受浸——成为基督徒必须采取嘅步骤
“浸礼，而家都……拯救你哋。”——彼得前书3:21
1,2．（甲）喺儿女提出想受浸嘅时候，有啲基督徒父母会有乜嘢反应？（乙）点解讲者会问准备受浸嘅人，佢哋系咪已经献身俾耶和华？（请睇吓课文开头嘅图片）
一个叫玛丽亚嘅年轻人同其他准备受浸嘅弟兄姊妹一齐企起身。佢嘅父母系基督徒，佢哋好开心噉望住自己嘅女。玛丽亚用清晰、响亮嘅声音回答讲者提出嘅两个问题。之后，佢就接受咗水浸礼。
2 玛丽亚毫无保留噉献身俾耶和华并接受浸礼，呢个决定令佢父母感到非常自豪。不过，之前佢妈妈对佢嘅决定有好多疑问。妈妈曾经问自己：“玛丽亚仲咁年轻，受得浸未㗎？佢系咪真系明白献身受浸系好严肃嘅事？系咪最好叫佢再等吓先？”当儿女表示自己想受浸嗰时，好多关爱儿女嘅父母都会问自己呢啲问题。（传道书5:5）毕竟，献身受浸系基督徒一生当中最重要嘅步骤。（请睇附栏“ 你系咪已经献咗身俾耶和华？”）
3,4．（甲）使徒彼得用乜嘢嚟比喻受浸嘅重要性？（乙）点解话受浸就好似挪亚建造方舟一样？
3 喺讲到浸礼呢件事嗰时，使徒彼得提及方舟嘅建造工程：“呢件事所预表嘅浸礼，而家都……拯救你哋。”（请读彼得前书3:20,21）方舟系一个实际嘅证据，清楚表明挪亚忠于耶和华，全心遵行佢嘅旨意。挪亚忠心完成耶和华委派嘅工作。佢出于信心嘅行动，使全家人都可以渡过大洪水。彼得呢番话系乜嘢意思呢？
4 挪亚建造方舟，证明佢对耶和华有信心。噉一个人喺大家面前受浸，又证明乜嘢呢？证明一个对赎价有信心嘅人，已经将自己献俾耶和华。就好似挪亚噉，呢啲献咗身嘅人会听从耶和华嘅吩咐，执行佢所委派嘅工作。挪亚可以活着渡过大洪水，同样，喺现行邪恶制度终结嘅时候，受咗浸嘅忠心基督徒都可以保全生命。（马可福音13:10；启示录7:9,10）所以，献身受浸的确非常重要。一个人如果迟迟唔受浸，噉佢永生嘅希望就会受到影响。
5．我哋会喺呢篇课文考虑乜嘢问题？
5 受浸系一件严肃嘅事，所以我哋应该仔细考虑以下三个问题：关于受浸，圣经点样讲？一个人喺受浸之前需要采取乜嘢步骤？基督徒教导自己儿女或者圣经学生嗰时，点解应该紧记受浸嘅重要性？
圣经记载嘅浸礼
6,7．（甲）请解释约翰施行嘅浸礼有乜嘢意义？（乙）约翰有殊荣为边个施浸？
6 圣经首次记载嘅浸礼系由施浸者约翰施行嘅。（马太福音3:1-6）嚟揾约翰嘅人由于违反咗摩西律法，所以佢哋通过约翰嘅浸礼表明自己已经悔改。好有意思嘅系，只有约翰有殊荣为一个完美嘅人——上帝嘅儿子耶稣施浸。呢个最重要嘅浸礼同悔改一啲关系都冇。（马太福音3:13-17）耶稣系无罪嘅，所以佢唔需要悔改。（彼得前书2:22）佢所接受嘅浸礼，象征佢献出自己嚟遵行上帝嘅旨意。（希伯来书10:7）
7 耶稣喺地上传道期间，佢嘅门徒亦都为人施浸。（约翰福音3:22；4:1,2）呢啲浸礼同约翰施行嘅一样，表明一个违反摩西律法嘅人已经为自己嘅罪悔改。不过耶稣复活之后，浸礼对佢嘅门徒嚟讲就有唔同嘅意义嘞。
