”喺乐园再见！”
“你必定同我一齐喺乐园。”——路加福音23:43
1,2． 人对乐园有乜嘢唔同嘅睇法？
呢个系一个非常感人嘅场面。韩国首尔大会结束之后，外国代表离开嘅时候，当地嘅见证人走过去，围住佢哋，当中好多人都挥手，大声话：“喺乐园再见！”你觉得佢哋所讲嘅系乜嘢乐园呢？
2 唔同嘅人对乐园有唔同嘅理解。有啲人认为乐园系人幻想出嚟嘅，有啲人就话乐园系可以使佢哋快乐同满足嘅地方。对一个好肚饿嘅人嚟讲，可能摆满食物嘅餐台就系佢嘅乐园嘞。19世纪嘅一个旅行家睇到一个开满鲜花嘅山谷就感叹话：“哇！好靓嘅乐园啊！”虽然嗰个地方每年都有超过15米（50英尺）厚嘅积雪，不过而家都仲系被称为乐园。对你嚟讲乐园系乜嘢？你希唔希望去乐园呢？
3． 圣经提到最初嘅乐园系一个点样嘅地方？
3 圣经提到，有一个曾经存在过嘅乐园同埋一个将会嚟到嘅乐园。乐园嘅概念好早就出现喺圣经入面。译自拉丁语嘅天主教思高圣经学会译本嘅创世记2:8话：“上主天主在伊甸东部种植了一个乐园，就将他形成的［亚当］安置在里面。”希伯来语原文将乐园称为伊甸园。伊甸嘅意思系“喜悦”。呢个美丽嘅花园食物充足，景色迷人，人同动物相处融洽，的确系一个令人开心快乐嘅地方。（创世记1:29-31）
4． 点解我哋可以将伊甸园称为乐园？
4 喺希腊语入面，意思系“花园”嘅希伯来语词被译作“帕拉迪索斯”。关于呢个词，麦克林同斯特朗合编嘅《百科全书》（英语）话：“一个宽阔、开放嘅公园，与世隔绝，入面嘅自然美景冇被破坏过。有庄严嘅森林，好多树木都结出果实，由清澈嘅溪流所灌溉，岸边有一群群嘅羚羊或绵羊走嚟走去。呢个就系一个希腊旅行者心目中嘅乐园嘞。”（参考创世记2:15,16）
5,6． 点解亚当同夏娃唔可以继续喺乐园生活？有啲人可能想知道乜嘢问题？
5 耶和华就系将亚当同夏娃安置喺一个咁靓嘅乐园，不过由于佢哋背叛耶和华，所以佢哋同后代都唔可以继续喺乐园生活。（创世记3:23,24）虽然唔再有人类住喺伊甸园，不过伊甸园喺挪亚洪水之后先至完全消失。
6 有啲人可能会谂：“将来有冇人可以喺地上嘅乐园生活呢？”事实表明乜嘢？你有冇充分嘅理由相信未来你会同自己所爱嘅人喺乐园生活呢？你能唔能够解释，点解将来一定会有乐园？
乜嘢证明将来会有乐园
7,8． （甲）上帝对亚伯拉罕作出乜嘢应许？（乙）上帝嘅应许可能令亚伯拉罕谂到乜嘢？
7 圣经嚟自伊甸园嘅创造主耶和华，所以同乐园有关嘅所有问题都可以喺圣经入面揾到答案。请谂吓上帝同佢嘅朋友亚伯拉罕讲过乜嘢。上帝话，佢会使亚伯拉罕嘅后代多到好似“海边嘅沙”噉。之后，佢向亚伯拉罕作出一个重要嘅应许，话：“地上嘅万国都必定因你嘅后代而赢得福分，因为你听从咗我嘅话。”（创世记22:17,18）上帝向亚伯拉罕嘅仔同孙都重申同样嘅承诺。（请读创世记26:4；28:14）
8 圣经入面冇任何迹象表明，亚伯拉罕认为人类会喺天上嘅乐园获得最终嘅奖赏。所以，当上帝话“地上嘅万国”得到福分嗰时，亚伯拉罕认为呢啲福分系喺地上得享嘅。不过，呢个系咪圣经入面证明乐园喺地上嘅唯一证据呢？
9,10． 后来乜嘢预言使我哋坚信乐园即将会到嚟？
9 亚伯拉罕嘅子孙大卫指出，“作恶嘅人”同“行事不义嘅人”喺将来都会被消灭，结果“恶人就唔会再存在”。（诗篇37:1,2,10）相反，“谦和嘅人必得着大地，大享平安，满心喜乐”。大卫亦都受圣灵启示，预言话：“义人必得着大地，永远喺地上安居。”（诗篇37:11,29；撒母耳记下23:2）你觉得，呢啲保证对嗰啲想遵行上帝旨意嘅人有乜嘢影响？佢哋相信，如果喺地上生活嘅全部都系义人，噉好似伊甸园一样嘅乐园一定会喺某个时候被重建。
