受委任嘅弟兄——向提摩太学习
上年，全球有数以万计嘅耶和华见证人男子受委任成为长老或助理仆人。如果你系其中一位，噉你一定好开心可以得到新嘅服务机会。
不过你可能会有啲担心，呢个系可以理解嘅。贾森系一位年轻嘅长老，佢话：“一开始被委任嘅时候，我好担心自己唔能够胜任。”摩西同耶利米受耶和华委派嗰阵，都觉得自己能力不足。（出埃及记4:10；耶利米书1:6）如果你有同感，可以点样克服呢种感觉并继续进步呢？请考虑吓提摩太嘅榜样。（使徒行传16:1-3）
效法提摩太嘅榜样
使徒保罗邀请提摩太同佢一齐从事海外传道工作嘅时候，提摩太可能系20岁左右。因为年轻，提摩太一开始执行新委派嗰阵可能缺乏自信，犹豫不决。（提摩太前书4:11,12；提摩太后书1:1,2,7）不过，十年之后，保罗同腓立比会众讲：“如果系主耶稣嘅意思，我希望冇几耐之后就派提摩太去你哋嗰度，……因为冇其他人性情好似佢噉样”。（腓立比书2:19,20）
乜嘢使年轻嘅提摩太成为一个出色嘅长老？我哋可以从佢身上学到以下六点：
1．佢真诚关心人。保罗同腓立比嘅弟兄姊妹讲：“［提摩太］真挚关心你哋嘅事”。（腓立比书2:20）冇错，提摩太关心人。佢真心希望帮助人亲近耶和华，佢亦都甘愿为咗其他人嘅益处献出自己。
可能你见过有啲巴士司机关心准时到站多过关心乘客。我哋要避免有噉样嘅态度。二十几年来，威廉一直系一位受人尊敬嘅长老，佢建议新委任嘅弟兄话：“要关爱弟兄姊妹，留意佢哋嘅需要，唔好只系关注会众嘅事务。”
2．佢最关注嘅系属灵嘅事。保罗睇出，唔系所有人都好似提摩太噉热心追求属灵嘅事，佢话：“其他人都只系求自己嘅利益，唔系求基督耶稣嘅利益。”（腓立比书2:21）保罗写呢句话嘅时候身在罗马，佢观察到当地嘅弟兄姊妹过度忙于个人事务。喺某程度嚟讲，佢哋对属灵嘅事有一种得过且过嘅态度。不过，提摩太就完全唔同！提摩太把握机会推广好消息，表现出同以赛亚一样嘅态度——“我喺呢度！请差遣我！”（以赛亚书6:8）
喺个人同属灵职责方面，你可以点样保持平衡？第一，要分清主次。保罗劝勉我哋要 “睇清边啲事更为重要”。（腓立比书1:10）我哋应该将耶和华认为重要嘅事放喺首位。第二，简化生活，避免浪费时间、精力。保罗鼓励提摩太 “要远避年轻人常有嘅欲望，……追求正义、信心、爱心、和平”。（提摩太后书2:22）
3．佢努力从事神圣服务。保罗提醒腓立比嘅弟兄姊妹话：“提摩太表明咗自己嘅为人点样，呢个你哋都知道。佢为咗推广好消息，同我一齐辛劳，就好似仔同爸爸噉一齐辛劳。”（腓立比书2:22）提摩太唔系一个做事懒散嘅人。佢同保罗一齐辛勤工作，结果佢哋嘅关系越来越亲密。
今日，上帝嘅组织有好多工作要做。呢啲工作使人心满意足，亦都能够拉近弟兄姊妹之间嘅关系。所以，你可以定立目标，“多做主嘅工作”。（哥林多前书15:58）
4．佢学以致用。保罗写信俾提摩太话：“你紧紧跟随我嘅教导、生活方式、目标、信心、耐心、爱心、忍耐”。（提摩太后书3:10）提摩太将学到嘅应用出嚟，所以佢可以胜任更重要嘅职责。（哥林多前书4:17）
你有冇一位属灵嘅良师益友？如果冇嘅话，你可以试吓结交噉样嘅朋友。汤姆系一个经验丰富嘅长老，佢回忆话：“一个有经验嘅长老特别关心我，又俾咗我好好嘅训练。我经常请教佢，亦都将佢嘅建议实践出嚟。我好快就建立咗自信。”
5．佢不断训练自己。保罗勉励提摩太“要以敬虔为目标操练自己”。（提摩太前书4:7）运动员需要教练嘅指导，亦都需要自己不断练习。保罗鼓励提摩太话：“你要继续致力于宣读、劝勉、教导嘅事，……呢啲事你要思考，要全神贯注，等人人都可以睇得出你嘅长进。”（提摩太前书4:13-15）
你需要继续提高自己嘅技能。要继续喺属灵上进步，熟悉组织对会众嘅最新指引。另外，要避免变得过度自信。你可能觉得自己有好多经验，唔需要查考指引都可以成功应付任何情况。要效法提摩太，“时刻留意自己同自己嘅教导”。（提摩太前书4:16）
6．佢倚靠上帝嘅圣灵。保罗鼓励提摩太，喺传道工作上“要倚靠住喺［佢哋］里面嘅圣灵，守护呢个美好嘅信托”。（提摩太后书1:14）如果提摩太想做好交托俾佢嘅传道工作，就需要倚靠上帝嘅圣灵。
做咗几十年长老嘅唐纳德话：“受委任嘅弟兄一定要珍视自己同上帝嘅关系。噉样佢哋就会‘力上加力’。如果佢哋祈求上帝赐佢哋圣灵，而且努力培养圣灵嘅果实，噉对会众嘅弟兄姊妹嚟讲，佢哋就的确系上帝嘅恩赐。”（诗篇84:7；彼得前书4:11）
珍视你嘅殊荣
睇到咁多新委任嘅弟兄乐意受耶和华任用，真系鼓舞人心。文章开头提到嘅贾森弟兄话：“我自从做咗长老之后，学到好多嘢，变得更有自信。而家我真系好钟意自己嘅委派，亦都将呢个视为莫大嘅殊荣！”
你有冇继续喺属灵上进步？效法提摩太嘅榜样，噉你就会成为上帝赐俾佢子民嘅恩赐。
