尊重上帝所赐嘅婚姻安排
“上帝既然使佢哋同负一轭，人就唔可以分开。”——马可福音10:9
1,2． 希伯来书13:4鼓励我哋点样做？
我哋每个人都好想荣耀耶和华。耶和华配受荣耀同尊崇，佢承诺会尊重嗰啲尊重佢嘅人。（撒母耳记上2:30；箴言3:9；启示录4:11）耶和华亦都希望我哋尊重其他人，例如政府官员。（罗马书12:10；13:7）而对我哋个人嚟讲，尤其要尊重婚姻嘅安排。
2 使徒保罗写道：“婚姻人人都应该尊重，婚姻之床不容玷污”。（希伯来书13:4）保罗唔系简单陈述婚姻嘅安排，而系鼓励每个基督徒要尊重婚姻，将婚姻视为一个宝贵嘅恩赐。呢个系咪你对婚姻嘅睇法呢？如果你已经结咗婚，你对自己嘅婚姻系咪都有同样嘅睇法？
3． 关于婚姻，耶稣提出乜嘢重要劝告？（请睇吓课文开头嘅图片）
3 耶稣尊重婚姻嘅安排。如果你同耶稣一样将婚姻睇得好宝贵，就系跟从佢嘅榜样嘞。法利赛派嘅人问耶稣对离婚有乜嘢睇法嘅时候，耶稣提到上帝创立人类第一宗婚姻嗰阵所讲嘅话。佢话：“所以人要离开父母，二人成为一体”。佢又话：“上帝既然使佢哋同负一轭，人就唔可以分开。”（请读马可福音10:2-12；创世记2:24）
4． 耶和华为婚姻定立乜嘢标准？
4 耶稣承认创立婚姻嘅就系耶和华上帝，而且婚姻应该系恒久不变嘅。上帝冇同亚当夏娃讲，夫妻可以离婚。佢喺伊甸园定立一夫一妻嘅婚姻标准，夫妻“二人”应该永远喺一齐，长相厮守。
婚姻方面暂时嘅改变
5． 死亡对婚姻有乜嘢影响？
5 亚当犯罪之后好多情况都发生改变。其中之一就系人会死亡，而死亡会影响到婚姻。使徒保罗向基督徒解释，死亡会终止婚姻关系，而死者嘅配偶就有选择再婚嘅自由。（罗马书7:1-3）
6． 摩西律法点样反映上帝对婚姻嘅睇法？
6 我哋从上帝赐俾以色列国族嘅律法，可以了解更多关于婚姻嘅细节。喺上帝赐下律法之前，就已经存在一夫多妻嘅习俗。虽然上帝嘅律法容许一个丈夫有多个妻子，但律法亦都保护妇女儿童免受唔公平嘅对待。例如，一个以色列男子娶一个奴隶为妻，之后又娶第二个妻子，呢个男子要同以前一样为第一个妻子提供食物同衣服，亦都要满足呢个妻子嘅性需要。上帝嘅要求系，呢个男子要继续保护同照顾第一个妻子。（出埃及记21:9,10）虽然而家我哋唔须要遵守摩西律法，不过都可以从中睇出耶和华有几重视婚姻。呢个可以帮助我哋更加尊重婚姻。
7,8． （甲）根据申命记24:1，律法包含边啲同离婚有关嘅规定？（乙）耶和华对离婚有乜嘢睇法？
7 关于离婚，上帝嘅律法点样讲呢？虽然律法容许人离婚，不过上帝依然好重视婚姻。根据律法，一个以色列男子如果发现妻子“做咗丑事”，就可以同佢离婚。（请读申命记24:1）虽然律法冇讲到“丑事”指嘅系乜嘢，但一定系可耻或严重嘅罪行，而唔系轻微嘅小事。（申命记23:14）可惜嘅系，喺耶稣嘅日子，好多犹太人“用各种理由”离婚。（马太福音19:3）当然，我哋唔想同佢哋有一样嘅态度。
8 玛拉基先知透露咗上帝对离婚嘅睇法。喺玛拉基嘅日子，一个男子可能为咗同一个更年轻嘅异教女子结婚，就诡诈背信，同“年轻时所娶嘅妻子”离婚。玛拉基描述上帝对呢件事嘅睇法，话：“上帝憎恨离婚。”（玛拉基书2:14-16）上帝创立婚姻嘅时候就讲过，男子要“同妻子厮守，二人成为一体”，呢个睇法自始至终都冇改变。（创世记2:24）耶稣支持天父对婚姻嘅观点，话：“上帝使佢哋同负一轭，人就唔可以分开。”（马太福音19:6）
