效法耶和华表现仁慈同体恤
“关怀寒微人嘅人真系有福!”——诗篇41:1
1. 真基督徒点样彼此表现爱心?
世界各地嘅真基督徒都属于同一个属灵大家庭,佢哋互相表现爱心。(约翰一书4:16,21)虽然有时弟兄姊妹会为同工作出好大嘅牺牲,不过大多数情况下,佢哋之间嘅爱心主要系通过一啲小事表现出嚟嘅,例如体贴嘅言词或者善意嘅行为。如果我哋仁慈、体贴噉对待其他人,就系“效法上帝”嘞。(以弗所书5:1)
2. 耶稣点样效法天父向人表现爱心?
2 耶稣十全十美噉效法天父。佢话:“你哋所有辛苦劳碌、担子沉重嘅人啊,嚟我呢度啦,我要使你哋得到安舒。……因为我性情温和,心里谦卑。”(马太福音11:28,29)如果我哋效法基督“关怀寒微人”,就可以使上帝嘅心欢喜,而自己亦都会感到快乐。(诗篇41:1)呢篇课文会讨论,我哋喺家庭、会众同传道工作上可以点样关心、体恤人。
体恤家人
3. 丈夫可以点样体恤妻子?(请睇吓课文开头嘅图片)
3 喺一个家庭入面,丈夫应该带头对家人表现体恤。(以弗所书5:25; 6:4)例如,圣经劝勉做丈夫嘅,要“按情理”对待妻子。即系话,丈夫要体恤妻子,尽力理解妻子嘅感受。(彼得前书3:7)我哋了解一个人,先可以更好噉关心佢。一个通情达理嘅丈夫会将妻子睇成系同自己互为补足嘅另一半。虽然妻子喺好多方面同自己唔同,不过佢唔会觉得自己比妻子优越。(创世记2:18)丈夫会体恤妻子嘅感受,用尊重嘅态度对待妻子。加拿大嘅一个姊妹讲到自己嘅丈夫,话:“佢好重视我嘅感觉,从来都唔会讲:‘你唔好噉谂啦。’佢会耐心、认真噉听我倾诉。如果我嘅观点唔系好啱,佢会温和噉帮助我调整自己嘅谂法。”
4. 喺对待其他异性方面,丈夫应该点样顾及妻子嘅感受?
4 丈夫如果凡事顾及妻子嘅感受,就唔会同其他女子调情,唔会对佢哋产生唔恰当嘅感情,喺上网或者使用社交网站嘅时候亦都会实践同样嘅原则。(约伯记31:1)冇错,丈夫应该对妻子保持忠贞,唔单止系因为爱妻子,亦都因为爱耶和华同憎恨恶事。(请读诗篇19:14;97:10)
5. 妻子可以点样对丈夫表现体恤?
5 如果丈夫效法佢哋嘅头耶稣基督,妻子就更容易“深深尊敬”丈夫。(以弗所书5:22-25,33)妻子尊敬丈夫嘅话,噉丈夫忙于处理属灵事务或者一啲重要问题嘅时候,妻子就会体贴丈夫,努力理解佢嘅感受。英国一位结咗婚嘅弟兄话:“有时,我太太会从我嘅神情举止睇出,我喺度谂紧一啲事。跟住,佢会应用箴言20:5嘅原则。有必要嘅话,佢会等到适合嘅时候先至问我发生咗乜嘢事。如果呢件事唔系机密嘅话,我会同佢一齐倾吓。”
6. 我哋可以点样鼓励小朋友?噉样可以使佢哋得到乜嘢益处?
6 如果父母互相体贴对方,就可以为儿女树立良好嘅榜样。父母有义务教导自己嘅儿女关心其他人。例如,父母可以教导佢哋,唔应该喺王国聚会所跑嚟跑去;食饭交往嘅时候,要礼让年长嘅人。当然,会众嘅所有人都可以喺呢方面帮助基督徒父母。如果一个小朋友好贴心噉为我哋做咗啲事,例如帮手开门,我哋就应该称赞佢哋。噉样,佢哋就会觉得好开心,深深体验到“施与比接受更快乐”。(使徒行传20:35)
喺会众“彼此关注”
7. 耶稣对一个聋人点样表现体恤?我哋从中学到乜嘢?