10 随住时间过去，大多数声称事奉耶和华嘅以色列人都背弃咗耶和华，唔再支持正确嘅崇拜。所以上帝容许巴比伦人征服佢嘅子民，毁灭佢哋嘅土地，掳走好多以色列人。（历代志下36:15-21；耶利米书4:22-27）不过，上帝嘅先知预告，70年之后上帝嘅子民会重返佢哋嘅家园。呢啲预言都应验咗。而呢啲预言对我哋亦都有好重要嘅意义。喺考虑其中一啲预言嗰阵，请将焦点集中喺即将到嚟嘅地上乐园。
11． 以赛亚书11:6-9嘅预言初次系点样应验嘅？仲有乜嘢问题需要回答？
11 请读以赛亚书11:6-9。上帝通过以赛亚预告，佢嘅子民返到故乡之后，唔会处于恶劣、危险嘅环境，亦都唔需要惊俾动物或者凶残嘅人攻击，无论老人定系细路都会感到好安全。呢一切唔系会令你谂起伊甸园嘅和平景象咩？（以赛亚书51:3）以赛亚嘅预言亦都提到，“认识耶和华嘅知识必定遍满［整个地球］，就好似水弥漫海洋一样”。所以，呢个预言唔单止喺以色列国，将来仲会喺全球应验。噉呢啲事几时会发生呢？
12． （甲）嗰啲被掳嘅以色列人重返故土之后得到乜嘢福分？（乙）乜嘢表明以赛亚书35:5-10嘅预言会有另一次应验？
12 请读以赛亚书35:5-10。以赛亚进一步强调，重返故土嘅以色列人唔会受到动物或者恶人嘅威胁。佢哋嘅土地会出产丰盈，因为嗰度好似伊甸园噉有充足嘅水源。（创世记2:10-14；耶利米书31:12）呢个预言系咪只应验喺重返故土嘅以色列人身上呢？请留意，预言亦都提到盲人、聋人同跛脚嘅人会痊愈，不过呢啲事当时并冇发生。所以上帝讲嘅系，佢喺将来先至会消除所有疾病。
13,14． 以赛亚书65:21-23嘅预言点样喺以色列人返回故土嗰时获得应验？呢个预言嘅边部分仲未应验？（请睇吓课文开头嘅图片）
13 请读以赛亚书65:21-23。犹太人返到家乡嗰时，冇舒适嘅住所，亦都冇见到耕地同葡萄园。不过，由于上帝赐福俾佢哋，情况就慢慢改变过嚟。请想象吓，可以住喺自己建造嘅房屋，佢哋有几咁开心！佢哋亦可以种植农作物，享受美味嘅食物。
14 请留意预言嘅一个重要细节。我哋嘅寿命系咪真系“会好似树木嘅寿命”一样咁长呢？有啲树有成千年甚至更长嘅寿命。如果一个人亦都有咁长嘅寿命，噉佢身体一定好健康。以赛亚预言所描述嘅环境对人嚟讲就系一个乐园，系人类一直梦寐以求嘅！呢个预言必定实现！
耶稣关于乐园嘅承诺会点样实现？（请睇第15、16段）
15． 以赛亚书预言未来会有乜嘢福分？
15 请谂吓，上文讨论过嘅应许点样表明将来会有一个乐园。到时，全人类都会得到上帝嘅赐福。冇人会担心俾动物或者凶残嘅人攻击。盲人、聋人同跛脚嘅人都会得到医治。人可以建造自己嘅房屋，享受地上出产嘅有益食物。佢哋嘅寿命比树木仲要长。冇错，圣经向我哋展现咗未来嘅景象。不过，有啲人可能会话，呢啲预言唔系真系指将来地上会有一个乐园。你会点答呢？点解你坚信地上会有一个真正嘅乐园？地上最伟大嘅人物可以俾到我哋一个稳确嘅理由。
你会喺乐园入面！
16,17． 耶稣喺乜嘢情况下提到乐园？
16 虽然耶稣系无罪嘅，但佢仲系被判有罪，而且被钉喺木柱上，最终死去。当时，喺佢旁边有两个犹太犯人。临死之前，其中一个犯人承认耶稣系君王，请求佢话：“耶稣，你领受王权之后，求你顾念我。”（路加福音23:39-42）路加福音23:43写低咗耶稣嘅回答，呢个关乎我哋嘅未来。有啲现代学者将耶稣讲嘅话词对词噉翻译为：“实在我话俾你知，今日同我一齐你必定喺乐园。”请留意“今日”呢个词。耶稣系乜嘢意思呢？唔同嘅人有唔同嘅睇法。
