年轻人——“不断努力，使你哋自己得救”
“你哋向来都好顺服，……应该恐惧战兢，不断努力，使你哋自己得救。”——腓立比书2:12
1． 点解受浸系一个重要嘅步骤？（请睇吓课文开头嘅图片）
每年都有几十万个圣经学生受浸，当中包括好多儿童以及青少年，佢哋有啲喺真理中长大。你系咪其中一个？如果系，噉你好值得称赞。人要成为基督徒就要受浸，呢个亦都系得救嘅重要步骤。（马太福音28:19，20；彼得前书3:21）
2． 点解你唔应该对献身感到恐惧而退缩？
2 你受浸之后，虽然耶和华会为你打开祝福嘅大门，不过你亦都要肩负一啲责任。乜嘢责任呢？喺受浸当日，讲者问:“你系咪已经根据耶稣基督所作嘅牺牲，为自己嘅罪悔改，并献咗身俾耶和华，要遵行佢嘅旨意呢？”你回答:“系。”你受浸表明你已经献咗身俾耶和华，亦都表明你爱耶和华，并将佢嘅旨意放喺生活嘅首位。呢个系一个好严肃嘅承诺。你应唔应该后悔做咗呢个决定？将自己嘅一生交俾耶和华系绝对冇错嘅。一个人唔系服从耶和华嘅统治就系服从撒但嘅统治。撒但一啲都唔关心你可唔可以得救。如果撒但见到你企喺佢嗰边，因拒绝服从耶和华嘅至高统治而失去永生嘅奖赏，佢一定会好开心。
3． 献身俾耶和华会带嚟乜嘢福分？
3 我哋可以谂吓，献身受浸成为基督徒之后所得到嘅福分。而家你已经将一生献俾耶和华，你可以比以前更有信心噉讲:“有耶和华喺我身边，我唔会怕。世人可以将我点样呢？”（诗篇118:6）喺一生当中，冇任何事比得上有耶和华喺我哋身边支持我哋，悦纳我哋所做嘅。
个人责任
4，5． （甲）点解每个人都要为自己嘅献身负起责任？（乙）每个人都要面对乜嘢挑战？
4 身为受咗浸嘅基督徒，你同耶和华嘅关系并唔系好似电信公司嘅一个“家庭共享套餐”，父母俾钱，人人受惠。相反，就算你同父母一齐住，你都要为自己嘅得救负责。点解记住呢点咁重要？因为你唔知道喺未来你将会遇到乜嘢挑战。例如，如果你系一个受咗浸嘅小朋友，当你步入青春期之后会有情绪波动，亦都会面对唔同嘅压力。一个少女话:“通常，一个小朋友唔会因为喺学校唔可以食生日蛋糕，就唔想做耶和华见证人。但系几年之后，当性欲变得越来越强，佢就需要确信服从耶和华嘅诫命系最好嘅选择。”
5 当然，唔系青少年先会面对新嘅挑战。就算受咗浸嘅成年人都会喺信心方面，面对突如其来嘅考验。呢啲考验可能同婚姻、健康、工作有关。所以无论一个人系乜嘢年纪，佢都会遇到一啲特别需要对耶和华表现信心嘅情况。（雅各书1:12-14）
6． （甲）毫无条件噉献身俾耶和华系乜嘢意思？（乙）你从腓立比书4:11-13学到乜嘢？
6 如果想喺任何情况下都保持忠心，就要紧记你对耶和华嘅承诺系冇附带任何条件嘅。呢个意味到你向宇宙至高统治者保证，就算朋友或者家人放弃真理，你都会继续事奉佢。（诗篇27:10）喺任何情况下，耶和华都会赐你力量，帮助你履行对佢所作嘅献身承诺。（请读腓立比书4:11-13）
7． “恐惧战兢”使自己得救系乜嘢意思？
7 耶和华想你做佢嘅朋友，不过维持呢份友谊同得到拯救，系需要付出努力嘅。腓立比书2:12话:“你哋应该恐惧战兢，不断努力，使你哋自己得救。”呢节经文表明，你要沉思自己可以点样加深同耶和华之间嘅友谊，无论遇到乜嘢挑战都要保持忠心。唔好过度自信，就算系一啲事奉上帝多年嘅基督徒都有可能会失足。噉你可以采取乜嘢步骤使自己得救呢？
