效法挪亚、但以理、约伯嘅信心同服从嘅态度
“挪亚、但以理、约伯……只能因自己嘅正义救自己嘅性命。”——以西结书14:14
1,2．（甲）点解沉思挪亚、但以理同约伯嘅榜样可以使我哋得到鼓励？（乙）以西结喺乜嘢情况下写低以西结书14:14嘅经文？
你系咪面对紧健康、经济之类嘅难题或者遭受紧猛烈嘅迫害？有时你会唔会觉得，喺为耶和华服务方面好难保持喜乐？如果系噉，沉思挪亚、但以理同约伯嘅榜样可以使你得到鼓励。佢哋都系唔完美嘅人，亦都面对过我哋而家面对紧嘅挑战，有啲挑战甚至令佢哋嘅生命受到威胁。虽然系噉，佢哋依然保持忠贞，所以上帝将佢哋视为信心同服从嘅好榜样。（请读以西结书14:12-14）
2 公元前612年，以西结喺巴比伦写低咗呢篇课文嘅主题经文。 *（以西结书1:1;8:1）叛道嘅耶路撒冷好快就要面临预言所讲嘅毁灭，而呢场毁灭就发生喺公元前607年。当时只有少数人好似挪亚、但以理同约伯噉，因为信赖同服从上帝而得以生还。（以西结书9:1-5）耶利米、巴录、以伯米勒同利甲人系其中嘅一啲人。
3．呢篇课文会讨论乜嘢？
3 今日嘅情况都一样，嗰啲好似挪亚、但以理同约伯一样被耶和华视为无可指责嘅人，先可以喺现行制度终结嘅时候得以生还。（启示录7:9,14）等我哋嚟睇吓，点解耶和华认为呢啲男子系正义嘅好榜样。我哋逐一讨论嗰时，会留意（1）佢面对乜嘢挑战？（2）我哋可以点样效法佢嘅信心同服从嘅态度？
挪亚——900年来一直表现信心同服从嘅态度！
4,5．挪亚面对过乜嘢挑战？点解佢嘅忍耐咁出众？
4 挪亚面对嘅挑战。喺挪亚曾祖父以诺嘅时代，人已经变得非常邪恶，佢哋甚至讲出“令人震惊嘅话抨击上帝”。（犹大书14,15）暴力事件不断增加，到挪亚嘅日子，“暴行遍及全地”。邪恶嘅天使化身为人，娶咗地上嘅女子为妻，佢哋嘅后代都系残暴嘅巨人。（创世记6:2-4,11,12）但系，挪亚就与众不同。“挪亚就蒙耶和华恩待。……喺嗰一代人当中纯全无疵。挪亚与上帝同行。”（创世记6:8,9）
5 请谂吓以上嘅经文点样谈及挪亚。首先，今日大部分人嘅寿命只有七八十年，不过喺洪水嚟到之前，挪亚为耶和华服务嘅时间远远超过一般人嘅寿命，佢喺嗰个时代生活咗差唔多600年！（创世记7:11）另外，同今日情况唔一样嘅系，当时仲未有会众，冇弟兄姊妹喺挪亚身边鼓励同帮助佢，就连佢嘅亲生兄弟姐妹都冇喺属灵上支持佢。 *
6．挪亚喺边方面表现勇气？
6 挪亚唔系但求自己道德清白就够，佢仲勇敢“传讲正义”，公开表明佢对耶和华上帝有信心。（彼得后书2:5）使徒保罗话：“佢凭住噉样嘅信心定咗世人嘅罪”。（希伯来书11:7）由于系噉，挪亚经常面对嘲笑同反对，甚至俾人以暴力恐吓。但系佢并冇“战兢惧怕人”。（箴言29:25）因为耶和华使佢有勇气。
7．挪亚建造方舟嗰时要面对乜嘢挑战？
7 挪亚忠心事奉耶和华500年之后，耶和华吩咐佢建造一只方舟嚟拯救人类同保全一啲动物嘅性命。（创世记5:32;6:14）对挪亚嚟讲，要完成一个规模咁庞大嘅项目，难度非常之高！挪亚亦都知道噉样做会引起好多人嘅嘲笑同反对。不过，佢依然表现信心，凡耶和华吩咐嘅，“佢都照住做”。（创世记6:22）
8．挪亚深信耶和华喺边方面照顾佢同家人？
8 挪亚嘅另一个挑战系照顾家人嘅物质需要。洪水之前，人要付出额外嘅努力先可以种出粮食，而挪亚亦都唔例外。（创世记5:28,29）虽然系噉，佢冇容许物质嘅事使自己分心，反而将事奉耶和华放喺生活嘅首位。甚至喺建造方舟嘅四五十年期间，佢依然专心事奉耶和华。喺洪水之后，佢又继续热心服务咗350年。（创世记9:28）喺表现信心同服从方面，挪亚的确系我哋嘅好榜样！
9,10．（甲）我哋可以点样效法挪亚嘅信心同服从嘅态度？（乙）如果你决心服从上帝嘅吩咐，就可以深信乜嘢？
