发出悦耳嘅声音！
“要歌颂我哋嘅上帝，噉系美好嘅事。”——诗篇147:1
唱诗9，138首
1． 唱诗可以达到乜嘢目的？
一个受欢迎嘅作词人曾经讲过:“字词可以引发思考，音乐可以牵动情感。不过一首歌既能打动人心，又能激发思考。”我哋可以通过唱诗嚟表达对天父耶和华嘅爱同赞美。无论系一个人定系同弟兄姊妹一齐嘅时候，唱诗都系正确崇拜嘅重要一环。
2，3． （甲）有啲人对喺聚会里面唱诗有乜嘢感觉？（乙）我哋会讨论乜嘢问题？
2 但系对你嚟讲，喺聚会嗰阵要开口唱诗歌，有乜嘢感觉？你会唔会觉得好尴尬？喺一啲文化里面，男人会觉得喺公众场合唱歌系好唔自在嘅。如果带头嘅弟兄揾借口唔唱诗歌，或者喺聚会唱诗歌嗰阵做其他嘢，佢哋噉样做就可能会影响到整群会众。（诗篇30:12）
3 如果我哋认为唱诗系我哋崇拜嘅一部分，噉我哋喺聚会唱诗嗰阵就唔会行开或者缺席。所以，我哋每个人都要问吓自己:“喺聚会嗰阵唱诗，我有乜嘢感觉？我可以点样消除顾虑，大胆唱诗？喺唱诗嘅时候，我又可以点样唱出诗歌嘅神韵？”
唱诗——正确崇拜嘅重要一环
4，5． 喺古代以色列人嘅崇拜当中，唱诗嘅安排有几咁重要？
4 耶和华嘅忠仆一直通过音乐嚟赞美佢。值得留意嘅系，当古代以色列人忠心为耶和华服务嘅时候，喺佢哋嘅崇拜当中，唱诗系必不可少嘅。例如，喺大卫王为圣殿做筹备工作嗰阵，佢安排咗4000个利未人担任乐师，其中有288人“喺歌颂耶和华方面受过训练，歌艺精湛”。（历代志上23:5；25:7）
5 喺圣殿嘅呈献礼上，音乐同唱诗系好重要嘅一部分。经文描述:“号筒手同歌手都一齐同声赞美感谢耶和华。佢哋吹号击钹，用各种歌唱嘅乐器高声赞美耶和华……耶和华嘅荣光充满咗上帝嘅殿。”可想而知，嗰个场景几咁鼓舞人心！（历代志下5:13，14；7:6）
6． 请描述尼希米喺耶路撒冷做省长嗰时嘅精彩音乐合奏。
6 尼希米带领忠心嘅以色列人重建耶路撒冷城墙，同时佢亦都组织利未部族歌手喺各种乐器嘅伴奏下高歌。喺举行重建城墙落成礼嘅时候，精彩嘅音乐合奏使气氛更加喜乐。当时有“两大队感恩合唱团”，一队向右边走，一队向左边走，然后两队喺靠近圣殿嘅城墙上会合。乐队嘅奏乐声响彻四方。（尼希米记12:27，28，31，38，40，43）耶和华一定好开心听到佢嘅子民热心唱诗赞美佢。
7． 耶稣点样表明唱诗系基督徒崇拜嘅重要部分？
7 基督徒会众成立之后，音乐仍然系正确崇拜嘅重要部分。喺人类历史上最重要嘅嗰一晚，耶稣设立咗主嘅晚餐之后，亦都同门徒一齐唱诗歌。（请读马太福音26:30）
8． 公元1世纪嘅基督徒点样为唱诗立下先例？
8 喺一齐唱诗赞美耶和华方面，公元1世纪嘅基督徒立下咗一个先例。虽然佢哋经常喺简陋嘅私人屋企聚会，但系佢哋唱诗赞美耶和华嘅热情并冇因此而减弱。使徒保罗喺圣灵嘅启示下，劝勉基督徒同工:“要用诗篇、赞美上帝嘅诗歌、洋溢恩慈嘅属灵歌曲，不断彼此教导劝戒，从心底歌颂耶和华。”（歌罗西书3:16）我哋嘅诗歌的确系“洋溢恩慈嘅属灵歌曲”。呢啲诗歌亦都系“忠信睿智嘅奴隶”所提供嘅灵粮之一。（马太福音24:45）
