人物生平
耶和华从来都冇撇弃我!
喺希特勒发表演讲之后,有四个女仔负责向佢献花,我系其中一个。点解会拣我?我爸爸好积极参与纳粹党嘅活动,亦都系当地纳粹党一位高官嘅司机。我妈妈系一个好虔诚嘅天主教徒,佢好想我做修女。虽然深受两边嘅影响,不过最终我既冇加入纳粹党亦都冇做修女。等我话俾你知点解。
我喺奥地利嘅格拉茨长大。七岁嘅时候,我就去咗一间教会学校受训。不过,我睇到神父同修女有苟且嘅性关系,觉得好震惊。所以唔到一年,妈妈就俾我离开呢间学校。
我嘅家人同着住军服嘅爸爸
之后,我去咗寄宿学校。有一晚,格拉茨受到猛烈嘅轰炸。于是,爸爸带住我逃去施拉德明镇避难。我哋一过咗条桥,条桥就被炸毁咗。另一次,有啲战机飞过我哋花园,向我同婆婆开枪。直到大战结束,教会同政府似乎都俾唔到人真正嘅希望。
学习信赖耶和华
1950年,我妈妈开始同一位耶和华见证人学习圣经。佢哋讨论嘅时候,我会喺旁边听。有时,我仲会跟妈妈去参加聚会。妈妈确信耶和华见证人所教嘅系真理,后来喺1952年受浸。
嗰时,本地会众就好似一个婆婆读书会。后来,我哋有机会参加另一群会众嘅聚会,嗰度有好多年轻人,同我哋嗰个婆婆读书会完全唔同!返到格拉茨,我就开始参加所有聚会,好快我都深信自己所学到嘅系真理。我亦都睇出,耶和华会支持佢嘅仆人,而且唔会令佢哋失望。即使我哋独自面对紧一啲睇嚟冇办法解决嘅问题,佢都会帮助我哋。(诗篇3:5,6)
我好想同其他人分享圣经真理。一开始,我先同兄弟姐妹传道。我四个姐姐都系教书嘅,当时佢哋已经搬咗出去住。我会去姐姐住嘅村庄探佢哋,鼓励佢哋学习
圣经。后来,所有兄弟姐妹都学习圣经,最终都成为耶和华见证人。我开始逐家逐户传道嘅第二个星期,就遇到一位三十几岁嘅太太,之后同佢讨论圣经。佢继续进步,跟住献身受浸,后来佢先生同两个仔都成为见证人。同呢位太太讨论圣经大大强化咗我嘅信心。点解呢?冇人正式同我讨论过圣经,所以我更加需要为每一课做好充分嘅准备。即系话,喺教导学生之前,我要先教导自己。呢个真系帮助我对圣经真理有更深入嘅理解。1954年4月,我受浸表明自己已经献身俾耶和华。
“受迫害,但冇被撇弃”
1955年,我参加咗分别喺德国、法国同英国举行嘅国际大会。喺伦敦,我有机会认识艾伯特·史劳德弟兄。佢系基列圣经学校嘅导师,后来佢成为中央长老团成员。参观大英博物馆嗰阵,史劳德弟兄向我哋介绍一啲有上帝希伯来语名字嘅圣经手抄本,同埋解释佢哋嘅重要性。呢个深深打动咗我,令我更加爱耶和华同圣经真理。所以,我下定决心要积极传讲上帝嘅话语。
我同同伴(右),喺奥地利嘅米斯特尔巴赫做特别先驱
1956年1月1日,我开始做正规先驱。四个月之后,我被委派到奥地利嘅米斯特尔巴赫做特别先驱。当时,呢个镇仲未有其他见证人。不过,我要面对一个特别嘅挑战。我同我嘅先驱同伴有好大嘅差异。我未满19岁,喺城市长大;佢25岁,嚟自乡村。我钟意迟啲瞓晏啲起身,佢就钟意早睡早起。不过我哋实践圣经原则,彼此包容,结果我哋可以好开心噉一齐做先驱。
后来,我哋要面对另一啲艰难嘅情况,甚至要面对迫害,但系我哋冇“被撇弃”。(哥林多后书4:7-9)有一次,我哋喺一条偏僻嘅村庄传道,村民特登放啲狗出嚟。好快,我同同伴就俾啲大狗围住。佢哋对住我哋不停噉吠,想咬我哋。我哋都捉实对方嘅手。我祷告话:“耶和华啊,如果啲狗真系要咬我哋,就俾我哋死快啲啦!”啲狗差唔多走到埋嚟,突然间停喺度,摆吓条尾就走咗嘞。我哋觉得耶和华真系保护咗我哋。之后,我哋就向整条村传道。令我哋开心嘅系,村民都好乐意听我哋传讲嘅信息。可能佢哋觉得好意外,因为啲狗居然冇咬我哋,或者见我哋经历咗噉嘅事都坚持向佢哋传道。有啲村民后来亦都成为咗耶和华见证人。
我哋仲经历咗另一件好得人惊嘅事。有一日,我哋嘅房东饮醉咗,返到嚟仲话
要杀我哋,又话我哋骚扰周围嘅邻居。佢太太尝试令佢冷静落嚟,但系唔成功。我哋喺楼上听到佢讲嘅嘢,就即刻攞啲凳顶住道门,拿拿冧执埋行李。我哋一开门就见到房东企喺楼梯度,揸住把菜刀。所以我哋就即刻拎住啲行李,从后门嘅小路逃走,之后再冇返过去。我哋去酒店订咗间房,喺嗰度住咗差唔多一年,呢个为我哋嘅传道工作带嚟好大嘅益处。点解?呢间酒店位于市中心,所以我哋嘅圣经学生钟意嚟呢度学习。冇几耐,我哋就喺房入面,举行书籍研究班同每个星期嘅《守望台》研读,大约有15人参加。
我哋留喺米斯特尔巴赫超过一年,跟住就被委派到格拉茨东南部嘅费尔德巴赫,呢度亦都冇会众。我有一个新嘅先驱同伴,我哋住喺一间简陋木屋二楼嘅房仔。因为啲木之间有罅,风经常会吹入嚟,所以我哋要用报纸塞住啲罅。我哋仲要去井度打水。但系呢一切都系值得嘅,因为几个月后,当地就成立咗一个小组。一个家庭嘅30个成员同我哋讨论圣经,结果佢哋都成为耶和华见证人!
