我哋属于耶和华
“以耶和华为上帝嘅国家几咁有福！蒙上帝拣选为产业嘅民族几咁有福！”——诗篇33:12
1．点解话耶和华拥有一切？（请睇吓课文开头嘅图片）
一切都系属于耶和华嘅！圣经话：“天同天上嘅天、地同地上嘅一切，都系耶和华你上帝嘅。”（申命记10:14；启示录4:11）因为耶和华创造人类，所以所有人都属于佢。（诗篇100:3）不过，喺唔同嘅时代，耶和华用特别嘅方式拣选某啲人归于佢。
2．边啲人蒙拣选成为耶和华特别拥有嘅子民？
2 例如，诗篇135篇话，古代以色列嘅忠仆系耶和华嘅特别产业。（诗篇135:4）另外，何西阿书预告，有啲非以色列人都会成为耶和华嘅子民。（何西阿书2:23）耶和华开始拣选非犹太人同耶稣一齐喺天上作王嘅时候，何西阿嘅预言就应验嘞。（使徒行传10:45；罗马书9:23-26）呢啲受圣灵膏立嘅人被称为“圣洁嘅国族”，系耶和华 “特别拥有嘅子民”。（彼得前书2:9,10）嗰啲有希望喺地上生活嘅忠心基督徒又点呢？耶和华亦都称佢哋为佢嘅“子民”同佢所“拣选嘅人”。（以赛亚书65:22）
3．（甲）今日边啲人同耶和华享有特别嘅关系？（乙）呢篇课文会讨论乜嘢？
3 今日，有希望到天上嘅“小群羊”同埋有希望喺地上永远生活嘅“另外嘅绵羊”合成“一群”，成为上帝嘅子民。（路加福音12:32；约翰福音10:16）我哋衷心感激耶和华，因为佢俾我哋可以同佢享有呢个特别嘅关系。呢篇课文会讨论，我哋可以点样向耶和华表明自己珍视呢个殊荣。
献身俾耶和华
4．耶和华俾我哋同佢享有亲密嘅关系，我哋可以点样表明自己感激佢？耶稣同样点做？
4 我哋献身俾耶和华，就表明自己衷心感激佢。通过水浸礼，我哋公开承认自己属于耶和华，乐意服从佢。（希伯来书12:9）耶稣亦都通过受浸向耶和华表明自己“乐于遵行［佢］嘅旨意”。（诗篇40:7,8）尽管耶稣一出世就属于一个献咗身俾耶和华嘅国族，佢仲系献出自己执行天父嘅旨意。
5,6．（甲）耶稣受浸嘅时候，耶和华有乜嘢感觉？（乙）耶和华对我哋嘅献身又有乜嘢感觉？请举例。
5 耶稣受浸嘅时候，耶和华有乜嘢感觉？圣经话：“耶稣受咗浸，随即从水中上嚟。睇吓！天开咗，约翰睇见上帝嘅灵好似鸽子降喺耶稣身上。忽然有声音从天上发出话：‘呢个系我嘅儿子，系我所爱嘅，系我所悦纳嘅。’”（马太福音3:16,17）虽然耶稣已经属于天父耶和华，不过耶和华好高兴睇到自己嘅爱子甘愿献出一生全心事奉佢。同样，我哋献身俾耶和华嘅时候，佢亦都会好开心，而且会大大赐福俾我哋。（诗篇149:4）
6 举个例，假设一个男子喺佢嘅花园种咗好多好靓嘅花。有一日，佢嘅女摘咗一朵花送俾佢。啲花唔系属于爸爸嘅咩？个女点可以将已经属于爸爸嘅嘢送翻俾爸爸呢？一个仁慈嘅爸爸绝对唔会噉样谂。相反，佢因为女儿出于爱心送礼物俾自己就感到好开心。虽然花园里面有其他花，但系佢觉得个女送俾自己嘅呢朵花系最珍贵嘅。我哋甘心情愿将自己献俾耶和华，佢同样会好开心。（出埃及记34:14）