9 我哋可以点样效法挪亚嘅信心同服从嘅态度。要维护上帝嘅正义，唔属于撒但嘅世界，而且将王国嘅事务放喺生活首位。（马太福音6:33；约翰福音15:19）当然，我哋嘅生活方式并唔会赢得呢个世界嘅认可。事实上，喺某啲地区，由于我哋谨守上帝嘅律法，例如喺婚姻同埋性方面遵守上帝定立嘅道德标准，结果好多人对我哋有负面嘅评价。（请读玛拉基书3:17,18）不过，我哋同挪亚一样，只会敬畏耶和华上帝，唔会畏惧人。我哋知道唯独耶和华先可以俾我哋永远嘅生命。（路加福音12:4,5）
10 噉你呢？当其他人嘲笑你、批评你，又或者经济压力对你嘅信心造成考验嘅时候，你会唔会继续“与上帝同行”？如果你效法挪亚嘅信心同服从嘅态度，就可以深信耶和华一定会照顾你。（腓立比书4:6,7）
但以理——喺充满罪恶嘅地方表现信心同服从嘅态度
11．但以理同佢三个同伴喺巴比伦要面对乜嘢挑战？（请睇吓课文开头嘅图片）
11 但以理面对嘅挑战。但以理被掳到充满偶像崇拜同通灵术嘅巴比伦城。巴比伦人睇唔起犹太人，仲嘲笑犹太人同佢哋嘅上帝耶和华。（诗篇137:1,3）呢个一定会使但以理同其他爱耶和华嘅犹太人大感痛心！但以理同佢三个同伴哈拿尼雅、米沙利同亚撒利雅都成为咗众人嘅焦点，因为佢哋受到训练，日后可以为王服务。佢哋嘅食物都系指定嘅，而其中有啲系耶和华唔希望佢子民食嘅。但以理唔想俾“御膳同御酒玷污自己”。（但以理书1:5-8,14-17）
12．（甲）但以理表现乜嘢美好特质？（乙）喺耶和华眼中，但以理系点样嘅人？
12 但以理因为才干出众而得到一啲特权，呢个可能为佢带嚟其他嘅挑战。（但以理书1:19,20）佢冇变得骄傲自大，反而保持谦卑同谦逊，经常将功劳归俾耶和华。（但以理书2:30）但以理年轻嘅时候，耶和华已经将佢视为正义嘅榜样，亦都将佢同挪亚、约伯相提并论。喺但以理九十几岁嗰时，上帝嘅一位天使好亲切噉同佢讲：“但以理啊，你系极可贵嘅人。”（但以理书10:11）但以理冇辜负耶和华对佢嘅信任，至死都保持忠贞同服从。
13．犹太人点样因但以理而得福？
13 由于但以理得到耶和华嘅帮助，所以佢可以喺巴比伦同米底亚-波斯做高官。（但以理书1:21;6:1,2）有可能系耶和华指引事态嘅发展，所以佢嘅子民可以因但以理而得福，就好似约瑟喺埃及、以斯拉同末底改喺波斯嘅情况一样。 *（但以理书2:48）你可以想象吓，包括以西结在内嘅犹太人，见到耶和华用呢种方式拯救佢哋，一定深感安慰！
耶和华好珍视嗰啲对佢保持忠贞嘅人（请睇第14,15段）
14,15．（甲）我哋同但以理嘅情况有乜嘢相似嘅地方？（乙）今日嘅父母可以点样效法但以理嘅父母？
14 我哋可以点样效法但以理嘅信心同服从嘅态度。今日，我哋居住嘅呢个世界喺道德同属灵方面都非常堕落。大巴比伦，即系世上所有嘅错误宗教，影响住整个世界嘅风气，圣经话佢已经成为“邪灵嘅住处”。（启示录18:2）所以，呢个世界嘅人会觉得我哋好另类，甚至因为噉而嘲笑我哋。（马可福音13:13）好似但以理一样，我哋都要亲近耶和华我哋嘅上帝。如果我哋表现谦卑，信赖同服从耶和华，佢就会将我哋视为珍宝。（哈该书2:7）
15 今日嘅父母都可以效法但以理嘅父母。佢哋可以点样做？但以理细个嗰时，犹大国到处都有恶人恶事。虽然系噉，但以理仲系可以培养对上帝嘅爱。当然，佢唔系一出世自然就会爱耶和华。呢个反映出但以理受过良好嘅家庭教育。（箴言22:6）但以理呢个名嘅意思系“我嘅审判者系上帝”，证明佢嘅父母都敬畏上帝。所以做父母嘅要耐心教导儿女，千祈唔好放弃。（以弗所书6:4）另外，要同佢哋一齐祷告，亦都要为佢哋祷告。如果父母将圣经真理刻喺儿女心上，就一定会得到耶和华所赐嘅厚福。（诗篇37:5）
