人物生平
放弃一切跟从耶稣
“如果你出去传道，就唔好再返嚟。返嚟嘅话，我就打跛你只脚。”听到爸爸嘅恐吓，我决定离开屋企。呢次系我第一次放弃一切嚟跟从耶稣嘅经历。当时我只有16岁。
呢件事系点样发生嘅呢？等我嚟解释一下。我喺1929年7月29日出世，喺菲律宾布拉干省嘅一条村长大。当时经济萧条，所以我哋嘅生活都比较简朴。我细个嗰时，日本军队侵略菲律宾，引发咗战争。但系我哋条村因为比较偏僻，就冇直接受到影响。我哋冇收音机、电视机同报纸，所知嘅战争信息都系听翻嚟嘅。
喺八个兄弟姐妹当中，我排第二。我八岁嘅时候就同外公外婆一齐住。虽然我哋系天主教徒，不过外公对宗教嘅态度好开明，仲收集咗一啲朋友俾佢嘅宗教书刊。我记得佢俾我睇过他加禄语嘅《保护》、《平安》同《揭露》册子 *，仲有圣经。我好钟意睇圣经，特别系四福音。研读呢啲经文使我好想跟从耶稣嘅榜样。（约翰福音10:27）
学习跟从耶稣
日军对菲律宾嘅统治喺1945年结束。大约喺嗰个时候，父母叫我返屋企住。外公都叫我返去，所以我就返嘞。
冇几耐之后，到咗1945年12月，昂阿特镇嘅耶和华见证人嚟我哋条村传道。一个年长嘅见证人嚟到我哋屋企，用圣经向我哋解释“最后嘅日子”系点样嘅。（提摩太后书3:1-5）佢邀请我哋参加附近村庄嘅一个圣经讨论。我父母冇去，不过我有。当时大约有20人参加，其中一啲人问咗好多同圣经有关嘅问题。
我唔系好明白佢哋喺度讨论啲乜嘢，所以我谂住走喇。就喺呢个时候，佢哋开始唱王国诗歌。诗歌打动咗我，所以我决定留低。唱完诗歌同祷告之后，所有人都受到邀请参加下个星期日喺昂阿特举行嘅聚会。
我哋几个人行咗8公里（5英里）先去到聚会嘅地方。聚会喺克鲁斯弟兄屋企举行，当时有50人参加。令我印象深刻嘅系，连一啲小朋友都可以喺好深入嘅圣经课题上发表评论。一个年长嘅先驱弟兄叫达米安·桑托斯，佢之前做过市长。喺我参加咗几次聚会之后，佢邀请我去佢屋企过夜。我哋成晚都喺度讨论圣经。
喺嗰段时期，好多人好快就将学到嘅基本圣经知识实践出嚟。我哋参加咗几次聚会之后，一啲弟兄就问我哋:“你哋想唔想受浸？”我回答:“我想。”我知道我好想“为主人基督效劳”。（歌罗西书3:24）1946年2月15日，我同另一个圣经学生喺附近嘅一条河受浸。
我哋意识到，受咗浸嘅基督徒需要效法耶稣基督，经常传道。我爸爸唔钟意我噉样做，佢话:“你咁细个，传咩道呀。你以为喺条河度浸吓就可以成为传教士咩。”我向佢解释传讲王国好消息系上帝嘅旨意。（马太福音24:14）我仲话:“我需要履行对上帝嘅承诺。”就喺呢个时候，爸爸讲出开头嗰番恐吓嘅话，佢想阻止我去传道。呢次系我第一次为咗追求属灵目标而放弃一切。
克鲁斯一家邀请我同佢哋喺昂阿特一齐住。佢哋鼓励我仲有佢哋嘅细女萝拉参与先驱工作。1947年11月1日，我哋两个都开始做先驱。萝拉喺另一个镇服务，而我就继续留喺昂阿特支持嗰度嘅传道工作。
再一次放弃一切
喺我做先驱嘅第三年，嚟自分部嘅厄尔·斯图尔特弟兄喺昂阿特嘅广场向超过500人发表咗一个演讲。佢用英语发表呢个演讲，之后我就用他加禄语概述佢演讲嘅内容。我只系读咗七年书，但系我哋嘅老师经常讲英语。我英语水平得到提升嘅另一个原因系，他加禄语嘅圣经出版物唔系好多，所以我经常阅读英语嘅出版物。因为噉，我累积到足够嘅英语词汇，可以为斯图尔特弟兄同之后嘅一啲英语讲者做翻译。
我为斯图尔特弟兄翻译嘅嗰一日，佢同当地嘅会众提到，因为好多海外传道员（现称特派传道员）会去美国纽约参加1950年嘅“神治国嘅扩展”大会，所以分部想邀请一两个先驱弟兄去伯特利帮手。我系其中一个受邀请嘅弟兄。我再一次放弃一切，离开熟悉嘅环境。
1950年6月19日，我去到伯特利，开始新嘅委派。伯特利系一间好大嘅旧屋，周围都系大树，占地面积为1万平方米（2.5英亩）。大概有12个独身弟兄喺嗰度服务。每朝早，我喺厨房帮手。大约9点之后，就喺洗衣部熨衫。下昼嘅工作都系类似。海外传道员参加完大会返嚟之后，我继续留喺伯特利服务。后来，我负责包装准备寄出嘅杂志、处理杂志订阅单，同埋喺接待处工作。无论被委派做乜嘢工作，我都乐意去做。
离开菲律宾参加基列学校
