,我哋去咗呢两个国家几次。我哋有机会鼓励弟兄姊妹,将书刊同其他需要嘅嘢带俾佢哋。我哋甚至可以去到西班牙加的斯一座古老嘅军事堡垒,探访囚禁喺入面嘅弟兄姊妹。能够同呢啲弟兄姊妹交谈,喺属灵上强化佢哋,使我内心充满喜乐。
我哋同杰里·莫洛汉、帕特里夏一齐参加1969年“地上嘅和平”大会
1963年以来,我有荣幸受委派为非洲、澳大利亚、南美、远东、夏威夷、新西兰同埋波多黎各嘅大会代表安排行程。莉拉同我一齐参加咗好多难以忘怀嘅大会,包括1989年喺波
兰华沙嘅大会。好多嚟自俄罗斯嘅弟兄姊妹,第一次有机会参加咁大型嘅大会。我哋仲结识咗几个因为信仰而曾经韫咗喺苏联监狱好多年嘅弟兄姊妹。可以参观世界各地嘅分部办事处,强化同鼓励伯特利家庭成员同特派传道员,系我好大嘅殊荣。我哋上一次探访韩国分部嘅时候,有机会同50个被韫喺水原市监狱嘅弟兄见面。呢啲弟兄都表现出积极嘅态度,而且期待将来重获自由之后继续事奉耶和华。同佢哋见面真系大大鼓励咗我哋!(罗马书1:11,12)
增长所带嚟嘅喜乐
1943年我受浸嗰时,全球大约有10万个传道员。今日,喺240个国家或地区已经有超过800万人嘞。咁多年来,我见到耶和华点样赐福俾佢嘅子民,使佢哋不断增长。呢个好大程度上要归功于嗰啲带头传道嘅基列毕业生。多年以来,我有机会同佢哋当中嘅好多人接触,帮助佢哋去到自己受委派嘅地方。呢个真系使我得到好大嘅喜乐!
我好庆幸自己年轻嘅时候就已经决定扩大服务,到伯特利工作。喺人生嘅每一段历程,耶和华都赐俾我丰厚嘅福分。除咗伯特利服务所带嚟嘅喜乐之外,几十年来,我同莉拉有幸喺布鲁克林嘅几个会众参与传道工作,而且喺呢啲会众结交咗好多毕生嘅挚友。
喺莉拉嘅支持下,我可以继续喺伯特利服务。虽然我而家已经超过84岁,但仲系可以做有意义嘅工作,协助处理分部嘅信件。
今日嘅我同莉拉
玛拉基书3:18话:“你哋必定再次睇出义人同恶人、事奉上帝嘅人同唔事奉上帝嘅人之间有乜嘢分别。”可以成为耶和华奇妙组织嘅一分子,亦都睇出事奉耶和华嘅人同唔事奉耶和华嘅人有乜嘢区别,真系好大嘅喜乐。随住时间一日一日噉过去,我哋睇到撒但统治嘅世界变得越来越差,好多人对未来失去希望,觉得生活冇咩乐趣。但系,嗰啲爱耶和华、事奉耶和华嘅人,即使喺呢个难以应付嘅非常时期,都可以享有快乐嘅人生,对未来有稳确嘅希望。我哋能够传讲上帝王国嘅好消息系无比嘅殊荣!(马太福音24:14)我哋都渴望上帝嘅大日子到嚟。好快,上帝嘅王国会用乐园取代呢个世界。到时,上帝承诺嘅所有福分都会实现,包括完美嘅身心同永远嘅生命。耶和华嘅忠心仆人会喺呢个地球上永远享有快乐嘅生活。