全能而又体贴人嘅上帝
“［耶和华］深知我哋嘅本质，记得我哋不过系尘土。”——诗篇103:14
1,2． （甲）耶和华对待人嘅方式，同有权势嘅人有乜嘢区别？（乙）呢篇课文会讨论乜嘢？
有权有势嘅人通常会“辖制”人，甚至压迫人。（马太福音20:25；传道书8:9）不过，耶和华上帝绝对唔会噉样做！虽然佢系全能嘅上帝，系全宇宙最有力量嘅个体，但系佢非常体贴唔完美嘅人类。佢好仁慈，亦都好关心、留意我哋嘅需要同感受。圣经话：“佢深知我哋嘅本质，记得我哋不过系尘土。”（诗篇103:13,14）
2 圣经入面有好多表明耶和华上帝关心体贴佢子民嘅事例。呢篇课文会讨论其中三个例子：第一，上帝仁慈噉帮助年轻嘅撒母耳向大祭司以利传达审判嘅信息；第二，耶和华耐心噉帮助觉得自己冇能力带领以色列人嘅摩西；第三，上帝以体贴嘅方式带领以色列人离开埃及。我哋会集中讨论，喺呢啲例子当中耶和华点样关心体贴佢嘅子民，以及我哋从中可以学到乜嘢。
好似慈父噉体贴年轻人
3． 年轻嘅撒母耳遇到乜嘢唔寻常嘅事？呢件事令我哋产生乜嘢疑问？（请睇吓课文开头嘅图片）
3 撒母耳好细嗰时就开始喺圣幕“事奉耶和华”。（撒母耳记上3:1）有一晚，撒母耳瞓着之后，发生咗一件唔寻常嘅事。 *（请读撒母耳记上3:2-10）佢听见有人叫佢嘅名。撒母耳以为系年老嘅大祭司以利叫佢，就即刻跑去以利嗰度，话：“你呼唤我，我喺呢度。”不过以利话，自己冇叫过佢。之后，第二次，第三次，又发生咗同样嘅事。以利意识到，呼唤撒母耳嘅系耶和华。于是佢话俾撒母耳知应该点样回应，而撒母耳亦都按照佢所讲嘅去做。点解耶和华冇先同撒母耳讲明，呼唤撒母耳嘅系佢？圣经冇解释原因，不过好可能系耶和华体恤撒母耳嘅感受。点解噉讲呢？
4,5． （甲）撒母耳对上帝俾佢嘅任务有乜嘢感觉？佢第二日朝早点样做？（乙）关于耶和华，我哋从呢个记载学到乜嘢？
4 请读撒母耳记上3:11-18。耶和华嘅律法规定，年轻人要尊敬老人，特别系有职责嘅人。（出埃及记22:28；利未记19:32）到咗朝早，撒母耳能唔能够鼓起勇气，向以利讲出上帝严厉嘅审判信息呢？呢个对佢嚟讲真系一啲都唔容易！圣经话“撒母耳唔敢将异象讲俾以利知”。不过，耶和华令以利清楚知道，被呼唤嘅系撒母耳。于是，以利要求撒母耳将上帝所讲嘅话原原本本讲翻俾佢知，一句都唔可以隐瞒。撒母耳好听话，“将一切话都讲俾以利知”。
5 以利听完撒母耳传达嘅信息之后，并冇感到非常惊讶，因为佢之前已经从“上帝嘅一个使者”嗰度听过类似嘅信息。（撒母耳记上2:27-36）我哋通过呢个记载可以睇出，耶和华好有智慧，佢的确系体恤人嘅上帝。
6． 上帝用体贴嘅方式帮助年轻嘅撒母耳，我哋从中学到乜嘢？
6 年轻人，你通过撒母耳嘅呢个记载睇出乜嘢呢？耶和华了解你面对嘅困难，亦都明白你嘅感受。可能你觉得自己好怕丑，好难同其他人分享王国信息，或者因为自己同同辈唔一样而感到有压力。不过请相信，耶和华好想帮助你。你可以通过祷告，向耶和华倾心吐意。（诗篇62:8）你亦都可以沉思圣经当中好似撒母耳噉嘅年轻人嘅事例。你仲可以向唔同年纪嘅基督徒同工请教，因为佢哋可能曾经克服过同你一样嘅难题。佢哋或者会话俾你知，耶和华点样以令人意想唔到嘅方式帮助咗佢哋。
