年轻人，你系咪尽力追求属灵目标？
“要将你嘅事交托俾耶和华，你嘅计划就能够成功。”——箴言16:3
1-3．（甲）所有年轻人面对乜嘢情况嗰时会感到迷茫？请用比喻说明。（请睇吓课文开头嘅图片）（乙）乜嘢可以帮助年轻基督徒作出明智嘅决定？
假设，你要坐长途巴士去好远嘅地方参加一个重要活动。喺巴士站，你见到人山人海，又有好多唔同嘅巴士，你可能会觉得有啲迷茫。好在你清楚知道自己嘅目标，就系要揾到可以到达目的地嘅巴士。但系，如果你求其上一部巴士，又唔知部巴士去边度，噉就好容易行错方向。
2 生命就好似一个长途旅程，而今日嘅年轻人就好似嗰啲要坐巴士嘅乘客。由于面前有好多机会同选择，所以好多时佢哋会感到不知所措。年轻人，如果你清楚知道自己嘅人生目标系乜嘢，就更加容易做决定嘞。你应该选择边个方向呢？
3 呢篇课文会回答呢个问题，亦都会鼓励你喺生活各方面力求取悦耶和华。呢个意味住，喺教育、就业、家庭责任等方面都要听从耶和华嘅指引，即系要追求属灵目标。年轻人全心事奉耶和华，就可以确信自己会得到耶和华嘅赐福，享有一个成功嘅人生。（请读箴言16:3）
点解要定立属灵目标？
4．呢篇课文会讨论乜嘢？
4 自细就定立属灵目标系明智嘅。点解？我哋会分析三个原因。头两个原因会帮助你睇出，努力追求属灵目标可以点样强化自己同耶和华嘅关系；第三个原因强调自细定立属灵目标所带嚟嘅益处。
5．定立属灵目标嘅主要原因系乜嘢？
5 定立属灵目标嘅主要原因系，向耶和华表明我哋感激佢对我哋表现嘅爱同佢为我哋所做嘅一切。诗篇执笔者话：“我眼中嘅美事，就系感谢耶和华，……耶和华啊，你使我因你嘅作为而欢喜；我因你手所做嘅事而欢呼。”（诗篇92:1,4）年轻人都应该认真谂吓，耶和华赐俾你嘅一切——生命、信仰、圣经、会众、未来美好嘅希望。只要你将属灵嘅事放喺第一位，就可以更加亲近上帝，亦都表明你感激上帝赐俾你咁多福分。
6．（甲）追求属灵目标点样加深我哋同耶和华嘅关系？（乙）自细就可以定立乜嘢目标？
6 第二个原因系，你一旦开始努力追求属灵目标，耶和华就会记住你所做嘅善工。你同耶和华嘅关系会因此变得更加亲密。使徒保罗承诺话：“上帝系正义嘅，绝对唔会忘记你哋所做嘅工作同你哋为佢嘅名所显嘅爱心”。（希伯来书6:10）无论你年纪几细，都可以定立属灵目标。克莉斯汀10岁嘅时候，就决心要经常阅读现代忠仆嘅人物生平。托比12岁嗰阵计划喺受浸之前读晒成本圣经。马克西姆同妹妹诺爱米受浸嘅时候分别系11岁同10岁。之后，佢哋两个都立下目标去伯特利服务。为咗帮助自己继续努力追求呢个目标，佢哋将伯特利申请表贴喺屋企嘅墙上。你都可以谂吓，边啲属灵目标对你嚟讲系重要嘅，然后努力去追求。（请读腓立比书1:10,11）
7,8．（甲）定立属灵目标可以点样帮助人更加容易作出决定？（乙）点解一个姊妹当初放弃读大学？
7 第三个原因系，自细定立目标可以帮助我哋喺生活嘅其他事上作出明智嘅决定。青少年要喺教育、就业同其他事上做决定，呢个就好似一个人喺十字路口要选择行边条路。如果你知道边条路可以去到目的地，就好容易作出选择。同样，如果你知道自己嘅目标系乜嘢，就更加容易作出正确嘅决定。箴言21:5话：“勤奋人计划周详，必致成功”。你越早定立属灵目标，就越快达到。达玛莉丝喺十几岁嘅时候就要做一个重要决定。我哋嚟睇吓佢嘅经历。
