年长嘅基督徒——耶和华珍视你哋忠贞嘅服务
全球各地嘅长老都好珍惜自己嘅职责，全心为上帝嘅子民服务。佢哋的确系上帝俾我哋嘅恩赐！喺冇几耐之前，上帝嘅组织作咗一个调整，请年长嘅长老将一啲重要职责交俾较年轻嘅长老。系边方面嘅职责呢？
新嘅安排系，一个长老到咗70岁就唔再继续担任分区监督同驻外导师，到咗80岁亦都会将一啲职责，例如分部委员会或者会众长老团协调人，交俾较年轻嘅弟兄。须要作出调整嘅长老有乜嘢反应？佢哋对耶和华同佢嘅组织表现出极大嘅忠贞！
肯恩做咗49年嘅分部委员会协调人，佢话：“我完全同意呢个决定。其实，就喺嗰朝早，我向耶和华祷告话，需要一个较年轻嘅长老嚟做协调人。之后，就得知呢个消息嘞。”世界各地好多忠心嘅年长长老都同肯恩有一样嘅感觉。不过，因为佢哋好想喺自己嘅岗位继续热心噉为弟兄姊妹服务，所以佢哋啱啱听到呢个调整嗰时觉得有啲灰心。
埃斯佩兰迪奥曾经系会众长老团嘅协调人，佢话：“我有啲伤感。”但系佢亦都承认：“我嘅健康状况越来越差，需要更多时间嚟照顾自己嘅身体。”埃斯佩兰迪奥继续忠心噉为耶和华服务，为会众作出好多贡献。
嗰啲多年从事探访工作嘅监督对自己嘅调整又有乜嘢睇法呢？艾伦从事探访工作38年，佢承认话：“我知道呢个调整之后，成个人都呆晒。”不过佢睇出，训练较年轻嘅弟兄真系好重要，而佢亦都继续忠心事奉耶和华。
拉塞尔总共有40年嘅时间从事探访会众同埋担任驻外导师嘅工作。佢同太太一开始听到呢个调整嗰时都有啲失望。佢哋话：“我哋都好珍惜自己嘅岗位，亦都觉得自己有足够嘅体力同精力继续做落去。”而家，拉塞尔同太太都善用自己嘅经验同接受过嘅培训去造益会众，而会众嘅传道员都好钟意同佢哋一齐工作。
可能你冇以上提到嘅感觉，不过阅读撒母耳记下嘅记载，或者可以帮助你理解呢啲弟兄姊妹嘅感受。
表现谦逊同考虑实际情况
押沙龙发动叛乱期间，大卫从耶路撒冷逃亡到约旦河东边嘅玛哈念。喺嗰度，大卫同佢嘅手下好需要得到一啲生活必需品。你记唔记得当时发生乜嘢事？
当地有三个男子慷慨噉提供床、食物同餐具俾佢哋。巴西莱系其中一个。（撒母耳记下17:27-29）押沙龙叛变失败之后，大卫起程返去耶路撒冷，巴西莱就送佢送到约旦河边。大卫好想巴西莱同佢一齐返耶路撒冷。虽然佢知道巴西莱“系个大财主”，生活无忧，但仲系应承会提供食物俾佢。（撒母耳记下19:31-33）因为巴西莱有美好嘅特质同丰富嘅经验，大卫好赏识佢，希望佢可以留喺自己身边，辅助自己。对巴西莱嚟讲，有机会喺王宫生活同工作的确系好大嘅殊荣！
不过，巴西莱考虑实际情况，表现出谦逊嘅态度。佢指出自己已经80岁，然后又话：“我仲能够分辨好坏咩？”佢嘅话系乜嘢意思？年老嘅巴西莱积累咗丰富嘅人生经验，佢好有智慧，一定可以好似后来罗波安日子嘅“长老”噉，为大卫提出好多实用嘅建议。（列王纪上12:6,7；诗篇92:12-14；箴言16:31）巴西莱话自己唔能够分辨好坏，可能系指自己上咗年纪之后，能够做到嘅事好有限。佢亦都承认自己嘅味觉同听觉越来越差。（传道书12:4,5）最后，巴西莱推荐年轻嘅金罕同大卫一齐返耶路撒冷。呢个金罕可能系巴西莱嘅仔。（撒母耳记下19:35-40）