克服唱诗嘅恐惧
9． （甲）有乜嘢因素会阻碍人喺聚会同大会高声欢唱？（乙）我哋应该点样唱诗赞美耶和华？边个应该带头噉样做？（请睇吓课文开头嘅图片）
9 假如喺你嘅家庭、文化或者环境入面冇唱歌嘅习惯，噉又点呢？由于有现代科技，你可以欣赏到职业歌手唱嘅歌。但系如果你攞自己同娱乐界嘅职业歌手比较，你可能会觉得有啲尴尬，技不如人。不过，我哋唔好俾呢啲因素阻碍我哋唱诗赞美耶和华。相反，我哋应该攞起歌书，抬起头，衷心唱出自己嘅感受。（以斯拉记3:11；请读诗篇147:1）今日，喺好多王国聚会所，歌词会显示喺屏幕上，呢个可以帮助我哋放声唱出诗歌。值得留意嘅系，长老参加嘅王国职务训练班，亦都包括唱王国诗歌嘅环节。目的系要强调长老有责任喺会众里面带头唱诗歌。
10． 如果我哋因为恐惧就唔敢放声唱诗歌，就应该记住乜嘢？
10 阻碍好多人放声唱诗歌嘅其中一个原因系恐惧。可能我哋惊喺人面前显得太特出，或者惊自己唱得唔好听。虽然我哋喺讲话嘅时候“都难免多次犯错”，但系我哋唔会因为呢个理由就唔再讲话。（雅各书3:2）噉点解因为我哋嘅歌喉唔好就唔敢唱诗赞美耶和华呢？
11，12． 有乜嘢方法可以改善我哋嘅歌喉？
11 我哋唔敢唱诗歌，可能系因为我哋唔系好识点样唱。不过，我哋可以通过一啲基本建议嚟改善我哋嘅歌喉。 *
12 你可以学吓正确嘅呼吸方法嚟帮助你大声有力噉唱出诗歌。就好似灯泡有电先会发光，同样呼吸使我哋有力气去讲话同唱歌。你唱歌嘅音量应该同平时讲话一样，甚至可以更大声。（想了解更多建议，请睇《神圣教育使你得益——传道训练班课本》181-184页“适当地控制呼吸”呢个标题下嘅资料。）其实，圣经有时都鼓励耶和华嘅子民喺唱诗赞美佢嗰阵要“欢呼”。（诗篇33:1-3）
13． 我哋可以点样更有自信噉唱出诗歌？
13 喺家庭崇拜或者自己一个人嘅时候，可以试吓:喺歌书入面选出你最钟意嘅诗歌，然后充满自信噉大声读出歌词。之后，用同样嘅音量，一口气读出其中一段歌词，跟住将呢一段大声唱出嚟。（以赛亚书24:14）噉样你唱歌嘅声音就会变得更加雄厚有力。歌声变得有力系一件好事，唔使因为噉而担心或者觉得尴尬！
14． （甲）掰大啲个口可以点样帮助我哋唱诗？（请睇附栏“ 点样改善你嘅歌喉”）（乙）喺改善声音质素方面，你揾到乜嘢实用嘅建议？
14 我哋需要扩张口腔嘅空间，先可以有雄厚嘅歌声。所以，另一个建议系要将个口掰大啲，仲要大过平时讲话。如果你觉得自己嘅声线微弱或者音调过高又可以点做？关于呢方面嘅实用建议，请睇《神圣教育使你得益——传道训练班课本》184页附栏“克服具体困难”。
衷心唱出赞美诗歌
15． （甲）2016年嘅年会有乜嘢宣布？（乙）点解需要出版新歌书？