离婚嘅唯一理由
9． 耶稣喺马可福音10:11,12所讲嘅话系乜嘢意思？
9 有啲人可能会问：“圣经有冇一啲关于离婚同再婚嘅原则，可以俾基督徒参考呢？”耶稣话：“边个同妻子离婚，另外娶妻，就系通奸，对唔住妻子；妇人同丈夫离婚，另外嫁人，亦都系通奸。”（马可福音10:11,12；路加福音16:18）显然，耶稣好尊重婚姻，亦都希望其他人噉样做。一个人揾借口同佢忠贞嘅配偶离婚，然后同另一个人结婚，就系通奸。其实，佢哋离婚唔代表两个人嘅婚姻关系已经终止，因为喺耶和华睇嚟，佢哋依然系“一体”。另外，耶稣话一个男子同佢清白嘅妻子离婚会导致妻子陷入通奸嘅危险。点解会噉？喺嗰个时代，一个女子离婚之后就会失去经济上嘅支持，无奈之下佢可能会再婚。但系噉样做，就相当于通奸。
10． 基督徒可以离婚同有自由再婚嘅唯一理由系乜嘢？
10 一个人基于乜嘢理由可以终止婚姻关系呢？耶稣话：“我同你哋讲，如果唔系因为妻子淫乱，丈夫离婚再娶，就系通奸。”（马太福音19:9）佢喺登山宝训亦都提出同样嘅观点。（马太福音5:31,32）耶稣喺两个场合都提到“淫乱［希腊语词‘波尼阿’］”。呢个词嘅意思包括婚姻以外嘅一系列性方面嘅罪，例如通奸、卖淫、未婚性行为、同性恋同埋兽交。如果一个已婚嘅男子犯咗淫乱，噉佢嘅妻子就可以选择系咪要同佢离婚。如果妻子决定离婚，噉喺上帝眼中，佢哋嘅婚姻就终止嘞。
11． 即使有圣经认可嘅理由，点解有啲人都选择唔离婚？
11 值得留意嘅系，耶稣冇讲一个人犯淫乱（波尼阿），佢嘅配偶就一定要同佢离婚。例如，就算丈夫犯咗淫乱，妻子可能仲系会选择维持呢段婚姻。原因可能系，妻子依然爱自己嘅丈夫，愿意原谅佢，希望大家一齐努力改善婚姻关系。妻子如果决定离婚，之后亦都冇再婚，可能就会面对某啲难题。佢喺物质同性方面嘅需要可唔可以得到满足呢？佢会唔会感到孤单呢？佢有冇仔女？离婚嘅话，佢要帮助仔女喺真理中成长会唔会更加困难？（哥林多前书7:14）显然，清白嘅一方离婚之后都会面对难题。
12,13． （甲）何西阿嘅婚姻出现乜嘢情况？（乙）点解何西阿赎翻歌篾？我哋从佢嘅婚姻学到乜嘢？
12 我哋从先知何西阿嘅经历可以得到启发。上帝叫何西阿娶一个叫歌篾嘅女子为妻。上帝话歌篾“日后必成淫妇”，又话佢嘅儿女“必从淫乱而生”。后来，“歌篾怀孕，同［何西阿］生咗一个儿子”。（何西阿书1:2,3）不过，之后佢生嘅一个女同一个仔，可能都系佢同其他男人生嘅。虽然歌篾多次通奸，何西阿仲系同佢维持婚姻关系。但系佢最终离开何西阿成为一个奴隶，而何西阿又将佢赎返嚟。（何西阿书3:1,2）耶和华通过何西阿所做嘅表明，佢点样多次原谅属灵上通奸嘅以色列人。我哋从中可以学到乜嘢？
13 如果一个基督徒嘅配偶犯咗淫乱，噉呢个基督徒就要面对一个抉择。耶稣话，清白嘅一方有理由离婚，之后亦都有自由再婚。另一方面，清白嘅配偶亦都可以选择宽恕，噉样做并唔系错嘅。何西阿赎返歌篾，等歌篾返翻自己身边之后，要求佢唔可以同其他男子发生性关系。虽然何西阿暂时“唔同［歌篾］行房”，但系过咗一段时间之后，佢肯定同歌篾恢复翻夫妻之间嘅性关系。（何西阿书3:3）上帝通过呢件事表明，佢愿意接受佢嘅子民返翻自己身边，并恢复同佢哋嘅关系。（何西阿书1:11；3:3-5）呢个对今日嘅婚姻有乜嘢影响？如果清白嘅配偶决定维持婚姻关系，噉恢复夫妻之间嘅性关系就表明佢已经原谅对方，唔再有符合圣经嘅理由离婚。（哥林多前书7:3,5）之后，佢哋作为夫妇，应该努力反映上帝对婚姻嘅观点。
