你有冇全心接纳耶和华嘅思想？
“要更新思想而改变自己”——罗马书12:2
1,2． 我哋喺属灵上不断成长，就会学识点样做？请举例。
一个小朋友收到礼物嗰阵，父母会同佢讲：“要同人讲声多谢呀。”小朋友照住做，因为父母叫佢噉样做。小朋友逐渐成长，慢慢开始明白点解父母觉得向人表示感激系好重要嘅。而家，佢识得主动去衷心感谢人。点解？因为感恩之心已经成为佢自己思想嘅一部分。
2 同样，我哋啱啱认识真理嗰时就知道，服从耶和华嘅一啲基本要求系好重要嘅。不过，随住我哋喺属灵上不断成长，我哋更加了解耶和华嘅思想，例如佢钟意乜嘢、唔钟意乜嘢，同埋佢系点样睇事情嘅。我哋识得用耶和华嘅方式推理，按照佢嘅观点嚟行事同做决定，就表明我哋全心接纳佢嘅思想嘞。
3． 点解我哋有时唔容易培养耶和华嘅思想？
3 学习用耶和华嘅方式思考会系一件快乐嘅事，但亦都可能会系一个挑战。我哋唔完美嘅倾向有时会妨碍我哋用耶和华嘅观点嚟睇事情。例如，我哋可能好难理解耶和华对道德洁净、唯物主义、传道工作、滥用血或者其他事情嘅观点。我哋可以点样做呢？我哋点样先可以喺培养耶和华嘅思想方面不断进步？培养耶和华嘅思想点样帮助我哋喺而家同将来作出明智嘅决定？
点样培养上帝嘅思想
4． 我哋可以点样“更新思想”？
4 请读罗马书12:2。使徒保罗喺呢节经文提到，我哋点样做就可以用耶和华嘅观点嚟睇事情。我哋从上一篇课文学到，为咗避免“俾呢个制度同化”，我哋必须拒绝采纳世俗嘅观点同精神。不过，保罗亦都提到我哋要“更新思想”。点样更新呢？就系通过研读圣经嚟领悟上帝嘅思想，沉思上帝嘅思想，同埋令自己嘅思想同上帝嘅保持一致。
5． 研读同简单嘅阅读有乜嘢唔同？
5 研读唔系简单噉阅读，亦都唔系只系注重研究问题嘅答案。我哋研读嗰阵可以问吓自己：“关于耶和华、佢嘅道路，同埋佢嘅思想，我从啱啱读到嘅内容学到乜嘢？”或者，我哋尝试去明白点解上帝要谴责某件事或者吩咐人去做某件事。我哋亦都可以认真谂吓，喺生活同思想方面，自己需要作出边啲调整。虽然我哋唔一定每次研读都会考虑晒呢啲问题，不过用一半嘅时间嚟沉思读过嘅内容，就会从中得到唔少益处。（诗篇119:97；提摩太前书4:15）
6． 我哋沉思上帝嘅话语，就会发生乜嘢改变？
6 我哋经常沉思上帝嘅话语，就会发生乜嘢令人惊讶嘅改变呢？我哋“察验”到耶和华嘅思想系完美嘅。我哋沉思嘅时候，开始明白佢对事情嘅睇法，最终亦都同意佢嘅观点。我哋嘅思想不断被“更新”，逐渐形成一种新嘅思维模式。噉样，我哋就系全心接纳耶和华嘅思想，将佢嘅思想变成自己嘅。
思想影响行动
7,8． （甲）耶和华对物质事物有乜嘢睇法？（请睇吓课文开头嘅图片）（乙）如果我哋采纳耶和华嘅观点，噉对我哋嚟讲乜嘢系最重要嘅呢？
7 我哋嘅思想唔单止影响我哋对事物嘅感觉，亦都会影响我哋嘅行动。（马可福音7:21-23；雅各书2:17）我哋通过一啲例子可以更好噉理解呢一点。例如，福音书嘅记载清楚向我哋表明耶和华对物质事物嘅睇法。约瑟同马利亚唔系好富有，但系上帝亲自拣选佢哋养育佢嘅爱子。（利未记12:8；路加福音2:24）耶稣出世嘅时候，马利亚“将婴儿……放喺饲槽入面，因为客店冇地方俾佢哋住宿”。（路加福音2:7）其实，只要耶和华愿意，佢可以用各种方式为自己啱啱出世嘅儿子提供更好更舒适嘅住宿环境。不过对耶和华嚟讲，耶稣可以喺一个良好嘅属灵环境下得到照顾同成长系更重要嘅。
8 通过耶稣诞生嘅圣经记载，我哋可以睇出耶和华对物质事物嘅睇法。有啲父母坚持要为儿女提供最好嘅物质条件，甚至不惜牺牲儿女嘅属灵健康。不过好明显，耶和华觉得属灵嘅事先至系最重要嘅。你有冇采纳耶和华嘅观点呢？你嘅行动表明乜嘢？（请读希伯来书13:5）