7 有一次,耶稣喺德卡波利斯境内嘅时候,“有人带咗一个有言语障碍嘅聋人嚟见[佢]”。(马可福音7:31-35)耶稣冇喺众人面前医治佢,而系将佢带到一边。耶稣点解噉样做?可能耶稣察觉到,喺一大班人面前,呢个男子会因为自己残障而觉得唔自在,于是就私下医 治佢。当然,我哋唔能够施行奇迹医治人。不过,我哋能够体贴同尊重我哋嘅信徒同工,顾及佢哋嘅需要同感受,而且应该噉样做。使徒保罗话:“要彼此关注,激发爱心,促进善行。”(希伯来书10:24)耶稣明白而且体恤嗰个聋人嘅感受,佢真系我哋嘅好榜样!
8,9. 我哋点样做,就表明我哋体恤年老、体弱嘅弟兄姊妹?请举例。
8 体恤年老、体弱嘅人。基督徒会众嘅标志系爱心,而唔系效率。(约翰福音13:34,35)呢种爱心推动我哋尽己所能帮助年老、伤残嘅同工参加基督徒聚会同传道。即使佢哋做到嘅好有限,我哋都应该帮助佢哋。(马太福音13:23)米高因为行动不便,生活离唔开轮椅,佢好感激家人同传道小组嘅弟兄姊妹俾咗佢好多帮助。佢话:“全靠佢哋嘅帮助,我可以参加大部分嘅聚会同埋经常参与传道工作。我特别钟意做公众场所见证。”
9 好多伯特利家庭都有年老、体弱嘅成员。仁爱嘅监督会体恤佢哋嘅情况,安排佢哋通过写信或者打电话嚟作见证。比尔系一位86岁嘅弟兄,佢会写信俾偏远地区嘅人,向佢哋作见证。佢好钟意用呢种方式传道。差唔多90岁嘅南茜话:“我唔觉得写信系一个无关紧要嘅工作。呢个系传道嘅一种方式,都可以帮助人认识真理!”1921年出生嘅伊茜尔话:“病痛系我生命嘅一部分。有时,我连着件衫都觉得好辛苦。”虽然系噉,伊茜尔好开心可以做电话见证,仲揾到一啲好好嘅续访。85岁嘅芭芭拉话:“因为我健康情况好差,好难经常出去传道。不过,我通过电话见证可以同人倾计。多谢你吖,耶和华!”唔到一年,一群宝贵嘅年长弟兄姊妹就用咗1228个钟嚟传道,写咗6265封信,打咗超过2000个电话,分发咗6315份出版物!我哋确信,佢哋付出嘅努力一定令耶和华嘅心欢喜。(箴言27:11)
10. 我哋可以点样帮助弟兄姊妹从基督徒聚会充分得益?
10 喺基督徒聚会嘅时候表现体恤。我哋好想弟兄姊妹可以从聚会充分得益。如果我哋关心佢哋,为佢哋嘅益处着想,噉可以点样做呢?一个方法就系,准时到达聚会嘅地方,噉我哋就唔会不必要噉使人分心。当然,因为一啲意外嘅情况,有时我哋会迟到,呢个系可以理解嘅。不过,如果我哋养成迟到嘅习惯,噉我哋就应该认真谂吓噉样会对弟兄姊妹造成乜嘢影响,同埋我哋点样做先至系关心佢哋。请记住,邀请我哋参加聚会嘅系耶和华同佢嘅爱子。(马太福音18:20)佢哋的确配受我哋深深嘅尊敬!
11. 点解有份担任节目嘅弟兄应该实践哥林多前书14:40嘅原则?
11 哥林多前书14:40话:“凡事都要规规矩矩,按照安排去做。”如果我哋体恤弟兄姊妹,就会按照呢个圣经指引去做。喺聚会当中有份担任节目嘅弟兄应该遵守每个环节嘅指定时间。噉样做,唔单止系体恤下一个讲者,亦都系体恤其他嘅弟兄姊妹。请谂吓,如果 聚会迟咗结束,可能会对其他人造成乜嘢影响。有啲弟兄姊妹返屋企嘅路途好远,有啲就可能要赶巴士赶地铁,亦都有啲同工因为不信配偶嘅要求而要尽快返屋企。
12. 点解我哋应该“用爱心格外敬重”辛勤工作嘅长老?(请睇附栏“ 对带头嘅弟兄表现尊重”)
12 属灵嘅牧人为会众辛劳噉工作,亦都热心参与传道,我哋好应该“用爱心格外敬重佢哋”。(请读帖撒罗尼迦前书5:12,13)你一定好感激长老为你付出嘅一切。我哋感激长老,就会同佢哋通力合作,支持佢哋嘅工作,“因为佢哋时刻看守[我哋]嘅生命,要向上帝交账”。(希伯来书13:7,17)
喺传道工作上表现体恤
13. 我哋从耶稣对待人嘅方式学到乜嘢?
