1918——百年回首
“1918年会有乜嘢事发生？”呢个系《守望台》（英语）1918年1月刊开头所讲嘅一句话。虽然当时第一次世界大战依然喺欧洲进行得如火如荼，不过年初所发生嘅事睇嚟会为圣经研究者同当时嘅世界带嚟好嘅转变。
世界呼吁和平
1918年1月8日，伍德罗·威尔逊总统喺美国国会发表咗一个演讲，提出咗十四点原则，并认为呢啲原则会带嚟“公平同恒久嘅和平”。佢建议各国之间终止秘密外交、裁减军备并建立一个国际联合机构嚟造益大小嘅国家。后来，佢提出嘅“十四点和平原则”成为结束第一次世界大战嘅《凡尔赛条约》同埋国际联盟成立嘅基础。
反对者落败
虽然上一年嘅情况动荡不安， *不过，通过守望台圣经书社年会上所发生嘅事，圣经研究者似乎睇到和平嘅曙光。
呢次会议喺1918年1月5日举行。会议期间，有几个已经俾伯特利革职嘅男子企图得到组织嘅控制权。理查德·巴伯系一位忠心嘅周游监督，佢为呢个会议做开始嘅祷告。总结咗上年嘅工作报告之后，就开始每年一度嘅董事会选举。巴伯弟兄推荐约瑟夫·卢述福同另外六位弟兄。然后，一个支持反对者嘅律师提名另外七个人，其中包括嗰几个已经俾伯特利革职嘅人。佢哋最终落败。卢述福弟兄同另外六位忠心嘅弟兄获得大多数股东嘅支持，以压倒性嘅票数当选董事会成员。
好多出席呢次会议的弟兄都话，呢次系“佢哋参加过嘅会议当中，得到最多祝福”嘅一次。不过，开心之后冇几耐，佢哋就要面对考验嘞。
对《完成嘅奥秘》一书嘅反应
几个月以来，圣经研究者向人分发咗《完成嘅奥秘》呢本书。诚心正意嘅读者对书入面所讲嘅圣经真理有好好嘅反应。
克里斯特系加拿大嘅一个周游监督，佢曾经听一对读过《完成嘅奥秘》嘅夫妇讲，佢哋只系用咗五个星期就接受咗真理。克里斯特话：“先生同太太都全心接受真理，喺属灵上有惊人嘅进步。”
有个男子得到呢本书之后，就马上同佢嘅朋友分享。佢俾书入面嘅信息深深打动，亦都可以讲佢系俾本书打中咗。呢个男子话：“我喺第三街行紧嘅时候，膊头突然间俾一啲嘢打中。我以为系嚿砖头，原来系《完成嘅奥秘》。我攞返屋企，睇晒成本书。……后来我先知道，原来本书系一个传教士发嬲嗰阵从窗口掟落街嘅。……我好肯定，无论佢付出几多努力改变人嘅信仰，成果都及唔上佢呢次所做嘅。因为佢掟呢本书，反而使更多人揾到一个稳确嘅希望。……多得呢个咁愤怒嘅传教士，我哋而家可以赞美上帝。”
唔钟意呢本书嘅，唔系只有呢个传教士。1918年2月12日，加拿大政府一口断定呢本书有煽动性，亦都包含反战嘅言论，所以将呢本书列为禁书。之后冇几耐，美国政府亦都跟住噉样做。政府特工搜查咗纽约宾夕法尼亚州同加利福尼亚州嘅伯特利宿舍同办公室。1918年3月14日，美国司法部将《完成嘅奥秘》列为禁书，话印刷同发行呢本书会妨碍佢哋喺战争中所作嘅努力，违反咗间谍法。
监禁！
1918年5月7日，司法部获得批准，拘捕咗乔瓦尼·狄撤卡、乔治·费希尔、亚历山大·麦克米伦、罗伯特·马丁、弗雷德里克·罗比森、约瑟夫·卢述福、威廉·范安伯同埋克莱顿·伍德沃思。佢哋被控“非法而且蓄意唔服从、唔忠于［国家］，并煽动他人拒绝喺美国嘅陆海军服兵役”。佢哋嘅审讯从1918年6月3日开始，不过基本上可以肯定，佢哋会被定罪。点解？
