耶稣预告佢嘅门徒喺最后嘅日子会享有丰盛嘅收获。（马太福音9:37；24:14）请睇吓，佢嘅话点样以一种独特嘅方式喺乌克兰外喀尔巴阡州嘅一个地区应验。呢个地区嘅三个相邻城镇就有50群会众同超过5400个传道员。 a耶和华见证人嘅数目占呢三个城镇人口嘅四分之一！

呢个地区嘅人对我哋嘅传道工作有乜嘢反应？本地一个叫瓦西里嘅弟兄话：“呢度嘅人好尊重圣经，重视公正，家庭关系紧密，而且乐于助人。”佢又话：“佢哋唔一定会同意我哋嘅信仰，但系你同佢哋分享圣经信息嘅话，佢哋都会留心聆听。”

当地嘅弟兄姊妹面对嘅挑战好特别，因为传道员同人口嘅比率非常高。例如，某个会众有134个传道员，但系佢哋嘅传道地区只有50户人！喺噉嘅情况下，传道员作出乜嘢调整？

好多弟兄姊妹乐意作出牺牲，去需求更大嘅地区传道。一个90岁嘅弟兄叫约纳什，佢话：“喺我哋会众嘅传道地区，传道员同住户嘅比例系1:2。我平时会喺自己条村传道，以前身体好嘅时候，会去160公里（100英里）以外嘅一个未分配俾任何会众嘅地区用匈牙利语传道。”要帮助其他地区，传道员就需要有自我牺牲嘅精神。约纳什话：“为咗可以搭上火车，我早上四点就要起身。我会一直传道到傍晚六点先至坐火车返屋企。每个星期我都会去两三次。”佢觉得自己付出嘅努力有冇价值？佢话：“我从呢种传道方式得到好大嘅喜乐，亦都好开心可以帮助一个偏远家庭认识真理。”

当然，唔系当地会众嘅每个人都可以去偏远地区传道，不过所有传道员，包括年老嘅弟兄姊妹，都努力将好消息传遍整个地区。2017年，呢三个城镇一齐举办耶稣受难纪念聚会。当时出席人数几乎系传道员人数嘅两倍，即系当地总人口嘅一半。毫无疑问，无论我哋喺边度服务，都可以“多做主嘅工作”。（哥林多前书15:58）