体恤摩西
7,8． 乜嘢表明耶和华真系好体恤摩西嘅感受？
7 摩西80岁嗰时，耶和华俾佢一个艰巨嘅任务，就系拯救以色列人脱离埃及嘅奴役。（出埃及记3:10）当时，摩西已经喺米甸做咗40年嘅牧羊人，佢听到呢个任务嗰时觉得好惊讶。佢话：“我算得系咩，可以去见法老，将以色列人从埃及带领出嚟呢？”上帝对摩西讲：“我保证会同你一齐。”（出埃及记3:11,12）上帝又向摩西承诺，以色列嘅长老一定会听摩西讲。虽然系噉，摩西仲系话：“如果佢哋……唔听我讲，……噉点算呢？”（出埃及记3:18；4:1）摩西噉样讲，其实就系反驳上帝！不过耶和华依然对佢保持耐心。唔单止系噉，耶和华仲赐力量俾摩西，使佢成为圣经记载当中第一个能够施行奇迹嘅人。（出埃及记4:2-9,21）
8 摩西仲系想揾借口，佢话自己口齿唔伶俐。耶和华回答佢话：“我必定与你同在，教你应该讲嘅话。”摩西系咪噉就愿意接受任务呢？唔系，佢又请求上帝派其他人去。因为噉，耶和华向摩西发怒。不过，佢仲系好体恤摩西嘅感受，于是派亚伦代摩西讲话。（出埃及记4:10-16）
9． 耶和华耐心、体贴嘅态度点样帮助摩西成为一个杰出嘅领袖？
9 关于耶和华上帝，我哋从呢个圣经记载学到乜嘢？作为全能嘅上帝，耶和华本来可以强迫摩西即刻按照佢嘅命令去做。不过，耶和华仁慈、耐心噉对待谦虚嘅摩西，设法令佢感到安心。呢种体贴嘅方式有冇效呢？好有效！摩西后来成为一个杰出嘅领袖。佢用温和、体贴嘅方式对待其他人，就好似耶和华对待佢一样。（民数记12:3）
喺待人方面，你会唔会效法耶和华？（请睇第10段）
10． 我哋效法耶和华向人表现体恤，可以点样得益？
10 我哋可以从中学到乜嘢呢？如果你系一个丈夫、父亲或者长老，一定比其他人负有更多嘅责任。你对待妻子、儿女或会众成员嘅时候，一定要效法耶和华，表现体恤、仁慈同耐心。（歌罗西书3:19-21；彼得前书5:1-3）如果你努力效法耶和华，同埋耶稣基督呢位更伟大嘅摩西，就会变得更加平易近人，更容易鼓励同安慰其他人。（马太福音11:28,29）你亦都会为其他人树立优良嘅榜样。（希伯来书13:7）
力量强大而又体贴人心嘅拯救者
11,12． 耶和华带领以色列人出埃及嗰时，点样使以色列人有安全感？
11 以色列人喺公元前1513年离开埃及嗰时，人数可能超过三百万。喺呢群以色列人当中，可能包括三到四代人，其中有老人有细路，肯定亦都有患病或者伤残嘅人。要带领咁大一群人离开埃及，肯定好需要一位体谅人、为人着想嘅领袖。耶和华就系一位噉样嘅领袖，佢通过摩西嚟带领以色列人。虽然以色列人要离开佢哋当时唯一嘅家乡，不过佢哋仍然觉得好安心。（诗篇78:52,53）
12 耶和华点样使佢嘅子民感到安心？佢使以色列人“列队”离开埃及。（出埃及记13:18）以色列人见各方面都组织得井井有条，就清楚睇出呢一切系出于耶和华嘅安排。另外，耶和华“白天用云引导佢哋，彻夜用火光带领佢哋”，使佢哋知道耶和华与佢哋同在，无时无刻都喺度守护住佢哋。（诗篇78:14）接住落嚟发生嘅事表明，以色列人的确好需要呢种安全感。
