人物生平
忍受逆境，得享美福
“你呢个做爸爸嘅真系残忍，”一个国安会嘅官员噉样闹我。 * “老婆大住个肚，个女又咁细，你居然揼低佢哋唔理。边个嚟照顾佢哋呀？放弃你嘅信仰返屋企啦！”我话:“我冇抛弃屋企人，系你捉我嚟嘅，我犯咗咩罪呀？”官员反驳话:“你犯咩罪都好过做见证人。”
呢番对话系1959年喺俄罗斯伊尔库茨克嘅监狱入面讲嘅。等我嚟同你哋讲吓，我同太太马丽亚系点样装备自己“为正义受苦”，同埋我哋保持忠贞得到乜嘢福分。（彼得前书3:13，14）
1933年，我喺乌克兰佐洛尼基嘅一条村出世。我阿姨同姨丈系见证人，1937年佢哋喺法国过嚟探我哋，留低咗两本由守望台书社出版嘅书，叫《政府》同《拯救》（英语）。爸爸睇咗呢啲书之后，重新恢复对上帝嘅信心。不过，喺1939年，佢病得好严重，去世之前佢同妈妈讲:“呢个就系真理。呢啲知识你要教识啲仔女呀。”
西伯利亚——新嘅传道地区
喺1951年4月，政府当局开始将见证人由苏联嘅西部放逐到西伯利亚。妈妈、我，仲有细佬格里戈雷，由乌克兰嘅西部流放到西伯利亚。坐咗6000公里（3700英里）火车之后，我哋去到西伯利亚嘅图伦市。两个星期之后，哥哥博登被送到附近嘅安加尔斯克市嘅劳动营。佢被判处25年嘅劳役。
妈妈、格里戈雷同我喺图伦市附近嘅民居传道，不过我哋要灵活变通先得。例如，我哋会问:“呢度有冇人想卖牛呀？”当我哋揾到想卖牛嘅人嗰阵，我哋会同佢讲，啲牛被设计得几咁奇妙。好快，我哋就会将话题转到造物主身上。嗰阵时，有份报纸报道话，见证人问人有冇牛卖，其实佢哋揾紧嘅系“绵羊”！冇错，我哋的确揾到好似绵羊噉嘅人！我哋喺呢个新嘅传道地区，同呢啲谦卑又好客嘅人学习圣经，真系好开心。今日，喺图伦市有一个会众，而呢个会众有超过100个传道员。
马丽亚嘅信心受到考验
喺二战期间，我嘅太太马丽亚喺乌克兰认识真理。马丽亚18岁嗰时，有个国安会官员开始骚扰佢，想强迫马丽亚同佢发生性关系，但系马丽亚坚决拒绝。有一日，马丽亚返到屋企，发现嗰个官员竟然瞓喺佢张床度。马丽亚即刻逃跑。嗰个官员好嬲，恐吓马丽亚话，要用佢系耶和华见证人呢个罪名拉佢去坐监。马丽亚喺1952年真系被判监10年。佢觉得自己好似约瑟，因为约瑟都系为咗紧守忠义而被囚嘅。（创世记39:12，20）押送马丽亚由法庭到监狱嘅司机同佢讲:“唔使惊。好多人坐完监出嚟，都冇失去佢哋嘅尊严。”呢番话强化咗马丽亚。
1952年到1956年，马丽亚被带到俄罗斯嘅高尔基市（今日叫下诺夫哥罗德）附近嘅劳动营服役。喺劳动营，佢哋要服嘅劳役系将树连根挖出嚟，就算天寒地冻都要噉做。佢嘅健康大受影响，好在喺1956年，佢被释放，之后去到图伦市。
远离我嘅太太同仔女
图伦市有个弟兄话俾我知，有个姊妹会嚟。我踩单车去巴士站接佢，帮佢拎行李。我一见到马丽亚就钟意咗佢。我付出一番努力想赢得佢嘅芳心，最后成功咗。我哋喺1957年结婚。一年后，我哋嘅女伊琳娜出世，但系我哋喺埋一齐嘅快乐时光好短暂。1959年，我因为印刷圣经书刊而被捕。有半年时间，我被单独囚禁。喺嗰段时期，为咗保持内心平静，我不断向上帝祷告，唱王国诗歌，同想象我重获自由之后可以点样传道。