呢啲经历强化咗我对耶和华嘅信心,知道佢唔会撇弃嗰啲追求王国嘅人。即使冇人可以帮到我哋,耶和华都一定会支持我哋。(诗篇121:1-3)
受耶和华“正义嘅右手”扶持
1958年,我申请参加喺纽约洋基体育场同马球场举行嘅国际大会。奥地利分部就问我想唔想参加第32届基列学校。我点可以拒绝呢个福分呢?我即刻话:“好啊!”
喺基列受训期间,我坐喺马丁·普辛格弟兄隔篱。佢喺纳粹集中营经历过严峻嘅考验,后来成为中央长老团嘅成员。上课嘅时候,马丁有时会细细声问我,“呢句话喺德语系咩意思啊?”
课程过咗一半之后,内森·诺尔弟兄就宣布我哋嘅委派。我嘅委派系去巴拉圭。因为当时我太年轻,所以我需要爸爸嘅批准先可以入境。得到批准后,我喺1959年3月抵达巴拉圭。我被委派到亚松森,住喺嗰度嘅海外传道员之家,同一个新同伴一齐服务。
冇几耐,我遇到一个喺第30届基列学校毕业嘅海外传道员(现称特派传道员),佢叫韦尔特·布赖特。之后,我哋就结咗婚,共同面对生活上嘅挑战。每当我哋遇到一啲棘手嘅难题,都会一齐读耶和华喺以赛亚书41:10所作嘅应许:“你唔使怕,因为我与你同在。你唔需要四顾张望,因为我系你嘅上帝,我要使你坚强。”呢节经文向我哋保证,只要我哋尽力对上帝保持忠贞,将佢嘅王国放喺首位,佢就一定唔会令我哋失望。
之后,我哋被委派去靠近巴西边境嘅一个地区。嗰度嘅教士怂恿一啲年轻人向本来就需要维修嘅海外传道员之家掟石头。后来,韦尔特同一个警察局长讨论圣经。局长派警员喺我哋屋企附近守卫咗一个星期,之后我哋就冇再受到骚扰嘞。跟住,我哋就搬咗去巴西边境嗰边一个更合适嘅住宅。噉样做对我哋嘅工作好有利,因为我哋喺巴拉圭同巴西都可以举行聚会。我哋离开呢个地区之前,当地已经有两群细会众。
同我先生韦尔特喺巴拉圭嘅亚松森做特派传道员
耶和华继续扶持我
我嘅医生曾经话我冇生育能力,所以喺1962年我知道自己有咗嘅时候,就觉得好意外!我哋决定喺佛罗里达州嘅荷李活定居,住喺韦尔特嘅家人附近。有好多年,情况都唔容许我同韦尔特做先驱,因为我哋需要照顾家人。虽然系噉,我哋继续将追求王国放喺生活首位。(马太福音6:33)
1962年11月,我哋抵达佛罗里达州嗰时,觉得好惊讶,因为本地嘅黑人弟兄同白人弟兄受到当时嘅种族歧视影响而要分开聚会,分开传道。但系耶和华冇种族偏见,所以冇几耐,唔同种族嘅弟兄姊妹就聚集埋一齐崇拜耶和华。我哋清楚睇出呢个安排得到耶和华嘅指引,因为而家呢个地区已经有几十群会众。
令我伤心嘅系,2015年韦尔特因为脑癌而去世。55年来,佢一直系一个好好嘅丈夫,佢深爱耶和华亦都帮咗好多弟兄姊妹。我好期待喺佢复活之后见翻佢,到时佢会恢复健康嘅身体。(使徒行传24:15)
我好开心能够全时为耶和华服务超过40年,得到好多喜乐同福分。例如,韦尔特同我亲眼睇到我哋嘅136个圣经学生受浸。当然,我哋都面对过艰难嘅情况,但系我哋从来都冇用呢啲事作为借口停止事奉耶和华。相反,我哋努力亲近佢,深信佢会喺最适当嘅时候用佢嘅方式解决问题。佢的确噉样做!(提摩太后书4:16,17)
我真系好挂住韦尔特,但系先驱工作可以帮助我保持积极。我发觉同其他人讨论圣经,分享复活嘅希望,对我特别有帮助。我从自己一生嘅经历睇出,耶和华从来都冇撇弃我。就好似佢所应许嘅一样,佢一直鼓励我,使我坚强,亦都“用正义嘅右手”捉紧我。(以赛亚书41:10)