7．我哋从玛拉基书3:16睇出，耶和华点样对待嗰啲甘心事奉佢嘅人？
7 请读玛拉基书3:16。点解献身俾耶和华同埋受浸系咁重要嘅？其实，我哋每个人一出世就属于耶和华。不过请谂吓，如果你将自己嘅一生献俾耶和华，承认佢系宇宙嘅至高统治者并执行佢嘅旨意，耶和华一定会好欣慰。（箴言23:15）耶和华接纳嗰啲甘愿事奉佢嘅人，并将佢哋嘅名“记录喺佢面前嘅册上”。
8,9．耶和华对嗰啲名字记录喺佢册上嘅人有乜嘢要求？
8 我哋想自己嘅名被“记录喺［耶和华］面前嘅册上”，就要履行一啲义务。玛拉基特别提到，我哋必须“敬畏耶和华”、思量佢嘅名。我哋如果崇拜任何人或事物，我哋嘅名就会从耶和华嘅生命册上被抹去。（出埃及记32:33；诗篇69:28）
9 所以，我哋献身俾耶和华唔系只系作出一个承诺或者接受一个浸礼。呢啲只需要做一次，但崇拜耶和华系一种生活方式。我哋每一日都必须以行动证明我哋服从耶和华。（彼得前书4:1,2）
拒绝世俗嘅欲望
10．事奉上帝嘅人必须点样做，表明佢哋同唔事奉上帝嘅人有明显嘅分别？
10 上一篇课文讨论过该隐、所罗门同以色列人嘅事例。佢哋都崇拜耶和华，不过就冇专一爱戴佢。佢哋嘅事例清楚表明，嗰啲真正属于耶和华嘅人既要坚决拥护正义，亦都要憎恨邪恶。（罗马书12:9）耶和华话，“义人同恶人、事奉上帝嘅人同唔事奉上帝嘅人之间”会有明显嘅分别。（玛拉基书3:18）
11．点解我哋应该勇于向人表明自己全心崇拜耶和华？
11 我哋好感激耶和华拣选我哋做佢嘅子民。我哋要“等人人都可以睇得出”我哋喺属灵上嘅进步。（提摩太前书4:15；马太福音5:16）我哋可以谂吓：“其他人系咪可以睇出我全心忠于耶和华？我会唔会自豪噉话俾人知自己系耶和华见证人？”耶和华拣选我哋做佢嘅子民，但系我哋唔敢向人表明自己嘅身份，噉耶和华就会好伤心。（诗篇119:46；请读马可福音8:38）
你嘅生活方式系咪清楚表明你系一个耶和华见证人？（请睇第12、13段）
12,13．有啲人嘅行为点解令人好难辨认出佢哋系耶和华见证人？
12 好可惜，有啲基督徒同唔事奉上帝嘅人睇嚟冇乜嘢分别，因为佢哋效法“世界嘅灵”。（哥林多前书2:12）呢个世界嘅精神使人“顺应肉体嘅欲望行事”。（以弗所书2:3）虽然组织喺衣着打扮方面俾咗我哋好多建议，但仲系有啲弟兄姊妹嘅衣着唔够端庄得体。佢哋偏爱紧身、暴露嘅衣服，或者奇特嘅发型，甚至以噉样嘅打扮去参加基督徒聚会同交往。（提摩太前书2:9,10）结果，人好难分辨佢哋系耶和华嘅子民，定系“同世俗友好”嘅人。（雅各书4:4）
13 喺其他方面，有啲见证人冇坚决弃绝世俗嘅品格。佢哋有啲人喺派对上嘅行为举止同所跳嘅舞蹈超出咗基督徒所能接受嘅范围。而有啲人就将唔符合基督徒身份嘅相片同评论放喺社交网站上。佢哋噉样做可能并冇犯下严重嘅罪，不过会对其他努力保持良好品行嘅人造成不良嘅影响。（请读彼得前书2:11,12）
唔好受嗰啲冇坚决拥护耶和华嘅人影响