15 喺2016年宾夕法尼亚州守望台圣经书社嘅年会上，大家都好兴奋听到中央长老团成员斯蒂芬·莱特弟兄作出一项宣布，组织会发行一本名为《向耶和华“高声欢唱”》嘅新歌书，而且我哋好快就可以喺聚会嗰阵使用。莱特弟兄解释要更新歌书嘅一个原因系，要同《圣经新世界译本》修订版（英语）保持一致。呢个调整包括删除或者修改歌词，因为《新世界译本》2013年修订版唔会再使用一啲字词。另外，新歌书亦都收录咗一啲新歌，系同传道工作同埋感激赎价有关嘅。再加上，因为唱诗喺我哋嘅崇拜当中系非常重要嘅，所以中央长老团希望出版一本封面设计同《新世界译本》修订版一样嘅新歌书。
16，17． 新歌书有乜嘢调整？
16 《向耶和华“高声欢唱”》里面嘅诗歌序列系以主题嚟编排嘅，目的系帮助人更容易搜寻诗歌。例如，头12首同耶和华有关，之后嘅8首同耶稣以及赎价有关。歌书亦都有一个分类索引，方便弟兄喺准备公众演讲嗰时揾到切合讲题嘅诗歌。
17 为咗帮助大家更由衷噉唱出诗歌，新歌书喺表达上更加清晰易明，亦都删除咗一啲喺生活上唔再普遍使用嘅字词。诗歌“保护你的心”改为“要保护自己的内心”系好合适嘅。点解呢？喺聚会同大会里面，一啲新人、对圣经感兴趣嘅人、年轻人同姊妹唱呢首歌嘅时候，可能会有奇怪嘅感觉，觉得自己好似喺度劝导人要点样做。所以，歌名同歌词都作出咗一啲调整。
喺家庭崇拜嘅时候练习唱诗（请睇第18段）
18． 点解我哋想更加熟悉新诗歌？（另外请参考脚注）
18 《向耶和华“高声欢唱”》里面嘅好多诗歌都系以祷告嘅形式编写嘅。我哋可以通过呢啲诗歌向耶和华表达自己嘅感受，而另一啲诗歌就有助于“激发［我哋嘅］爱心，促进善行”。（希伯来书10:24）我哋每个人肯定都好想更加熟悉诗歌嘅旋律、节奏同歌词。我哋可以喺jw.org网站上面播放合唱版嘅诗歌。我哋喺屋企练习唱诗嘅时候，可以学吓点样衷心而有自信噉唱出嚟。 *
19． 会众嘅所有人可以用乜嘢直接嘅方式嚟崇拜耶和华？
19 要记住，唱诗系我哋崇拜嘅重要部分。我哋亦都可以通过唱诗，衷心噉向耶和华表达爱同感激之心。（请读以赛亚书12:5）你开心噉唱出诗歌，都可以鼓励到其他人有自信噉唱出嚟。事实上，喺会众入面，年长嘅，年幼嘅，或者系新近感兴趣嘅，都可以用呢个直接嘅方式嚟崇拜耶和华。所以，唔使觉得唔好意思用唱诗呢种方式去表达自己嘅感受。相反，要听从诗篇执笔者嘅清晰指引:“要向耶和华歌唱”。冇错，要发出悦耳嘅声音！（诗篇96:1）
^ 11段 关于点样改善我哋歌喉嘅进一步资料，请睇JW电视网2014年12月嘅节目（英语）（影片点播——每月节目与宣布）。
^ 18段 为咗帮助我哋更有感情噉唱出诗歌，喺大会上下午嘅节目开始之前，都会播放10分钟嘅音乐特辑。呢啲音乐系为咗准备好我哋嘅内心同头脑，使我哋更好噉聆听接住落嚟嘅节目而编写嘅。所以我哋受到提醒，喺大会开始之前就应该返到自己嘅座位，留心欣赏呢啲音乐。
