“你要勇敢……即管放胆去做”
“你要勇敢坚强，即管放胆去做，唔使怕，亦都唔使惊慌，因为耶和华上帝……与你同在”——历代志上28:20
唱诗60，29首
1，2． （甲）所罗门接受咗乜嘢重要嘅委派？（乙）点解大卫有啲担心所罗门唔能够胜任？
所罗门受委派，负责监督有史以来最重要嘅建筑工程。呢座建筑物要“宏伟辉煌，声誉要传遍各地”。更重要嘅系，呢座“系耶和华上帝嘅殿”。耶和华委派所罗门做呢项工程嘅监督。（历代志上22:1，5，9-11）
2 大卫王深信上帝会支持所罗门。不过，所罗门“仲年轻，冇经验”，呢个对佢嚟讲系咪一个障碍呢？佢有冇勇气去承担建造圣殿嘅责任呢？为咗成功完成呢个工程，所罗门需要鼓起勇气，放胆去做。
3． 所罗门从佢父亲身上学到乜嘢？
3 所罗门一定听过好多佢父亲大卫嘅英勇事迹。大卫年轻嘅时候，为咗保护羊群，要同野兽搏斗。（撒母耳记上17:34，35）佢面对能征善战嘅巨人歌利亚嗰阵，表现出惊人嘅勇气。冇错，喺上帝嘅帮助下，大卫只系用一粒石仔就击败咗对手。（撒母耳记上17:45，49，50）
4． 点解所罗门需要鼓起勇气？
4 由大卫嚟鼓励所罗门鼓起勇气建造圣殿，真系非常合适！（请读历代志上28:20）如果所罗门勇气不足，担心失败而冇采取行动，噉佢就完成唔到呢个委派。
5． 点解我哋需要有勇气？
5 好似所罗门噉，我哋都需要耶和华所赐嘅勇气，完成佢交俾我哋嘅任务。我哋可以回顾古代一啲勇敢嘅榜样。我哋都应该谂吓，可以点样放胆做好自己嘅工作。
勇敢嘅榜样
6． 约瑟点样表现勇气？
6 我哋嚟睇吓，面对波提乏妻子嘅引诱，约瑟所表现嘅勇气。佢肯定知道，如果拒绝波提乏嘅妻子，一定会有严重嘅后果。即使系噉，佢都冇妥协，反而勇敢采取行动。（创世记39:10，12）
7． 喇合点样表现勇气？（请睇吓课文开头嘅图片）
7 耶利哥城嘅喇合系另一个勇敢嘅榜样。当以色列人嘅探子去到佢屋企嗰阵，佢冇因为恐惧而赶佢哋走。因为对耶和华有信心，喇合帮助两个探子匿埋，仲帮佢哋安全脱险。（约书亚记2:4，5，9，12-16）喇合承认耶和华系真神，同时又确信耶和华会使以色列人得到应许之地。佢冇因为惧怕人，包括耶利哥王同埋王嘅手下，而冇采取行动。相反，佢毅然出手相助，最终拯救咗自己同家人。（约书亚记6:22，23）
8． 耶稣嘅勇气点样影响使徒？
8 耶稣嘅忠心使徒同样表现勇气，立下咗好好嘅榜样。佢哋亲眼睇到耶稣表现勇气。（马太福音8:28-32；约翰福音2:13-17；18:3-5）耶稣嘅榜样帮助佢哋变得更加勇敢。所以，喺遭受撒都该派反对嗰时，使徒冇停止奉耶稣嘅名传道。（使徒行传5:17，18，27-29）
9． 提摩太后书1:7帮助我哋明白，边个俾到我哋勇气？
9 约瑟、喇合、耶稣同使徒都表现出一种内在嘅力量，推动佢哋决心做啱嘅事。佢哋嘅勇敢唔系过度自信，而系基于对耶和华嘅信赖。我哋都会面对一啲需要表现勇气嘅情况。我哋唔会依靠自己，而系全心信赖耶和华。（请读提摩太后书1:7）等我哋嚟睇吓，点解我哋喺屋企同会众都需要表现勇气。
需要勇气嘅情况
10． 点解年轻嘅基督徒需要勇气？