8 达玛莉丝学习成绩优秀。佢完成基本学业之后，本来可以得到一笔奖学金去大学主修法律。但系，佢放弃咗呢个机会，选择喺银行工作。点解？达玛莉丝话：“我好细个就决心要做先驱，呢个意味住我唔会揾一份全职工作。如果得到法律学位，我可能会赚好多钱，不过就好难做部分时间嘅工作。”达玛莉丝而家已经做咗20年先驱，佢有冇对自己十几岁嗰时定立嘅目标同所作嘅决定感到后悔？佢继续话：“喺银行工作嘅时候，我经常要同律师打交道。如果我读法律，我嘅工作就可能系佢哋而家做紧嘅工作。佢哋好多人都工作得唔开心。相反，我嘅先驱目标帮助我唔需要过度为世俗工作烦恼。多年来，为耶和华服务使我得到好大嘅喜乐。”
9．点解会众嘅年轻人值得我哋衷心称赞？
9 世界各地嘅会众有好多年轻人都值得我哋衷心称赞。佢哋信赖耶和华，全心追求属灵目标。呢啲年轻人喺生活上得到好多喜乐，同时亦都学会点样喺教育、就业、家庭生活等事上跟从耶和华嘅指引。所罗门王话：“你要全心信赖耶和华，……喺你所行嘅一切事上都要留意佢，佢必修直你嘅路。”（箴言3:5,6）基督徒会众嘅年轻人喺耶和华眼中非常宝贵。耶和华好爱佢哋，仲会保护、指引同祝福佢哋。
做好准备向人作见证
10．（甲）点解我哋应该重视传道工作？（乙）我哋可以点样有效噉做传道工作？
10 一个喺生活上尽力取悦耶和华嘅年轻人特别重视传道工作。耶稣基督话“好消息必须先传遍万国万族”。（马可福音13:10）传道工作系当务之急，所以我哋应该以呢个工作为生活重心。你可唔可以定立目标，用更多时间传道？你可唔可以考虑做先驱？如果你做传道工作唔系做得好喜乐，噉可以点样做？你可以点样更有效噉作见证？两个基本方法可以帮到你：好好准备；唔好放弃同人分享圣经信息。之后你可能会意外噉发现，原来做传道系咁开心嘅。
你点样为作见证做准备？（请睇第11,12段）
11,12．（甲）年轻人可以点样做好准备向人作见证？（乙）一个年轻人喺学校点样把握机会作见证？
11 首先，你可以谂吓同学通常会问啲咩问题，然后事先做好准备，睇吓点样回答佢哋。例如，佢哋可能会问：“你点解相信上帝存在？”喺我哋嘅网站jw.org有一啲文章可以回答呢个问题。你可以点击“圣经与生活”>“青少年”，喺入面揾出“我为甚么相信有上帝呢？”呢张学习单。学习单可以帮助你用自己嘅话回答呢个问题。你可以运用入面嘅三节经文同人推理——希伯来书3:4；罗马书1:20；诗篇139:14。你可以用呢啲学习单为唔同嘅问题做好准备。（请读彼得前书3:15）
12 只要有机会，你就可以鼓励同学自己浏览jw.org。卢卡就系噉样做嘅。有一次上课嘅时候，老师同大家讨论唔同嘅宗教。卢卡留意到，教科书上一啲对耶和华见证人嘅描述唔正确。虽然卢卡一开始有啲犹疑，但佢最后都鼓起勇气请求老师俾机会佢澄清呢啲错误，结果得到批准。卢卡唔单止有机会解释佢嘅信仰，亦都向全班介绍咗我哋嘅网站。之后，老师仲向全班同学布置功课，叫佢哋自己睇白板动画片“不用拳头也可以打败恶霸！”。卢卡好开心自己向大家作咗一个美好嘅见证。
13．情况唔顺利嘅时候，点解我哋唔应该放弃？
