读者来函
已婚嘅基督徒系咪可以将宫内避孕器(又称子宫环、节育环、避孕环)视为一种唔会违反圣经原则,可以采用嘅避孕措施呢?
对于呢个问题,基督徒夫妇可以查考有关嘅资料同圣经原则,然后做决定。噉样佢哋就可以喺上帝面前保持无愧嘅良心。
耶和华吩咐第一对男女,同大洪水之后嘅八个人,话:“要繁衍增多”。(创世记1:28;9:1)圣经并冇话呢个命令适用于基督徒。所以,用边种方式避孕或者几时想怀孕,呢啲问题系由夫妇自己决定嘅。佢哋需要考虑边啲因素呢?
关于采用边一种节育方式,基督徒应该根据圣经原则做决定。基督徒绝对唔会采用堕胎呢种方式,因为堕胎同圣经所讲嘅尊重生命有冲突。基督徒唔会故意终止一个随住时间而孕育成人嘅生命。(出埃及记20:13;21:22,23;诗篇139:16;耶利米书1:5)噉使用子宫环又适唔适合呢?
《守望台》1979年12月1日刊31-32页分析过呢个问题。当时普遍使用嘅子宫环系用惰性塑料(一种唔容易发生化学反应嘅材料)做成嘅,放入子宫里面有避孕嘅效果。文章提到,专家喺当时仲未完全了解呢种子宫环点样发挥作用。好多专家话,放入子宫环之后,子宫会产生反应,阻止精子接触卵子。如果卵子冇受精,就唔会有生命产生。
但系,有啲证据表明卵子有时仲系会受精。新嘅受精卵可能会喺输卵管入面成长(宫外孕)或者进入子宫。如果受精卵进入子宫,子宫环就可以妨碍受精卵喺子宫内膜上着床,阻止正常嘅怀孕过程。终止一个成长紧嘅生命就等同堕胎。呢篇文章总结话:“如果真基督徒好想知道使用子宫环系咪适当,就应该认真考虑圣经里面关于尊重神圣生命嘅吩咐,同埋上述嘅资料。”(1979年嘅呢篇文章出版以来,科学同医学方面有乜嘢重大嘅发展呢?
两种新型嘅子宫环面世。1988年,一种带铜嘅子宫环喺美国开始普及。另外,2001年又推出咗一种释放荷尔蒙嘅子宫环。呢两种类型嘅子宫环系点样发挥作用嘅呢?
带铜嘅子宫环:正如上文所讲,子宫环似乎可以使精子好难穿越子宫接触卵子。除咗呢个功能之外,带铜嘅子宫环会释放出铜离子,睇嚟铜会对精子有害,系一种杀精剂。 * 另外,带铜嘅子宫环可能会使子宫内膜发生改变。
含荷尔蒙嘅子宫环:好多唔同种类嘅子宫环含有同避孕药类似嘅荷尔蒙。呢啲子宫环会喺子宫入面释放荷尔蒙。睇嚟,呢啲子宫环会抑制某啲女性嘅排卵。当然,冇排卵就唔会发生受精。除咗呢个作用之外,好多人相信子宫环含有嘅荷尔蒙会令子宫内膜变薄。 * 呢啲子宫环亦都会令宫颈粘液变得粘稠,噉样就可以阻碍精子从阴道进入子宫。呢啲避孕效果系喺普通子宫环嘅基础上附加嘅。
正如之前所讲,呢两种子宫环都会使子宫内膜发生改变。不过,如果发生排卵而且卵子受咗精嘅话,又点样呢?受精卵可能会进入子宫,但系就好难喺内膜着床。噉样怀孕喺最初阶段就会终止。不过,呢种着床唔成功嘅情况被认为系好罕见嘅,甚至连口服避孕药睇嚟都有机会发生噉嘅情况。
所以,冇人可以肯定噉讲,带铜或者含荷尔蒙嘅子宫环可以绝对阻止卵子受精。不过,科学证据表明,基于上文提及嘅多种避孕效果,使用呢啲子宫环后怀孕嘅机率极低。
基督徒夫妇喺考虑使用子宫环嗰时,可以同专业嘅医护人员讨论吓本地可以选择边种子宫环,同埋使用子宫环会对妻子有乜嘢影响。夫妇唔应该期待其他人甚至医生帮佢哋做决定。(罗马书14:12;加拉太书6:4,5)夫妇应该一齐商量,自己做决定,务求令上帝喜悦,可以喺佢面前保持清白嘅良心。(参考提摩太前书1:18,19;提摩太后书1:3)