10 喺好多情况下，年轻嘅基督徒事奉耶和华都需要表现勇气。佢哋可以学习同效法所罗门嘅榜样。为咗完成圣殿嘅建筑工程，所罗门表现勇气，喺各种问题上作出明智嘅决定。虽然年轻嘅基督徒可以向父母寻求指引，亦都应该噉样做，但系喺重要嘅问题上，佢哋要自己做决定。（箴言27:11）例如同乜嘢人交往，点样选择娱乐，点样保持道德洁净，同埋几时受浸等问题，年轻人都要勇敢作出明智嘅决定。呢种勇气可以帮助佢哋对抗讥刺上帝嘅撒但。
11，12． （甲）摩西点样喺表现勇气方面立下榜样？（乙）年轻人可以点样效法摩西？
11 年轻人必须做嘅一个重要决定就系，要立下点样嘅人生目标。喺某啲地方，年轻人受到压力要追求高等教育同高收入嘅工作。喺另一啲地方，当地嘅经济情况会令年轻人过度专注于为家人提供物质方面嘅帮助。如果你有类似嘅情况，请谂吓摩西嘅榜样。身为法老女儿嘅养子，摩西有条件去追求高官厚禄。佢嘅埃及家人、导师同谋士一定好想佢出人头地。可想而知，佢受到嘅压力一啲都唔少！不过摩西冇妥协，反而鼓起勇气支持正确嘅崇拜。佢放弃咗埃及嘅财富，全心信赖耶和华。（希伯来书11:24-26）摩西做咗明智嘅决定，所以耶和华大大赐福俾佢。喺未来，佢肯定会得到更多嘅福分。
12 同样，耶和华一定会祝福嗰啲将王国放喺生活首位，有勇气追求属灵目标嘅年轻人。耶和华会供应佢哋家人嘅需要。喺公元1世纪，年轻嘅提摩太可以专注于属灵嘅目标，今日你都一定做得到。 *（请读腓立比书2:19-22）
你有冇决心喺生活嘅所有方面表现勇气？（请睇第13-17段）
13． 勇气点样帮助一个年轻姊妹达到目标？
13 美国亚拉巴马州嘅一个姊妹需要培养勇气先可以达到佢嘅属灵目标。佢话:“我由细到大都好怕丑。连喺王国聚会所同人倾计都唔敢，更加唔使讲要敲门向人传道。”喺父母同弟兄姊妹嘅帮助之下，呢个年轻姊妹达到咗佢嘅目标，成为一个正规先驱。佢话:“撒但嘅世界推崇高等教育、名誉、金钱同埋物质财富，想人将追求呢啲嘢作为人生嘅目标。呢啲追求通常好难达到，往往仲带俾人好大嘅压力，令人痛苦失望。相反，事奉耶和华使我得到最大嘅喜乐同成就感。”
14． 基督徒父母喺边啲情况下需要勇气？
14 基督徒父母亦都需要勇气。例如，你通常会喺晚上或者周末做家庭崇拜、传道同聚会，但系你嘅老板可能经常要求你加班。拒绝呢啲要求系需要勇气嘅，但系噉样做，你就可以为仔女树立优良嘅榜样。又或者，喺你会众有啲父母允许佢哋嘅仔女做某啲你唔想自己仔女做嘅事。呢啲父母可能会问，你嘅仔女点解唔参加呢啲活动。你会唔会鼓起勇气，有技巧噉同佢哋解释呢？
15． 诗篇37:25同希伯来书13:5可以点样帮助父母？
15 如果你想帮助仔女立下而且达到属灵目标，就需要有勇气。例如，有啲父母可能冇积极鼓励仔女投身先驱工作，去需求更大嘅地区服务，加入伯特利工作，或者参与志愿建筑工程。呢啲父母可能担心，老咗之后仔女冇能力照顾佢哋。不过，明智嘅父母会表现勇气，全心信赖耶和华嘅应许。（请读诗篇37:25；希伯来书13:5）你亦都可以帮助仔女同样噉做。（撒母耳记上1:27，28；提摩太后书3:14，15）
16． 有啲父母点样帮助佢哋嘅仔女立下属灵目标？噉样做带嚟乜嘢益处？