8．（甲）耶稣复活之后，佢吩咐门徒要做乜嘢？（乙）请解释基督徒浸礼嘅重要性。
8 公元33年，耶稣复活之后向超过500人显现。呢啲人当中有男有女，或者仲有细路仔。可能就喺呢个时候，耶稣吩咐门徒：“所以你哋要去，使所有国族嘅人做我嘅门徒，奉父亲、儿子、圣灵嘅名为佢哋施浸，我吩咐你哋嘅一切，都要教导佢哋遵守。”（马太福音28:19,20；哥林多前书15:6）睇嚟耶稣讲呢番话嘅时候，有几百个门徒在场。耶稣指出，一个人想负起基督徒嘅轭就一定要受浸。（马太福音11:29,30）如果人希望自己所作嘅崇拜蒙耶和华悦纳，就一定要承认同接受基督喺实现耶和华旨意方面所担任嘅角色，之后先可以接受水浸礼。唯有呢种浸礼先得到耶和华嘅认可。圣经嘅记载充分表明，1世纪嘅基督徒清楚明白受浸非常重要。佢哋并冇拖延时间，迟迟唔肯受浸。（使徒行传2:41；9:18；16:14,15,32,33）
唔好拖延
9,10．关于浸礼，我哋通过埃塞俄比亚官员同使徒保罗嘅记载学到乜嘢？
9 请读使徒行传8:35,36。请谂吓一个归信咗犹太教嘅埃塞俄比亚官员嘅记载。当时，呢个官员啱啱去完耶路撒冷崇拜上帝。喺佢返屋企嘅途中，耶和华嘅天使指引腓力向佢“传讲耶稣嘅好消息”。官员有乜嘢反应呢？佢跟住所做嘅事表明，佢对自己所学到嘅真理有感激之心。由于佢愿意服从耶和华嘅安排，所以冇拖延，马上受浸。
10 第二个记载同一个迫害基督徒嘅犹太男子有关。佢出生于一个献咗身俾上帝嘅民族，而呢个民族已经失去咗同耶和华嘅特殊关系。呢个男子仍然热衷于犹太教嘅传统，不过佢后来认识到正确嘅崇拜方式。复活之后得到荣耀嘅耶稣基督亲自向佢作见证。呢个男子有乜嘢反应？佢乐意接受基督嘅门徒亚拿尼亚嘅帮助。圣经话呢个男子跟住就“起嚟受浸”。（使徒行传9:17,18；加拉太书1:14）相信你已经知道，呢个犹太男子就系后来为人所知嘅使徒保罗。值得留意嘅系，保罗一知道耶稣喺实现上帝旨意方面担任嘅角色，就冇拖延，即刻受浸。（请读使徒行传22:12-16）
11．（甲）今日，乜嘢推动圣经学生受浸？（乙）我哋见到献咗身嘅人受浸，会有咩感觉？
11 今日嘅圣经学生，无论年纪大细都一样噉做。佢哋一旦对圣经真理建立信心，有深刻嘅体会，就会好渴望献身受浸。浸礼演讲就系特别为佢哋准备嘅，亦都系每个区域大会同分区大会嘅重要部分。每当有圣经学生接受真理，而且进步到受浸，所有弟兄姊妹都会为佢哋感到高兴。基督徒父母见到自己儿女受浸，唔系亦都好开心咩？喺2017服务年度，超过28万4000位“秉性适宜得永生嘅人”接受水浸礼，表明佢哋已经献身俾耶和华。（使徒行传13:48）显然，呢啲新嘅弟兄姊妹都明白，想成为基督徒就必须受浸。一个人喺受浸之前需要采取乜嘢步骤？
12．一个圣经学生喺受浸之前必须采取乜嘢步骤？
