人物生平
忧虑时总会得到安慰
苏库尔系一座古老嘅城市，座落喺印度河西岸，属于而家嘅巴基斯坦。1929年11月，我喺呢个城市出世。大约喺嗰个时候，我父母从一个英国嘅海外传道员（现称特派传道员）嗰度得到一套颜色鲜艳嘅书。呢啲基于圣经嘅书刊对我将来成为一个耶和华见证人有深远嘅影响。
呢套书被称为“彩虹书册”。我开始认真阅读呢套书嗰阵，书上嘅生动插图激发咗我嘅想象力，结果，我好细个就开始对呢啲精彩书刊所呈现嘅圣经知识产生咗浓厚嘅兴趣。
第二次世界大战嘅战火迫近英属印度嘅时候，我嘅世界亦都发生咗巨变。我嘅父母先系分居，然后离婚。我好唔明白点解两个我爱嘅人会离开对方。我变得感情麻木，觉得自己俾人遗弃。因为我系独生子，所以冇其他家人可以俾我所需嘅安慰同支持。
嗰阵时，我同妈妈住喺省会城市卡拉奇。有一日，年长嘅弗雷德·哈达克医生探访我哋屋企。佢系一个耶和华见证人，同之前送我哋书刊嘅海外传道员有同样嘅信仰。佢建议我妈妈开始一个圣经课程。虽然妈妈拒绝咗，不过话我可能有兴趣。第二个星期，我就开始同哈达克弟兄学习。
几个星期之后，我就参加喺哈达克弟兄嘅医疗诊所举行嘅基督徒聚会。大约十二个年长嘅见证人喺嗰度举行崇拜。佢哋鼓励我，照顾我，就好似对待自己嘅仔一样。我清楚记得佢哋坐喺我旁边，交谈嗰阵同我保持平视，而且将我视为佢哋嘅好朋友。呢啲都系我当时非常需要嘅。
冇几耐，哈达克弟兄就邀请我同佢一齐做传道工作。佢教我点样操作手提式留声机，向人播放一个简短嘅圣经演讲。虽然有啲住户觉得某啲演讲讲得好直接就唔想听，但系我因为可以向人作见证而感到好兴奋。我对圣经真理充满热情，亦都好钟意同人分享。
随住日军向英属印度迫近，英国政府对耶和华见证人施加嘅压力越来越大，后来直接影响到我。我嘅校长系一个圣公会牧师。1943年7月，佢以“品德不良”为理由将我开除。佢同我妈妈讲，我同耶和华见证人来往对其他学生造成咗不良嘅影响。妈妈好担心，就唔准我同见证人来往。之后，佢送我去爸爸所在嘅城市，往北1370公里（850英里）嘅白沙瓦。因为冇继续吸收灵粮同参加聚会，我嘅灵性就慢慢变得软弱。
恢复属灵健康
1947年，我返去卡拉奇揾工。其间，我拜访咗哈达克医生嘅诊所，并受到佢热情欢迎。
佢以为我嚟系为咗睇病，就问我：“你边度唔舒服呀？”
我回答话：“医生，我身体冇事，不过喺属灵上病咗。我需要一个圣经课程。”
佢问：“你想几时开始？”
我话：“如果可以，而家就开始。”
嗰晚我哋好开心一齐讨论圣经。我觉得自己好似返到属灵嘅家噉。妈妈谂尽办法阻止我同见证人来往，不过今次我下定决心要持守真理。1947年8月31日，我受浸表明自己献咗身俾耶和华。冇几耐，我就开始做正规先驱，当时我17岁。
喜乐嘅先驱服务
我第一个先驱委派就系去奎达传道。呢个城市以前系英军嘅前哨基地。1947年，英属印度被划分为印度同巴基斯坦两个国家。 *呢个事件触发国民之间激烈嘅宗教冲突，引发历史上其中一次规模最大嘅难民潮。大约1400万个难民流离失所。印度嘅穆斯林去巴基斯坦，而巴基斯坦嘅印度教同锡克教教徒就迁移到印度。喺一片混乱中，我喺卡拉奇上咗一列前往奎达嘅火车。因为火车逼满晒人，所以路途嘅大部分时间我都要喺火车外面，全靠揸实条扶手先唔会跌落车。
我参加1948年印度嘅一个分区大会
喺奎达，我遇到乔治·辛格，一个二十几岁嘅特别先驱。乔治俾咗一部旧单车我，噉我就可以踩住（或者推住）部单车喺呢个好多山坡嘅地区传道。大部分时间我都系一个人传道。不出六个月，我就有17个圣经学生，有啲后来仲受咗浸。其中一个叫做萨迪克·马西嘅学生系一个军官，佢帮助乔治同我将一啲圣经书刊翻译成巴基斯坦嘅官方语言乌尔都语。后来，萨迪克成为一个热心嘅传道员。
乘搭伊利莎白女王号前往基列学校