美国司法部部长指控佢哋违反咗间谍法。呢个间谍法系一个“反宣传嘅有效武器”。1918年5月16日，国会否决咗一条法案嘅修正案，而呢条修正案本来可以保护嗰啲发行“讲事实，有良好动机，有合理目的”嘅出版物嘅人。《完成嘅奥秘》系佢哋讨论嘅焦点。关于呢一点，美国国会嘅官方记录话：“喺呢类型嘅宣传当中，其中一本最危险嘅书就系《完成嘅奥秘》。……呢本书唯一嘅作用系，令士兵质疑战争嘅原因，而且激化……对［强制性服兵役］草案嘅抵触情绪。”
1918年6月20日，陪审团认为八个弟兄喺所有指控上都有罪。第二日，法官作出咗判决。佢话：“被告大力提倡以及四处传播嘅宗教宣传……比一个师嘅德国军队构成更加大嘅危险。……应该将呢啲人判以重刑。”两个星期之后，呢八个弟兄被韫入乔治亚州亚特兰大嘅联邦监狱，刑期从10年到20年不等。
传道工作继续进行
喺呢段时期，圣经研究者受到猛烈嘅反对。联邦调查局(FBI)彻底调查咗佢哋嘅活动，记录咗数以千计嘅文档。呢啲记录显示，我哋嘅弟兄决心继续传道。
佛罗里达州奥兰多嘅邮政局局长写咗一封信俾FBI。呢封信话：“［圣经研究者］主要喺晚黑逐家逐户传道。……睇嚟，无论受到乜嘢反对，佢哋都要继续传道。”
作战部门嘅一个上校写信俾调查局，报告后来成为中央长老团成员嘅弗德烈克·法兰兹弟兄嘅活动。上校报告话：“法兰兹……一直都好积极噉售卖成千本《完成嘅奥秘》。”
另一位后来成为中央长老团成员嘅查尔斯·费克尔，面对猛烈嘅迫害。当局因为佢分发《完成嘅奥秘》而逮捕佢，又监视佢嘅个人信件。佢喺马里兰州嘅巴尔的摩坐咗一个月监，当时有人帮佢起咗个花名，叫“嚟自奥地利嘅敌人”。佢向审讯员勇敢作见证嘅时候，谂起保罗喺哥林多前书9:16节讲嘅话：“我唔宣扬好消息就有祸嘞！” *
除咗热心传道之外，圣经研究者为咗解救被韫喺亚特兰大嘅弟兄而热切噉发起一项请愿行动。安娜·加德纳话：“我哋一直都有做嘢。弟兄被韫入监之后，我哋就努力揾人签名请愿。我哋逐家逐户，攞到成千上万个签名！我哋话俾啲人知，呢啲弟兄都系真正嘅基督徒，佢哋都系含冤入狱嘅。”
大会
喺呢段艰难时期，经常有大会举行，喺属灵上强化弟兄团体。《守望台》报道：“喺呢一年，召开咗……超过四十场大会。……呢啲大会都取得咗辉煌嘅成绩。以前，所有大会都会喺大约夏秋交替嘅时候举行，不过呢一年就每个月都有大会。”
诚心正意嘅人依然对好消息作出响应。喺俄亥俄州克利夫兰嘅一个大会，大约有1200人参加，42人受浸。受浸嘅人当中有一个细路仔，佢“好感激上帝，亦都对献身受浸好有体会，令好多比佢年长嘅人都觉得自愧不如”。
接住落嚟会点？
1918年就嚟结束，不过圣经研究者对未来嘅好多事都唔确定。布鲁克林嘅部分房产被出售，总部搬咗去宾夕法尼亚州嘅匹兹堡。当带头嘅弟兄仲喺监狱嘅时候，下一次嘅股东会议定喺1919年1月4日举行。接住落嚟会点？
我哋嘅弟兄冇放弃工作。佢哋充满信心噉决定咗下一年，即系1919年嘅全年经文。呢节经文话：“凡为攻击你而造嘅武器，都一定会失去功用。”（以赛亚书54:17）之后将会发生一场戏剧性嘅改变，而呢场改变会加强佢哋嘅信心，使佢哋得到力量去执行前头嘅伟大工作。