16 美国嘅一对夫妇点样帮助仔女立下属灵目标呢？丈夫话:“喺我哋嘅仔女识行识讲之前，我哋就已经同佢哋分享做先驱同为会众服务嘅喜乐嘞。而家呢啲已经成为佢哋嘅目标。仔女立下而且实现属灵目标，可以帮助佢哋自己应付嚟自撒但制度嘅压力，全心事奉耶和华。”一个有两个细路嘅弟兄话:“好多父母喺运动、教育同兴趣活动等方面为仔女花费大量嘅精力同金钱。更明智嘅做法系，将精力同金钱用嚟帮助仔女同上帝培养亲密嘅关系。我哋唔单止睇到仔女达到属灵目标，仲有份参与其中，真系好有满足感。”我哋可以肯定，耶和华上帝一定会祝福嗰啲帮助仔女立下而且达到属灵目标嘅基督徒父母。
喺会众表现勇气
17． 喺表现勇气方面，会众里面边啲人系我哋嘅榜样？
17 喺会众里面都需要表现勇气。例如，长老要有勇气，先至可以处理严重嘅过犯，帮助面对紧急医疗事件嘅弟兄姊妹，同埋去监狱探访嗰啲对圣经有兴趣嘅囚犯。独身嘅姊妹又可以做啲乜嘢？佢哋而家有好多扩大服务嘅机会，例如，投身先驱工作，搬去需求更大嘅地区，参与本地设计及建筑安排，参加王国传福音者训练班，有啲仲受到邀请去基列学校。
18． 年长嘅姊妹可以点样表现勇气？
18 年长嘅姊妹对会众嚟讲系好宝贵嘅。我哋好爱呢啲姊妹！虽然佢哋而家为耶和华所做嘅冇以前咁多，但系依然能够表现勇气，继续为耶和华服务。（请读提多书2:3-5）如果长老请一位年长姊妹同一位年轻姊妹倾吓关于衣着得体嘅问题，呢位年长嘅姊妹就需要勇气。佢唔会批评年轻姊妹嘅衣着打扮，而系鼓励对方谂吓自己嘅选择会唔会影响其他人。（提摩太前书2:9，10）呢种仁慈嘅做法能够为会众带嚟积极嘅影响。
19． （甲）受咗浸嘅弟兄可以点样表现勇气？（乙）腓立比书2:13同4:13点样帮助弟兄培养勇气？
19 受咗浸嘅弟兄亦都应该勇敢为耶和华服务。愿意勇敢负起更多责任嘅弟兄，系会众嘅福分。（提摩太前书3:1）不过，有啲弟兄唔系好想追求更多职责。如果一个弟兄以前犯过错，佢可能会觉得自己冇资格成为助理仆人或者长老。又或者有啲弟兄觉得自己冇能力完成某个委派。如果你有一样嘅感觉，耶和华能够帮助你培养勇气。（请读腓立比书2:13；4:13）要记住，摩西都曾经觉得自己唔能够胜任耶和华俾佢嘅委派。（出埃及记3:11）但系，由于耶和华嘅帮助，摩西培养出勇气，成功完成佢嘅工作。如果弟兄经常向上帝恳切祷告，每日研读圣经，就可以得到上帝嘅帮助，培养出同样嘅勇气。佢都可以通过沉思圣经入面嘅勇敢榜样而得益。佢可以谦卑噉向长老提出，自己希望得到训练，亦都愿意接受会众嘅任何工作。我哋鼓励所有弟兄，鼓起勇气，努力为会众服务！
“耶和华……与你同在”
20，21． （甲）大卫向所罗门保证乜嘢？（乙）我哋可以确信乜嘢？
20 大卫王提醒所罗门，建造圣殿嘅成个过程，耶和华都会与佢同在。（历代志上28:20）所罗门紧记父亲所讲嘅话，冇因为自己年轻又冇经验而畏缩。佢表现出好大嘅勇气，放胆去做，喺耶和华嘅帮助下，用咗七年半嘅时间成功建造好呢座宏伟嘅圣殿。
21 喺我哋嘅家庭生活同会众事务上，耶和华会帮助我哋勇敢完成我哋嘅工作，就好似佢为所罗门做嘅一样。（以赛亚书41:10，13）如果我哋喺崇拜耶和华方面表现勇气，就可以确信，无论而家定系将来，耶和华都会祝福我哋。所以，“你要勇敢……即管放胆去做”。
^ 12段 如果你想立下属灵目标，可以喺《守望台》2004年7月15日刊“确立属灵目标以荣耀创造主”呢篇文章揾到一啲实用嘅建议。
