你可以点样适应新嘅会众?
“搬嚟呢度之前我好担心,”艾伦 *话,“我唔知识唔识到新嘅朋友,或者可唔可以融入到新嘅会众。”艾伦而家喺一个离佢以前屋企超过1400公里(大约900英里)嘅新会众。
如果你搬到一个新嘅会众,可能都会有呢啲忧虑。有乜嘢方法可以帮助你调整呢?如果你觉得好难调整,可以点做呢?另一方面,如果你唔需要搬,可以点样喺自己嘅会众帮助新嚟嘅人更容易适应呢?
作出调整适应环境
举个例:如果一棵树移植到另一个地方,树就会受到损伤。因为挖棵树上嚟嘅时候,为咗方便运输,通常都会切断大部分嘅根。树移植之后,好快就会生翻啲新嘅根出嚟。同样,可能你会搬去另一个会众而感到有压力。因为你喺以前嘅会众,已经有感情好深嘅朋友同埋习惯咗嘅属灵常规,呢啲就好似你嘅“根”一样。而家你为咗适应新嘅环境,需要生出新嘅根。乜嘢可以帮到你呢?就系实践圣经嘅原则。我哋一齐嚟睇吓其中一啲原则。
一个经常阅读上帝话语嘅人就“好似一棵树种喺水边,按时结果,枝叶不枯;凡佢所做嘅尽都成功。”(诗篇1:1-3)
一棵树要经常得到水嘅滋养,先至可以茁壮成长。同样,一个基督徒要经常吸收上帝嘅话语,先至可以保持灵性健壮。所以,要每日阅读圣经,经常参加聚会,定期举行家庭崇拜同做个人研读。你以前系点样同耶和华维系亲密关系嘅,喺新嘅会众都要噉样做。
“大方滋润人嘅,必蒙大方滋润。”(箴言11:25)
如果你全心投入传道工作,就会重新得力,而且会快啲适应新嘅环境。凯文系一个基督徒长老,佢话:“我同太太搬到新嘅会众之后冇几耐就做辅助先驱,噉样做可以帮助我哋快啲适应。”佢仲话:“我哋好快就熟悉会众嘅弟兄姊妹、先驱同埋传道地区。”罗杰搬去一个离佢以前屋企超过1600公里(1000英里)嘅地方,佢话:“适应新嘅会众最好嘅方法就系多啲出去传道。而且你可以话俾长老知,好多方面你都乐意帮手,例如清洁王国聚会所,临时顶替聚会节目,或者接送参加聚会嘅人。当弟兄姊妹见到你表现出自我牺牲嘅精神,就会更加想同你做朋友。”
“开阔心胸”(哥林多后书6:13)
开阔心胸去认识弟兄姊妹。玛丽莎同屋企人搬到一个新嘅会众之后,都好努力认识新嘅朋友。玛丽莎话:“我哋聚会前后都会主动同弟兄
姊妹打招呼,努力认识佢哋。”噉样可以帮佢哋一家人快啲记住会众成员嘅名。佢又话:“我哋会交换电话号码保持联系,一齐交往同参与属灵嘅活动。”我哋开阔心胸表现慷慨嘅精神,就可以加深弟兄姊妹之间嘅友谊。当你觉得好难认识新朋友嘅时候,可以从一啲简单嘅事做起。例如你可以微笑。可能一开始你觉得唔容易,但系一个友善嘅眼神同微笑可以令其他人更加容易亲近你。圣经话“眼睛明亮,心就欢喜”,呢句话的确有道理。(箴言15:30)瑞秋搬去一个离家乡好远嘅地方,佢话:“我天生就好内向,有时我要逼自己同新会众嘅弟兄姊妹倾计。通常我会揾嗰啲坐喺度冇同人倾计嘅人,因为我觉得噉样嘅人可能同我一样咁内向。”不妨定下目标,喺聚会前后同新嚟嘅人倾吓计。
头嗰几个星期你识到新嘅朋友,可能会好兴奋。但系,努力认识新朋友嘅“积极性”会随住时间慢慢消失。到时,你可能需要更加努力先至可以继续认识新嘅朋友。