之后，我返翻去卡拉奇，同两位啱啱嚟到，分别叫亨利·芬奇同埋哈里·福里斯特嘅基列毕业生一齐服务。佢哋喺属灵上俾我嘅训练真系好宝贵！有一次，我同芬奇弟兄一齐去巴基斯坦北部做传道。喺崇山峻岭嘅山脚下，我哋揾到好多谦卑、渴求圣经真理嘅村民，佢哋都讲乌尔都语。两年之后，我自己都受到邀请参加基列学校。我返到巴基斯坦后，用部分时间做分区探访工作。我住喺拉合尔嘅海外传道员之家，另外有三个特派传道员弟兄同我一齐住。
从痛苦中复原
1954年，拉合尔嘅特派传道员之间因为性格差异而发生严重矛盾，所以分部要调整委派。因为我唔明智噉支持其中一方，结果受到严厉嘅责备。我深受打击，觉得自己好失败。我搬返去卡拉奇，之后去咗英国伦敦，希望喺属灵上可以有个新嘅开始。
喺伦敦，我嘅会众有好多伯特利成员。普赖斯·休斯系个仁慈嘅分部仆人，佢特别关心我。有一日，佢话俾我知，佢曾经受到当时负责全球传道工作嘅约瑟夫·卢述福嘅严厉劝告。当休斯弟兄想为自己辩护嗰阵，卢述福弟兄严厉噉责备佢。我好惊讶休斯弟兄可以微笑住讲述呢段往事。佢话，佢最初好唔开心，不过后来意识到，自己确实需要噉样嘅劝告，而且呢个系耶和华向佢表达爱嘅一种方式。（希伯来书12:6）佢嘅话深深打动咗我，帮助我喺属灵上重新取得平衡。
大约呢个时候，我妈妈搬到伦敦，而且接受咗后来成为中央长老团成员嘅约翰·巴尔弟兄嘅提议，同意学习圣经。佢喺属灵上不断进步，喺1957年受浸。后来我得知，原来爸爸去世之前，都同耶和华见证人学习过圣经。
1958年，我同一位喺伦敦定居嘅丹麦姊妹莱娜结婚。第二年，我哋好开心生咗个女，同佢起名叫做简。佢系我哋五个仔女中最大嘅。当时我喺富勒姆会众有好多服务机会。但系后来，因为莱娜嘅身体唔好，我哋要搬去气候温暖嘅地方。1967年，我哋移居到澳大利亚嘅阿德莱德。
一生中最痛苦嘅事
我哋喺阿德莱德嘅会众有12位年长嘅受膏基督徒。佢哋热心带头传道。我哋一家好快就安定落嚟，继续保持良好嘅属灵常规。
1979年，我同莱娜迎嚟咗我哋第五个细路丹尼尔。佢患有严重嘅唐氏综合症 *，预计寿命唔长。即使而家我讲翻起当时嘅情况，我嘅心依然好痛。我哋竭尽全力照顾佢，同时冇忽略另外四个仔女嘅需要。丹尼尔因为心脏穿咗两个窿，有时会缺氧而面色发紫。遇到噉嘅情况，我哋就要即刻送佢去医院。虽然佢健康状况好差，不过佢好聪明，好有爱心，亦都好爱耶和华。我哋全家食饭前祷告嗰阵，佢会扣实佢对手仔，点吓头，衷心噉讲“阿们！”。做晒呢啲之后，佢先至食饭。
丹尼尔四岁嗰时，患上急性白血病。我同莱娜无论身体上定系感情上都精疲力尽。我觉得自己就快精神崩溃。不过有一日，喺我哋最低落嘅时候，分区监督内维尔·布朗域嚟探我哋。嗰晚，佢揽实我哋，同我哋一齐喊。佢仁慈体贴嘅安慰令我哋深受感动。佢大约凌晨一点先至离开。冇几耐，丹尼尔死咗。失去佢，系我哋一生最痛苦嘅事。不过，我哋喺悲痛中保持忍耐，深信任何嘢，甚至系死亡，都唔能够隔断耶和华对丹尼尔嘅爱。（罗马书8:38,39）将来丹尼尔会喺上帝嘅新世界复活，我哋非常期待到时可以同佢喺一齐！（约翰福音5:28,29）
帮助其他人而得到喜乐
我有两次严重中风，不过而家仍然以长老嘅身份喺会众服务。我嘅经历使我更加识得同情、怜悯其他人，特别系面对紧难题嘅人。我唔会去妄断佢哋，反而会谂：“佢哋嘅成长背景点样影响佢哋嘅情感同谂法？我可以点样关心佢哋？我可以点样鼓励佢哋用耶和华嘅方式嚟解决问题？”我真系好钟意牧养会众嘅弟兄姊妹！当我安慰其他人，使佢哋喺属灵上重新得力嘅时候，我自己都得到安慰同强化。
牧养弟兄姊妹一直使我深感满足
诗篇执笔者嘅话表达咗我嘅心声，佢话：“每当我心里多忧多虑，［耶和华］都安慰我，使我安心。”（诗篇94:19）面对家庭难题、信仰受到家人反对、对自己失望同感到沮丧嘅时候，耶和华都扶持我。耶和华的确系我真正嘅父亲！
^ 19段 最初，巴基斯坦分为西巴基斯坦（而家嘅巴基斯坦）同东巴基斯坦（而家嘅孟加拉）。
^ 29段 请睇《警醒！》2011年6月11日刊“养育唐氏综合症孩子——喜乐与挑战”。