9,10． 我哋可以点样表明，喺绊倒人方面我哋同耶和华有一样嘅睇法？
9 另一个例子系上帝对绊倒其他人嘅睇法。耶稣话：“边个使呢啲信我嘅一个小子跌倒，就不如攞一块驴推嘅大磨石挂喺自己条颈，投入大海好过啊。”（马可福音9:42）耶稣用咗好强烈嘅语气嚟讲呢番话！因为耶稣完美噉反映出天父嘅特质，所以我哋可以肯定，如果一个人嘅行为绊倒咗一个基督徒，噉耶和华对呢个人都会有同样强烈嘅感觉。（约翰福音14:9）
10 我哋系咪同耶和华、耶稣有一样嘅睇法呢？我哋有冇用佢哋嘅观点嚟睇事情？我哋嘅行为表明乜嘢？例如，我哋钟意某种风格嘅服饰打扮，不过呢类型嘅打扮可能会令会众嘅一啲人觉得不安，或者会令其他人产生不道德嘅念头。我哋会唔会仁爱噉顾及信徒同工嘅感受，放弃呢类型嘅服饰打扮呢？（提摩太前书2:9,10）
11,12． 我哋培养自制，恨耶和华所恨，可以点样保护自己？
11 第三个例子就系，耶和华憎恨不义嘅事。（以赛亚书61:8）耶和华知道我哋唔完美，天生就有一啲错误嘅倾向。不过，佢勉励我哋要同佢一样憎恨不义嘅事。（请读诗篇97:10）沉思耶和华憎恨恶事嘅原因，可以帮助我哋全心接受佢嘅观点，亦都使我哋更有力量抗拒错误嘅行为。
12 我哋同耶和华一样憎恨恶事，亦都有助于我哋辨别出圣经冇具体提及嘅某啲错误行为。例如，一种叫做膝上舞嘅淫秽行为喺世界各地越来越普遍。有啲人可能觉得，膝上舞唔系同其他人发生性关系，所以冇咩问题。 * 不过，耶和华系咪都系噉谂呢？要记得，耶和华憎恨所有形式嘅恶事。所以，我哋要培养自制，恨耶和华所恨，噉样就可以远离恶行。（罗马书12:9）
预先考虑可能会发生嘅事
13． 点解我哋要预先谂吓，耶和华嘅思想可以点样影响我哋未来所做嘅决定？
13 我哋研读嘅时候最好谂吓，耶和华嘅思想可以点样帮助我哋喺未来做明智嘅决定。我哋如果已经预先做好准备，噉就算遇到一个要即时做决定嘅情况，都知道应该点样做。（箴言22:3）等我哋嚟睇吓圣经嘅一啲例子。
14． 我哋从约瑟拒绝波提乏嘅妻子呢件事学到乜嘢？
14 当波提乏嘅妻子勾引约瑟嗰阵，约瑟即刻拒绝。我哋从中可以睇出，约瑟已经考虑过耶和华对婚姻嘅睇法，就系希望人忠于配偶。（请读创世记39:8,9）约瑟回答波提乏嘅妻子嘅时候，话：“我点可以做出咁大嘅恶事，得罪上帝呢？”呢个表明，佢已经有耶和华嘅观点。我哋又点样呢？如果有同事向你调情，你会点样做呢？假如有人用手机发一啲露骨嘅色情信息或者图片俾你，你又点做呢？ *如果我哋喺呢啲问题上已经明白而且采纳耶和华嘅观点，亦都事先谂好自己会点样做，噉忠于耶和华就容易得多嘞。
15． 我哋点样做就可以好似三个希伯来青年噉，喺压力下对耶和华保持忠贞？
15 请谂吓沙得拉、米煞、亚伯尼哥呢三个希伯来青年嘅例子。尼布甲尼撒王要求佢哋崇拜佢所立嘅金像嗰时，佢哋坚决噉拒绝咗。佢哋对王嘅清晰回答表明，佢哋已经思考过继续忠于耶和华就须要点做。（出埃及记20:4,5；但以理书3:4-6,12,16-18）假如老板叫你捐款支持一个同错误宗教有关嘅庆祝活动，你会点样做？与其等到呢啲情况发生先至考虑，不如而家就谂吓耶和华对呢啲问题有乜嘢睇法。如果你事先考虑过耶和华嘅谂法，噉有类似情况发生嗰阵，你就可以好似嗰三个希伯来青年噉，更容易讲正确嘅话同做正确嘅事。
你有冇做个人研读、填写一份具有法律效力嘅医疗文件，并同你嘅医生倾吓？（请睇第16段）
16． 清楚了解耶和华嘅思想，可以点样帮助我哋为紧急医疗问题做好准备？