13 人生嘅旅途唔会总系一帆风顺。（提摩太后书4:2）难题出现嘅时候，千祈唔好放弃你嘅目标。卡塔琳娜17岁嗰阵嘅目标系，向每一个同事作见证。卡塔琳娜多次受到一个同事侮辱，但系佢都冇放弃自己嘅目标。喺唔顺利嘅情况下，卡塔琳娜都保持良好嘅品行，使另一个同事汉斯留低深刻嘅印象。结果，汉斯开始睇我哋嘅出版物，学习圣经，后来仲受咗浸。卡塔琳娜因为搬咗屋，所以唔知道后来发生嘅事。13年后，佢同屋企人喺聚会嘅时候得知，发表演讲嘅弟兄竟然系汉斯。可想而知，卡塔琳娜有几咁惊喜！由于卡塔琳娜冇放弃向同事传道嘅目标，结果得到非常大嘅成果！
千祈唔好分心
14,15．（甲）面对压力嘅时候，年轻人应该谨记乜嘢？（乙）年轻人可以点样应付同辈压力？
14 呢篇课文鼓励你下定决心，用自己嘅一生全心事奉耶和华，努力追求属灵目标。可能你身边有啲年轻人只系顾住吃喝玩乐，仲叫埋你一齐去。你应该清楚表明自己嘅立场唔会改变。请谂吓课文开头巴士嘅比喻，你会唔会因为见到某部巴士上嘅乘客玩得好开心就贸贸然上车？千祈唔好因为同辈压力而分心。
15 有几个方法可以帮助你应付同辈压力。例如，避开容易受到诱惑嘅环境；（箴言22:3）谨记向同伴压力屈服会导致乜嘢后果；（加拉太书6:7）承认自己需要指引，谦卑噉向父母同灵性成熟嘅弟兄姊妹请教。（请读彼得前书5:5,6）
16．一个弟兄嘅经历点样表明谦卑嘅态度会带嚟益处？
16 谦卑嘅态度推使克里斯托夫接受明智嘅劝告。克里斯托夫受浸之后冇几耐，就开始经常去一间健身室做运动。健身室嘅一啲年轻人邀请佢加入佢哋嘅运动俱乐部。克里斯托夫同一个长老讲呢件事。长老叫克里斯托夫喺做决定之前谂吓一啲潜在嘅危险，例如会唔会受竞争精神影响。不过，克里斯托夫都系加入咗俱乐部。一段时间过后，佢发现佢参加嘅运动有啲暴力，而且仲好危险。佢又同几个长老讲呢件事，之后佢哋都根据圣经向佢提出劝告。克里斯托夫话：“耶和华通过长老俾咗我好好嘅建议。虽然我之前冇即刻接受，但系最终我都听从咗耶和华嘅劝告。”你有冇谦卑噉接受明智嘅劝告？
17,18．（甲）耶和华希望年轻人过点样嘅生活？（乙）有啲成年人后悔乜嘢？年轻人可以点样避免呢种情况？请举例。
17 “年轻人，你年轻嘅时候要欢乐。趁年少嘅日子，你嘅心即管好好享受。”（传道书11:9）耶和华的确希望年轻人开心快乐。呢篇课文强调咗年轻人获得快乐嘅一个方法，就系全心追求属灵目标，做任何计划之前要先考虑耶和华嘅睇法。你越早噉样做，就越早体会到耶和华嘅指引、保护同赐福。要沉思耶和华通过佢嘅话语圣经俾你嘅明智劝告，亦都要听从圣经嘅教导，“趁年轻嘅日子，就要将你伟大嘅创造主谨记在心”。（传道书12:1）
18 青春嘅岁月好短暂。年轻人好快会长大成人。好多成年人都后悔自己年轻嗰阵追求咗错误嘅目标，或者根本冇定立任何目标。如果年轻人尽力追求属灵目标，无论而家定系将来，佢哋都会为自己嘅决定感到心满意足。麦娅娜十几岁嘅时候喺运动方面表现出色，所以受到邀请参加冬季奥运会。不过，佢选择投身全时传道工作。30年后，麦娅娜依然紧守岗位，同丈夫一齐从事全时服务。佢话：“名誉、荣耀、权势、财富都不过系过眼云烟，冇乜价值。事奉上帝同埋帮助人亲近上帝先至系真正崇高同永恒嘅目标。”
19．趁年轻嘅时候就定立属灵目标会有乜嘢益处？
19 会众嘅年轻人确实配得称赞。你哋成功应付挑战，决心用自己嘅一生去事奉耶和华。你哋定立属灵目标，而且以传道工作为生活重心。你哋下定决心唔受世界嘅事影响而分心。你哋嘅工作系有价值嘅。弟兄姊妹好爱你哋，一定会全力支持你哋。只要你哋全心信赖耶和华，你哋嘅计划就会成功。