耶和华喺红海点样用体贴嘅方式拯救以色列人？（请睇第13段）
13,14． （甲）耶和华喺红海施行嘅奇迹，点样表明佢体贴以色列人？（乙）耶和华点样表明佢嘅力量比埃及人强大？
13 请读出埃及记14:19-22。想象吓，你就系其中一个以色列人，而家前有红海，后有法老嘅追兵。跟住，上帝采取行动嘞。佢将云柱移到以色列人同埃及人之间。埃及人嗰边一片黑暗，而以色列人呢边就明光照耀！跟住你见到摩西伸出佢嘅手，指向红海。好快，强劲嘅东风就将海水分开两边，直至对岸。你、你嘅家人同埋你嘅家畜都同其他人一齐有秩序噉行过海床。你一踩落海床就觉得有啲不同寻常。因为海床既唔系烂泥，亦唔系湿滑嘅冻土，反而又干又实净。你行喺上面觉得好踏实。最后，就算行得好慢嘅人都安全噉过到对岸。
14 请读出埃及记14:23,26-30。就喺呢阵时，高傲愚蠢嘅法老亦都冲入海床，想追上你哋。摩西再次伸出手，指向红海。跟住，本来好似两幅墙噉嘅海水就开始回流。海水从两边冲落嚟，好似两个海啸撞埋一齐噉。法老同佢嘅手下全军覆没，无一生还！（出埃及记15:8-10）
15． 关于耶和华，我哋从呢个记载学到乜嘢？
15 我哋从呢个圣经记载可以睇出，耶和华系讲求秩序嘅上帝。佢嘅呢种特质使我哋感到安心。（哥林多前书14:33）呢个记载亦都表明，耶和华系一个仁爱嘅牧人，佢会用实际嘅行动关心照顾佢嘅子民。佢会保护佢哋，使佢哋免受敌人伤害。我哋而家生活喺现行制度嘅末期，知道耶和华系咁关怀体贴人嘅上帝，我哋真系好安心！（箴言1:33）
16． 回顾耶和华拯救以色列人嘅记载，可以点样强化我哋嘅信心？
16 今日，以整体嚟讲，耶和华仍然照顾佢嘅子民，帮助佢哋保持灵性健壮，亦都保护佢哋免受敌人伤害。喺即将到来嘅大患难期间，耶和华都会继续噉做。（启示录7:9,10）到时，上帝嘅子民无论年轻抑或年长，健全抑或残疾，都唔会惊慌退缩。 * 佢哋紧记耶稣讲过嘅话，就系“要挺身昂首，因为你哋好快就会得救嘞”。（路加福音21:28）圣经预言，歌革将会攻击上帝嘅子民。歌革就系联合起嚟嘅列国，比古代嘅埃及强大好多。不过，上帝嘅子民喺攻击之下仍然会保持沉着冷静。（以西结书38:2,14-16）点解上帝嘅子民有咁大嘅信心？因为佢哋知道，耶和华唔会改变，佢会再次证明佢系关心体贴佢子民嘅拯救者。（以赛亚书26:3,20）
17． （甲）我哋点样做，就可以从耶和华照顾佢子民嘅圣经记载得益？（乙）下一篇课文会讨论乜嘢？
17 圣经有好多事例表明，耶和华以仁慈体贴嘅方式照顾、指引同埋拯救佢嘅子民。呢篇课文嘅事例只系其中一部分。你沉思呢啲记载嘅时候，可以尝试从一啲之前冇留意过嘅细节当中揾出同耶和华有关嘅新发现。噉样做，你就可以将耶和华嘅美好特质深深印喺自己嘅头脑同内心，强化自己对上帝嘅爱同信心。下一篇课文会讨论，我哋喺家庭、会众同埋传道工作方面可以点样效法耶和华上帝关心体恤人。