适应新会众系需要时间嘅
有啲树喺新嘅环境扎根,比其他树需要更长嘅时间。同样,每个人适应新会众需要嘅时间都唔同。如果你搬咗去一个新嘅会众,仲喺度适应紧,实践以下嘅圣经原则可以帮到你:
“我哋千祈唔好放弃行善,如果唔灰心松懈,到咗时候就会有收成。”(加拉太书6:9)
要俾自己更多时间去适应新嘅环境,可能呢个时间比你预期嘅更长。例如,好多受过基列学校培训嘅特派传道员,会留喺受委派嘅地区几年,之后先至返自己国家探亲。佢哋噉样做,就可以用更多时间嚟亲近当地嘅弟兄姊妹,同埋适应当地嘅文化。
亚历杭德罗搬过几次会众,佢知道适应新嘅环境系需要时间嘅。佢话:“啱啱搬嚟呢个会众嗰时,我太太话:‘我啲朋友都喺晒以前嘅会众度!’”亚历杭德罗提醒太太,再上一次搬会众嗰阵,佢都讲过同样嘅话。不过事实上,佢太太喺过去嗰两年努力关心其他人,所以后来同会众嘅人都成为咗好好嘅朋友。
“唔好话:‘点解以前嘅日子比而家好?’你噉样问系冇智慧嘅。”(传道书7:10)
你要避免攞新嘅会众同以前嘅会众比较。例如,你已经习惯咗以前会众嘅弟兄姊妹,所以可能你会觉得而家新会众嘅弟兄姊妹讲嘢比较直接,或者比较难亲近。呢个时候,你要留意佢哋嘅优点,因为你都想人噉样对你。有啲啱啱搬咗会众嘅人都估唔到自己有噉嘅谂法:“我系咪真系爱‘整个弟兄团体’呢?”(彼得前书2:17)
“不断敲门,就一定会开门俾你哋。”(
你要不断祷告寻求帮助。戴维系个长老,佢话:“唔好倚靠自己。”佢仲话:“好多嘢只有耶和华先至帮到我哋,所以向佢祷告啦!”瑞秋话:“如果我同先生觉得融入唔到会众,就会好具体噉向耶和华祷告话:‘求你俾我哋知道,系咪我哋做咗啲嘢使其他人好难亲近我哋。’之后我哋就会努力用更多时间同弟兄姊妹一齐交往。”
如果你哋系做父母嘅,当你留意到儿女好难适应新会众,就应该多啲同佢哋一齐为呢件事祷告。你亦都可以安排一啲有益嘅交往帮佢哋揾到新嘅朋友。
要令新人有宾至如归嘅感觉
你可以点样帮助新嚟嘅人?一开始就要努力同佢哋做朋友。你可以换个角度谂吓,如果自己系新搬嚟嘅人,会有咩需要呢?噉你就识得点样去帮助佢哋嘞。(马太福音7:12)你可唔可以邀请新嚟嘅人参加你嘅家庭崇拜呢?或者一齐睇每个月嘅JW电视节目?又或者你可唔可以邀请佢哋同你一齐传道?如果你请佢哋食一餐便饭,佢哋会好记得你嘅慷慨。噉你仲可以提供乜嘢切合实际嘅帮助呢?
卡洛斯话:“当我哋搬到一个新会众嘅时候,有个姊妹列咗一份店铺嘅名单俾我。嗰啲店铺嘅价钱好实惠,噉样真系帮咗我好多。”新嚟嘅人可能唔系好了解本地嘅气候,你可以话俾佢哋知唔同嘅天气可以着咩衫,仲可以话俾佢哋知本地嘅历史同宗教背景,帮佢哋更有效噉传道。
努力作出调整系值得嘅
文章开头提到嘅艾伦已经喺新嘅会众超过一年嘞。佢回忆话:“我喺会众主动加深对弟兄姊妹嘅认识,而家我哋好似一家人噉,我真系好开心。”艾伦发觉,离开以前嘅会众之后,唔单止冇失去老朋友,仲识到新朋友,而且佢哋可能都会成为佢嘅终生好友。
^ 2段 本文有啲人名系化名。