即使出现难题都依然尊重婚姻
14． 根据哥林多前书7:10,11，婚姻可能会出现乜嘢问题？
14 所有基督徒都应该效法耶和华同耶稣，尽力尊重婚姻。不过，因为人唔完美，可能有啲人做唔到。（罗马书7:18-23）公元1世纪，有啲基督徒喺婚姻方面遇到难题。虽然保罗喺信入面提到“妻子唔应该离开丈夫”，不过有时仲系会有噉样嘅事发生。（请读哥林多前书7:10,11）
可以做啲乜嘢嚟挽救有难题嘅婚姻？（请睇第15段）
15,16． （甲）即使婚姻出现问题，夫妻双方都应该努力点样做？点解？（乙）如果配偶唔系信徒，点样应用呢个原则？
15 保罗冇解释，一啲夫妻因为乜嘢原因而分开。不过我哋知道，佢哋分开唔系因为夫妻其中一方犯淫乱。保罗话，一个离开丈夫嘅妻子“应该安于现状，唔再结婚，如果唔系就同丈夫重修旧好”。所以，佢哋喺耶和华眼中仲系夫妻。保罗嘅建议系，如果唔系因为配偶淫乱，噉无论潜在嘅问题系乜嘢，两个人都应该努力和解。佢哋可以通过会众嘅长老寻求嚟自圣经嘅帮助。长老唔会偏袒任何一方，而会根据圣经提出劝告。
16 如果夫妻当中只有其中一方系按上帝标准生活嘅信徒，噉又应该点做呢？发生问题嘅时候，分居系咪一个正当嘅解决方法呢？上文已经讨论过圣经认可嘅离婚理由，不过圣经冇提及过分居嘅理由。保罗话：“任何妇人有丈夫唔信主，但系丈夫肯同佢同住，佢亦唔应该离开丈夫。”（哥林多前书7:12,13）呢个原则喺今日同样适用。
17,18． 点解有啲基督徒即使婚姻出现难题都依然维持婚姻关系？
17 不过，某啲情况可能表明，唔信主嘅丈夫唔肯同妻子同住。可能系丈夫严重伤害或虐待妻子，以致妻子觉得自己嘅健康同生命受到威胁。又可能系丈夫唔肯养家，或者严重危害妻子嘅属灵生命。喺呢啲情况下，基督徒妻子可能认为丈夫噉样做就系唔肯同自己一齐生活，需要同丈夫分居。不过，有啲姊妹面对类似嘅难题就选择继续忍耐，努力改善婚姻关系。点解呢？
18 喺噉嘅情况下分居，两个人都仲系夫妻。如果佢哋分开生活，噉两个人都可能要面对之前所提到嘅难题。使徒保罗提出另一个要维持婚姻关系嘅理由，话：“丈夫虽然唔信主，但因妻子而成圣；妻子虽然唔信主，亦因弟兄而成圣。唔系嘅话，你哋嘅儿女就唔洁净，但而家佢哋系圣洁嘅。”（哥林多前书7:14）好多忠贞嘅基督徒即使遇到非常艰难嘅情况，都仍然同不信嘅配偶喺一齐。如果佢哋嘅配偶后来成为耶和华见证人，噉佢哋一定会好开心，因为佢哋知道自己付出嘅牺牲都系值得嘅。（请读哥林多前书7:16；彼得前书3:1,2）
19． 点解好多基督徒享有成功嘅婚姻？
19 耶稣就离婚嘅问题提出原则，而使徒保罗就分居嘅问题提出劝告。佢哋都希望上帝嘅忠仆尊重婚姻。今日，世界各地有好多弟兄姊妹都享有成功嘅婚姻。你可以喺自己嘅会众见到好多幸福嘅基督徒夫妇。喺呢啲家庭当中，弟兄深爱自己嘅妻子，而姊妹亦都深深尊重自己嘅丈夫。我哋好开心见到，千百万人嘅例子都证明上帝嘅话语系真实嘅：“所以人要离开父母，从此同妻子厮守，二人成为一体。”（以弗所书5:31,33）