16 预先沉思耶和华嘅观点，亦都可以帮助我哋喺遇到紧急医疗问题嘅时候对耶和华保持忠贞。虽然我哋坚决拒绝输入全血或者血嘅四种主要成分，不过某啲涉及到血嘅疗法，就要每个基督徒根据圣经原则同耶和华嘅观点自己做决定。（使徒行传15:28,29）我哋最好喺几时做呢啲决定呢？当然唔系去到医院嗰时，因为到时我哋可能要忍受身体上嘅痛苦同埋要面对压力，好难即时作出明智嘅决定。我哋最好而家就做好个人研读、填写一份表明我哋个人意愿而且具有法律效力嘅医疗文件，亦都揾自己嘅医生倾吓。 *
17-19． 点解我哋而家就应该了解耶和华对事情嘅睇法？我哋要预先为乜嘢情况做好准备？请举例。
17 最后请谂吓，彼得劝耶稣“应该爱惜自己”嗰时点解耶稣可以迅速作出回应。耶稣显然已经沉思过上帝对自己嘅旨意，同埋有关自己喺地上生活以及死去嘅预言。呢个强化咗佢对耶和华保持忠贞以及为我哋所有人作出牺牲嘅决心。（请读马太福音16:21-23）
18 今日，上帝希望佢嘅子民同佢培养亲密嘅关系，并尽力向人宣扬王国嘅好消息。（马太福音6:33；28:19,20；雅各书4:8）不过，可能有啲人会好似彼得劝耶稣噉，出于好意建议我哋对自己好啲。例如，老板升你职又加你好多人工，不过呢个职位会影响你嘅属灵活动，噉你会点做呢？又或者你读紧书，有机会离开屋企接受额外嘅教育。呢阵时，你会唔会多啲祷告同埋做个人研读，请教家人或者长老，然后再做决定？如果你而家就了解耶和华对呢啲事嘅睇法，全心接受耶和华嘅思想，噉就最好不过嘞。就算以后有类似嘅事发生，可能对你嚟讲都已经唔再系乜嘢诱惑。你会清楚知道自己应该点样做，因为你已经决定一直全心事奉耶和华。
19 你可能仲谂到有其他突发事件会考验你对耶和华嘅忠贞。当然，我哋冇办法为每一件可能会发生嘅事都做好准备。但系，如果我哋做个人研读嘅时候沉思上帝嘅思想，噉任何情况下我哋都会更容易记起自己学过嘅知识，并运用呢啲知识做明智嘅决定。所以，我哋做研读嗰阵要留意耶和华对事情嘅睇法，全心接受佢嘅思想，亦都要谂吓佢嘅思想喺而家同将来点样帮助我哋做明智嘅决定。
耶和华嘅思想同你嘅未来
20,21． （甲）点解我哋喺新世界享有嘅自由系相对嘅？（乙）我哋而家可以享有点样嘅生活？
20 我哋热切期待新世界到嚟。我哋大多数人都希望可以喺地上嘅乐园享有永生。喺王国嘅统治下，我哋会从而家呢个制度所遭受嘅痛苦得到释放。喺新世界，我哋亦都有自由根据自己嘅喜好同愿望嚟作出选择。
21 当然，呢种自由唔系毫无限制嘅。谦逊嘅人会根据耶和华嘅律法同思想嚟判断是非对错。结果，佢哋满心喜乐，大享平安。（诗篇37:11）即使嗰个时候仲未嚟到，我哋而家都可以全心接纳耶和华嘅思想，从而得享喜乐。
^ 12段 膝上舞就系一个衣着暴露或者半裸嘅舞女坐喺顾客大腿上做出挑逗性动作嘅一种行为。根据实际情况，呢种行为可能会构成须要采取司法行动嘅性不道德行为。参与呢类活动嘅基督徒应该向长老寻求帮助。（雅各书5:14,15）
^ 14段 利用手机传送嘅淫秽简讯、照片或者影片称为色情短信。根据具体情况，有可能要对传送色情短信嘅人采取司法行动。喺某啲案例当中，参与传送色情短信嘅未成年人，会被检控为性侵犯者。想了解更多嘅信息，请上jw.org网站阅读““青年人问：传送色情短信——我该知道甚么？”（点击“圣经与生活”>“青少年”），或者请睇《警醒！》2013年11月刊4-5页“怎样帮助儿女远离色情短信”。
^ 16段 我哋嘅出版物讨论过相关嘅圣经原则。例如，请睇《常在上帝的爱里》第215-218页。