12 一个圣经学生先要对上帝、上帝嘅旨意同埋上帝嘅拯救安排有确切嘅知识，喺呢个基础上培养信心，然后先可以受浸。（提摩太前书2:3-6）学生有咗信心之后，就会弃绝令上帝不悦嘅行为，并且努力符合耶和华嘅正义标准。（使徒行传3:19）噉样做好重要，因为一个人如果继续做耶和华憎恨嘅事，耶和华就唔会接受佢嘅献身。（哥林多前书6:9,10）一个追求正义嘅人除咗要遵守耶和华崇高嘅道德标准之外，仲要参加聚会，而且积极参与传道教人嘅救生工作。耶稣话，真基督徒会执行呢项工作。（使徒行传1:8）一个圣经学生必须完成以上步骤，先可以通过祷告献身俾耶和华，然后喺大家嘅见证之下受浸。
帮助圣经学生定立目标
你有冇紧记并且帮助学生明白受浸嘅重要性？（请睇第13段）
13．点解圣经老师一定要紧记，想做真基督徒嘅人必须受浸？
13 我哋一步一步噉教导自己嘅儿女同埋圣经学生，同时都应该紧记，想做真基督徒嘅人必须受浸。如果我哋记住呢一点，就可以更有效噉教导学生。所以，喺适当嘅时候，我哋就会同学生讨论献身受浸嘅重要性。的确，我哋都好希望自己嘅儿女同圣经学生不断进步，可以献身受浸！
14．点解我哋唔会强迫人受浸？
14 当然，圣经学生唔应该因为受到父母、圣经老师或者会众其他人嘅压力而受浸。耶和华绝对唔会强迫人事奉佢。（约翰一书4:8）所以，我哋教导人嗰时，必须强调同上帝培养亲密关系嘅重要性。如果圣经学生对真理深有体会，而且好想负起基督徒嘅轭，就自然想受浸。（哥林多后书5:14,15）
15,16．（甲）一个人系咪一定要到咗某个年龄先可以受浸？请解释。（乙）就算一个圣经学生过去喺其他宗教已经受过浸，点解佢要再一次受浸先可以成为耶和华见证人？
15 一个人唔一定要到咗某个年龄先可以受浸。每个人属灵成长嘅速度都唔一样。好多人年纪轻轻就受浸，长大之后都继续忠于耶和华。有啲人就上咗年纪之后先至学习圣经真理同受浸，当中有啲甚至超过100岁！
16 一个年老嘅圣经学生以前喺唔同嘅宗教接受过几次浸礼，所以佢问圣经老师，系咪真系有需要再次受浸。圣经老师就俾佢睇一啲相关嘅经文。呢个学生明白咗圣经嘅要求之后，冇几耐就受浸。虽然佢就快80岁，但都唔会觉得自己冇必要再受浸。我哋从中学到乜嘢？要确切认识耶和华嘅旨意先可以受浸，唯有呢种浸礼先会得到耶和华嘅悦纳。所以，即使有啲人过去喺其他宗教已经受过浸，佢哋都必须再次受浸。（请读使徒行传19:3-5）
17．一个人喺受浸当日应该认真谂吓乜嘢？
17 一个人喺受浸嗰日当然会好开心，不过佢亦都应该认真谂吓献身受浸嘅意义。佢想符合献身嘅誓愿就需要付出努力。所以耶稣就将基督徒嘅责任比作一个轭。耶稣嘅门徒必须“唔再为自己活，而系为替佢哋死咗又复活嘅主活”。（哥林多后书5:15；马太福音16:24）
18．喺下一篇课文，我哋会讨论乜嘢？
18 玛丽亚嘅妈妈知道，成为基督徒系一个好严肃嘅决定，所以佢先会有课文开头提到嘅疑问。如果你为人父母，可能你都问过自己：“我嘅儿女系咪已经准备好可以受浸？佢系咪已经有足够嘅知识可以献身俾耶和华？我嘅儿女系咪要等到读完书揾到工先考虑受浸？如果佢受浸之后犯咗严重嘅罪，点算好呢？”喺下一篇课文，我哋会讨论以上嘅问题，而且睇吓基督徒父母可以点样对受浸有正确嘅观点。