研读圣经嘅重要性
8． 个人研读包括乜嘢？研读点解咁重要？
8 维持同耶和华之间嘅友谊系双向嘅，牵涉到听同讲。研读圣经系聆听耶和华对我哋讲话嘅主要方法。呢个包括研读、沉思上帝嘅话语同圣经书刊。要记住研读圣经唔系做学术研究，亦都唔系为咗应付考试而死记书上嘅知识。有意义嘅研读应该好似一个探险旅程噉，可以帮助我哋更加深入探索耶和华嘅唔同特质。噉做可以帮助我哋亲近耶和华，而佢亦都会亲近我哋。（雅各书4:8）
你有冇同耶和华保持良好嘅沟通？（请睇第8-11段）
9． 有乜嘢工具可以帮助你做好个人研读？
9 耶和华嘅组织提供咗好多工具，帮助你做好个人研读。例如，喺jw.org“青少年”分页标题下面嘅“看圣经动动脑”，可以帮助你通过圣经故事学到实用嘅原则；《辨明圣经的真理》研读指南可以强化你对圣经嘅信心。呢啲研读指南可以帮助你学识点样向其他人解释自己嘅信仰。喺《警醒！》2009年4月刊嘅“青年人问……怎样才能使自己更喜欢阅读圣经？”文章里面亦都提到其他嘅研读建议。我哋希望得救就一定要研读同沉思，呢个系非常重要嘅。（请读诗篇119:105）
祷告系必须嘅
10． 对一个受咗浸嘅基督徒嚟讲，点解祷告系必须嘅？
10 既然个人研读系我哋听耶和华讲，噉祷告就系我哋向耶和华倾心吐意。基督徒唔应该觉得祷告系一种冇咩意义嘅仪式，或者觉得祷告系一个可以带嚟好运嘅“护身符”，使我哋事事顺利。其实，祷告系我哋同造物主真正沟通嘅渠道。耶和华好想听你嘅祷告。（请读腓立比书4:6）无论我哋有乜嘢忧虑，圣经话最明智嘅做法就系“将重担卸俾耶和华”。（诗篇55:22）你相唔相信噉样做真系有效呢？有几百万个弟兄姊妹可以向你保证，祷告的确帮到佢哋。噉样做亦都能够帮助你！
11． 点解我哋时时都应该感谢耶和华？
11 喺祷告里面，除咗祈求耶和华帮助我哋之外，我哋都可以向耶和华表达我哋对佢嘅感激。圣经话:“你哋要显出感恩之心。”（歌罗西书3:15）我哋有时由于太担心遇到嘅难题，就忽视咗已经享有嘅福分。我哋可唔可以下定决心，每日谂吓至少三件事系值得我哋感恩嘅呢？然后就喺祷告里面感谢耶和华。一个喺12岁就受咗浸嘅年轻姊妹叫亚比该，佢话:“我觉得喺全宇宙，最值得我哋感激嘅就系耶和华。我哋一有机会就应该多谢佢赐俾我哋咁多礼物。我曾经听过一个好好嘅提醒，可以问吓自己:当听日起身嘅时候，我哋仲记唔记得今日多谢咗耶和华几多件事呢？” *
个人经历嘅价值
12，13． 你可以点样亲自尝到耶和华嘅良善？点解沉思耶和华为你所做嘅咁重要？
12 古代嘅大卫王经历过好多磨难，佢喺诗歌里面表达自己嘅感受话:“你哋嚟尝尝主恩，就知道耶和华系良善嘅；向佢寻求庇护嘅人几咁有福！”（诗篇34:8）呢节经文强调个人经历嘅价值。通过研读圣经、圣经书刊，同参加聚会，你会听到好多有关耶和华点样帮助人保持忠心嘅经历。不过随住你不断进步，你会亲身体验到耶和华点样喺生活上扶持你。你有冇亲自尝到耶和华嘅良善呢？
