你嘅思想受边个影响？
“唔好俾呢个制度同化”——罗马书12:2
1,2． （甲）彼得劝耶稣爱惜自己嘅时候，耶稣有乜嘢反应？（请睇吓课文开头嘅图片）（乙）点解耶稣有噉样嘅反应？
耶稣嘅门徒冇办法相信佢哋所听到嘅。佢哋期待耶稣重建以色列王国，不过耶稣话自己好快就会受苦同死去。当时冇人出声，使徒彼得就话：“主啊，你应该爱惜自己，你绝对唔会有呢种下场。”但系，耶稣话：“撒但，退到我后面！你系我嘅绊脚石，因为你所谂嘅，唔系上帝嘅意思，而系人嘅意思。”（马太福音16:21-23；使徒行传1:6）
2 通过呢番话，耶稣将源于上帝嘅思想同源于撒但控制嘅呢个世界嘅思想区分开嚟。（约翰一书5:19）彼得表现出呢个世界嘅自私精神，而耶稣知道呢种精神唔系源于天父嘅。佢知道，上帝希望佢鼓起勇气，做好准备面对将临嘅痛苦同死亡。耶稣嘅回答清楚表明，佢接受嘅系耶和华嘅思想，坚决拒绝世俗嘅思想。
3． 点解我哋好容易就会跟从呢个世界嘅思想？
3 我哋又点样呢？我哋有上帝嘅思想，抑或有世人嘅思想呢？作为基督徒，我哋努力按照上帝嘅要求行事。不过，我哋嘅思想又点样呢？我哋有冇使自己嘅思想、观点同上帝嘅保持一致？噉样做须要付出好大嘅努力。相反，跟从世人嘅思想就毫不费力，因为周围都充满世界嘅精神。（以弗所书2:2）另外，呢个世界嘅人往往鼓吹自私嘅精神，我哋唔小心就会受到影响。我哋唔容易同耶和华嘅思想保持一致，但系就好容易会按照世人嘅方式嚟思考。
4． （甲）如果我哋任由自己嘅思想俾呢个世界同化，会有乜嘢后果？（乙）呢篇课文会讨论乜嘢？
4 如果我哋容许自己嘅思想俾呢个世界同化，我哋就会变得自私同埋钟意自行判断是非对错。（马可福音7:21,22）所以，我哋要培养上帝嘅思想，而唔系人嘅思想。为咗帮助我哋做到呢一点，呢篇课文会讨论吓，点解我哋嘅思想同耶和华嘅保持一致，对我哋嚟讲唔系过度嘅限制，而系会使我哋得益，以及点样可以避免俾呢个世界嘅思想同化。而下一篇课文会分析，我哋点样可以全心接纳耶和华嘅思想，使自己喺唔同嘅问题上都反映出佢嘅观点。
耶和华嘅思想使人得益
5． 点解有啲人唔钟意俾其他人影响自己嘅谂法？
5 有啲人唔钟意俾任何人塑造或者影响自己嘅谂法。佢哋会话：“我自己识谂㗎喇。”意思大概系话，佢哋想自己做决定，而且觉得自己有权噉样做。佢哋唔想俾人控制，亦都唔想放弃自己嘅个性。 *
6． （甲）耶和华俾我哋有自由做乜嘢？（乙）呢种自由系咪毫无限制嘅？
6 可以放心嘅系，我哋同耶和华嘅思想保持一致，唔代表要完全放弃个人嘅谂法或者意见。哥林多后书3:17话：“耶和华嘅灵喺边度，边度就有自由。”正如呢节经文所讲，我哋有自由培养自己独特嘅个性。我哋可以有自己嘅喜好，选择自己感兴趣嘅事。因为耶和华将我哋设计成可以噉样做。不过，我哋唔可以任意运用自己嘅自由。（请读彼得前书2:16）如果事情涉及到是非对错，耶和华就希望我哋运用佢嘅话语嚟做决定。噉样会过度限制我哋，抑或令我哋得益？
7,8． 对我哋嚟讲，按照耶和华嘅观点做事系咪过度嘅限制？请举例。
7 请睇吓一个例子。父母努力将正确嘅价值观灌输俾儿女。佢哋可能教导儿女要诚实、勤劳同埋体恤其他人。呢个唔系过度嘅限制，而系父母为咗儿女喺成年之后可以过好嘅生活，而预先帮助佢哋做好准备。到咗儿女长大成人，离开屋企之后，佢哋就可以自己自由噉做决定嘞。如果佢哋按照父母所教导嘅嚟生活，就会更加识得做明智嘅决定。噉样，佢哋就可以避免好多难题同烦恼，亦都唔会后悔自己曾经所做嘅决定。