14．我哋点样做就表明自己专一爱戴耶和华？
14 呢个世界极力鼓吹“肉体嘅欲望、眼睛嘅欲望、炫耀财物嘅行为”。（约翰一书2:16）不过，由于我哋属于耶和华，所以我哋会努力“摒弃唔敬虔嘅心同世俗嘅欲望，喺现行嘅制度本住健全嘅思想、正义、敬虔而活”。（提多书2:12）我哋嘅整个生活方式，包括言谈、饮食习惯、衣着打扮、工作态度，都应该使人睇出我哋系专一爱戴耶和华嘅。（请读哥林多前书10:31,32）
“热切噉彼此相爱”
15．点解我哋要以爱心同仁慈对待弟兄姊妹？
15 信徒同工都系属于耶和华嘅。我哋善待佢哋，就表明我哋珍视同耶和华嘅宝贵关系。我哋紧记呢一点，就会以爱心同仁慈对待我哋嘅弟兄姊妹。（帖撒罗尼迦前书5:15）耶稣同门徒讲：“你哋如果彼此相爱，所有人就会因此知道你哋系我嘅门徒嘞。”（约翰福音13:35）
16．摩西律法嘅乜嘢例子表明耶和华好重视佢嘅子民？
16 有一个例子可以帮助我哋明白，喺会众入面应该点样彼此相待。耶和华圣殿入面摆设嘅器具都系专门为咗正确崇拜而献上嘅。摩西律法具体说明咗要点样管理呢啲器具，亦都明确提到违反嘅人会被处死。（民数记1:50,51）连呢啲用嚟崇拜嘅器具耶和华都咁重视，更何况系受佢拣选而又忠心事奉佢嘅人呢！有一次，耶和华向佢嘅子民讲：“触摸你哋嘅，就系触摸我嘅眼珠。”（撒迦利亚书2:8）
17．耶和华“留意细听”乜嘢？
17 有意思嘅系，玛拉基描述耶和华会“留意细听”佢嘅子民点样彼此交谈。（玛拉基书3:16）耶和华的确“认识属于佢嘅人”。（提摩太后书2:19）佢清楚了解每个人嘅一言一行。（希伯来书4:13）如果我哋冇仁慈对待自己嘅同工，耶和华一定会知道。我哋彼此表现慷慨好客、乐于宽恕同仁慈嘅精神，耶和华都肯定会留意到我哋所做嘅。（希伯来书13:16；彼得前书4:8,9）
“耶和华必不撇弃佢嘅子民”
18．耶和华拣选我哋成为佢嘅子民，噉我哋可以点样向佢表示感激？
18 耶和华使我哋有殊荣成为佢嘅子民，归佢所有，所以我哋好想为此感激佢。我哋甘心乐意献身俾耶和华系最明智嘅做法。即使生活“喺呢一代歪邪不正嘅人当中”，我哋都希望世人可以睇出我哋系“毫无瑕疵嘅……喺世人当中如同明光照耀”。（腓立比书2:15）所以，我哋要坚决抗拒恶事。（雅各书4:7）我哋亦都要关爱同尊重我哋嘅同工，因为佢哋都系属于耶和华嘅。（罗马书12:10）
19．耶和华点样奖赏嗰啲属于佢嘅人？
19 圣经话：“耶和华必不撇弃佢嘅子民”。（诗篇94:14）无论我哋面对乜嘢难题，都要谨记呢个有力嘅保证。就算系死亡，都唔能够隔断耶和华对我哋嘅爱。（罗马书8:38,39）“因为我哋生系为耶和华而生，死系为耶和华而死。所以，我哋系生系死，都属于耶和华。”（罗马书14:8）我哋期待有一日，耶和华复活所有死去嘅忠仆。（马太福音22:32）而家，我哋已经享有好多福分。正如圣经所讲，“以耶和华为上帝嘅国家几咁有福！蒙上帝拣选为产业嘅民族几咁有福！”（诗篇33:12）