为将来做好准备
文章开头提到同年龄有关嘅调整，反映出巴西莱嘅观点。可以理解嘅系，我哋今日要考虑嘅事唔单单系一个人嘅情况同能力，亦都要从实际出发，睇吓对全球各地忠心服务嘅长老嚟讲乜嘢先至系最好嘅。
年长而又谦逊嘅基督徒男子可以睇出，如果佢哋将自己多年以来一直担任嘅职责交俾较年轻嘅弟兄，噉耶和华嘅组织就会得到强化，喺未来可以发展得更好。通常嚟讲，年长嘅弟兄都会训练年轻嘅弟兄，就好似巴西莱训练佢嘅仔、使徒保罗训练提摩太一样。（哥林多前书4:17；腓立比书2:20-22）呢啲较年轻嘅弟兄的确系嚟自上帝嘅“恩赐”，可以“强化基督嘅身体”。（以弗所书4:8-12；参考民数记11:16,17,29）
有机会参与其他方面嘅服务
喺世界各地，上帝嘅好多忠仆将职责交俾其他人之后，都可以喺其他方面继续事奉耶和华。
从事探访工作19年嘅马尔科话：“职责调整之后，我就有更多时间可以认识一啲姊妹嘅不信丈夫。”
热拉尔多从事咗28年嘅探访工作，佢话：“我哋定立咗一啲新嘅目标，包括帮助不活跃嘅弟兄姊妹同埋主持更多嘅圣经课程。”佢同太太而家主持紧15个圣经课程。喺佢哋嘅帮助下，好多不活跃嘅弟兄姊妹重新参加聚会。
文章开头提到嘅艾伦话：“我哋而家有机会做更多传道工作。我哋参与公众场所见证、商业见证，亦都向隔篱邻舍作见证，从中得到好大嘅喜乐。有两个邻居已经嚟过王国聚会所添。”
如果组织俾你一个新嘅委派，你都可以善用自己嘅才干，喺会众当中作出特别嘅贡献。你可以同会众嘅年轻弟兄分享自己嘅宝贵经验，从而支持耶和华嘅工作。上文提到嘅拉塞尔话：“耶和华正喺度训练同埋运用呢啲能干而且年轻有为嘅弟兄。佢哋精力充沛，悉心教导同牧养上帝嘅羊群，使整个弟兄团体都大大得益！——请睇附栏“ 帮助较年轻嘅弟兄充分发挥潜能”
耶和华珍视你忠贞嘅服务
如果你嘅职责最近有所改变，请继续保持积极嘅心态。好多人都因为你热心工作而深受打动。你继续噉样做，一定可以帮助更多嘅人。无论而家定系将来，弟兄姊妹都会一直爱戴你哋。
更重要嘅系，你喺耶和华心目中留低咗深刻嘅印象。希伯来书6:10话，耶和华“绝对唔会忘记［你］所做嘅工作同［你］为佢嘅名所显嘅爱心，就系［你］从前服事圣民，而家仍然服事佢哋”。呢个经文作出嘅保证几咁令人安慰！喺耶和华眼中，你的确好宝贵。无论系你以前为耶和华付出嘅努力，抑或你而家继续作出嘅忠贞服务，耶和华都一定唔会忘记！
可能你唔需要因为新嘅调整而改变岗位，不过呢个调整都可能会影响到你。点解噉讲呢？
虽然一啲弟兄嘅职责有所改变，不过佢哋有丰富嘅经验，而且灵性成熟。如果你有机会接触一个噉样嘅弟兄，不妨主动征求佢嘅意见，留心观察佢喺而家嘅岗位上点样善用自己嘅经验忠贞噉为会众服务。你噉样做，就可以从中得益。
可能你因为组织嘅调整，而家喺新嘅岗位继续忠贞噉为耶和华服务。又或者，你好想向有经验嘅同工请教，从而得到教导同训练。无论你属于边一种情况，都请谨记，耶和华珍视所有多年为佢服务并且继续忠贞事奉佢嘅人。