13 关于耶稣,以赛亚预言话:“压伤嘅芦苇,佢唔折断;将残嘅麻芯,佢唔熄灭。”(以赛亚书42:3)耶稣对人嘅呢种爱,推使佢关心其他人。有啲人灰心软弱,就好似“压伤嘅芦苇”同“将残嘅麻芯”噉。耶稣好理解佢哋嘅感受,温和、耐心噉关怀佢哋。所以,连小朋友都好钟意同佢一齐。(马可福音10:14)当然,我哋冇耶稣噉样嘅洞察力同教导能力,不过我哋仲系可以对传道地区嘅人表现体恤,亦都应该噉样做。我哋同佢哋交谈嘅时候,都应该要考虑吓交谈嘅方式同时间。
14. 点解我哋应该留意我哋同人交谈嘅方式?
马太福音9:36)结果,好多人变得愤世嫉俗,灰心绝望。我哋同人交谈所使用嘅言词同语气都应该表现出仁慈同怜恤。的确,好多人之所以想听我哋传讲嘅信息,唔单止系因为我哋识得运用圣经嚟推理,亦都因为我哋体贴有礼,真诚噉关心佢哋。
14 我哋应该点样同人交谈?喺今日呢个世界嘅商业、政治同宗教制度下,无数人“俾人剥削,四处流离”。(15. 我哋传道嘅时候,可以用乜嘢实际嘅方式体恤人?
15 向人作见证嗰时,我哋可以用唔同嘅方法体恤人。其中一个就系向人提出问题。我哋应该用心谂吓,向人提问嘅时候,可以点样表现仁慈同尊重嘅态度。喺某个地区,当地嘅好多人性格内向,容易怕丑。所以,一个喺呢个地区传道嘅先驱弟兄就学识点样提出唔会令人尴尬嘅问题,包括当地人可能会答唔到或者答错嘅问题。例如,佢唔会问“你知唔知上帝嘅名系乜嘢?”或者“你知唔知乜嘢系上帝嘅王国?”反而,佢会换一种方式嚟问,类似系“我从圣经学到,上帝有一个名。我可唔可以俾你睇吓?”当然,一个方法未必适用于每一种情况,因为每个人嘅文化、背景、个性都唔一样。不过,无论乜嘢时候,我哋都应该怀住体恤同尊重嘅态度对待其他人。为咗做到呢一点,我哋就要深入了解佢哋。
16,17. (甲)如果我哋体恤住户,就会喺乜嘢时候去探访佢哋?(乙)如果我哋体恤住户,就会点样考虑逗留嘅时间?
16 我哋应该喺乜嘢时间探访传道对象?我哋逐家逐户传道嗰阵,可能住户冇谂过我哋会嚟,因为佢哋并冇邀请我哋。我哋应该喺住户方便交谈嘅时间去探访佢哋。(马太福音7:12)例如,你传道地区嘅人系咪钟意喺周末瞓晏啲呢?如果系噉,你可以先向路人作见证,或者参与公众场所见证,又或者先去续访嗰啲早起身嘅人。
17 你应该逗留几耐?好多人都好忙,所以初次拜访嗰时最好唔好倾咁耐。与其长时间逗留,不如作一啲简短嘅讨论。(哥林多前书9:20-23)如果住户留意到我哋体贴佢哋,喺佢哋忙紧嘅时候唔会逗留太耐,噉我哋下次探访嘅时候佢哋会更加愿意听。我哋传道嘅时候表现出圣灵嘅果实,噉我哋就真系“上帝嘅同工”嘞。好可能,耶和华就系通过我哋表现嘅特质嚟吸引人认识真理。(哥林多前书3:6,7,9)
18. 我哋关心、体恤其他人,就可以得到乜嘢福分?
18 所以,喺家庭、会众以及传道工作上,我哋都应该努力关心、体恤其他人。噉无论而家定系将来,我哋都可以得享好多福分。正如诗篇41:1,2所讲:“关怀寒微人嘅人真系有福!喺佢遭祸嘅日子,耶和华要救佢脱险。 ……佢喺地上必称为有福嘅人。”