8 耶和华就好似仁爱嘅父母噉，希望自己嘅儿女享有最心满意足嘅生活。（以赛亚书48:17,18）所以，佢喺道德行为同埋待人接物方面，为我哋提供咗基本嘅原则。佢邀请我哋学习用佢嘅方式去睇问题，同埋按照佢嘅价值观嚟生活。噉样唔系过度限制我哋，而系增强、提升同埋扩展我哋嘅思维能力。（诗篇92:5；箴言2:1-5；以赛亚书55:9）我哋仲系可以有自己嘅个人喜好，亦都可以作出令自己高兴嘅正确选择。（诗篇1:2,3）冇错，我哋有耶和华嘅思想，可以令自己喺好多方面得到益处同满足感！
耶和华嘅思想高明
9,10． 耶和华嘅思想点样比世界嘅思想高明？
9 崇拜耶和华嘅人好希望自己嘅思想同耶和华一致嘅另一个原因系，耶和华嘅思想远远比呢个世界嘅优越。世人喺道德行为、家庭关系、工作满意度同埋生活嘅其他方面都提出咗好多建议，但系大部分嘅建议都同耶和华嘅思想有矛盾。例如，呢个世界经常鼓励人只系追求自己嘅利益，或者鼓励人将性不道德视为可以接受嘅事，有时建议已婚夫妇为咗自己开心，可以随便用一啲琐碎嘅理由分居或离婚。呢啲建议都同圣经嘅原则有抵触。不过，嚟自呢个世界嘅建议系咪比圣经嘅劝告更实用呢？
10 耶稣话：“有智慧嘅行为自然会显出正义。”（马太福音11:19）呢个世界喺科技方面取得好大嘅进步，不过就始终冇办法解决一啲妨碍我哋得到幸福嘅重要问题，例如战争、种族歧视同罪行。另外，呢个世界认为性不道德系可以接受嘅事。不过好多人都承认，呢个会破坏家庭，引发健康问题，亦都会造成其他难题。而另一方面，采用上帝观点嘅基督徒可以有更好嘅家庭关系，保持道德洁净，同全球嘅弟兄姊妹享有和睦嘅关系。（以赛亚书2:4；使徒行传10:34,35；哥林多前书6:9-11）呢一切都清楚表明，耶和华嘅思想的确比世界嘅思想高明。
11． 摩西受边个嘅思想引导？结果点样？
11 古代嘅忠仆知道耶和华嘅思想非常高明。虽然摩西“学识埃及人嘅一切智慧”，佢仲系向耶和华寻求“智慧嘅心”。（使徒行传7:22；诗篇90:12）佢亦都恳求耶和华，话：“求你教我认识你嘅道路”。（出埃及记33:13）喺耶和华思想嘅引导下，摩西有机会参与执行耶和华嘅旨意，亦都被视为信心嘅杰出榜样。（希伯来书11:24-27）
12． 保罗根据乜嘢嚟推理？
12 使徒保罗系一个聪明而且有学问嘅人，佢至少识得讲两种语言。（使徒行传5:34；21:37,39；22:2,3）不过，喺判断事情啱定错嘅时候，佢唔会运用世俗嘅智慧，而系根据圣经嚟推理。（请读使徒行传17:2；哥林多前书2:6,7,13）所以，保罗喺传道工作上取得好大嘅成功，而且有机会享有永恒嘅奖赏。（提摩太后书4:8）
13． 使自己嘅思想同耶和华嘅保持一致，系边个嘅责任？
13 显然，上帝嘅思想比呢个世界嘅思想高明得多。我哋按照上帝嘅思想生活，就可以得到最大嘅快乐同成功。不过，耶和华唔会强迫我哋接受佢嘅思想，“忠信睿智嘅奴隶”同长老亦都唔会控制我哋嘅思想。（马太福音24:45；哥林多后书1:24）每个基督徒都要负起自己嘅责任，使自己嘅思想同上帝嘅一致。我哋点样先可以做到？
避免受呢个制度同化
14,15． （甲）沉思乜嘢事有助于我哋用耶和华嘅观点嚟睇事情？（乙）根据罗马书12:2，点解我哋唔应该接受呢个世界嘅思想？请举例。
14 罗马书12:2话：“唔好俾呢个制度同化，要更新思想而改变自己，噉你就可以察验上帝良善、完美而又蒙佢悦纳嘅旨意。”呢啲圣灵启示嘅话语表明，无论我哋喺学习真理之前思想受过点样嘅影响，都可以作出调整，使自己嘅思想更接近上帝嘅思想。我哋嘅思想虽然喺某程度上会受遗传因素同以往嘅经验所影响，但系可以不断改变。呢啲改变主要取决于我哋允许乜嘢进入头脑，以及我哋细心思考嘅系乜嘢。我哋沉思细想耶和华嘅思维模式，就可以睇出佢嘅观点系正确嘅。噉样，我哋自然就会希望自己嘅思想同耶和华嘅一致。