17 为咗清楚表达句子嘅意思，好多现代语言都会使用逗号。不过，喺揾到嘅最早期嘅希腊语抄本当中，唔系时时都使用标点符号。噉样就会产生一个问题，到底耶稣想讲嘅系，“我话俾你知，你今日必定同我一齐喺乐园”；定系，“我今日话俾你知，你必定同我一齐喺乐园”呢？翻译员可能会根据自己对呢句话嘅理解嚟加入逗号。呢两种译法喺今日唔同嘅圣经译本当中都可以揾到。
18,19． 我哋可以点样推理耶稣嘅意思？
18 不过，请谂吓耶稣之前点样同佢嘅门徒讲。佢话：“人子亦会喺地入面三日三夜。”佢又话：“人子必被出卖，落喺人手上，俾人杀死，第三日复活。”（马太福音12:40；16:21；17:22,23；马可福音10:34）使徒彼得话呢件事的确发生过。（使徒行传10:39,40）耶稣同嗰个罪犯死去当日并冇去乐园。耶稣“喺坟墓［或者‘海地斯’］”几日，直至上帝使佢复活。（使徒行传2:31,32） *
19 所以，我哋可以睇出，耶稣通过“我今日实在话俾你知”呢句话嚟带出佢对犯人嘅承诺。呢个系一种普遍而且礼貌嘅表达方式，喺摩西嘅日子就已经使用。摩西曾经话：“今日我吩咐你嘅呢啲话，你要记喺心上”。（申命记6:6；7:11；8:1,19；30:15）
20． 乜嘢帮助我哋明白耶稣嘅意思？
20 嚟自中东嘅一位圣经译者提到耶稣嘅回答，话：“呢段文字嘅关键在于‘今日’呢个词，成句话应该读成：‘我今日实在话俾你知，你必定同我一齐喺乐园。’承诺系当日作出嘅，但以后先至会实现。呢个系东方语言嘅一个特点，表明肯定会信守某一日所作嘅承诺。”所以，公元5世纪嘅一个叙利亚语译本将耶稣嘅话翻译为：“确实，我今日同你讲，你将会同我一齐喺伊甸园。”我哋所有人都可以从呢个承诺受到鼓励。
21． 乜嘢事唔会发生喺嗰个犯人身上？点解？
21 耶稣同使徒定立咗王国之约，使佢哋可以同佢一齐去天上嘅王国。嗰个就嚟要死嘅犯人唔知道呢个王国之约。（路加福音22:29）另外，佢亦都冇受浸。（约翰福音3:3-6,12）所以，我哋从中睇出，耶稣所承诺嘅一定系地上嘅乐园。多年之后，使徒保罗通过异象见到一个人“忽然被接到乐园”。（哥林多后书12:1-4）同嗰个犯人唔一样，保罗同其他忠心嘅使徒被拣选到天上同耶稣一齐作王。不过，保罗所指嘅都系将来先至会发生嘅事，就系未来嘅“乐园”。 * 呢个乐园系咪喺地上嘅呢？你会唔会喺嗰度呢？
热切盼望乐园到嚟
22,23． 你有乜嘢希望？
22 请唔好忘记，大卫讲“义人必得着大地”呢句话嘅时候，其实都系讲紧一个时间点。（诗篇37:29；彼得后书3:13）大卫想指出嘅系，到咗某个时候，地上嘅人会按照上帝正义嘅原则生活。以赛亚书65:22嘅预言话：“我子民嘅寿命，会好似树木嘅寿命。”呢句话隐含嘅意思系，人类可以有好长好长嘅寿命。点解我哋可以相信呢件事呢？启示录21:1-4话，上帝会赐福俾嗰啲喺新世界事奉佢嘅人，而其中一个福分就系“唔再有死亡”。
23 圣经真系将乐园描述得好清楚。亚当同夏娃失去嘅系伊甸嘅乐园，不过乐园唔会永远消失。上帝应许，地上嘅人仍然会得到赐福。大卫喺圣灵启示下话，温和嘅人同义人会承受大地，喺地上永远生活落去。以赛亚书提到，人类将来可以喺地上美丽嘅乐园享受生命。我哋都期待呢啲预言实现。呢个乐园几时会嚟呢？就系耶稣实现对犹太犯人嘅承诺嗰时。你都有机会喺呢个乐园里面生活。到时，“喺乐园再见！”呢句话就会实现。
^ 18段 马尔文·佩特教授评论话，虽然好多学者相信，耶稣所讲嘅“今日”系指，佢会喺当日或者24小时之内死去并进入乐园，但系呢个谂法同圣经嘅其他记载唔相符。例如，圣经提到耶稣死去之后喺坟墓，后来又返翻上天。（马太福音12:40；使徒行传2:31；罗马书10:7）