13 其实，所有基督徒都可以尝到耶和华嘅良善，因为人人都受到邀请亲近上帝同佢嘅儿子。耶稣话:“如果唔系差我嚟嘅父亲吸引人，就冇人能够嚟到我呢度。”（约翰福音6:44）你觉唔觉得呢句话都适用喺你身上？一个年轻人可能会谂:“耶和华吸引我嘅父母，而我只系跟住佢哋行。”但系你献身受浸就表明从此以后你同耶和华有一个特别嘅关系。而家佢真正认识你。圣经向我哋保证:“人如果爱上帝，上帝就认识呢个人。”（哥林多前书8:3）所以，要永远珍视同感激自己可以属于耶和华嘅组织呢个殊荣。
14，15． 传道工作点样强化你嘅信心？
14 喺传道或者喺学校嘅时候，每当你感受到耶和华赐你勇气向其他人谈及自己嘅信仰，就可以尝到耶和华嘅良善。或者你觉得好难向同学作见证，因为你担心对方会有唔好嘅反应。特别系当你要向一大班人解释自己信仰嘅时候，压力就更加大。你可以点样做呢？
15 首先，要谂吓点解你对自己嘅信仰有信心。喺jw.org有冇你语言版本嘅研读指南？如果你唔肯定，可以花啲时间喺网站度揾吓。呢啲指南嘅设计目的，系帮助你沉思自己相信乜嘢、点解你相信，同埋你可以点样向其他人解释自己嘅信仰。如果你有坚定嘅信心，又作妥准备，就会受到推动为耶和华嘅名作见证。（耶利米书20:8，9）
16． 乜嘢可以帮助你克服向人谈论信仰嘅障碍？
16 不过，有时就算准备充足，你可能都系唔敢向其他人谈论自己嘅信仰。一个18岁嘅姊妹喺13岁受浸，佢承认:“我知道自己相信乜嘢，但系有时好难将自己嘅谂法表达出嚟。”佢点样克服呢个障碍？佢话:“我试吓自然噉带入话题。啲同学经常讲佢哋做过嘅事，噉我都可以同佢哋分享我做过嘅事。所以我同同学倾计嘅时候，倾吓倾吓就加一句‘嗰日我教人圣经嘅时候……’，之后就继续讲落去。虽然倾计嗰阵嘅话题唔系主要讲圣经，不过其他人会好奇，我系点样教人圣经嘅，有时佢哋仲会问我问题。我越经常用呢个方法，就越容易同同学打开属灵话题。噉样做使我觉得好开心好满足！”
17． 你对自己信仰嘅睇法可以点样帮助你同人讲论真理？
17 如果其他人感受到你尊重同关心佢哋，好可能佢哋亦都会尊重你。17岁嘅奥莉维娅好细嘅时候就受咗浸，佢话:“我成日惊如果我一讲圣经，其他人就觉得我系宗教狂。”不过，之后佢改变咗自己嘅谂法。而家奥莉维娅唔再担心其他人点谂，佢解释话:“好多年轻人对耶和华见证人一无所知。我哋系佢哋唯一接触到嘅见证人，所以我哋嘅言行会影响佢哋对真理嘅反应。如果我哋好怕丑，唔敢同佢哋讲自己嘅信仰，又或者同人讲嘅时候畏首畏尾，佢哋就可能会觉得我哋对自己嘅身份缺乏自信，甚至唔尊重我哋。相反，如果我哋喺日常谈话当中，自然又有自信噉提到自己嘅信仰，佢哋或者会更加尊重我哋。”
完成使你哋得救嘅工作
18． 我哋点做先可以使自己得救？
18 我哋从以上嘅分析睇出，使自己得救包括阅读同沉思上帝嘅话语，向耶和华祷告，同埋谂吓耶和华点样喺生活上祝福你。噉样做可以使你同耶和华嘅关系更亲密，亦都会推动你同人谈论自己嘅信仰。（请读诗篇73:28）
19． 点解为得救所付出嘅努力都系值得嘅？
19 耶稣话:“边个想嚟跟从我，就应该承认唔再拥有自己，孭起自己嘅苦刑柱，不断跟随我。”（马太福音16:24）冇错，每个想跟从耶稣嘅人都要献身受浸。呢个将会系你精彩人生嘅开始，因为噉样做，而家就为你带嚟数之不尽嘅福分，将来仲会使你喺上帝嘅新世界得享永远嘅生命。所以，要竭尽全力使自己得救！
^ 11段 想得到更多建议，请睇jw.org网站嘅“青年人问——祷告对我有帮助吗？” 以及相关学习单。