约伯——无论富有抑或贫穷都表现信心同服从嘅态度
16,17．约伯经历乜嘢转变？
16 约伯面对嘅挑战。约伯嘅一生跌宕起伏。遭遇考验之前，佢“喺东方人当中……系最尊大嘅”。（约伯记1:3）佢好富有，好多人都认识佢、敬重佢。（约伯记29:7-16）但系，佢冇变得高傲自大或者觉得自己唔需要上帝。上帝称佢为“我嘅仆人”，仲话佢“为人正直，敬畏上帝，远离恶事”。（约伯记1:8）
17 喺短时间内，约伯嘅生活发生咗极大嘅转变。佢失去一切，变得灰心绝望，甚至觉得生不如死。而事情嘅起因就系，毁谤者撒但指控约伯出于自私嘅理由事奉上帝。（请读约伯记1:9,10）耶和华并冇将呢个问题置之不理，而系俾机会约伯证明自己系忠义嘅，表明佢崇拜上帝嘅动机纯正、毫无私心。
18．（甲）约伯嘅忠义点样令你印象深刻？（乙）耶和华对待约伯嘅方式显示佢系点样嘅上帝？
18 撒但用咗一连串恶毒嘅计谋攻击约伯，令约伯以为佢所遭遇嘅事都系上帝促成嘅。（约伯记1:13-21）跟住，三个所谓嘅朋友用尖酸刻薄嘅话打击佢，话佢一定系罪有应得！（约伯记2:11;22:1,5-10）不过，约伯依然对耶和华保持忠贞。虽然约伯曾经讲话鲁莽，但系耶和华明白佢要忍受嘅痛苦。（约伯记6:1-3）耶和华睇到，虽然撒但猛烈攻击约伯，仲一再使佢受恶言中伤，令佢灰心绝望，但系约伯始终都冇因为噉而背弃上帝。之后，耶和华赐福俾约伯，使佢嘅财富比考验之前多一倍，又使佢多活140年。（雅各书5:11）呢篇课文嘅主题经文系以西结喺约伯死去几个世纪之后写嘅。我哋从中可以睇出，考验过后，约伯仲系继续全心事奉耶和华。
19,20．（甲）我哋可以点样效法约伯嘅信心同服从嘅态度？（乙）我哋可以点样效法耶和华向人表现体恤之情？
19 我哋可以点样效法约伯嘅信心同服从嘅态度。无论处于乜嘢情况，愿我哋继续将耶和华放喺生活嘅首位，全心信赖同服从佢。其实我哋比约伯更加有理由噉样做，因为我哋而家更了解撒但同佢嘅奸计。（哥林多后书2:11）我哋真系好感激耶和华通过约伯记使我哋知道点解佢容许苦难发生。我哋从但以理嘅预言得知，上帝嘅王国系由耶稣基督统治嘅一个真实政府。（但以理书7:13,14）呢个王国好快就会永远消除所有嘅苦难。
20 我哋从约伯嘅经历亦都学到，我哋要体恤嗰啲遇到难题嘅基督徒同工。有时，一啲弟兄姊妹可能会好似约伯噉讲出一啲消极嘅话。（传道书7:7）虽然系噉，我哋与其喺心入面审判佢哋，不如运用洞悉力，向佢哋表现体恤之情。噉样做就系效法我哋仁爱嘅天父耶和华。（诗篇103:8）
耶和华“使你哋坚定刚强”
21．彼得前书5:10点样喺挪亚、但以理同约伯嘅经历中反映出嚟？
21 虽然挪亚、但以理、约伯生活喺唔同嘅时代，面对唔同嘅情况，但系佢哋喺考验下都忍耐到底。佢哋一生嘅经历使我哋谂起使徒彼得嘅话：“你哋受过短暂嘅苦楚之后，有丰富分外恩典嘅上帝，……必定亲自完成你哋所受嘅训练，使你哋坚定刚强。”（彼得前书5:10）
22．下一篇课文会讨论乜嘢？
22 耶和华通过彼得嘅话向我哋保证，佢会使我哋坚定刚强。我哋都好想接受耶和华嘅训练，使自己变得更加刚强，喺信仰上坚定不移。所以，我哋好想效法挪亚、但以理、约伯嘅信心同服从嘅态度。喺下一篇课文我哋会学到，佢哋保持忠义嘅主要原因系，佢哋真正认识耶和华。凡耶和华要求嘅，佢哋“都能领悟”。（箴言28:5）我哋都一样可以做得到。
^ 2段 以西结喺公元前617年被掳到巴比伦。佢喺被掳嘅“第六年”，即系公元前612年写低咗以西结书8:1-19:14。
^ 5段 挪亚嘅父亲拉麦敬畏上帝，不过佢喺洪水嚟到5年前就已经去世。喺渡过大洪水而生还嘅人当中，并冇挪亚嘅母亲同兄弟姐妹。如果洪水发生嗰时佢哋仲在世，噉佢哋一定系俾洪水毁灭咗。
