读者来函
点解耶和华见证人将保罗描绘为秃头或者头发稀疏嘅人?
今日冇人可以肯定保罗嘅外表系点样嘅。我哋出版物入面嘅图画都系通过想象,而唔系基于考古文物嘅真实图片画出嚟嘅。
不过,我哋都同意对保罗外表嘅一啲公认嘅讲法。例如,《锡安嘅守望台》1902年3月1日刊(英语)提到:“关于保罗嘅外表:……公元150年写成嘅《保罗与德克拉行传》嘅描述,可能系传统上最为人接受嘅。呢本书将保罗嘅外表描述为‘矮细、秃头、O形腿、强壮、一字眉、鼻长长。’”
《牛津基督教词典》(1997年版)提到呢本古代作品话:“《行传》所记载嘅一啲历史细节有可能系真实嘅。”《保罗与德克拉行传》成书之后嘅几个世纪,已经存留有80本希腊语手抄本同其他语言版本,表明呢本书的确受人重视。所以,我哋出版物嘅图画都参考咗呢啲古代作品对保罗外貌嘅描述。
不过要记住,有其他嘢比保罗嘅外表更加重要。保罗传道嘅时候,一啲肤浅嘅人批评佢话:“佢喺呢度嘅时候,为人软弱无能,又冇口才。”(哥林多后书10:10)但系我哋唔好忘记,系耶稣使佢成为基督徒嘅。我哋都可以谂吓保罗“系[基督]拣选嘅器皿,[基督]要派佢向外邦人……传扬[耶稣]嘅名”。(使徒行传9:3-5,15;22:6-8)我哋仲可以谂吓,耶和华启示保罗写嘅圣经书卷对我哋有几大嘅益处。
成为基督徒之前,佢冇夸耀自己世俗嘅成就,亦都冇讲及佢自己嘅外表。(使徒行传26:4,5;腓立比书3:4-6)佢承认:“我喺使徒当中系最细嘅,根本唔配称为使徒”。(哥林多前书15:9)佢后来又话:“我连圣民中最细嘅都不如,但系上帝就将分外恩典赐俾我,叫我传好消息俾外邦人,宣扬基督无法量度嘅属灵财富”。(以弗所书3:8)显然,保罗传讲嘅信息比佢嘅外表更加重要。