1962年喺劳动营嘅生活
喺监狱，我接受审讯嘅时候，审讯员大声噉对我讲:“我哋好快会消灭晒你哋，就好似消灭啲老鼠噉！”我答佢话，“耶稣讲过，王国嘅好消息一定会传遍普天下，冇人阻止得到。”之后，审讯员改变手段，尝试说服我放弃信仰，就好似开头讲嘅噉。当威迫利诱都唔成功，我就被判去萨兰斯克市附近嘅劳动营做七年苦工。喺去劳动营途中，我知道二女奥尔加出咗世。虽然太太同两个女都离我好远，但系知道大家都忠于耶和华，我就好安慰。
1965年马丽亚同两个女，奥尔加同伊琳娜
马丽亚每年一次会从图伦坐火车到萨兰斯克嚟探我，来回足足要12日。每次佢都会带一对新靴俾我，仲会将近期嘅《守望台》收埋喺鞋踭嗰度。有一年，马丽亚带住两个年幼嘅女嚟探我，真系好难忘。你可以想象，当时我几咁感动！
新地区，新挑战
喺1966年，我喺劳动营放返出嚟之后，一家四口搬到黑海附近嘅阿尔马维尔市。我哋嘅仔雅罗斯拉夫同帕维尔都喺嗰度出世。
冇几耐，国安会嘅官员就开始经常搜查我哋间屋，睇吓有冇圣经书刊。佢哋搜匀晒所有地方，连牛嘅饲料都揾埋。有一次，啲官员仲搞到满头大汗，成身都系尘。马丽亚知道佢哋只系奉命行事，都好同情佢哋。马丽亚倒咗啲果汁俾佢哋饮，又攞咗个衣刷，一盆水，同埋啲毛巾俾佢哋用。后来，国安会嘅长官嚟到，啲官员话俾佢知佢哋受到好友善嘅对待。佢哋走嗰阵，国安会嘅长官带住微笑向我哋挥手。我哋好开心见到自己努力“以善胜恶”所带嚟嘅好结果。（罗马书12:21）
即使有咁多突击搜查，我哋仍然继续喺阿尔马维尔传道。我哋仲有机会强化库尔加宁斯克市镇附近一个小组嘅传道员。今日，喺阿尔马维尔有六群会众，喺库尔加宁斯克就有四群，我真系好开心见到呢啲发展。
咁多年来，我哋都遇到唔同嘅考验。我哋嘅属灵健康有时会变得软弱，不过好感谢耶和华任用一啲忠心嘅弟兄嚟纠正我哋，强化我哋嘅灵性。（诗篇130:3）另一个严重嘅考验系，国安会嘅间谍潜入会众同我哋一齐工作。佢哋扮到好热心，好积极噉传道，有啲甚至喺组织入面担负一啲职责。呢个带俾我哋好大嘅考验。不过最终，我哋都认清咗呢啲人嘅真面目。
1978年，马丽亚45岁嗰年再一次怀孕。由于佢有慢性心脏病，医生惊佢有生命危险，就想说服佢堕胎，不过马丽亚坚决噉拒绝咗。因为噉，有啲医生喺医院入面拎住支针到处跟住佢，想打针迫佢早产。为咗保护未出世嘅BB， 马丽亚就逃离医院。
国安会命令我哋离开呢个城市。我哋就搬去爱沙尼亚塔林市附近一个村庄。爱沙尼亚当时系苏联嘅一部分。马丽亚喺塔林市生咗细仔维塔利。佢哋母子都好健康，同医生预计嘅完全唔同。
后来，我哋由爱沙尼亚搬到俄罗斯南部嘅涅兹洛布纳亚。喺屋企附近嘅旅游胜地，我哋好谨慎噉向嚟自唔同地区嘅游客作见证。游客去嗰度都系为咗放松身心，不过有啲游客走嗰阵，就带埋永生嘅希望离开！
教导我哋嘅仔女爱耶和华