1952年，我同另外六位嚟自菲律宾嘅弟兄受到邀请，去参加第20届基列学校。收到呢个邀请，我哋都非常兴奋。喺美国，我哋见到同体验到嘅嘢都好新奇。呢度同我哋条村真系好唔一样。
同其他同学喺基列
例如，我哋要学习使用从来都冇见过嘅餐具同电器。连天气都零舍唔同。有一朝，我行出去见到一个好靓嘅白色世界。呢个系我第一次见到雪景。之后，我发觉原来落雪系好冻嘅——非常之冻！
我喺基列受到非常好嘅训练，相比之下，要作出嘅调整根本唔算得系乜嘢。导师运用好有效嘅教导方式。我哋学识点样做有意义嘅研读同资料搜集。基列学校的确巩固咗我同耶和华嘅关系。
毕业之后，我临时被派去纽约市嘅布朗克斯做特别先驱。所以，我可以参加1953年7月喺嗰度举行嘅大会，名为“新世界社会”。大会之后，我收到委派返去菲律宾。
离开大城市嘅舒适生活
分部嘅弟兄同我讲:“从而家开始，你被委派去做分区监督。”呢个俾我一个新嘅机会实际跟从主人耶稣嘅脚踪。佢周游各城各村，帮助耶和华嘅绵羊。（彼得前书2:21）我负责探访嘅分区包括布拉干省、新埃西哈省、打拉省、三描礼士省，覆盖吕宋岛中部好大嘅地区。吕宋岛系菲律宾最大嘅海岛。为咗探访一啲市镇，我需要越过崎岖嘅马德雷山脉。冇任何公共交通工具可以去到呢啲地方，结果我要问啲货车司机，可唔可以坐喺佢哋装满木头嘅货车上面。好多时佢哋都俾我坐，不过呢个唔系最舒服嘅交通工具。
大部分会众都比较新而且人数比较少，所以啲弟兄都好感激我帮助佢哋更有效噉组织聚会同传道工作。
后来我被委派去探访整个比科尔区。呢个分区大多数都系由特别先驱开发嘅偏远小组组成。喺我探访期间住嘅嗰间屋，唯一嘅厕所就系喺地下挖嘅坑，喺中间放住两条木。我一踩上去，两条木就跌咗落去个坑度，跟住我都跌埋落去。我用咗好耐先洗翻干净个身，之后就去食早餐。
就喺嗰个委派期间，我谂起萝拉。萝拉一开始喺布拉干做先驱，而家喺杜马格特做特别先驱，于是我就去嗰度探佢。我哋书信来往咗一段时间，然后喺1956年结婚。结婚之后嘅第一个星期，我哋就去拉普拉普岛探访当地嘅一群会众。我哋要翻山越岭，行好多路，不过可以同萝拉一齐为偏远地区嘅弟兄姊妹服务，真系好开心！
再次返到伯特利服务
我哋一齐从事探访工作四年之后，被邀请去分部服务。从1960年开始我哋就一直喺伯特利工作。咁多年嚟，我同一啲负有重要职责嘅弟兄一齐工作，从佢哋身上我学到好多嘢。萝拉喺伯特利亦都有过唔同嘅工作委派。
一个宿务语翻译员翻译我喺大会发表嘅演讲
喺伯特利，我有幸见证到喺菲律宾有越来越多人事奉耶和华。我年轻单身入伯特利嘅时候，整个菲律宾嘅传道员人数只有1万左右，而家已经超过20万，当中几百个弟兄姊妹喺伯特利服务，支持传道工作。
随住工作不断扩展，伯特利嘅设施已经满足唔到当时嘅需要。所以中央长老团委派我哋去揾吓有冇一啲物业，可以兴建一个全新而且更大嘅分部。我同印刷厂嘅监督就喺分部附近逐家逐户去问，有冇人想卖地。冇人肯卖，有个屋主仲同我哋讲:“我哋中国人只会买地，唔会卖地。”
为艾伯特·史劳德弟兄嘅演讲传译
有一日，一个业主突然间问我哋想唔想买佢块地，因为佢要搬去美国。之后发生咗一连串难以置信嘅事件。另一个邻居亦都决定卖佢块地，仲鼓励埋佢嘅隔篱邻舍都卖地俾我哋。我哋甚至可以买埋嗰个话“中国人唔会卖地”嘅人嗰块地。喺好短嘅时间之内，分部面积增加到以前嘅三倍。我确信呢个结果系耶和华所成就嘅。
喺1950年嗰阵时，我系年纪最细嘅伯特利成员，而家我同太太系最老嘅。无论主人指示我去边度，我都乐意去，而且从来冇后悔过。虽然父母赶我出屋企，不过耶和华俾咗我一个基督徒大家庭。无论收到点样嘅委派，我都坚信耶和华一定会提供我哋需要嘅一切。我同萝拉都好感激耶和华俾我哋嘅仁爱照顾，我哋都鼓励其他人试试耶和华。（玛拉基书3:10）
有一次，耶稣邀请一个叫马太（又叫利未）嘅收税人，话:“嚟跟随我啦。”马太有乜嘢反应呢？“［佢］就放弃一切，起身跟随耶稣。”（路加福音5:27，28）好似马太噉，我都有机会跟从耶稣，亦都鼓励其他人噉样做，亲自体验耶和华所赐嘅福分。
好开心可以继续参与菲律宾嘅扩展工作
^ 6段 由耶和华见证人出版，现已绝版。