15 为咗使自己嘅思想同耶和华嘅一致，我哋就要小心，千祈“唔好俾呢个制度同化”。呢个意味住，我哋要停止接纳任何同上帝嘅观点对立嘅思想。我哋可以用食物做比喻。一个人可能通过一啲有营养嘅食物嚟改善自己嘅健康状况，但如果佢同时又经常食一啲受污染嘅食物，噉嗰啲有营养嘅食物对佢又有乜嘢用呢？同样，如果我哋容许世俗嘅思想腐化自己嘅头脑，噉我哋从耶和华嘅思想所吸收到嘅就好有限嘞。
16． 我哋可以点样保护自己嘅思想？
16 我哋可唔可以完全唔接触世界嘅思想呢？唔可以。我哋唔能够完全脱离呢个世界，所以或多或少都会接触到呢个世界嘅思想。（哥林多前书5:9,10）我哋传道嗰时难免会接触到错误嘅信仰，但系我哋唔需要学习、研究或者接受呢啲嚟自世界嘅思想。撒但好想用呢啲思想嚟影响我哋，所以我哋要好似耶稣噉即刻拒绝接受。另外，我哋要避免同呢个世界嘅思想有不必要嘅接触，噉就可以使自己得到保护。（请读箴言4:23）
17． 我哋可以点样避免同世界嘅思想有不必要嘅接触？
17 例如，我哋应该小心选择密友。圣经警告话，如果我哋同唔崇拜耶和华嘅人亲密来往，就会受佢哋嘅思想所影响。（箴言13:20；哥林多前书15:12,32,33）我哋亦要小心选择娱乐。我哋拒绝接受推崇进化论、暴力或者性不道德嘅娱乐活动，就可以避免受嗰啲“抵触上帝知识”嘅思想毒害。（哥林多后书10:5）
我哋有冇帮助自己嘅仔女抗拒有害嘅娱乐？（请睇第18、19段）
18,19． （甲）点解我哋必须警惕嗰啲唔容易察觉嘅世俗思想？（乙）选择娱乐嘅时候，我哋可以问吓自己乜嘢问题？点解？
18 有啲世俗嘅思想唔容易察觉，我哋要小心识别并加以拒绝。例如，有啲新闻报道为咗迎合某啲政治观点，可能会偏向某个立场；有啲节目会报道一啲人物事迹，推崇一啲令世人羡慕嘅目标同成就；有啲电影同书刊提倡“自我优先”或者“家庭优先”嘅人生观。如果唔小心识别嘅话，我哋可能会觉得呢啲同圣经原则相抵触嘅观点好合理、好感人，甚至认为系啱嘅。圣经表明，我哋最爱嘅系耶和华，噉我哋同我哋嘅家庭先至会有真正嘅幸福。（马太福音22:36-39）另外，有啲儿童故事虽然大部分都可以接受，但系有部分内容可能会误导小朋友，令佢哋觉得不道德嘅行为系可以接受嘅。
19 虽然呢个世界嘅娱乐有好多危险，但并唔系话，我哋唔可以享受健康嘅娱乐。选择娱乐嘅时候，最好问吓自己：“有啲娱乐间接噉反映出世界嘅思想，我有冇察觉到呢？我有冇保护自己同仔女，免受某啲电视节目或者刊物影响呢？我有冇用耶和华嘅观点帮助仔女抵抗佢哋接触到嘅世俗思想呢？”如果我哋睇出上帝嘅思想同世界嘅思想之间嘅区别，就可以避免“俾呢个制度同化”。
而家你受边个塑造？
20． 我哋受上帝嘅思想塑造抑或受世界嘅思想影响，视乎乜嘢？
20 请谨记，信息嘅来源基本只有两个：一个系耶和华，另一个系受撒但控制嘅世界。我哋受边个影响呢？呢个要视乎我哋从边一个来源获取信息。如果我哋采纳世界嘅思想就会被同化，噉我哋嘅观点同行为就会有属肉体嘅倾向。所以，我哋一定要非常小心噉选择自己睇嘅、读嘅、听嘅同埋谂嘅嘢。
21． 下一篇课文会讨论乜嘢？
21 正如课文之前提到嘅一样，我哋想用耶和华嘅观点嚟睇事情，只系使自己嘅头脑免受不良嘅影响系唔够嘅。我哋仲要不断吸收，并全心接纳上帝嘅思想。下一篇课文会进一步讨论我哋可以点样做。
^ 5段 喺现实当中，就算系最独立嘅思想家都难免受到其他人嘅影响。一个人无论思考生命嘅起源，抑或只系决定要着乜嘢衫，多多少少都会受人影响。不过，我哋可以选择受边个影响。