我哋努力教导仔女爱耶和华，帮助佢哋培养渴望事奉耶和华嘅心。我哋经常邀请一啲成熟嘅弟兄姊妹嚟屋企交往，鼓励我哋嘅仔女，我细佬格里戈雷就系其中一个常客。佢喺1970年到1995年受委任探访唔同嘅会众。我哋成家人都好钟意佢嘅探访，因为佢好乐观，又有幽默感。有客人嚟屋企嗰时，我哋通常会玩圣经游戏，所以啲仔女自细就好钟意圣经嘅历史记载。
我嘅仔同媳妇
由左至右，后排:雅罗斯拉夫，帕维尔，维塔利
前排:阿廖娜，拉娅，斯韦特兰娜
喺1987年，我哋个仔雅罗斯拉夫搬去拉脱维亚嘅里加市。喺嗰度佢可以更公开噉传道。不过，由于佢唔肯参军，结果被判坐监一年半，先后监禁喺九个唔同嘅监狱。我将自己喺监狱嘅经历话俾佢知，帮助佢喺监狱入面保持忍耐。后来，雅罗斯拉夫开始做先驱。1990年，我哋19岁嘅仔帕维尔话俾我哋知，佢想去日本以北嘅萨哈林岛（库页岛）做先驱。最初我哋唔想佢去，因为萨哈林岛当时只有20个传道员，而且距离我哋屋企有成9000公里（5500英里）咁远。不过最后我哋都同意佢去，呢个真系一个正确嘅决定。岛上嘅人都积极响应王国信息。几年之后，嗰度就有八个会众嘞。帕维尔一直喺萨哈林岛服务，直到1995年。嗰阵时，只系得细仔维塔利留喺我哋身边。佢自细好钟意睇圣经，14岁就开始做先驱。我有两年时间同佢一齐做先驱，嗰段时光真系好开心。维塔利19岁嗰年离开屋企做特别先驱。
谂翻1952年嗰时，有个国安会官员同马丽亚讲:“你一系就放弃信仰，一系就等住坐十年监。到你放监嗰阵，你肯定又老又孤独。”但系事实就完全相反。我哋感受到好多爱心，包括上帝嘅忠贞之爱同埋啲仔女嘅爱。我哋又有荣幸帮助好多人揾到真理，我哋都感受到佢哋嘅爱。我同马丽亚都好钟意去我哋仔女服务嘅地方探佢哋，睇见啲仔女帮助人认识耶和华，而呢啲人又表现感激之情，我哋都好开心。
感激耶和华嘅良善
1991年，耶和华见证人嘅活动得到法律认可，呢个增添咗弟兄姊妹嘅力量，使传道工作发展得更快。我哋会众甚至买咗部巴士，每个周末都去附近嘅乡村同市镇传道。
2011年我同马丽亚
我好开心，雅罗斯拉夫同佢太太阿廖娜，帕维尔同佢太太拉娅都喺伯特利服务，而维塔利同佢太太斯韦特兰娜，就做分区探访嘅工作。我哋嘅大女伊琳娜同佢嘅家人就住喺德国。伊琳娜嘅先生弗拉基米尔同佢哋三个仔都系长老。二女奥尔加就住喺爱沙尼亚，佢成日都打电话俾我㗎。令我伤心嘅系，我嘅挚爱马丽亚喺2014年去世。我真系好想佢快啲复活，见翻佢。我而家住喺别尔哥罗德市，呢度嘅弟兄俾我好多支持同帮助。
事奉耶和华嘅岁月使我明白到，保持忠义系有代价嘅，但系耶和华赐俾我哋嘅内心平安就系价值非凡嘅回报。我同马丽亚因为坚定不移所得到嘅福分远远超过我嘅想象。苏联喺1991年解体之前，只有4万个传道员。曾经系苏联成员国嘅国家，今日已经有超过40万个传道员！我而家83岁，继续以长老嘅身份为会众服务。耶和华嘅支持一直都使我有力量保持忍耐。冇错，耶和华真系大大赐福俾我。（诗篇13:5，6）
^ 4段 国安会系苏联国家安全委员会嘅简称。
